Abril

¿Xi zanda gúninu para cueendunu ni galán de dxiiñaʼ runi ca ancianu yaʼ? Chinándanu ejemplu ne fe stícabe, ne guzúʼbanu diidxaʼ ora gudiicabe conseju laanu de lu Stiidxaʼ Dios (Heb. 13:7, 17). Cadi guiaandaʼ laanu nabé nadxii ca ancianu laanu ne racaláʼdxicabe gaca xhamígunu Jiobá. Casi pa gudiicabe cuenta riáʼdxanu reunión o maʼ careʼnu gana la? nagueendaca zacanécabe laanu. Zucaadiágacabe laanu, zaguucabe gana laanu ne zaquiiñecabe Biblia para gudiicabe conseju laanu. Ora racané ca ancianu lii, ¿ñee rudiiluʼ cuenta zacá nga culuíʼ Jiobá nadxii lii la? Nuu biaje raca nagana para ca ancianu gudiicaʼ conseju. Yanna, ¿ximodo zanda gacaneluʼ ca ancianu ora gudiicabe conseju lii yaʼ? Guca humilde, bicaadiaga ne bidii xquíxepeʼ laacabe. Ora gacanécabe lii, biiyaʼ ni casi ora culuíʼ Dios nadxii lii. Pa gúniluʼ zacá la? zabeenduluʼ ni galán ne ziuu ca ancianu ca nayecheʼ ra gúnicaʼ xhiiñacaʼ. w18.03 31 párr. 15, 16

Gadxé gadxé nga cada xcuidi. Nuu de laacabe nahuiinirúcabe maʼ riénecabe ni rusiidiʼ Stiidxaʼ Dios, ricaacabe decisión jneza ne rinábacabe chuʼnísacabe. Peru nuu xcaadxi xcuidihuiiniʼ cadi casi zeʼ riene ni rusiidiʼ Stiidxaʼ Dios ne pur nga rindaa para chúʼnisa. Nga runi, laguiene ca xiiñitu ne cadi gucaatu laacabe chuʼnísacabe, sínuque lagacané laacabe guiniisicabe lu Stiidxaʼ Dios biaʼ laacabe. Riecheʼ cani napa xiiñiʼ ora ricaa xiiñicaʼ decisión jneza ne rúnicaʼ ni ná ca diidxaʼ ni zeeda lu textu ni cadúʼndanu yannadxí. Nga runi, cadi guiaandaʼ lii meta stiluʼ nga gacaneluʼ xiiñiluʼ gaca discípulo stiʼ Cristu. Né guiráʼ ni guninu riʼ galán guinabadiidxaluʼ laca lii: «¿Ñee maʼ nanna xiiñeʼ cani caquiiñeʼ ganna de lu Stiidxaʼ Dios para gudii laa Jiobá ne chúʼnisa la?». w18.03 9 párr. 6

Pa maʼ biʼniʼ aceptarnu ti invitación la? cadi naquiiñeʼ guininu maʼ qué ziuunu pur intiica si cosa. Purtiʼ pa maʼ qué chuunu la? pur gana si guiráʼ ni guni binni ni biʼniʼ invitar laanu ca (Mat. 5:37). Stale tu laa ricaa ti invitación peru despué rudxii ni para ganda cheʼ sti lugar ra biʼniʼ invitárcabe laa. ¿Cadi dxandíʼ pa guni tuuxa zacá zusihuinni qué gapa guendarannaxhii nin respetu la? Naquiiñeʼ guicaanu invitación ni gudii ca hermanu ca laanu ne gudiʼnu xquíxepeʼ laacabe pur guiráʼ ni gúnicabe pur laanu (Luc. 10:7). Peru pa málasi maʼ qué ganda chuunu la? dede ante naquiiñeʼ guinínenu hermanu ni biʼniʼ invitar laanu ca para gábinu laa maʼ qué ziuunu. Zacá zusihuínninu nadxiinu ne nápanu respetu laacabe. Laaca risaca guni respetarnu costumbre napa binni. Nuu cultura zanda cheluʼ ra lidxi tuuxa neca qué ñábiluʼ laa pa cheluʼ, peru nuu lugar la? napa xidé gábiluʼ laacaʼ dede ante. Ne nuu lugar qué ruuyacabe mal guiníʼ tuuxa qué zié primé o guiropa biaje guni invitárcabe laa, peru xcaadxi lugar la? cadi jneza ruuyacabe ni. Modo tiica si costumbre napa binni lugar ra nuunu, gúninu stipa pur chuʼ cani biʼniʼ invitar laanu nayecheʼ. w18.03 18 párr. 20, 21

Cadi guiaandaʼ laanu cadi caquiiñeʼ si gánnanu de lu Biblia para gácanu ti binni espiritual (1 Rey. 4:29, 30; 11:4-6). Nga runi, aparte de gánnanu cani zeeda lu Biblia la? naquiiñeʼ guni progresarnu en sentidu espiritual (Col. 2:6, 7). Para ganda gúninu ni la? nabé risaca guni estudiarnu libru Cadi guixélenu de Dios ni nadxii laanu. Ra guni estudiarnu ni zacané ni laanu gúninu ni ná ca principiu ni zeeda lu Biblia lu xquendanabáninu. Pa maʼ biluxe bidúʼndanu ni la? zanda guidúʼndanu xcaadxi publicación ni gacané laanu gaca fe stinu naguidxi (Col. 1:23). Ne laaca naquiiñeʼ guni orarnu ne guiníʼ íquenu ximodo gúninu cani maʼ bizíʼdinu. Ora guni estudiarnu ne ora guiníʼ íquenu cani zeeda lu Biblia, ni jma guicá íquenu nga guiale de ladxidoʼno gusiéchenu Jiobá ne guzúʼbanu stiidxaʼ (Sal. 40:8; 119:97). Ne guizíʼdinu gucáʼnanu ca cosa ni zanda gucueeza laanu de guiniisinu en sentidu espiritual (Tito 2:11, 12). w18.02 24, 25 párr. 7-9

