Diciembre

Guníʼ Jesús tobi si laa né ca discípulo stiʼ casi ti pastor ne ca dendxuhuiiniʼ stiʼ (Juan 10:14). Ne biaʼ si ejemplu biquiiñebe ca purtiʼ runibiaʼ ca dendxuhuiiniʼ ca ridxi stiʼ pastor sticaʼ ne ruzuubacame stiidxaʼ. Ne nga peʼ nga ni biʼyaʼ ti hombre. Sicaríʼ guniʼbe: «Gucaláʼdxidu nidxiña caadxi dendxuʼ ra nuudu para ñuni grabardu laacaʼ, peru cumu qué runibiáʼcame stídxidu la? qué nulábicame laadu. Ne casi bidxiña ti hombrehuiiniʼ ni naca pastor stícame ne bicaa ridxi laacame zinándacame laa». Ni bizaaca hombre riʼ rusietenaláʼdxini laanu ni guníʼ Jesús zuni ca discípulo stiʼ o ca dendxuʼ stiʼ. Laabe guniʼbe: «Zunadiágacaʼ stidxeʼ». Peru pa guibáʼ nuu Jesús, ¿ximodo zanda gucaʼdiáganu laa yaʼ? Ti modo zanda gúninu ni nga ra chinándanu ca ni bisiidibe (Mat. 7:24, 25). w21.12 16 párr. 1, 2

Ante gaca Pablo apóstol, guzanándabe ca xpinni Cristu. Peru gudiʼdiʼ si tiempu bidiibe cuenta cadi jneza ngue ni bíʼnibe ne guyuube dispuestu guchaabe modo laabe ne modo riníʼ íquebe (1 Tim. 1:12-16). Gucané Jehová laabe para gácabe ti pastor nachaʼhuiʼ, humilde ne ni riá binni. Gúpabe confianza maʼ biʼniʼ perdonar Jehová laabe ne maʼ qué niníʼ íquerube ca cosa ni bíʼnibe (Rom. 7:21-25). Gúnnabe cadi perfectu laabe, ngue runi bíʼnibe stipa gápabe ca cualidad ni naquiiñeʼ gapa ca xpinni Cristu. Ne cumu gúcabe humilde la? bidiibe lugar gacané Jehová laabe para ganda gúnibe xhiiñaʼ (1 Cor. 9:27; Filip. 4:13). Cadi pur perfectu ca hermanu riʼ nga raca nombrarcaʼ ancianu, peru ribeza Jehová gudiicabe cuenta paraa rucheecabe ne gúnicabe stipa gusihuínnicabe cualidad stiʼ ca xpinni Cristu (Efes. 4:23, 24). Naquiiñeʼ iquiiñecabe Stiidxaʼ Dios para guiníʼ íquecabe ximodo laacabe ne guchaacabe pa caquiiñeʼ gúnicabe ni. Pa gúnicabe ni, zacané Jehová laacabe gúnicabe xhiiñacabe jneza ne ziuucabe nayecheʼ (Sant. 1:25). w22.03 29, 30 párr. 13-15

¿Xi naquiiñeʼ gúninu pa gudiʼnu cuenta cayuni juzgarnu ti hermanu stinu yaʼ? Cadi guiaandaʼ laanu naquiiñeʼ gannaxhiinu ca hermanu stinu (Sant. 2:8). Ne laaca zanda guinábanu Jehová lu oración gacané laanu cadi guni juzgarnu. Ne ti modo zanda gúninu ni nga ra guidxíñanu hermanu stinu ne guinínenu laa. Laaca zanda guni invitarnu laabe guni predicárnebe laanu o guni invitarnu laabe ti guendaró. Ne ra gunibiaʼ chaahuinu hermanu stinu zinándanu ejemplu stiʼ Jehová ne Jesús ora guidúʼyanu ca cosa galán ni rúnibe. Zacá zusihuínninu zinándanu mandatu ni bidii pastor chaʼhuiʼ stinu ora guníʼ cadi naquiiñeʼ guni juzgarnu xcaadxi. Cásica runadiaga ne runibiaʼ ca dendxuhuiiniʼ ca stidxi pastor sticaʼ, zacaca nga rúninu né pastor chaʼhuiʼ stinu. Pa nácanu de grupuhuiiniʼ de dendxuʼ ni cheʼ guibáʼ o de xcaadxi dendxuʼ ni chiguibani lu Guidxilayú riʼ, naquiiñeʼ gucaadiáganu ne chinándanu ni gabi pastor chaʼhuiʼ stinu laanu (Luc. 12:32; Juan 10:11, 14, 16). w21.12 19 párr. 11; 21 párr. 17, 18

Dxi naca Rehoboam rey stiʼ guidxi Israel, gunabaʼ guidxi que laabe guindétebe lu dxiiñaʼ ni rúnicaʼ, ni gudixhe bixhózebe Salomón gúnicaʼ. Biʼniʼ Rehoboam ti cosa galán: gunabadiidxabe ca ancianu stiʼ guidxi Israel xi zanda gúnibe. Gúdxicaʼ laabe pa gúnibe ni ná guidxi que la? siempre zacanecaʼ laabe (1 Rey. 12:3-7). Nánnanu qué ñuulaʼdxiʼ Rehoboam conseju ni bidii ca ancianu que laa, ngue runi yenabaʼ conseju ca hombre ni biniisiné. Peru cadi jneza conseju bidiicabe Rehoboam: gudxi ca hombre riʼ laabe guquíchinabe guidxi que jma (1 Rey. 12:9-11). Ñanda ñuni orarbe Jehová para ninabadiidxabe laa xi conseju naquiiñeʼ chinándabe. Peru lugar de ñúnibe ni laga gucuaabe conseju ni jma guyuuláʼdxibe: stiʼ ca hombre ni biniisinebe que. Ne pur ngue, laabe ne guidxi que gúpacabe guendanagana. Zaqueca nga laanu, zándaca gudiicabe laanu conseju ni qué chuuláʼdxinu, peru pa zeedacani de lu Biblia la? caquiiñeʼ guicaanu ca ni. w22.02 9 párr. 6

