Septiembre

Ante quibané Abrahán Isaac lu dani que, gudxi cani runi xhiiñaʼ: «Laguiaana raríʼ né burru riʼ, peru naa ne hombrehuiiniʼ riʼ chuudu rariʼcaʼ para guni adorardu, ne guibiguétadu ra nuutu» (Gén. 22:5). Xiñee gudxi Abrahán ca mozo que laaca zabiguetaʼ Isaac yaʼ. Ñee bisiguiibe laacaʼ la? Coʼ. Biblia ná napa Abrahán stale confianza zanda guindisaʼ Jiobá Isaac de lade gueʼtuʼ (Heb. 11:19). Laabe nánnabe biʼniʼ Jiobá ti milagru para gunda gupanebe Sara ti xiiñicabe neca maʼ bióʼxhocabe (Heb. 11:11, 12, 18). Nánnabe zanda guni Dios guiráʼ cosa. Dxandíʼ, qué gánnadibe xi chiguizaaca dxi que. Peru nápabe fe zanda gusibani Jiobá Isaac pa gatiʼ ti gaca cumplir ca promesa stiʼ Dios. Nga runi ná Biblia Abrahán nga «bixhoze irá xixé cani guni cre Dios», o cani napa fe (Rom. 4:11). w16.02 1:3, 13

Nuu Jonatán ne ca israelita lu ti guendanagana. Xiñee yaʼ. Purtiʼ maʼ qué ruzuubaʼ Saúl diidxaʼ, ngue runi maʼ guníʼ Jiobá zadxiña dxi zusaana de gaca hombre riʼ rey stiʼ Israel (1 Sam. 15:17-23). Peru bidiiruʼ Jiobá lugar gaca Saúl rey pur stale iza. Yanna, cumu zúbaruʼ Saúl «lu trono stiʼ Jiobá» ne cayuni stale cosa malu la? cayaca nagana para ca israelita guzuubacaʼ stiidxaʼ Jiobá (1 Crón. 29:23). Qué ñuu dxi nixeleʼ Jonatán de Jiobá (1 Sam. 13:13, 14). Laanu laaca qué rixélenu de Jiobá, ora ruzúʼbanu stiidxaʼ ca gobiernu «runi mandar ndaani» xquídxinu biaʼ ra naquiiñeʼ gúninu ni. Rudii Jiobá lugar guni mandar ca gobiernu laanu ne ribézabe guni respetarnu laacaʼ (Rom. 13:1, 2). Nga runi, naquiiñeʼ guni respetarnu guiráʼ binni runi xhiiñaʼ gobiernu, ne zúninu ni neca gánnanu nuu tuuxa qué runi jneza ne ruluíʼ cadi naquiiñeʼ guzúʼbanu stiidxaʼ. Laaca ribeza Jiobá guni respetarnu guiráʼ binni maʼ bisaanabe para guni mandar ra lídxinu ne ndaaniʼ congregación. Ndiʼ nga sti modo rusihuínninu qué rixélenu de Jiobá (1 Cor. 11:3; Heb. 13:17). w16.02 3:5, 6, 8

Biblia ná zuni guiráʼ xpinni Dios ni nabe «né stale gana», dede né cani nahuiiniʼ. Nga runi, pa caníʼ íqueluʼ chuʼnísaluʼ, naquiiñeʼ ganna chaahuiluʼ lii nga racalaʼdxuʼ guʼnuʼ ni. Nabé risaca ndiʼ, jmaruʼ si pa biniisiluʼ ndaaniʼ ti familia ni naca testigu stiʼ Jiobá. Laga ziniisiluʼ, nánnadu maʼ biiyaluʼ guyuunisa stale binni. Zándaca maʼ guyuunisa caadxi xhamíguluʼ, ca bíʼchiluʼ o ca bizáʼnaluʼ. Peru guyuu cuidadu. Cadi guiníʼ íqueluʼ naquiiñeʼ chuʼnísaluʼ purtiʼ si maʼ napuʼ iza para laani o purtiʼ si cayuuyaluʼ cayuunisa xcaadxi. Xi zacané lii gúʼyaluʼ guendariuunisa casi ruuyaʼ Jiobá ni yaʼ. Gulee tiempu para guiníʼ íqueluʼ xiñee nabé risaca chúʼnisa binni. w16.03 1:11, 12

Ximodo para ganda gusíʼdinu ni dxandíʼ zeeda lu Biblia guiráʼ tu racalaʼdxiʼ guiziidiʼ de laani yaʼ. Naquiiñeʼ chuʼnu tobi si ne gacanésaanu ra congregación stinu (Efes. 4:16). Para ganda chinenu mensaje riʼ ra nuu stale binni la? naquiiñeʼ gataʼ chaahuinu modo gaca dxiiñaʼ riʼ. Ni zanda gacané laanu nga cani rizíʼdinu ra ridagulisaanu ne cani rusiidicabe laanu ante chiguni predicarnu. Racané cani bizéʼtenu riʼ laanu para ganda guni predicarnu stiidxaʼ Reinu lu guidubi Guidxilayú ne para gusaananenu binni ca publicación ni rusiidiʼ de Biblia. Ne laaca nuu biaje rinábacabe laanu chuunu lu ca campaña ni raca. Ora rúninu dxiiñaʼ riʼ, cayúninu dxiiñaʼ juntu né millón de hermanu stinu ni canazané mensaje riʼ lu guidubi Guidxilayú. Ne laaca runinenu ca ángel dxiiñaʼ, purtiʼ racanécabe laanu guni predicarnu (Apoc. 14:6). w16.03 3:4, 5