Para gápanu fe casi gupa Noé la? naquiiñeʼ guiduʼndaʼ chaahuinu Stiidxaʼ Dios, gusisácanu ni guizíʼdinu ne gudiʼnu lugar guchaa ni laanu ne gacané ni laanu ora guicaanu decisión (1 Ped. 1:13-15). Pa gúninu ni bizéʼtenu riʼ, fe ne guendabiaaniʼ ni zeeda de Dios ca zapa cani laanu de ca trampa stiʼ Binidxabaʼ ne de espíritu malu stiʼ guidxilayú riʼ (2 Cor. 2:11). Rucaa espíritu riʼ binni jma chuulaʼdxiʼ inmoralidad ne guendaridinde, ne rucaa ni laacaʼ jma guicá íquecaʼ gúnicaʼ ni ná ca deseu sticaʼ (1 Juan 2:15, 16). Dede zanda gucaa ni cani huaxiéʼ napa fe cadi gulábicaʼ ca prueba ni cusihuinni mayaca gueeda dxi stiʼ Jiobá. Cadi guiaandaʼ laanu, dxi bichaaga Jesús tiempu stinu ne tiempu stiʼ Noé, qué nuzeetebe jma de inmoralidad ne guendaridinde, sínuque jma bizeetebe de peligru ni nuu pa gaca distraernu en sentidu espiritual (Mat. 24:36-39). Gunabadiidxaʼ laca lii: «¿Rusihuinneʼ pur modo nabaneʼ dxandíʼ runebiaʼyaʼ Jiobá la? ¿Ñee rucaa fe stinneʼ naa chinandaʼ ca norma stiʼ Jiobá ne gusiideʼ cani binni la?». Pur modo guicábiluʼ zahuinni pa nuuluʼ gaxha de Dios ni dxandíʼ (Gén. 6:9). w18.02 9, 10 párr. 8-10

Qué zanda guixélepenu de guiráʼ binni, purtiʼ zándaca zuninenu laacabe dxiiñaʼ, zinenu laacabe scuela o tobi si ra zabezanenu laacabe. Ni zanda gúninu nga cadi guiníʼ íquenu ne cadi gúninu casi rúnicabe. ¿Ximodo zanda gúninu ni yaʼ? Para gaca amistad ni napanenu Jiobá jma naguidxi la? naquiiñeʼ guidúʼndanu Biblia ne cuinu binni ni naguixhe ique guni ni nabe para gaca xhamígunu. Laaca naquiiñeʼ gúninu stipa pur gacanenu binni en sentidu espiritual. Guyúbinu oportunidad para guni predicarnu ne guinábanu Jiobá gacané laanu para guininu ni caquiiñeʼ guininu ne órapeʼ caquiiñeʼ gúninu ni. Gábinu binni testigu stiʼ Jiobá laanu. Pa gúninu zacá la? zusisácanu Dios ne cadi laca laanu, purtiʼ galán conducta stinu. Maʼ bisiidibe laanu «usaana nu irá ni bini nu dxi caʼru gunibiáʼ nu laabe, ne irá ni riulaʼdxi binni guidxilayú guni, ti ma cadi ibani nu ndaani guidxilayú ri modo na ique nu, sínuque modo riulaʼdxi be» (Tito 2:11-14). Pa chinándanu ejemplu stiʼ Jiobá ne gúninu ni ná la? zuuyaʼ binni laanu ne zándaca guiníʼ caadxi de laacaʼ: «Zinedu laatu, purtiʼ huayunadiágadu nuuné Dios laatu» (Zac. 8:23). w18.01 31 párr. 17, 18

¿Ñee riníʼ ca diidxaʼ ca malu nga gannaxhii binni laca laa la? Coʼ. Normal nga gannaxhiinu laca laanu ne caquiiñeʼ gúninu ni. Zacá nga bizáʼ Jiobá laanu. Jesús guníʼ: «Gunaxhii stobi cásica nadxii lu lii» (Mar. 12:31). Pa cadi nadxiinu laca laanu la? qué zanda gannaxhiinu sti binni. Ne Biblia ná: «Naquiiñe ganaxhii hombre xheela casi nadxii cuerpu stiʼ. Ni nadxii xheela la? nadxii laca laa. Purti iruti raca nanalaʼdxi cuerpu stiʼ, sínuque ruyaana ni ne ranaxhii ni» (Efes. 5:28, 29). Nga runi, galán nga gannaxhiinu laca laanu, peru maca nuu pabiáʼ. Guendarannaxhii ni rapa tobi laca laa ni rieeteʼ lu 2 Timoteo 3:2 riʼ la? rucaa ni binni guyubi puru si para laa. Cani nadxii xhaataʼ laca laa riníʼ íquecaʼ de laasicaʼ jma de biaʼ naquiiñeʼ gúnicaʼ ni (Rom. 12:3). Jma riuucabe xizaa pur laacabe que pur xcaadxi. Ne ora qué guiree xiixa jneza la? nuu biaje rugaanicabe donda xcaadxi, lugar de guiníʼcabe laaca nápacabe donda. Ca binni ni ruyubi para laasi cadi dxandíʼ nuucaʼ nayecheʼ. w18.01 23 párr. 4, 5