Ti binni humilde ne nanna nuu cosa ni qué zanda guni, qué riníʼ ique huaxiéʼ experiencia napa ca hermanu ni jma nahuiiniʼ, sínuque riníʼ ique zanda gúnicabe intiica dxiiñaʼ guicaacabe. Ne zuuyacabe laaca casi compañeru stícabe ne cadi casi tuuxa ni racalaʼdxiʼ tidiʼ lúcabe. Ruuyaʼ ca hermanu ni maʼ huaniisi ca ni jma nahuiiniʼ casi ti regalu ni zeeda de Jehová ne rudiicaʼ xquixe peʼ pur ni rúnicabe. Cumu maʼ zirá stipa stícabe la? Nga runi, riéchecabe nuu hermanu nahuiiniʼ ni daʼ gana ne ni racalaʼdxiʼ gacané ndaaniʼ congregación. Lu Biblia zeeda ejemplu galán casi stiʼ Noemí, purtiʼ neca maʼ huaniisi peru bidii xquixe ne bidii lugar gacané ti binni ni nahuiiniʼ laa. Despué de guti xiiñiʼ Noemí, gúdxibe xuaalídxibe, Rut, guibiguetaʼ ra nuu familia stiʼ peru qué niná Rut nusaana laabe, ngue runi bidii Noemí lugar chinebe laa Belén (Rut 1:7, 8, 18). Ne nabé gucané ni guirópacabe (Rut 4:13-16). Ca hermanu ni maʼ huaniisi ni naca humilde rinándacaʼ ejemplu stiʼ Noemí. w21.09 10, 11 párr. 9-11

Riene Bixhózenu ni nuu guibáʼ ximodo nuu cada tobi de laanu. Zándaca zúniluʼ jma lu xhiiñaʼ Jehová que ca xhamíguluʼ. O zándaca qué ganda gúniluʼ jma biaʼ ñuuláʼdxiluʼ ñúniluʼ purtiʼ maʼ huaniisiluʼ, maʼ huaraluʼ o naquiiñeʼ gacaneluʼ familia stiluʼ. Peru cadi guireeluʼ gana (Gál. 6:4). Qué zusiaandaʼ Jehová guiráʼ ni gúniluʼ pur laa. Pa gúniluʼ ni nabe purtiʼ nadxiiluʼ laabe la? guizáʼ ziuube nayecheʼ. Nanna Jehová xi nuu ndaaniʼ ladxidoʼloʼ. Ne racaláʼdxibe chuʼnu nayecheʼ né biaʼ zanda gúninu lu xhiiñabe. Ne ratadxí ladxidoʼno purtiʼ nánnanu racané Jehová laanu ora tídinu lu xiixa guendanagana (Is. 41:9, 10). Guiranu zanda chuʼnu nayecheʼ ora runi adorarnu Bixhózenu ni nuu guibáʼ, laa runi merecer guicaa gloria ne honra purtiʼ laa bizáʼ guiráʼ xixé ni nuu (Apoc. 4:11). w22.03 24 párr. 16; 25 párr. 18

Racaláʼdxinu chinándanu ejemplu stiʼ Jesús. Nga runi cadi guireʼnu gana pa qué ganda gúninu modo peʼ bíʼnibe (Sant. 3:2). Ti estudiante ni deruʼ caziidiʼ, qué zanda gaca casi peʼ maestru stiʼ, peru jma zaziidibe pa gúnibe stipa chinándabe ejemplu stiʼ maestru stibe biaʼ gándatiʼ. Zaqueca nga laanu, pa gúninu guiráʼ ni maʼ bizíʼdinu ora runi estudiarnu Biblia stúbinu ne rúninu stipa pur guchaʼnu, zanda chinándanu ejemplu ni bisaana Jesús para laanu (Sal. 119:59). Ndaaniʼ Guidxilayú riʼ nuu stale binni ni ruyubi puru si para laa, peru laanu, ca xpinni Jehová, maʼ gadxé laanu. Ejemplu stiʼ Jesús riguuni gana laanu ne rucaa ni laanu laaca gacanenu xcaadxi binni (1 Ped. 2:21). Pa gúninu stipa chinándanu ejemplu stiʼ Jesús biaʼ gándatiʼ ne gacanenu binni la? ziuʼnu nayecheʼ purtiʼ nánnanu cusiéchenu Jehová. w22.02 24 párr. 16; 25 párr. 18