Lu guidxilayú cubi ca, zudii Jiobá laanu «caadxi libru», o caadxi rollo, ra zeeda xcaadxi cosa nacubi ni naquiiñeʼ gúninu. Ora guidúʼndanu ca rollo nacubi riʼ, zánnanu xi racalaʼdxiʼ Dios gúninu. Cani guiasa de lade gueʼtuʼ laaca zaziidicaʼ ni zeeda lu ca rollo riʼ. Guiranu ziene chaahuinu modo riníʼ ique Jiobá. Ne cumu jma ziénenu Biblia la? jma zannaxhiisaanu, zápanu respetu ne zusisácanu xcaadxi (Is. 26:9). ¡Bixuiʼlú xi guiráʼ zazíʼdinu ne xi guiráʼ zusíʼdinu binni ndaaniʼ Paraísu ca ora maʼ guni mandar Jesucristo, Rey stinu! Pa gúninu guiráʼ ni gueeda lu ca «libru» cubi ca ne guzúʼbanu stiidxaʼ Dios ora tiidinu últimu prueba la? zucaa Jiobá lá cada tobi de laanu lu «libru de enda nabani». Nga runi, zanda guicaanu guendanabani ni qué zaluxe. w16.03 4:19, 20

Stale hermanu ni maʼ xadxí de naca ancianu nacaʼ nabé risaca guzulú gusiidicaʼ ca hombrehuiiniʼ laga nahuiinicaʼ. Zanda guicaacabe xiixa dxiiñaʼ ni zanda gúnicabe ra ridagulisaacabe. Xiñee galán nga gusiidiʼ ti ancianu ca hombrehuiiniʼ riʼ yaʼ. Purtiʼ zanda gacané nga laacabe ugaandacabe meta stícabe ora maʼ guiniisicabe ante chuʼ xiixa ni uquiinde laacabe (Sal. 71:17). Para cuʼ ti ancianu gana ti hermanu guni jma lu xhiiñaʼ Dios, cadi naquiiñeʼ si gábibe laa xi guni, sínuque naquiiñeʼ gusiénebe laa xiñee risaca guni ni. Ne sicaríʼ nga biʼniʼ Jesús para bisiidiʼ xcaadxi binni. Biʼniʼ mandarbe ca apóstol stibe guni predicarcaʼ. Peru primé gúdxibe laacaʼ xiñee naquiiñeʼ guzuubacaʼ diidxaʼ. Gúdxibe laacaʼ: «Irá xixé ni nuu ibáʼ ne ni nuu guidxilayú ma nexhe ladxi nayaʼ. Nga runi, laché ne lachigusiidiʼ binni de guiráʼ guidxi sananda naa» (Mat. 28:18, 19). w15 15/4 2:5, 6

Ca xpinni Cristo de Roma ni bibani lu primé siglu nabé nagana modo bibánicaʼ. Guladxi ca romanu que laacabe. Guníʼ binni nanalaʼdxiʼ ca cristianu que binni ne bigaanicabe donda laacaʼ pur gucuá gui guidxi que. Ca dxi que nga biseguyoo ca romanu apóstol Pablo. Zándaca guníʼ íquebe pa zacané xcaadxi xpinni Cristo laabe. Xiñee yaʼ. Purtiʼ ti biaje gúpabe ti guendanagana nabé nadipaʼ ne guirutiʼ qué ñacané laabe. Peru Pablo guníʼ gucané Jiobá laa ra biquiiñeʼ Jesús para gudii stipa laa (2 Tim. 4:16). Nanna Pablo zudii Jiobá stipa laa para guni huantar guendanagana que ne intiica guendanagana ni gapa despué. Nga runi guniʼbe zulá Señor laabe de intiica guendanagana ni gápabe (2 Tim. 4:18). Nanna Pablo ti cosa: neca qué gacané ca hermanu laabe, Jiobá ne Jesús qué zusaana de gacanecaʼ laabe. w15 15/4 4:1-3