Ora runi estudiarnu rucaʼdiáganu Jiobá. Peru, pa racaláʼdxinu guinínenu laabe la? naquiiñeʼ guni orarnu laabe. Laanu, ca xpinni Cristu, cadi naquiiñeʼ diʼ guidúʼyanu oración ca casi xiixa ni maʼ biaʼnu gúninu o casi xiixa ni gacané laanu para si guiree ca cosa ca laanu jneza. Oración ca nga xiixa ni dxandíʼ racané laanu guinínenu Creador stinu. Ne Jiobá racalaʼdxiʼ gucaadiaga lii (Filip. 4:6). Ora maʼ nuuluʼ xizaa pur xiixa, bietenalaʼdxiʼ rudii Biblia conseju riʼ lii: «Bilaa ni nualuʼ luguiáʼ Jiobá» (Sal. 55:22). ¿Ñee dxandíʼ raʼbuʼ zanda gacané ndiʼ lii la? Millón de hermanu zanda gabi lii huayacané ni laacaʼ. Ne laaca zanda gacané ni lii. Naquiiñeʼ guni orarnu Jiobá guiráʼ ora, cadi ora si racaláʼdxinu gacanebe laanu. Zándaca nuu biaje jma chuʼnu xizaa de ca guendanagana stinu dede gusiáʼndanu guiráʼ ndaayaʼ ni ricaanu. ¿Xiñee qué quíxheluʼ meta guiníʼ íqueluʼ neca chonna razón para gudiiluʼ xquíxepeʼ Jiobá cada dxi yaʼ? w17.12 25, 26 párr. 10, 11

Guiráʼ iza, stale mil de binni ni runi estudiar Biblia rudiicaʼ xquendanabánicaʼ Dios ne riuunísacaʼ. Stale de laacaʼ nácacaʼ joven ni biniisi ndaaniʼ ti familia ni naca xpinni Cristu ne maʼ gulicaʼ guibánicaʼ jma galán (Sal. 1:1-3). Nanna dxíchinu racalaʼdxiʼ ca testigu stiʼ Jiobá ni napa xiiñiʼ guedandá dxi chúʼnisa ca xiiñicaʼ (bichaaga ni né 3 Juan 4). Ca xpinni Cristu ni napa xiiñiʼ racaláʼdxicaʼ gunibiáʼ xiiñicaʼ «ni cá lu Stidxaʼ Dios», cásica ni zeeda lu Escrituras Hebreas ne ni zeeda lu Escrituras Griegas Cristianas ni nápanu yanna. Dede ca xcuidi jma nahuiiniʼ —biaʼ capacidad stiʼ cada tobi— zanda guiziidicaʼ ca cosa básicu de ca binni ne ca relatu zeeda lu Biblia. Maʼ bidii organización stiʼ Jiobá stale libru, folletu ne videu lu stale idioma para ganda iquiiñeʼ ca padre ni ti gacanecaʼ ca xiiñicaʼ. Cadi guiaandaʼ laanu: guiráʼ ni guizíʼdinu de lu Stiidxaʼ Dios risaca cani para gápanu ti amistad né Jiobá. w17.12 18 párr. 1; 19 párr. 4

Guxuíʼlunu ti hermana ni cadi Testigu xheelaʼ, riníʼ ique cadi galán modo runi tratar xheelaʼ laa. ¿Ñee zuni chaahuibe guendanagana riʼ pa tindenebe laa pur modo raca portar la? Pa gucaabe xheelabe guni ni racaláʼdxibe, ¿ñee zacanebe laa guni ni ná Jiobá la? Zándaca coʼ. Maʼ gadxé si zaca ni pa gusihuínnibe nápabe respetu xheelabe purtiʼ laa nga xaíque ndaaniʼ familia. Zacanebe chuʼ paz ndaaniʼ familia stibe, zusisácabe Jiobá ne zándaca dede ziuulaʼdxiʼ xheelabe guni ni ná Dios. Ne pa gaca ni zacá la? guirópacabe zanda guicaacabe premiu ni cudii Dios (1 Ped. 3:1, 2). Yanna guiníʼ íquenu de ti hermanu ni cadi Testigu xheelaʼ, ne riníʼ ique qué runi respetar xheelaʼ laa. ¿Ñee zuni respetar xheelabe laabe pa tindenebe laa para gusihuínnibe tu runi mandar ndaaniʼ lídxicabe la? Coʼ. Ribeza Jiobá chinándabe ejemplu stiʼ Jesús ne gannaxhiibe xheelabe. Rusihuinni Cristu laa nga runi mandar congregación, peru rúnibe ni né guendarannaxhii ne paciencia (Luc. 9:46-48). Ti xpinni Cristu ni chinanda ejemplu stiʼ Jesús zándaca gacané xheelaʼ chuulaʼdxiʼ guni ni ná Jiobá. w17.11 28, 29 párr. 13, 14