Tiempu riʼ riquiiñeʼ Jehová Biblia para guni dirigir xquidxi. Luni rábibe laanu ximodo racaláʼdxibe guni adorarnu laabe. Pa cueenu tiempu para guiníʼ íquenu guiráʼ ni rusiidiʼ Jehová laanu, zinándanu ni gábibe laanu ne zúninu xhiiñabe (1 Tim. 4:15, 16). Sti modo runi dirigir Jehová xquidxi nga ra riquiiñeʼ «mozo ni nuu xpiaaniʼ ne ni runi jneza» (Mat. 24:45). Zándaca nuu biaje qué ziénenu xiixa instrucción ni gudii mozo ni nuu xpiaaniʼ ca laanu. Guzéʼtenu ti ejemplu, zándaca gudiicabe laanu instrucción xi gúninu ora guizaaca xiixa desastre natural, peru zándaca guiníʼ íquenu cadi caquiiñenu ni purtiʼ qué rizaaca desastre natural neza ra nabézanu. Yanna, ¿xi naquiiñeʼ gúninu pa guiníʼ íquenu cadi naquiiñeʼ chinándanu ca instrucción ni gudiicabe laanu yaʼ? Zanda guiníʼ íquenu xcaadxi relatu ni zeeda lu Biblia ni maʼ bidúʼndanu. ¡Stale biaje gucuaa ca xpinni Dios de dxiqué instrucción ni ruluíʼ cadi caquiiñecaʼ, peru bilani xpídacaʼ! (Juec. 7:7; 8:10). w22.03 18, 19 párr. 15, 16

Né stale confianza guníʼ Jesús ca diidxaʼ ni zeeda lu textu ni cadúʼndanu yannadxí. Gúnnabe lu náʼ Jehová nuu xquendanabánibe ne laaca gúnnabe zietenalaʼdxiʼ Bixhózebe de laabe. ¿Xi rizíʼdinu de laani? Rizíʼdinu naquiiñeʼ chuʼnu dispuestu gusaananu xquendanabáninu lu náʼ Jehová. Para ganda gúninu ni la? naquiiñeʼ gápanu confianza laabe de guidubi ladxidoʼno (Prov. 3:5). Guiníʼ íquenu ejemplu stiʼ Joshua, ti hermanu de 15 iza ni gupa ti guendahuará ni biiti laa. Qué ninabe nicaabe tratamientu ni zucaa laabe gucheenebe Dios. Ante gátibe gúdxibe jñaabe: «Lu náʼ Jehová nuu xquendanabaneʼ». Ne laaca guniʼbe: «Amá, nanna dxicheʼ zandisaʼ Jehová naa de lade gueʼtuʼ. Maʼ biiyabe ni nuu ndaaniʼ ladxiduáʼ ne nánnabe dxandíʼ nadxieeʼ laabe». Guiranu naquiiñeʼ guiníʼ íquenu ndiʼ: «Pa tideʼ lu prueba ne chuʼ xquendanabaneʼ lu peligru, ¿zuzuubaʼ stiidxaʼ Jehová ne zapaʼ confianza zandísabe naa de lade gueʼtuʼ la?». w21.04 12, 13 párr. 15, 16

Guiranu, casi xpinni Jehová, riuʼnu gana ora runi predicarnu, neca qué gucaadiaga binni laanu. Zándaca pur modo nabáninu guiníʼ íquenu qué zanda guni predicarnu jma. Peru cadi guiaandaʼ laanu, pa gúninu guiráʼ ni nuu lu nanu, ziechené Jehová laanu. Nanna Jehová racaláʼdxinu guni predicarnu neca qué ganda guireʼnu de ra lídxinu. Zanda gacanebe laanu para guni predicarnu ca doctor ne ca enfermera. Ne zándaca guireʼnu gana pa guchaaganu modo runi predicarnu yanna ne biaʼ bíninu dxiqué. Peru pa guiníʼ íquenu ximodo cayacané Jehová laanu yanna la? zápanu stipa para guni huantarnu intiica guendanagana gápanu ne qué zusaana de chuʼnu nayecheʼ. Qué gánnanu gunáʼ de ca biidxihuiiniʼ ni zeeda gaca stiidxaʼ Dios guicaa xcu ne guiniisi ndaaniʼ ladxidóʼ binni (Ecl. 11:6). w21.05 24, 25 párr. 14-17

Guzéʼtenu ni bizaaca rey David. Bidii Jehová laabe stale cosa, gúpabe stale bueltu, gúcabe ti binni risaca ne biʼniʼ ganarbe stale guerra. Bidii David xquixe peʼ Dios pur guiráʼ ni napa ne guníʼ bidii Dios laa jma de biaʼ ni caquiiñeʼ (Sal. 40:5). Peru bisiaandaʼ David guiráʼ ni bidii Jehová laa. Neca nápabe stale xheelabe bíʼnibe ti cosa ni nanalaʼdxiʼ Jehová, biʼniʼ desearbe xheelaʼ sti hombre. Bat-Seba láʼ gunaa que, xheelabe láʼ Urías, ti hitita. Biʼniʼ cometer David adulteriu né Bat-Seba ne guca xiiñiʼ. Peru cadi ngasi laaca biyúbibe modo gatiʼ Urías (2 Sam. 11:2-15). ¿Xi caníʼ ique David ora biʼniʼ ndiʼ pue? ¿Ñee qué niníʼ íquebe pa cayuuyaʼ Jehová laabe la? Despué de stale iza de bíʼnibe ni ná Jehová, biyúbibe para laasibe ne naná modo gudíxhebe ni. Ra gudiʼdiʼ tiempu guníʼ David xi pecadu biʼniʼ ne guca arrepentir. ¡Nánnanu guizáʼ bidiibe xquixe peʼ Jehová pur biʼniʼ perdonar laabe! (2 Sam. 12:7-13). w21.06 17 párr. 10