Dxi gule Jesús la? nanna Binidxabaʼ zeedabe de familia stiʼ Abrahán ne despué zácabe Mesías. Ñee guníʼ ique Binidxabaʼ malu nga guuti ti baʼduhuiiniʼ la? Coʼ. Qué rulábibe pa cayúnibe ni jneza o ni cadi jneza. Nagueendaca biyúbibe modo guutibe Jesús. Xi bíʼnibe yaʼ. Ora gunna rey Herodes maʼ gule «rey sti ca judíu», guizáʼ bidxiichi ne biyubi guuti laabe (Mat. 2:1-3, 13). Ne pur nga biʼniʼ mandarbe gatiʼ guiráʼ baʼduhuiiniʼ de chupa iza o menu de guidxi Belén ne ca guidxihuiiniʼ ni nuu gaxha de laani (Mat. 2:13-18). Bilá Jesús dxi biiticabe guiráʼ baʼduhuiiniʼ que. Peru xi rusiidiʼ ndiʼ laanu de Binidxabaʼ yaʼ. Qué lica risaca xquendanabani binni para laabe, ne nin xquendanabani ca baʼduhuiiniʼ. Rihuinni dxichi zeeda gaca Binidxabaʼ casi ti lión ni canaguu beedxeʼ (1 Ped. 5:8). Qué chuʼ dxi guiaandaʼ laanu nabé malu laabe. w15 15/5 1:10, 12, 13

Laanu randa ruxuíʼlunu cosa ni qué huadúʼyanu. Ne nabé galán biʼniʼ Jiobá ra bisigaʼdeʼ laanu capacidad sicarú riʼ. Xiñee yaʼ. Purtiʼ pur laani zanda guiníʼ íquenu ca cosa sicarú ni cabézanu. Ne laaca zanda gúninu plan ne guicaanu decisión galán. Lu Biblia cayabi Jiobá laanu zudii stale cosa galán laanu despué. Dxandíʼ, caʼruʼ diʼ guidúʼyanu cani. Peru zanda guiníʼ íquenu cani ne gápanu fe dxandíʼ zaca cani (2 Cor. 4:18). Guzéʼtenu ejemplu stiʼ jñaa profeta Samuel. Gudxi gunaa riʼ Jiobá ziné xiiñiʼ para guni dxiiñaʼ de sacerdote. Guníʼ ique gunaa riʼ xi zazaaca dxi ca. Maca gudixhe íquebe gúnibe ni, ngue runi qué niníʼ íquebe xiixa ni qué zaca. Ora bixuíʼlube dxi que bidii ni stipa laabe para gúnibe ni maca guniʼbe (1 Sam. 1:22). Zacaca nga laanu, naquiiñeʼ guiníʼ íquenu lu ca cosa ni maʼ guníʼ Jiobá chiguni, purtiʼ nanna dxíchinu dxandíʼ zúnibe cani (2 Ped. 1:19-21). Stale xpinni Dios de dxiqué bixuíʼlucaʼ ximodo guni Dios guiráʼ ni maʼ guníʼ. w15 15/5 3:1-3

Biblia laaca cayabi laanu naquiiñeʼ guiníʼ íquenu ni racalaʼdxiʼ Jiobá gúninu ne cadi guiníʼ íquenu gápanu stale bidxichi. Jesús guníʼ: pa guni ti hombre stipa pur gapa stale bidxichi ne maʼ qué guni ni ná Jiobá primé la? naca ti hombre nahuati. Neca ricu laa, «qué gapa gasti ni risaca nezalú Dios» (Luc. 12:16-21). Risaca gúninu stipa pur gúninu ni riuulaʼdxiʼ Dios, purtiʼ zeeda gaca ni casi ora niguu chaahuinu «ni risaca ibáʼ» (Mat. 6:20). Ne zacá ziuʼnu jma nayecheʼ ne zusiéchenu Jiobá (Prov. 27:11). Jma risaca gaca xhamígunu Dios que guiráʼ bidxichi nuu lu Guidxilayú riʼ. Pa gacaláʼdxinu gácanu ricu lu guidxilayú riʼ, zápanu jma guendanagana (Mat. 6:19). Jesús bisiidiʼ nabé nagana zaca para laanu gúninu ni ná Jiobá primé lu xquendanabáninu pa qué gusaana de guiníʼ íquenu gápanu bidxichi (Mat. 13:18, 19, 22). w15 15/5 4:15, 16

Pur poder ni bidii Dios Jesús, biʼniʼ stale milagru ni nabé bidxagayaa binni. Bisiándabe binni napa lepra ne binni ni napa sti clase guendahuará. Ca dxi riʼ, nuu biaje riquiiñeʼ ca doctor ca gudii binni xiixa órganu stiʼ para cúʼcabe ni lu cuerpu stiʼ sti binni para guianda. Peru Jesús qué ñuni zacá. Laabe gunda bisiándabe intiica órganu stiʼ binni nagueendaca. Dede gunda bisiándabe binni neca nuu zitu (Juan 4:46-54). Xi rusiidiʼ ca ndiʼ laanu yaʼ. Rizíʼdinu zanda cuee Jesús guiráʼ clase guendahuará ne racaláʼdxibe gúnibe ni. Ora guidúʼyanu modo runi tratar Jesús binni, rucaa ni laanu chuʼnu seguru «ziabe cani caquiiñeʼ gacanécabe laacaʼ ne ca binni pobre» (Sal. 72:13). Nánnanu dxandipeʼ racaláʼdxibe gusiándabe guiráʼ cani huará. w15 15/6 2:6