Ca binni ni riníʼ ique casi riníʼ ique binni guidxilayú qué rulábicaʼ ca norma stiʼ Jiobá. Pa guidxaagapenu laacabe zándaca guirá fe stinu chaahuiʼ chaahuiʼ. Guiranu zanda guicá modo riníʼ ique binni guidxilayú laanu purtiʼ rihuinni ni lu televisión, Internet, ra dxiiñaʼ ne ra scuela. Ndaaniʼ stale guidxi, cadi guendaridxagayaa gunadiaga tuuxa guiníʼ ti binni qué runi cré Dios. Zándaca caʼruʼ guiene chaahuicabe pa dxandíʼ nuu Dios o pa coʼ, peru riuuláʼdxicabe gácacabe libre ne gúnicabe guiráʼ ni riuuláʼdxicabe (Sal. 10:4). Xcaadxi zándaca guiníʼ ique nuu xpiaaniʼ ora guiníʼ cadi caquiiñeʼ guni cré Dios para gapa principiu ni jneza. ¿Ñee jneza nga guni crenu guirutiʼ bizáʼ guiráʼ ca cosa ni nuu la? Pa gacaláʼdxinu guicabi ciencia laanu la? zándaca jmaruʼ si zuchenda guiráʼ ni rusiidicabe laanu. Peru cadi nagana respuesta ca. Cásica guyuu tu bizáʼ ti yoo la? guiráʼ ni nabani laaca guyuu tu bizáʼ laacaʼ. w17.11 20, 21 párr. 2-4

¿Xiñee nabé risaca chuunu Conmemoración yaʼ? Cadi guiaandaʼ laanu laaca runi adorarnu Dios nga ora riuunu reunión. Nuunu seguru ruuyaʼ Jiobá ne Jesús tuu nga cani runi stipa pur cadi guiaadxaʼ reunión ni jma risaca raca cada iza riʼ. Racaláʼdxinu gúʼyacabe ziuunu ra chigaca ni pa qué chuʼ xiixa ni dxandipeʼ gucueeza laanu o guizaacanu xiixa. Ora rusihuínninu pur ni gúninu dxandíʼ risaca ca reunión ca para laanu, rudiʼnu jma razón Jiobá para cadi guxhiá lanu lu libru ra cá lá cani qué rusiaandabe. Libru riʼ, laaca laani nga «libru de enda nabani» ra cá lá cani racalaʼdxiʼ Jiobá gudii guendanabani ni qué zaluxe (Apoc. 20:15). Ora maʼ zeeda dxiña dxi ganda Conmemoración, zanda cueenu tiempu para guni orarnu ne guiníʼ ique chaahuinu ximodo nuu amistad ni nápanu né Jiobá (2 Cor. 13:5, TNM). w18.01 13 párr. 4, 5

Ora maʼ nuu binni ni biiti riʼ ndaaniʼ guidxi ra bixooñeʼ para guilá la? maʼ qué zanda gúnicabe laa gastiʼ. Sicaríʼ guníʼ Jiobá de ca guidxi riʼ: «Napa xidé iquiiñeʼ cani para guilatu» (Jos. 20:2, 3). Cadi canábabe gaca juzgar ni biiti ca sti biaje pur ni biʼniʼ. Ne qué zudiicabe lugar chuʼ ni chiguquixe rini ni bixii que ndaaniʼ guidxi riʼ ne guuti laabe. Biaʼ tiempu chuʼbe ndaaniʼ guidxi que, cadi naquiiñeʼ guidxíbibe purtiʼ cayapa Dios laabe. Cadi ndaaniʼ ti cárcel diʼ nuube, purtiʼ zanda gúnibe dxiiñaʼ, gacanebe xcaadxi binni ne gúnibe xhiiñaʼ Dios né guendariuudxi. Zanda guibánibe nayecheʼ ne qué ziaadxaʼ laabe gastiʼ. Nuu caadxi xpinni Dios neca maʼ guca arrepentircaʼ de ca pecadu naroʼbaʼ bíʼnicaʼ peru runi sentircaʼ náparucaʼ donda. Dede nuu caadxi de laacaʼ riníʼ íquecaʼ qué zusaana Jiobá de guʼyaʼ laacaʼ casi tuuxa ni nabiidiʼ. Pa zacá runi sentirluʼ, zanda chuʼluʼ seguru riá Jiobá lii ne maʼ biʼniʼ perdonarbe lii. w17.11 9 párr. 6; 11 párr. 13, 14

Sti modo zanda gacanenu chuʼnu tobi si nga guiníʼ ique chaahuinu xi significadu napa pan ne vinu ni riquiiñeʼ lu Conmemoración. Naquiiñeʼ gúninu ni ante ganda gueelaʼ nabé risaca riʼ ne jmaruʼ si naquiiñeʼ gúninu ni gueelaʼ ca (1 Cor. 11:23-25). Pan sin levadura ca raca representar ni cuerpu sin donda stiʼ Jesús ni bidii casi sacrificiu, ne vinu ca raca representar ni rini ni bixhiibe. Peru cadi naquiiñeʼ si guiénenu significadu napa ca símbolo riʼ. Guietenaláʼdxinu bisihuinni sacrificiu stiʼ Jesús chupa clase guendarannaxhii jma naroʼbaʼ ni qué huahuinni: guendarannaxhii ni biluíʼ Jiobá ra bidii Xiiñiʼ para gulá laanu ne guendarannaxhii ni biluíʼ Jesús ra guyuu dispuestu gudii xquendanabani pur laanu. Ora guiníʼ íquenu pabiáʼ nadxiicabe laanu, naquiiñeʼ gucaa ni laanu gannaxhiinu laacabe. Ne guendarannaxhii ni runi sentirnu ne ni runi sentir ca hermanu pur Jiobá naca ni xiixa ni racané laanu chuʼnu tobi si ne cadi guixélenu. w18.01 15 párr. 11