Zándaca guiníʼ íquenu qué zanda gudiʼnu estudiu purtiʼ riníʼ íquenu huaxiéʼ nánnanu o caquiiñeruʼ guizíʼdinu para ganda gusíʼdinu sti binni. Pa zacá rizaacanu, guzéʼtenu chonna cosa ni zacané laanu. Primé, nanna Jehová zanda gusíʼdinu xcaadxi. Guiropa, Jesús, ni «maʼ gucuaaʼ guiráʼ xixé autoridad guibáʼ ne lu guidxilayú» cayuni mandar laanu gusíʼdinu (Mat. 28:18). Ne guionna, cadi nuunu stúbinu. Cásica Jesús, zanda guni crenu zacané Jehová laanu para gánnanu xi guininu (Juan 8:28; 12:49). Laaca zanda guinínenu superintendente de grupu de predicación stinu, ti precursor o ti publicador ni napa experiencia para gacané laanu guidxélanu binni gudiʼnu estudiu. Pa chinenu laacabe ora chigudiicabe estudiu, laaca zazíʼdinu gusíʼdinu binni. w21.07 6 párr. 12

Jma mayaca guinitilú guidxilayú malu riʼ. Nga runi, yanna nga jma naquiiñeʼ gápanu confianza jneza guiráʼ ni runi Jehová. Ne nabé risaca ndiʼ purtiʼ lu gran tribulación zándaca gudiicabe laanu instrucción ni gaca nagana para laanu guiénenu o gaca nagana para laanu chinándanu. Cadi Jehová peʼ nga guiniʼné laanu, zándaca zaquiiñebe ca xpínnibe ni runi dirigir xquídxibe para gudiicaʼ laanu instrucción. Óraca cadi naquiiñeʼ guiníʼ íquenu pa dxandíʼ de Jehová zeeda ca instrucción ca o pa cayuni ca hermanu ca ni racaláʼdxicaʼ. ¿Ñee zápanu confianza Jehová ne organización stiʼ ora maʼ nuunu lu gran tribulación la? Zánnaluʼ respuesta ca pa dede ca yanna rinándaluʼ ca instrucción ni rudii xquidxi Dios. Pa nagueendaca rinándanu ca instrucción ni rudiicabe laanu yanna, laaca zacaca zúninu lu gran tribulación. w22.02 6 párr. 15

Gucané Jehová Gedeón ne 300 hombre de tribu stiʼ para biʼniʼ ganarcaʼ ti guerra. Ne pur ngue ñándaca nuchácabe bi yánnicabe. Guyé ca hombre de tribu stiʼ Efraín ra nuu Gedeón peru cadi para guiechenecaʼ laabe, sínuque para tíndenecaʼ laabe purtiʼ qué ninábabe laacaʼ ninecaʼ laabe lu guerra que (Juec. 8:1). Gudxi Gedeón laacabe ximodo huaguu Jehová ndaayaʼ laacabe ne pur ngue biete xiana stícabe (Juec. 8:3). Guca Gedeón humilde para chuʼ xquidxi Dios tobi si. De ca hombre de tribu stiʼ Efraín que rizíʼdinu naquiiñeʼ guyúbinu gusisaca binni Jehová lugar de gusisácacabe laanu. De Gedeón la? riziidiʼ ca ni naca xaíque ndaaniʼ familia o ca ancianu pa cadxiichiné ti binni laacaʼ naquiiñeʼ guiénecaʼ xiñee cadxiichiné binni ca laacaʼ. Laaca riziidicaʼ naquiiñeʼ guni felicitarcaʼ ti binni ora biʼniʼ ti cosa galán. Caquiiñeʼ gácacabe humilde. Purtiʼ ni jma risaca nga chúʼcabe tobi si né ca hermanu. w21.07 17 párr. 10-12

Bisisaca Jehová laanu ra bizáʼ laanu casi laa. Cumu bizáʼ Dios laanu casi laa, zanda gannaxhiinu, guianu, gácanu leal ne gúninu ni jneza cásica rúnibe ni (Sal. 86:15; 145:17). Ora rúninu stipa gusihuínninu ca cualidad riʼ, rusisácanu Jehová ne rusihuínninu rudiʼnu xquixe peʼ laa (1 Ped. 1:14-16). Pa gúninu ni riuulaʼdxiʼ Bixhózenu ni nuu guibáʼ, ziuʼnu nayecheʼ ne zuni sentirnu galán. Ne cumu bizáʼ Jehová laanu casi laa la? zanda gácanu binni ni riuuláʼdxibe chuʼ ndaaniʼ familia stibe. Bizáʼ Jehová ti lugar nabé galán para laanu. Ante guzaʼbe primé hombre, bizaʼbe Guidxilayú para guibani binni ndaaniʼ ni (Job 38:4-6; Jer. 10:12). Cumu guizáʼ nachaʼhuiʼ Jehová ne riuulaʼdxiʼ gudii de ni napa la? bizaʼbe stale cosa para guibáninu galán (Sal. 104:14, 15, 24). Gatigá gulee Jehová tiempu para guiníʼ ique lu guiráʼ ni bizáʼ ne biiyabe «guizáʼ galán cani» (Gén. 1:10, 12, 31). w21.08 3 párr. 5, 6