Stale binni nanna oración de padrenuestro. Laanu, ca testigu stiʼ Jiobá, nabé rusíʼdinu binni de oración riʼ ora runi predicarnu. Riquiiñenu ca diidxaʼ «biseendaʼ reinu stiluʼ» para gusíʼdinu binni Reinu ca nga gobiernu stiʼ Dios ne maʼ cadi candaa zuni ni Guidxilayú riʼ ti paraísu. Laaca riquiiñenu ca diidxaʼ «guisácapeʼ laluʼ» para gusihuínninu napa Dios lá ne naquiiñeʼ guni respetarnu ni purtiʼ «nayá ni» (Mat. 6:9, nota, TNM). Stale binni riníʼ de memoria oración de padrenuestro ora runi orar Dios. Peru, ñee zacá nga gucalaʼdxiʼ Jesús ñúninu la? Coʼ. Laabe guniʼbe: «Ora ma caníʼ né tu [Dios] la? cadi utale tu diidxa [o “cadi guiniʼtu ngueca ca ngueca”]» (Mat. 6:7, TNM). Ti dxi bisiidiʼ Jesús ca discípulo stiʼ guni orarcaʼ ne bizeetebe oración de padrenuestro, peru bíʼnibe ni né gadxé gadxé diidxaʼ (Luc. 11:1-4). Ndiʼ rusihuinni bisiidiʼ Jesús oración riʼ para gánnanu xii nga ca cosa ni naquiiñeʼ guinábanu ora guni orarnu. w15 15/6 4:1, 2

Riquiiñeʼ Jiobá espíritu santu stiʼ para gacané laanu gucáʼnanu ca trampa stiʼ Binidxabaʼ. Laaca riquiiñebe Biblia ne congregación stibe para quixhenabe laanu de ca trampa stiʼ Binidxabaʼ. Rábibe laanu cadi iquiiñenu stipa stinu, tiempu ne bueltu stinu lu ca cosa ni qué zaquiiñenu. Espen ne Janne nga ti guendaxheelaʼ ni guca precursor, peru yanna maʼ cusiniisicabe chupa xiiñicabe. Espen guníʼ: «Yanna ra maʼ qué randa rúnidu jma lu xhiiñaʼ Jiobá, gatigá rinábadu laabe gacanebe laadu para cadi guiábadu lu ca trampa stiʼ Binidxabaʼ. Rinábadu laabe gacanebe laadu chuʼdu jma gaxha de laabe ne cadi gusaana de guni predicardu né stale gana». Sti trampa ni naquiiñeʼ gucáʼnanu nga pornografía. Nuu tu ruuyaʼ pornografía purtiʼ qué rusaana de guiníʼ ique cosa malu. Peru stale de ca hermanu stinu maʼ bicaanacaʼ trampa riʼ. Nga runi laaca zanda gucáʼnanu ni (1 Cor. 10:13). w15 15/6 5:15, 16

Naquiiñeʼ gusihuínninu pa dxandíʼ nadxiinu Jiobá ora maʼ guinitilú religión falsa. Jma stale binni nga ni zuyubi guiaapa «lade ca guie sti dani», o ca organización stiʼ guidxilayú riʼ. Peru laanu zuyúbinu gapa Jiobá laanu. Ñee naquiiñeʼ cuézanu málasi gaca stale binni xpinni Jiobá la? Coʼ. Ndaaniʼ guidxi Jerusalén, dxi zeʼ ca soldadu que, stale judíu qué ñácacaʼ xpinni Cristo. Cani maca naca xpinni Cristo que nga bizuubaʼ stiidxaʼ Jesús ne bireecaʼ de ndaaniʼ guidxi que. Ngaca nga ni zazaaca ora gusaana de gucaalúcabe guiráʼ ca religión, stale binni qué zuyubi religión ni rusiidiʼ ni dxandíʼ. Peru laanu, ca xpinni Jiobá, naquiiñeʼ gusihuínninu nadxiinu laabe ne cayacanenu cani bibí né espíritu santu (Mat. 25:34-40). w15 15/7 2:7

Ca xpinni Jiobá ni nuu lu guidubi Guidxilayú nuucaʼ tobi si. Nga runi qué chuʼ dxi guiníʼ íquenu jma risaca ti lugar o ti guidxi jma que stobi. Zándaca bisiidiʼ ca binnilídxinu o ca binni ni nabeza gaxha de laanu gannaxhiinu xquídxinu. Ne zándaca nuu biaje guni sentirnu qué risaca binni de sti guidxi, sti cultura, sti diidxaʼ o sti raza. Xi zanda gacané lii para guchaaluʼ pa runi sentirluʼ zacá yaʼ. Guníʼ ique ximodo ruuyaʼ Jiobá ca binni ni runi sentir jma galán xquidxi ne riníʼ ique jma risácacaʼ que xcaadxi. Biyubi ni cusiene tema riʼ ne gunabaʼ Jiobá gacané lii gúʼyaluʼ xcaadxi binni casi modo ruuyabe laacaʼ (Rom. 12:2). Cumu ruzúʼbanu stiidxaʼ Jiobá la? stale biaje, ca vecinu stinu, binnilídxinu, cani runinenu dxiiñaʼ o cani rinenu scuela, rudiicaʼ cuenta maʼ gadxé laanu. w15 15/7 3:14, 15