Nabé risácanu para Jiobá. Nadxiibe laanu stale, dede bidiibe lugar guixii rini stiʼ Xiiñibe para gulabe laanu ne ganda gápanu guendanabani ni qué zaluxe (Juan 3:16). Pa qué ñuni cumplir Jiobá ca promesa stiʼ, ñapa Binidxabaʼ ti pretextu para niníʼ rusiguiibe, qué runi mandarbe jneza ne qué rinabe gudiibe ni galán binni. Ne laaca pur laani maʼ ñapa ca enemigu stiʼ Dios jma razón, purtiʼ laacaʼ runi búrlacaʼ ne riniʼcaʼ: «Cadi na be zeeda be la? xi guca xa yanna caʼru gueeda be. Ma guti ca bixhoze gola du, peru ze ru guidxilayú cásica laa dxi nabani cabe ne dede dxi uyáʼ ni» (2 Ped. 3:3, 4). Pur nga la? ora guilá ca binni ni ruzuubaʼ diidxaʼ la? zuuyaʼ Jiobá iquiiñeʼ ni para gaca vindicar soberanía stiʼ (Is. 55:10, 11). Ne pur modo runi mandar Jiobá rusihuinni nabé rannaxhii. Nga runi zanda chuʼnu seguru qué zusaanabe de gannaxhiibe ca xpínnibe ni gaca leal né laabe (Éx. 34:6). w17.06 23 párr. 7

Dede dxi biʼniʼ prometer Jiobá ziuu tu gulá binni, casi ná lu Génesis 3:15, para laabe casi ora mápeca biʼniʼ Xiiñibe sacrificiu que. Biaʼ tapa mil iza despué, bidii Jiobá tobi lucha Xiiñiʼ pur binni guidxilayú neca guizáʼ naroʼbaʼ yuubaʼ biʼniʼ sentir (Juan 3:16). ¡Rudiʼnu xquíxepeʼ Jiobá pur ni biʼniʼ riʼ! Cumu bizáʼ Dios laanu casi laa la? zanda gusihuínninu dxandíʼ nadxiinu sin cuézanu guicaanu xiixa pur laani. Casi Abel la? bisihuinni pabiáʼ nadxii Dios ora bidii sacrificiu ni jma galán napa (Gén. 4:3, 4). Bisihuinni Noé pabiáʼ nadxii binni ra biʼniʼ predicar stale iza neca qué niná binni nucaadiaga laa (2 Ped. 2:5). Ne Abrahán la? guyuu dispuestu gudii xiiñiʼ casi sacrificiu ne zaqué bisihuinni jma naroʼbaʼ guendarannaxhii ni runi sentir pur Dios (Sant. 2:21). Cásica bisihuinni ca hombre fiel riʼ guendarannaxhii la? laanu laaca racaláʼdxinu gusihuínninu ni dede né ora gaca ni nagana para laanu. w17.10 7, 8 párr. 3, 4

Ni biʼniʼ Sumo Sacerdote, Jesús, rusiidiʼ ni laanu zanda guni perdonarbe ca pecadu stinu ne gácabe nachaʼhuiʼ né laanu ne gacanebe laanu órapeʼ caquiiñenu ni (Heb. 4:16). Nga runi, gupa fe sacrificiu stiʼ Jesús. Ne laaca gupa fe guca sacrificiu riʼ para lii (Gál. 2:20, 21). Nga runi, gupa fe sacrificiu riʼ purtiʼ laani nga ni riquiiñeʼ Dios para guni perdonar ca pecadu ni maʼ bíʼniluʼ. Ne sacrificiu riʼ cudii ni lii ti esperanza para guibániluʼ sin gátiluʼ. Sacrificiu stiʼ Jesús ca naca ni ti regalu ni maʼ bidii Jiobá lii. Ne ora maʼ biʼniʼ perdonar Jiobá ca pecadu stinu, cadi guidxíbinu o cadi guiníʼ íquenu zusietenaláʼdxibe laanu ca pecadu stinu o zuni juzgarbe laanu (Sal. 103:8-12). Zanda chuʼnu seguru maʼ biʼniʼ perdonar Jiobá laanu. w17.11 11, 12 párr. 14-17

Gueelaʼ guca primé Conmemoración biʼniʼ Jesús ti oración ne gunabaʼ chuʼ ca discípulo stiʼ tobi si cásica nuube tobi si né Bixhózebe. Nanna dxíchinu bicabi Jiobá oración ni biʼniʼ Xiiñiʼ ni jma nadxii. Aparte de ca reunión ni rápanu, Conmemoración ca rusihuinni ni dxandíʼ nuu ca testigu stiʼ Jiobá tobi si. Dxi raca ni, millón binni de guiráʼ guidxi ne de guiráʼ raza ridagulisaacaʼ lu guidubi Guidxilayú ne rusihuínnicaʼ runi crecaʼ biseendaʼ Jiobá Xiiñiʼ. Nuu lugar, huaxiéʼ si ora ridagulisaa ca religión ne binni de gadxé raza ne ora rúnicabe ni runi saacabe menu laacabe. Peru Jiobá ne Jesús sicarú ruuyacabe xquídxicabe nuu tobi si. Laanu, ca xpinni Jiobá, qué ridxagayaanu xiñee nuunu tobi si. Lu mensaje bidii Jiobá profeta Ezequiel bizeeteʼ ximodo chigaca ni (Ezeq. 37:15-17; Zac. 8:23). w18.01 14 párr. 7-9