Laanu, ca xpinni Cristu, naquiiñeʼ gacanenu binni gaca discípulo (Mat. 28:19, 20; Rom. 10:14). ¿Ñuuláʼdxinu ñúnirunu dxiiñaʼ riʼ jma jneza la? Para ganda gúninu ni, zanda guidúʼndanu folletu Gusíʼdinu ne guidúʼndanu jma jneza ne quíxhenu meta ni gacané laanu gúninu ni cazíʼdinu. Cadi guiaandaʼ laanu tobi de ca meta risaca ni zanda quixhe íquenu ugaandanu nga gápanu xcaadxi cualidad ni napa ca xpinni Cristu (Col. 3:12; 2 Ped. 1:5-8). Nanna dxíchinu guiranu riuuláʼdxinu gúninu jma lu xhiiñaʼ Jehová, jma que biaʼ rúninu ni yanna. Ndaaniʼ guidxilayú cubi stiʼ Dios, gastiʼ qué zucueeza laanu de gúninu jma lu xhiiñaʼ Jehová ne zacá ziuʼnu jma nayecheʼ ne qué ziúʼpenu triste pa qué ugaandanu xiixa meta ni gudixhe íquenu ne ni jma risaca nga zusisácanu Jehová Dios stinu ni jma nayecheʼ (1 Tim. 1:11). Nga runi, chuʼnu nayecheʼ pur ni cayúninu lu xhiiñaʼ Jehová. w21.08 24, 25 párr. 18-20

¿Ñee biniisiluʼ ndaaniʼ ti familia de testigu stiʼ Jehová la? Pa zacá ni, zándaca bisiidicabe lii de Jehová dxi nahuiiniluʼ. Biziidiluʼ laabe nga bizaʼbe guiráʼ cosa, nápabe cualidad sicarú ne racaláʼdxibe guibani guiráʼ binni ndaaniʼ ti paraísu lu Guidxilayú riʼ (Gén. 1:1; Hech. 17:24-27). Yanna, stale binni qué runi cré pa nuu Dios o qué runi crecaʼ pa laabe bizaʼbe guiráʼ cosa. Runi crecaʼ málasi guyuu guendanabani ne chaahuiʼ chaahuiʼ guca evolucionar guiráʼ cosa ni nabani. Nuu de ca binni ni riníʼ ique sicaríʼ guzacaʼ scuela roʼ. Zándaca riníʼcabe maʼ bisihuinni ciencia cadi jneza ni rusiidiʼ Biblia ne ca binni ni runi cré nuu tu bizáʼ guiráʼ cosa nga, ca binni ni qué ñé scuela, ni cadi nuu xpiaaniʼ ne ni nagueenda riguítecabe laa. Neca maʼ zinenu stale iza de cayúninu ni ná Jehová, guiranu caquiiñeʼ guquídxinu fe stinu. Pa gúninu ni la? qué zudiʼnu lugar «guchenda tuuxa [laanu] né ni zeeda si de xquendabiaaniʼ» ne riniʼcaʼ cadi dxandíʼ ni zeeda lu Biblia (Col. 2:8). w21.08 14 párr. 1-3

Bisihuinni Abel, Noé, Abrahán ne Job runi respetarcaʼ ne nadxiicaʼ Jehová. Bíʼnicabe ni ra bizuubacabe diidxaʼ, ra bisihuínnicabe fe ne ra bíʼnicabe sacrificiu. Nánnanu bíʼnicabe stipa gusisácabe laabe ne gucuaa Jehová adoración stícabe. Gudiʼdiʼ si tiempu bidii Dios Ley stiʼ Moisés, ca binni ni zá de Abrahán. Lu Ley que bidiibe laacaʼ instrucción ximodo racaláʼdxibe gaca adorarbe. Despué de guti Jesús ne biasa de lade gueʼtuʼ, maʼ qué ninabaʼ Jehová guidxi stiʼ chinanda Ley stiʼ Moisés (Rom. 10:4). Lugar de nga la? maʼ naquiiñeʼ chinándacabe «ley stiʼ Cristu» (Gál. 6:2). Cumu qué gapa ley riʼ ti lista de xi naquiiñeʼ gúnicabe ne xi cadi naquiiñeʼ gúnicabe la? nga runi naquiiñeʼ chinándacabe ejemplu stiʼ Jesús ne guiráʼ ni bisiidiʼ. Tiempu riʼ, runi ca xpinni Cristu stipa chinándacaʼ ejemplu stiʼ Cristu para gusiéchecaʼ Jehová ne gatadxí ladxidoʼcaʼ (Mat. 11:29). w22.03 20, 21 párr. 4, 5

Rucaadiaga Jehová ca xiiñiʼ. Bicaadiágabe Jesús stale biaje ora biʼniʼ orar laabe dxi guyuu lu Guidxilayú riʼ. Nánnanu gucanebe Jesús dxi gunabaʼ laabe gacanebe laa ora gucuaa decisión risaca, casi dxi gulí ca 12 apóstol stiʼ (Luc. 6:12, 13). Laaca bicaadiaga Jehová laabe dxi gudíʼdibe ra nagana. Ante guni traicionar Judas laabe gunábabe Bixhózebe gacané laabe para gudxiilube ca prueba ni chitídibe. Cadi bicaadiaga si Jehová Xiiñiʼ, sínuque laaca biseendaʼ ti ángel para cuʼ gana laabe (Luc. 22:41-44). Tiempu riʼ, laaca rucaadiaga Jehová laanu ora runi orarnu laa, ne ricábibe laanu órapeʼ caquiiñenu ni ne racanebe laanu (Sal. 116:1, 2). Ti hermana de la India, biiyaʼ ximodo bicabi Jehová ca oración stiʼ. Nabé guyuube xizaa, ngue runi gunábabe Jehová gacané laabe. Sicaríʼ guniʼbe: «Programa stiʼ JW Broadcasting^® ni biree lu beeu mayo de 2019 caníʼ xi zanda gúninu para gudxíʼlunu ca cosa ni riguu xizaa laanu, ngue peʼ nga ni caquiiñeʼ. Zaqué nga biiyaʼ bicabi Jehová oración stinneʼ». w21.09 21, 22 párr. 6, 7