Jiobá rucaadiaga laanu ne riene laanu neca guirútiruʼ tu guni ni. Sti modo rusihuínnibe guizáʼ nadxiibe laanu nga ora ricábibe ca oración stinu. Ca oración ni ridúʼndanu lu Biblia zanda gusiidiʼ cani laanu stale cosa. Nga runi, galán gúninu pa guidúʼndanu cani gatigá ora rápanu adoración en familia. Zanda guidúʼndanu de oración ni biʼniʼ Jonás dxi nuu ndaaniʼ benda ngola que (Jon. 1:17–2:10). Laaca zanda guidúʼndanu oración ni biʼniʼ Salomón ora biluxe yuʼduʼ que (1 Rey. 8:22-53). Ne laaca zanda guiníʼ íquenu oración ni bisiidiʼ Jesús (Mat. 6:9-13). Pa cueenu tiempu para guiníʼ íquenu lu ca oración ni maʼ bizéʼtenu riʼ, zazíʼdinu guni orarnu jma jneza. Ne cadi guiaandaʼ laanu risaca nga guni orarnu gatigá. Pa gúninu zacá, «zaguixhe dxí [Dios] ladxidóʼ [no]» ne xquendabiaaninu (Filip. 4:6, 7). w15 15/8 1:11, 12

Pa racaláʼdxinu chuʼnu listu para guibáninu ndaaniʼ Paraísu, dede nagasi naquiiñeʼ gúninu cani guiníʼ xquidxi Jiobá. Xiñee yaʼ. Purtiʼ ndaaniʼ Paraísu ca zábicabe laanu gúninu Guidxilayú riʼ ti jardín sicarú ne gacanenu ca binni ni guiasa lade gueʼtuʼ guiziidicaʼ de Jiobá. Ziuu stale dxiiñaʼ gúninu dxi ca. Nga runi naquiiñeʼ guinabadiidxanu laca laanu: «Pa guinabaʼ xquidxi Jiobá naa guneʼ xiixa ni qué riuuladxeʼ, ñee zuzuubaʼ diidxaʼ ne zuneʼ xhiiñaʼ né stale gana la?». Para ganda guibáninu ndaaniʼ Paraísu, naquiiñeʼ guizíʼdinu chuʼnu nayecheʼ né ni gábicabe laanu gúninu ne gacanenu sti binni. Casi ora gabi xquidxi Jiobá laanu gúninu ti dxiiñaʼ sti lugar, ñee rúninu stipa pur gúninu ni ne chuʼnu nayecheʼ la? Pa guiaʼnu gacanenu xquidxi Jiobá yanna, qué zaca nagana para laanu gúninu ni ndaaniʼ Paraísu. w15 15/8 3:6, 7

Pa bizaaca ndiʼ né Salomón ti hombre nuu xpiaaniʼ la? laaca zanda guizaacanu zacá. Nga runi cadi lica naquiiñeʼ guiníʼ íquenu guichagananu tuuxa ni cadi nadxii Jiobá (1 Rey. 11:1-6). Yanna, pa gueeda gaca tuuxa Testigu peru xheelabe qué runi ni ná Jiobá yaʼ. Biblia rabi ca gunaa ni maʼ bichaganáʼ: «Hermana caʼ, lauzuuba stiidxa xheela tu, purti pa nuu de laaca qué runi cre stiidxa Cristu la? zándaca iguudxi» (1 Ped. 3:1). Xi riníʼ ca diidxaʼ riʼ yaʼ. Pa guni gunaa riʼ stipa pur gaca nachaʼhuiʼ né xheelaʼ ne chinanda ca conseju stiʼ Biblia la? zándaca guʼyaʼ xheelabe zeʼ dxi jma nacháʼhuibe ne quixhe ique gaca testigu stiʼ Jiobá. Maʼ huadúʼyanu nga lu stale guendaxheelaʼ. Ca hermanu ni maʼ bichaganáʼ ti gunaa ni cadi naca Testigu laaca naquiiñeʼ chinándacaʼ conseju ni zeeda lu 1 Pedro 3:1. w15 15/8 4:15, 16

Ca dxi stinu riʼ nuu stale guendahuará ni qué gapa remediu. Peru nuu binni zándaca guiníʼ runibiáʼ xiixa tratamientu ni zanda gusianda xiixa guendahuará. Naquiiñeʼ gápanu cuidadu. Apóstol Pablo guníʼ naquiiñeʼ gaca ca xpinni Cristo binni riuu razón (Filip. 4:5). Pa chinándanu conseju riʼ, qué zacapeʼ íquenu guendahuará stinu. Qué racaláʼdxinu gácanu binni ni riníʼ ique puru para laa si (Filip. 2:4). Nánnanu qué zusaana de gaca huaranu laga nácanu binni ruchee. Nga runi naquiiñeʼ ganna dxíchinu ndiʼ: ni jma risaca lu xquendanabáninu nga gúninu ni ná Jiobá (Filip. 1:10). O zándaca laanu nga naquiiñeʼ gusiidiʼ chaahuinu conciencia stinu. Cada tobi de laanu naquiiñeʼ guicaa decisión stiʼ ne chuʼnu conforme ne intiica guizaaca. w15 15/9 2:8, 10