Ca xaíque stiʼ ca judíu que nga beeda gácacaʼ «cani cucuí yoo», ne laaca nga bicaanacaʼ Jesús, Mesías que. Cadi qué ñuni crésicaʼ pa laabe nga Cristu. Stale de ca judíu que dede gunábacaʼ gátibe (Luc. 23:18-23). Ngue runi gúpacabe donda pur gútibe. Pa bicaanácabe Jesús ne biiticabe laa, ¿ximodo nga gueeda gácabe «guié ni jma risaca» que yaʼ? Zácabe ni pa guiásabe de lade gueʼtuʼ. Apóstol Pedro guníʼ de Jesucristu de guidxi Nazaret, ni bicaacabe lu ti yaga, peru «undisa Dios laa de lade gueʼtu» (Hech. 3:15; 4:5-11; 1 Ped. 2:5-7). Biasa si xiiñiʼ Dios de lade gueʼtuʼ, beeda gácabe binni ni iquiiñeʼ Dios para gulá laanu, «purti iruti ru stobi ndaani guidxilayú ni huaguixhe Dios ulá binni, sínuque laasi be» (Hech. 4:12; Efes. 1:20). w17.12 9, 10 párr. 6-9

Sicaríʼ guníʼ Jesús de gran tribulación ni mayaca guedandá: «Zahuinni seña ibáʼ ma chi ibigueta Hombre Biseenda Dios sti tiru, [...] ne zuuya ca zeda yete be de ibáʼ lade za, ne stale enda nandxóʼ dede riaqui biaaniʼ. Oraque zaxidxi trompeta reciu ne zuseenda be ca ángel stibe gueda topa irá ni ma ulí be de idubi naca guidxilayú» (Mat. 24:29-31). Zutagulisaa Jesús cani bibí ora chinebe ca ungidu guibáʼ, cani nuu lu Guidxilayú riʼ tiempu ca. Zaca ndiʼ despué de guzulú gran tribulación, peru ante guzulú Armagedón. Lu guerra ca zuni ganar Jesús ne 144,000 ca rey ni nuu lu Guidxilayú (Apoc. 17:12-14). Conmemoración ni gaca ante gueeda Jesús para chiné ca ungidu ca guibáʼ nga últimu ni gaca. w18.01 16 párr. 15

Nabani Jesús guibáʼ ne maʼ qué ziuu dxi gátibe (Apoc. 1:5, 18; Rom. 6:9; Col. 1:18; 1 Ped. 3:18). Laabe bidii stiidxabe ca apóstol ni ruzuubaʼ stiidxabe ziecaʼ guibáʼ para guni mandárnecaʼ laabe (Luc. 22:28-30). Pablo guníʼ ziasa xcaadxi para guibánicaʼ guibáʼ, aparte de Jesús. Guniʼbe: «Sicarí nga gudixhe Dios aca ni: nirudóʼ ibani Cristu, ne dxi gueeda [o lu presencia stiʼ] la? óraque ibani ca xpinni» (1 Cor. 15:20, 23). Ca diidxaʼ riʼ cusihuinni cani bizulú presencia stiʼ Jesús lu iza 1914. Nabánirunu lu presencia riʼ, ne mayaca guedandá dxi guinitilú guidxilayú malu riʼ. w17.12 10 párr. 11; 11 párr. 14-16

Laaca maʼ guti caadxi binni ni nadxii Bixhózenu ni riá laanu, casi Abrahán, Isaac, Jacob, Moisés ne rey David (Núm. 12:6-8; Mat. 22:31, 32; Hech. 13:22). Biblia ná racalaʼdxiʼ Dios guedandá dxi gusibani laacabe sti biaje (Job 14:14, 15). Tiempu ca, zabánicabe nayecheʼ ne maʼ qué zaca huarácabe. Cadi guiaandaʼ laanu laaca biiyaʼ Dios pabiáʼ feu modo biiticabe Xiiñiʼ ni nabé nadxii (Prov. 8:22, 30). Qué zanda guiníʼ íquenu pabiáʼ naroʼbaʼ yuubaʼ biʼniʼ sentir Jiobá (Juan 5:20; 10:17). Zanda gápanu confianza zacané Jiobá laanu. Nga runi guxhélenu ladxidoʼno nezalube ne gábinu laabe guiráʼ ni runi sentirnu. Riéchenu gánnanu riénebe ca yuubaʼ stinu ne riguixhedxibe ladxidoʼno órapeʼ caquiiñenu ni (2 Cor. 1:3, 4). w17.07 13 párr. 3-5

Yanna riʼ nuu millón de binni ni riquiiñeʼ ca «ca cosa risaca» stiʼ para gacané, casi tiempu, bueltu ne stipa sticaʼ, ne rúnicaʼ ni de guidubi ladxidoʼcaʼ (Prov. 3:9). Qué ziuu dxi gusiaandaʼ Jiobá ni rúninu pur laa ne pabiáʼ nadxiinu laa. Guiráʼ ni huayaca para gaca adorar Dios jneza lu ca últimu dxi riʼ, rusihuinni cani nápanu ndaayaʼ stiʼ Jiobá ne Cristu nga cayuni dirigir laanu. Laanu, ca xpinni Dios, nácanu parte de ti organización ni zuhuaa dxiichiʼ, ni nuu seguru ne ni qué ziuu dxi guinitilú. Nga runi, gusisácanu lugar ni nápanu ndaaniʼ xquidxi Jiobá ne gucaʼdiáganu «stidxi Jiobá» Dios stinu (Zac. 6:15). Pa gúninu ni la? zapa Rey ne Sumo Sacerdote stinu laanu. Nga runi, gúninu guiráʼ ni gándatiʼ pur gacanenu gaca adorar Dios jneza. Zacatiʼ nga zanda chuʼnu seguru zulá Jiobá stiʼ ca ejércitu laanu lu ca últimu dxi stiʼ guidxilayú stiʼ Binidxabaʼ riʼ ne zudiibe laanu ti guendanabani ni qué zaluxe. w17.10 30 párr. 18, 19