¿Ñee ruxuíʼlunu pabiáʼ nagana guca para ca xpinni Cristu ni bibani lu primé siglu gusaanacaʼ ca cosa ni nápacaʼ ne chindézacaʼ sti lugar la? Caquiiñeʼ gápacabe fe purtiʼ zacaneni laacabe gápacabe confianza zudii Jehová ni caquiiñecabe. Peru gaayuʼ iza ante cuʼ ca romanu leʼ Jerusalén bidii apóstol Pablo caadxi conseju ca hebreu ne zacaneni laacaʼ. Sicaríʼ guniʼbe: «Lagusihuinni cadi nadxiitu bueltu pur modo nabánitu, sínuque lachuu nayecheʼ né ca cosa si ni nápatu. Purtiʼ ndiʼ nga ni maʼ guníʼ Dios: “Qué zusaanaʼ lii ne qué ziaanadxieeʼ de gacaniaʼ lii”. Nga runi zanda guininu né stale confianza: “Jehová nga racané naa. Qué zadxibeʼ diaʼ. ¿Xi zanda guni binni naa yaʼ?”» (Heb. 13:5, 6). ¿Xi guleendú ca xpinni Cristu ni yenanda conseju ni bidii Pablo ante cuʼ ca romanu leʼ Jerusalén? Pur yenándacabe conseju riʼ qué ñaca nagana para laacabe guiaacabe sti lugar purtiʼ gunna dxíchicabe zudii Jehová laacabe ca cosa ni caquiiñecabe. w22.01 4 párr. 7, 9

¿Ximodo nga ti binni ni riá? zándaca guiníʼ íquenu tuuxa ni nachaʼhuiʼ ne rudii de ni napa para gacané xcaadxi. Casi xa samaritanu ni bizeeteʼ Jesús lu parábola ni guníʼ. Neca naca hombre riʼ de sti guidxi, peru gucanebe ti judíu ni biree gubaanaʼ lu. Guizáʼ biá samaritanu que judíu que ora biʼyaʼ laabe, ne ngue bicaa laa gacané laabe (Luc. 10:29-37). Rusiidiʼ parábola riʼ riá Jehová laanu purtiʼ nadxii laanu ne rusihuinni riá laanu guiráʼ dxi ne rúnini gadxé gadxé modo. Rusihuinni tuuxa riá ora qué runi castigar ti binni neca nuu razón para gúnini. Riá Jehová laanu neca napa razón para guni castigar laanu. Sicaríʼ guníʼ ti hombre ni bicaa ti salmo: «Qué huayuni castigarbe laanu biaʼ ca pecadu stinu» (Sal. 103:10). Peru nuu biaje caquiiñeʼ guni disciplinar Jehová tuuxa ni maʼ biʼniʼ ti pecadu. w21.10 8 párr. 1, 2

Qué rusaana Jehová de gannaxhii ca xhamigu o ca xpinni. Rihuinni zacá ni pur ca diidxaʼ ni guníʼ rey David ne profeta Daniel. David bicaa: «Cadi gusaana de gannaxhiiluʼ ca ni runibiáʼ lii» ne «qué ziuu dxi gusaana Jehová de gannaxhii ca ni ridxibi laa». Ne Daniel guníʼ: «Jehová, Dios ni dxandíʼ, Dios ni nandxóʼ, [...] ne qué rusaana de gannaxhii ca ni nadxii laa ne rinanda ca mandamientu stibe» (Sal. 36:10; 103:17; Dan. 9:4). Casi maʼ bidúʼyanu ca, qué rusaana Jehová de gannaxhii ca xpinni ni runibiáʼ laa, ni ridxibi laa, ni nadxii laa ne ni rinanda ca mandamientu stiʼ. Ruluiʼbe cualidad riʼ xquídxibe, ca ni runi adorarcaʼ laabe modo racaláʼdxibe. Dede ante gúninu ni ná Jehová, maca bisihuínnibe nadxiibe laanu cásica nadxiibe guiráʼ binni (Sal. 104:14). Peru ra bizulú biʼniʼ adorarnu laabe, jmaruʼ si gunnaxhiibe laanu. w21.11 4 párr. 8, 9

Intiica si guizaaca, maʼ gudixhe íquenu chinándanu ca diidxaʼ ni guníʼ Jesús. Tiempu riʼ, stale binni rinanda ca líder stiʼ ca religión ni nabé runibiáʼ binni, dede xcaadxi si para guni adorárcabe laacaʼ. Stale binni rié ndaaniʼ yuʼduʼ stícabe, riziʼcaʼ libru ne rudiicaʼ stale bueltu para gacanecaʼ laacabe. Nuu tu laa runi cré guiráʼ ni rabi ca líder ca laacaʼ. ¡Zuluáʼ pa ñuuyacabe Jesús qué ñéchecabe biaʼ riéchecabe ora ruuyacabe ca líder ca! Peru laanu, ca ni dxandíʼ xpinni Jehová qué rinándanu nin ti binni. Neca runi respetarnu ca hermanu ni runi dirigir laanu, peru rinándanu ni bisiidiʼ Jesús ora guníʼ: «Guiratu bíʼchitu» (Mat. 23:8-10). Qué runi adorarnu binni, nin ti líder stiʼ religión o ti gobernante políticu. Qué runi apoyarnu laacabe, sínuque rácanu neutral ne rixélenu de guidxilayú riʼ. Lu guiráʼ ni bizéʼtenu riʼ rusihuinni ni maʼ gadxé laanu de ca binni ni riníʼ nácacaʼ xpinni Cristu (Juan 18:36). w21.10 20 párr. 7