Jiobá nga «Dios ni dxandíʼ» (Sal. 31:5). Rusiidibe laanu ni dxandíʼ de laabe ne rábibe laanu ximodo guni adorarnu laabe. Ne laaca rusiidibe laanu ximodo nga jma galán guibáninu. Guidúʼyanu xii nga cani maʼ bisiidiʼ Jiobá laanu ra rusihuinni guizáʼ nadxii laanu. Primé, rusiidiʼ Jiobá laanu caadxi cosa nabé risaca de laa purtiʼ racalaʼdxiʼ gunibiaʼnu laa (Sant. 4:8). Nga runi, rusiidibe laanu tu labe o nombre stibe. Jma stale biaje rieeteʼ labe lu Biblia que sti lá. Laaca rusiidiʼ Jiobá laanu ximodo nga laa. Casi pa guidúʼyanu ca cosa ni maʼ bizaʼbe, zudiʼnu cuenta nuu xpiaanibe ne nápabe stale poder (Rom. 1:20). Ne ora ridúʼndanu Biblia, ridúʼyanu rúnibe ni jneza ne nadxiibe laanu. Ora jma gunibiaʼnu Jiobá, jma ziuʼnu gaxha de laa. w15 15/9 4:8, 9

Ca dxi stinu riʼ, stale binni riníʼ ique qué rizaalaʼdxiʼ Dios cani rúninu ne cani rizaacanu. Guzéʼtenu ti ejemplu. Lu beeu noviembre iza 2013, binitilú ti supertifón stale de ca isla stiʼ Filipinas. Gudiʼdiʼ si tifón que, guníʼ alcalde stiʼ tobi de ca guidxi que zándaca qué ñacané Dios laacaʼ purtiʼ cayuni sti cosa. Xcaadxi binni riníʼ ique qué ruuyaʼ Dios guiráʼ ni rúnicaʼ (Is. 26:10, 11; 3 Juan 11). Apóstol Pablo bizeeteʼ de caadxi binni ni qué nizaalaʼdxiʼ pa nuu Dios tiempu bibani. Gúcacabe binni malu, qué ñúnicabe ni jneza ne biyúbicabe puru si para laacabe (Rom. 1:28, 29). Peru laanu nánnanu ruuyaʼ Jiobá guiráʼ ni rúninu, rizaaláʼdxibe ne racanebe laanu. w15 15/10 1:1-3

Rusihuínninu nápanu fe ora runi predicarnu. Xiñee yaʼ. Purtiʼ zacá rusihuínninu runi crenu maʼ gaxha zeeda fin ne «qué zandaa ni» (Hab. 2:3). Pa racaláʼdxinu gánnanu pa naguidxi fe stinu la? naquiiñeʼ guinabadiidxanu laca laanu: «Ñee dxandíʼ risaca para naa guneʼ predicar la? Ñee cayuneʼ biaʼ gándatiʼ para güeniáʼ guiráʼ binni de Dios la? Ñee ruyubeʼ modo para guneʼ predicar jma la?» (2 Cor. 13:5). Pa gúninu stipa pur guni predicarnu la? zusihuínninu naguidxi fe stinu (Rom. 10:10). Sti modo rusihuínninu nápanu fe nga ora runi huantarnu ca guendanagana ridxaagalunu. Pa huaranu, pa careʼnu gana, pa nápanu depresión, pa pobre laanu o pa cadídinu xcaadxi problema la? naquiiñeʼ guni crenu zacané Jiobá ne Jesús laanu «ora caquiʼñe nu tu acané laanu» (Heb. 4:16). Pa guinábanu Jiobá gacané laanu la? zusihuínninu nápanu fe laa. w15 15/10 2:12-14

Guiníʼ íquenu pa málasi maʼ qué ñápanu Biblia. Neca gáxhacabe ni laanu, guirutiʼ zanda gucueeza laanu de guiníʼ íquenu lu cani maʼ bizíʼdinu de memoria, casi xiixa textu zeeda lu Biblia o ca diidxaʼ riuundaʼ stiʼ Reinu (Hech. 16:25). Zaquiiñeʼ Jiobá espíritu stiʼ para gusietenalaʼdxiʼ laanu cani maʼ bizíʼdinu ne para cadi guchéʼnenu laa. Xi zanda gúninu para guidúʼndanu Biblia guiráʼ dxi yaʼ. Dede nagasi zanda cueenu tiempu para guidúʼndanu Biblia ne guiníʼ íquenu lu ni bidúʼndanu. Laaca zanda cueenu tiempu para guidúʼndanu xiixa ni zeeda lu libru stiʼ Mateo, Marcos, Lucas o Juan, ne guiníʼ íquenu lu ni biʼniʼ Jesús ne ni bisiidiʼ (Rom. 10:17; Heb. 12:2; 1 Ped. 2:21). Ne para cueendunu stale cosa galán ora maʼ cadúʼndanu la? zanda iquiiñenu tobi de ca publicación stinu casi libru El hombre más grande, ra gudixhe chaahuiʼ xquidxi Dios guiráʼ ni biʼniʼ Jesús dxi bibani lu Guidxilayú (Juan 14:6). w15 15/10 4:11, 12