Maʼ cadi candaa ziabantaa sistema stiʼ Binidxabaʼ, casi sistema comercial, política ne religión. Profeta Ezequiel ne Sofonías maca guniʼcaʼ gastiʼ qué zasaca oro ne plata, neca gayuaa iza laacani nga ni jma huaquiiñeʼ binni lu negocio stiʼ (Ezeq. 7:19; Sof. 1:18). ¿Ximodo ñuni sentirnu pa maʼ chiguiluxe xquendanabáninu nudiʼnu cuenta bicáʼnanu ca cosa ni dxandíʼ risaca pur cuyúbinu gápanu «ca cosa risaca stiʼ guidxilayú riʼ» yaʼ? Zándaca ñuni sentirnu casi tuuxa ni biʼniʼ dxiiñaʼ guidubi xquendanabani para guni ganar stale bueltu ne despué bidii cuenta cadi dxandíʼ cani (Prov. 18:11). Xcaadxi si maʼ qué zasaca ca cosa risaca stiʼ guidxilayú riʼ. Nga runi, cadi gunítinu oportunidad de iquiiñenu cani para gápanu xhamígunu guibáʼ. Intiica gúninu para chuʼnu pur Reinu stiʼ Dios zacané ni laanu para gaca xhamígunu Jiobá jma. w17.07 11 párr. 16

Nuu xpinni Cristu, ora maʼ biʼniʼ cometer ti pecadu naroʼbaʼ, ruyubi modo gucaachiʼ ni para cadi guituilú ne para cadi guniná xcaadxi pa gueeda gánnacaʼ xi bíʼnicabe (Prov. 28:13). Peru ora gúnicabe zacá rusihuínnicabe cadi dxandíʼ guendarannaxhii stícabe, purtiʼ cayuninácabe laca laacabe ne laaca cayuninácabe xcaadxi. Zándaca zaxeleʼ espíritu santu de laanu ne maʼ qué ziuu congregación tobi si (Efes. 4:30). Pa dxandíʼ guendarannaxhii stiʼ ti xpinni Cristu ni maʼ biʼniʼ xiixa pecadu la? zucaa ni laa guiniʼné ca ancianu para gacanecaʼ laabe (Sant. 5:14, 15). Tobi de ca cualidad ni jma risaca ni naquiiñeʼ gapa ca xpinni Cristu nga guendarannaxhii (1 Cor. 13:13). Rusihuinni ni laanu nga cani dxandíʼ xpinni Jesús, ne zinanda ejemplu stiʼ Jiobá, Dios ra cadá guendarannaxhii. Pablo bicaa qué zasaca guiráʼ ni guni pa qué gannaxhii (1 Cor. 13:2). Nga runi, «cadi gabi si nu nadxii nu binni sínuque gannaxhii nu laaca de idubi ladxidóʼ no ne usihuinni nu ni ra acané nu laacaʼ» (1 Juan 3:18). w17.10 11 párr. 17, 18

Guiníʼ íquenu pabiáʼ nadxibalú guca José dxi gunabaʼ xheelaʼ Potifar laabe ñatanebe laa. Nánnabe pa gucaanabe gunaa que zápabe guendanagana. Peru gúcabe nadxibalú ne nagueenda ca bicaanabe laa, qué lica niníʼ íquebe ni chupa biaje (Gén. 39:10, 12). Yanna guidúʼyanu ejemplu stiʼ Rahab, ti gunaa guleza Jericó. Dxi guyé chupa espía ra lídxibe, gúcabe nadxibalú para bicaachibe laacaʼ ne gucanebe laacaʼ guxooñecaʼ (Jos. 2:4, 5, 9, 12-16). Ca apóstol fiel stiʼ Jesús que laaca bisihuínnicaʼ gúcacaʼ nadxibalú. Dxi biʼniʼ mandar ca saduceu ca apóstol que gusaanacaʼ de guiniʼcaʼ de Jesús, qué ninacaʼ ñúnicaʼ ni (Hech. 5:17, 18, 27-29). Gudixhe ique José, Rahab, Jesús ne ca apóstol que gúnicaʼ ni jneza. Gúcacabe nadxibalú purtiʼ gúpacabe confianza Jiobá, cadi pur gúpacabe confianza laca laacabe. Ora guidxaagalunu xiixa guendanagana ra caquiiñeʼ gusihuínninu nácanu nadxibalú, gápanu confianza Jiobá ne cadi laca laanu (2 Tim. 1:7). w17.09 29 párr. 6-9