Guiráʼ xpinni Cristu ni racalaʼdxiʼ gaca binni santo cadi naquiiñeʼ gudii lugar chuʼ xiixa ni guxheleʼ laa de Jehová ne cumu nácanu testigu stiʼ Jehová la? cadi naquiiñeʼ gúninu xiixa ni guni biidiʼ nombre stibe (Lev. 19:12; Is. 57:15). Bisihuinni ca israelita que Jehová nga Dios sticaʼ ra yenándacaʼ ca ley stibe. Levítico 18:4 ná: «Lachinanda ca ley stinneʼ, ne laguni ca cosa ni maʼ gudixheʼ gúnitu ne lachinanda ca ni. Naa nga Jehová Dios stitu». Lu capítulo 19 riete caadxi de ca cosa ni gudixhe Jehová guni ca israelita. Casi lu versículo 5 hasta 8, 21 ne 22 riete ximodo gudiicabe sacrificiu de maniʼ. Naquiiñeʼ gúnicabe ni jneza para cadi gaca biidiʼ sacrificiu que nezalú Jehová. Ra guidúʼndanu ca versículo riʼ, naquiiñeʼ gucaani laanu gusisácanu Jehová modo riuulaʼdxiʼ, casi ñaca nudiʼnu ti sacrificiu laa, casi riete ni lu Hebreos 13:15. w21.12 5, 6 párr. 14, 15

Ca guendaxheelaʼ joven, zanda guiziiditu stale de experiencia stiʼ xcaadxi guendaxheelaʼ ni huaziidiʼ gapa confianza Jehová. Nuu guendaxheelaʼ maʼ zinecaʼ stale iza de cayúnicaʼ xhiiñaʼ Dios de tiempu completu. ¿Xiñee qué guinábatu conseju laacabe pa caníʼ íquetu xi meta racaláʼdxitu ugaandatu yaʼ? Ndiʼ nga ti modo zanda gusihuínnitu nápatu confianza Jehová (Prov. 22:17, 19). Cadi guiaandaʼ laatu, ti regalu stiʼ Jehová nga guendaxheelaʼ (Mat. 19:5, 6). Racaláʼdxibe guibánicaʼ galán ne chuʼcaʼ nayecheʼ. Ca guendaxheelaʼ joven, ¿xiñee qué cueetu tiempu ne guiníʼ íquetu xi cayúnitu né xquendanabánitu? ¿Ñee cayúnitu guiráʼ ni nuu lu natu para gusihuínnitu rudiitu xquixe peʼ Jehová pur guiráʼ regalu ni huadii laatu la? Laguiniʼné Jehová, laguyubi lu Stiidxabe conseju ni caquiiñetu ne lachinanda ca ni. Pa gucaa íquetu gúnitu xhiiñaʼ Jehová lu xquendanabánitu, dxandíʼ peʼ ziuu guendaxheelaʼ stitu nayecheʼ. w21.11 18, 19 párr. 16, 18

Qué nudxiibaʼ Santiago laca laa. Qué niníʼ ique Santiago jma risaca que xcaadxi hermanu purtiʼ biʼchiʼ Jesús o pur ca privilegiu gupa, sínuque gúdxibe laacaʼ «hermanu ni nadxieeʼ caʼ» (Sant. 1:16, 19; 2:5). Guniʼbe laaca rucheebe. Ni rizíʼdinu nga: cadi guianda laanu laaca rucheʼnu. ¿Xiñee cadi jneza guiníʼ íquenu jma risácanu que ca estudiante stinu yaʼ? Pa guininu qué rucheʼnu, zándaca guiníʼ ique estudiante stinu qué zanda guni ni ribeza Dios de laa. Zanda gábinu ca estudiante stinu laaca nuu biaje huayaca nagana para laanu chinándanu xiixa principiu ni zeeda ndaaniʼ Biblia, peru ora rábinu laabe ximodo huayacané Jehová laanu gúninu xiixa cambiu la? zacanenu laabe gúʼyabe zanda gúnibe xhiiñaʼ Jehová. w22.01 11, 12 párr. 13, 14

Ra jma guiníʼ íquenu cásica riníʼ ique Jesús jma zusihuínninu ca cualidad stibe lu ca cosa ni rúninu (Heb. 1:3). Zándaca guiníʼ íqueluʼ: «Peru Jesús perfectu laa. ¡Qué ziuu dxí gacaʼ casi laabe!». Pa zacá caníʼ íqueluʼ, cadi guiaandaʼ lii guionnaʼ cosa riʼ. Primé, guyaluʼ para gácaluʼ casi Jehová ne Jesús. Nga runi, zanda cuiluʼ chinándaluʼ ejemplu stícabe dede biaʼ gándatiʼ (Gén. 1:26). Guiropa, espíritu santu stiʼ Dios nga stipa ni jma nadipaʼ. Ne zanda gacaneni lii gúniluʼ cosa ni qué ñuu dxi niníʼ íqueluʼ ñúniluʼ. Ne guionna, cadi cabeza diʼ Jehová gusihuínninu ca cualidad stiʼ espíritu modo peʼ biʼniʼ Jesús ni purtiʼ laa guca perfectu. Bietenalaʼdxiʼ zudii Bixhózenu ni nadxii laanu ca ni chiguibani lu Guidxilayú riʼ 1,000 iza para gácacaʼ perfectu (Apoc. 20:1-3). Ni canabaʼ Jehová laanu nga, gúninu stipa biaʼ gándatiʼ ne gápanu confianza zacané laanu. w22.03 9 párr. 5, 6