Ca binni gupa esclavu tiempu ruzeeteʼ Biblia, qué rábicaʼ laacabe xi caníʼ íquecaʼ ne xi cayuni sentircaʼ. Peru qué ñuu dxi ñuni Jesús ca apóstol stiʼ zacá. Guniʼbe qué ruuyabe laacaʼ casi esclavu stibe, sínuque casi xhamígube. Gunnaxhiibe laacaʼ ne bisihuínnibe ni ora guleebe tiempu para laacaʼ ne ora gúdxibe laacaʼ xi caníʼ íquebe ne xi cayuni sentirbe. Laaca bicaadiágabe laacaʼ ora gúdxicaʼ laabe xi caníʼ íquecaʼ ne xi cayuni sentircaʼ (Mar. 6:30-32). Gucané guiráʼ ndiʼ ca apóstol que gaca xhamígucaʼ Jesús ne chuʼcaʼ listu para dxiiñaʼ chigúnicaʼ. Nanna Jesús ziuu ca discípulo stiʼ nayecheʼ pa chuuláʼdxicaʼ gúnicaʼ ni ná Jiobá ne pa guni predicarcaʼ né stale gana. Ngue runi gúdxibe laacaʼ gucaa íquecaʼ dxiiñaʼ que ne guniʼbe zacanebe laacaʼ gaca ni (Mat. 28:19, 20). w15 15/11 2:3, 5

Guendarannaxhii nga cualidad ni jma risaca stiʼ Jiobá (1 Juan 4:16). Ne laaca nadxii Jesucristo binni cásica Bixhoze. Bizáʼ Dios laabe ante guzáʼ guiráʼ xixé ni nuu, ne bibaniné laabe millón de iza guibáʼ. Racá nga biziidibe naca Jiobá ti Dios ni rannaxhii (Col. 1:15). Maʼ bisihuinni Jesús guendarannaxhii riʼ lu guidubi xquendanabani, cásica guibáʼ ne zaqueca lu Guidxilayú. Nga runi, nanna dxíchinu qué ziuu dxi gusaana de guni gobernar Jiobá ne Jesús laanu né guendarannaxhii. Dxi gunabadiidxacabe Jesús gunáʼ nga mandamientu ni jma risaca la? laa bicabi: «“Gunaxhii Dios stiuʼ de idubi ladxidóʼ loʼ ne idubi xhialma luʼ ne idubi xquenda biaani luʼ”. Ne rairopa ri zeda gaca casi primé ca: “Gunaxhii stobi cásica nadxii lu lii”» (Mat. 22:37-39). Nabé risaca gusihuínninu nadxiinu guiráʼ binni. Jesús guníʼ naquiiñeʼ gannaxhiinu Jiobá ne sti binni. w15 15/11 4:1-3

Cadi puru si lu diidxaʼ hebreu nga guniʼné Jiobá binni guidxilayú. Xiñee yaʼ. Purtiʼ ruchaa tiempu ne modo nabani binni. Guzéʼtenu ti ejemplu. Biree si ca israelita que de esclavu Babilonia, stale de laacaʼ maʼ riniʼcaʼ diidxaʼ arameu. Zándaca pur nga bicaa Daniel, Jeremías ne Esdras caadxi versículo stiʼ Biblia lu diidxaʼ que. Gudiʼdiʼ si iza, guyuu ti rey de Grecia láʼ Alejandro Magno, ti hombre ni biʼniʼ ganar stale guidxi roʼ. Pur ni biʼniʼ rey riʼ, bizulú guníʼ ca binni de ca guidxi que ti clase diidxaʼ griegu ni jma riene binni. Laaca bizulú guníʼ stale judíu diidxaʼ griegu riʼ. Ngue runi guca traducir Escrituras Hebreas lu diidxaʼ griegu que. Binibiáʼcabe traducción riʼ casi Septuaginta. Laani nga primé traducción ni guca stiʼ Biblia, ne laani nga tobi de cani jma risaca. Caadxi binni ni nanna de tema riʼ ná zándaca 72 binni nga biʼniʼ traducción riʼ. Caadxi de cani biʼniʼ Septuaginta bitiixhicaʼ ni diidxaʼ pur diidxaʼ, peru xcaadxi qué ñuni zacá. Nga runi, napa traducción riʼ gadxé gadxé estilu. Neca zaqué, para ca judíu ni riníʼ diidxaʼ griegu ne para ca xpinni Cristo la? Septuaginta que nga Stiidxaʼ Dios. w15 15/12 1:4-6