Qué zanda diʼ cueenu personalidad yooxhoʼ riʼ laasinu. Stale binni nabé nadipaʼ maʼ bidxiilú para bisaana modo bibani ante. ¿Xi gucané laacabe yaʼ? Stipa ni rudii Stiidxaʼ Dios ne ni rudii espíritu santu (Luc. 11:13; Heb. 4:12). Laaca zanda gacané stipa ca laanu pa guidúʼndanu Biblia guiráʼ dxi, guiníʼ íquenu ni guidúʼndanu ne pa guinábanu Jiobá gudii laanu guendabiaaniʼ ne stipa guiráʼ ora ti gúninu ni ná Stiidxaʼ (Jos. 1:8; Sal. 119:97; 1 Tes. 5:17). Laaca zudii espíritu santu ne Biblia stipa laanu pa guidúʼndanu dede ante cani chitiidiʼ lu reunión ne pa qué guiáʼdxanu cani (Heb. 10:24, 25). Laaca galán iquiiñenu cani rudii organización stiʼ Jiobá laanu casi ca revista ca, canal JW Broadcasting, aplicación JW Library ne sitiu jw.org (Luc. 12:42). Dxandíʼ naquiiñeʼ gusaananu personalidad yooxhoʼ que, peru ¿ñee ngasi nga ni naquiiñeʼ gúninu para chuulaʼdxiʼ Dios ni rúninu la? Coʼ, laaca naquiiñeʼ gácunu personalidad cubi que (Col. 3:10). w17.08 21 párr. 16, 17

Bíʼnicabe stale cosa ni cadi jneza rey David. Neca de dxi nahuiinibe gulí Jiobá laabe para gácabe rey stiʼ guidxi Israel, gupa xidé gulézabe biaʼ quince iza para gácabe rey de tribu stibe (2 Sam. 2:3, 4). Lu caadxi iza de tiempu ca, gupa xidé bixooñebe de rey Saúl, purtiʼ nuu guuti laabe. Pur ngue nuu tiru gupa xidé yendeza David fuera de xquidxi o ndaaniʼ ca cueva ni nuu lu desiertu. Despué, guti Saúl lu ti guendaridinde. Neca zaqué, gupa xidé guleza David xcadxe iza para guca rey stiʼ guidubi guidxi Israel (2 Sam. 5:4, 5). ¿Xiñee guyuu David dispuestu cueza né stale paciencia yaʼ? Purtiʼ nápabe confianza qué zusaana de gannaxhii Jiobá laabe. Né stale guendanayecheʼ gulézabe dede ora guedandá dxi guiluxe ca guendanagana stibe. Ne laaca guníʼ íquebe ximodo gucané Jiobá laabe ante (Sal. 13:6). Nanna dxichi David nabé risaca gapa paciencia. w17.08 6, 7 párr. 14, 15

Ra tiidiʼ tiempu ruchaa ca idioma ca. Zándaca runibiaʼnu xiixa diidxaʼ o modo riníʼ binni lu stiidxanu ne yanna maʼ gadxé modo riénecabe ni. Ngapeʼ nga ni bizaaca né idioma hebreu ne griegu, guiropaʼ idioma riʼ nga gucuá stale parte stiʼ Biblia. Tiempu stinu riʼ maʼ gadxé modo riníʼcabe cani de modo guníʼcabe cani tiempu gucuá Biblia. Nga runi, guiráʼ binni ni ruundaʼ Stiidxaʼ Dios riquiiñecaʼ ti traducción para guiénecaʼ ni neca nánnacaʼ hebreu o griegu de tiempu riʼ. Nuu tu riníʼ ique jma ziene Biblia pa guiziidiʼ modo guníʼcabe idioma hebreu ne griegu dxiqué, peru zándaca qué zacané ni laacabe stale casi riníʼ íquecabe. Nayecheʼ runi sentirnu maʼ guca traducir guidubi Biblia o parte de laani lu jma 3,200 idioma. Ndiʼ rusihuinni racalaʼdxiʼ Jiobá gapa binni «de irá ladu, de irá guidxi, ni riníʼ adxé adxé idioma» oportunidad de cueenducaʼ ni galán ora gúʼndacaʼ Stiidxabe (Apoc. 14:6). ¿Cadi dxandíʼ ridxíñanu jma gaxha de Jiobá ora ridúʼyanu pabiáʼ nadxiibe binni ne qué rúnibe menu laacaʼ la? w17.09 19 párr. 4

Pa tuuxa de familia stinu nuu expulsadu la? zándaca naquiiñeʼ gucueezanu laanu para cadi guidxaaganu laabe ora cadi caquiiñeʼ gúninu ni. Nagana para gúninu ndiʼ, peru qué zaca ni nagana pa guietenaláʼdxinu zacá zinándanu ejemplu stiʼ Jiobá ne ruzúʼbanu stiidxaʼ. Sti ejemplu zanda iquiiñenu nga stiʼ rey David. Dxi guzananda Saúl laabe ne dxi bilaa Simeí diidxaʼ laabe, qué nidxiichiné laacabe ne qué nuquixe ni bíʼnicaʼ laabe neca ñanda ñúnibe ni (1 Sam. 26:9-11; 2 Sam. 16:5-10). Dxandíʼ, nánnanu cadi guiráʼ biaje bicueeza David laa. Guietenaláʼdxinu xi bíʼnibe dxi qué niná Nabal ñacané laabe ne dxi bicheebe ra guyuunebe Bat-seba (1 Sam. 25:10-13; 2 Sam. 11:2-4). ¿Xi rizíʼdinu de xquendanabani David yaʼ? Primé, naquiiñeʼ gucueeza ca superintendente laacaʼ ne chuʼcaʼ cuidadu cadi tiidisucaʼ de autoridad nápacaʼ. Ne guiropa la? cadi naquiiñeʼ gapa tuuxa confianza laca laa ne guiníʼ ique qué zuchee ora uquiinde xiixa cosa malu laa (1 Cor. 10:12). w17.09 5, 6 párr. 12, 13