Runi orarnu para chuʼnu gaxha de Jehová peru xcaadxi cosa ni zanda gúninu nga guni estudiarnu Biblia ne cadi guiáʼdxanu reunión. ¿Ñee nuu ni zanda gúninu para cadi gaca distraernu ora maʼ cayuni estudiarnu ne ora maʼ nuunu lu reunión la? Guiníʼ íquenu ndiʼ: «¿Xii nga ni runi distraer laanu?». Zanda gácani ti correu ti mensaje o ti llamada lu teléfono o lu tableta stinu. Pa cayuni estudiarnu o nuunu ra reunión ne gudiʼnu cuenta maʼ gadxé ni caníʼ íquenu la? guinábanu Jehová gacané laanu. Zándaca gaca nagana para laanu gaca concentrarnu, peru nabé risaca gúninu ni. Guni orarnu Jehová ne guinábanu laa gudii laanu paz stiʼ purtiʼ zápani ladxidoʼno ne xquendabiaaninu (Filip. 4:6, 7). w22.01 29, 30 párr. 12-14

Laaca qué niná rey Uzías nicaa conseju ni bidiicabe laa. Gucaláʼdxibe nuzaaquibe inciensu, guyuube ti lugar ndaaniʼ templu que, ra randa si riuu ca sacerdote. Sicaríʼ gudxi ca sacerdote que laabe: «¡Uzías, cadi lii nga naquiiñeʼ guzaaquiluʼ inciensu para Jehová! Ca sacerdote si zanda guzaaquiʼ inciensu». ¿Xi biʼniʼ Uzías óraque yaʼ? Biblia ná guizáʼ bidxiichibe. ¿Xiñee qué nicaabe conseju que yaʼ? Zándaca purtiʼ cumu laabe ngue rey la? guníʼ íquebe zanda gúnibe guiráʼ ni gacaláʼdxibe. Peru cadi zaqué diʼ guníʼ ique Jehová. Pa ñaca Uzías humilde, nicaa conseju ni bidiicabe laa ne nagueendaca niree de ndaaniʼ templu que la? ñándaca ñuni perdonar Jehová laabe. Peru cumu qué nuzuubabe diidxaʼ la? biseendaʼ Jehová lepra luguiabe ne gúpabe guendahuará ca dede dxi gútibe (2 Crón. 26:16-21). ¿Xi rizíʼdinu de ni bizaaca Uzías yaʼ? Intiica si asignación nápanu, pa qué chinándanu ca conseju ni zeeda lu Biblia la? qué zaca xhamigu Jehová laanu. w22.02 9 párr. 7

Binni ni qué naʼ gusaana modo guca dxiqué, riníʼ ique ne runi ni rinabaʼ xcuerpu laa o laani nga pecadu ni gulené (Col. 3:9). Zándaca nagueenda ridxiichibe, ruyúbibe puru si para laabe, qué rudiibe xquixe ne orgulloso laabe. Zándaca riuuláʼdxibe gúʼyabe pornografía, película inmoral o ra ridinde binni. Zándaca nápabe cualidad galán ne nánnabe cadi jneza ni rúnibe ne ni riniʼbe, peru raca nagana para laabe guchaabe (Gál. 5:19-21; 2 Tim. 3:2-5). Cumu binni ruchee laanu la? raca nagana para laanu cadi guiníʼ íquenu cosa malu ne gápanu deseu ndaaniʼ ladxidoʼno, nuu biaje zaninu o zúninu xiixa ne despué zaca arrepentirnu (Jer. 17:9; Sant. 3:2). Peru ra gusaananu modo gúcanu dxiqué, maʼ rucueezanu laanu ne maʼ qué rúninu cosa ni cadi jneza (Is. 55:7). w22.03 3 párr. 4, 5

Ancianu caʼ, laguuyaʼ ca cualidad galán napa ca hermanu. Dxandíʼ nga binni ruchee laacabe, peru laaca rusihuínnicabe cualidad galán (Filip. 2:3). Nuu biaje napa xidé gudiitu conseju tuuxa, peru cásica biʼniʼ apóstol Pablo lagapa cuidadu ni guiniʼtu ne ni gúnitu, purtiʼ zándaca guchiichi ni ca hermanu. Laguiníʼ ique nadxii hermanu ca Jehová, cayuni xhiiñabe de guidubi ladxidóʼ ne zanda guchaa. Ora ruuyaʼ ca ancianu ca cualidad galán napa ca hermanu, racanecaʼ para gannaxhiisaa ca hermanu de congregación ne riuucaʼ tobi si. Qué ribeza diʼ Jehová gácatu perfectu, ni ribézabe nga cadi gusaanatu laabe ne gúnitu xhiiñatu jneza (1 Cor. 4:2). Naquiiñeʼ gánnatu rusisaca Jehová dxiiñaʼ ni rúnitu, purtiʼ sicaríʼ nabe lu Hebreos 6:10: «Qué zusiaandaʼ guiráʼ ni maʼ bíʼnitu pur ca hermanu, ne dede yanna cayúnirutu ni purtiʼ rusihuínnitu nadxiitu nombre stibe». w22.03 31 párr. 19, 21