Santiago cusiene: «Ludxi nu laca zeda aca casi ti batee», o casi ti bele (Sant. 3:6). Lúdxinu ni caníʼ versículo riʼ nga capacidad ni bidii Dios laanu para guininu. Cásica zanda guniná ti bele xiixa lugar, cani rininu laaca zanda guniná cani xcaadxi binni. Yanna, ñee riníʼ nga cadi licapeʼ naquiiñeʼ guininu la? Coʼ. Cadi dxandíʼ qué rusaana de iquiiñenu gui purtiʼ si zándaca guninanu sti binni la? Ni rúninu nga riquiiñenu ni jneza. Guzéʼtenu ti ejemplu. Zanda iquiiñenu ni para gúninu guendaró, para guidxaanu o para guzaaniʼ ni laanu. Ngaca nga ná Biblia rizaaca né cani rininu, zanda guniná cani binni o zanda gacané cani laacaʼ (Prov. 18:21). Nga runi, naquiiñeʼ chuʼnu cuidadu ti ganda iquiiñenu lúdxinu jneza. Zanda iquiiñenu ni para gusisácanu Jiobá ne para gacanenu xcaadxi binni (Sal. 19:14). Bizáʼ Jiobá laanu né capacidad para guininu xi riníʼ íquenu ne xi runi sentirnu, ne zanda gúninu ni ora guininu o pur seña. Galán iquiiñenu capacidad riʼ para gacanenu stobi, cadi para guninanu laa (Sant. 3:9, 10). w15 15/12 3:1-3

Zándaca gucané Lucas Pablo ne xcaadxi cristianu dxi guca huaracaʼ lu ca viaje ni bíʼnicaʼ (Gál. 4:13). Casi guníʼ Jesús, cani huará la? caquiiñeʼ checaʼ ra nuu doctor (Luc. 5:31). Qué ñaca diʼ Lucas ti binni ni riuulaʼdxiʼ gudii conseju para chuʼ binni nazaaca, sínuque doctor peʼ laabe. Ngue runi, ora bicaabe libru stiʼ Lucas ne stiʼ Hechos, biquiiñebe diidxaʼ ni riquiiñeʼ doctor ne bicaabe caadxi de ca milagru ni biʼniʼ Jesús ora bisianda binni huará. Paraa o padxí biʼniʼ estudiar Lucas de doctor yaʼ. Qué riníʼ diʼ Biblia de laani. Peru zándaca guyebe ti scuela de medicina ni guyuu Laodicea, ti guidxi nuu gaxha de Colosas. Ngue runi, ora bicaa Pablo carta ra nuu ca binni de Colosas, bizeetebe Lucas ne guniʼbe cuseendaʼ Lucas diuxi para laacaʼ. w15 15/12 4:11, 12

Nabé nadxii Jiobá laanu, nga runi dede biseendaʼ Xiiñiʼ Jesucristo lu Guidxilayú riʼ para gatiʼ pur laanu (Juan 3:16; 1 Juan 4:9, 10). Ndiʼ nga regalu ni jma risaca bidii Dios laanu. Nga runi guníʼ apóstol Pablo ni zeeda lu textu cadúʼndanu yannadxí. Nanna Pablo zaquiiñeʼ guendaguti stiʼ Jesús para gaca cumplir guiráʼ promesa stiʼ Dios (2 Cor. 1:20). Lade ca cosa sicarú ni biʼniʼ Dios, nuu sacrificiu biʼniʼ Jesús, guiráʼ modo rusihuinni Dios nadxii laanu ne guiráʼ ca cosa galán rudii Dios laanu. Nabé sicarú regalu riʼ, dede qué zanda gusiénenu ni. Zándaca zucaa regalu riʼ lii guiníʼ íqueluʼ ximodo caquiiñeluʼ xquendanabániluʼ. Ne zándaca dede zucaa ni lii guchaaluʼ modo nabániluʼ. Zándaca laaca zacané ni lii gannaxhiiluʼ binni jma, gucaa ni lii gudiiluʼ de ni nápaluʼ ne guni perdonarluʼ binni. Bietenalaʼdxiʼ, regalu bidii Dios laanu riʼ nga ni jma risaca que intiica stobi (1 Ped. 3:18). w16.01 2:1, 2, 4, 5

Zándaca guinabadiidxaʼ ti cristianu ungidu sicaríʼ: «Xiñee gulí Dios naa pue. Xiñee qué nibibe sti xpinni Cristo». Zándaca riuube xizaa purtiʼ riníʼ íquebe pa zanda gúnibe dxiiñaʼ cudii Dios laabe. Ni nánnabe nga dxandíʼ maʼ gulí Jiobá laabe para chebe guibáʼ. Ne pur nga nuube nayecheʼ ne rudiibe xquíxepeʼ Dios. Cani bibí né espíritu santu runi sentircaʼ casi biʼniʼ sentir Pedro ora guníʼ ca diidxaʼ riʼ: «Usisaca nu Dios, Bixhoze Jesucristu, Señor stinu. Nabé bilaselaʼdxi be laanu, nga runi bidii be laanu ti enda nabani cubi, casi ñaca gule nu sti tiru. Ne uca ni ra bisibani be Jesucristu de lade gueʼtuʼ. Yanna ma nanna dxichi nu laca zabani nu, ne zacaa nu ni cayapa chaahui be para laanu ibáʼ. Qué zanda initilú ni, nin guiuʼdxu ni, nin guioʼxho ni» (1 Ped. 1:3, 4). Ora ruundaʼ ti ungidu ca diidxaʼ riʼ, nanna dxichi laa nga caniʼné Jiobá. w16.01 3:11, 12