Mayo

Despué de biiyaʼ Juan grupu ni nuu guibáʼ, laaca biiyabe «stale binni». Maʼ gadxé grupu riʼ de 144,000 que, purtiʼ guirutiʼ zanda ugabaʼ laacabe. ¿Xi nánnanu de grupu riʼ yaʼ? Juan guníʼ: «Laacabe nga ca ni gudiʼdiʼ lu stale yuubaʼ ne maʼ gudiibicabe xhábacabe ne maʼ bisiquíchicabe ni né rini stiʼ Dendxuhuiiniʼ» (Apoc. 7:14). Tidiʼ si ca binni riʼ o gran muchedumbre lu gran tribulación, zabánicaʼ lu Guidxilayú riʼ ne zacaacaʼ stale ndaayaʼ (Sal. 37:​9-11, 27-29; Prov. 2:​21, 22; Apoc. 7:​16, 17). Pa gulí Dios laanu para chuunu guibáʼ o para guibáninu lu Guidxilayú, ¿ñee ridúʼyanu né laanu nuunu «lu foto» ni riete lu capítulo gadxe stiʼ Apocalipsis la? o ¿ñee runi crenu zaca cumplir ca cosa ni riete lu Apocalipsis la? Guizáʼ galán ca ndaayaʼ ni chiguicaa guiropaʼ grupu riʼ. Ziuʼnu nayecheʼ purtiʼ gudixhe íquenu gúninu ni ná gobiernu stiʼ Jehová. w22.05 16 párr. 6, 7

¿Ñee huacaaluʼ xiixa decisión risaca la? Pa zacá ni, zándaca gunábaluʼ Jehová gudii lii guendabiaaniʼ purtiʼ nánnaluʼ caquiiñeluʼ ni (Sant. 1:5). Sicaríʼ bicaa rey Salomón: «Sabiduría nga ni jma risaca» (Prov. 4:7). Sabiduría o guendanuuxpiaaniʼ ni caniʼbe raríʼ nga ni zeeda de Jehová. Peru ¿ñee zanda gacané guendabiaaniʼ ni zeeda de Dios laanu para gudxíʼlunu ca guendanagana stinu la? Zanda pue. Ti modo zanda gácanu binni nuu xpiaaniʼ nga guni estudiarnu ne chinándanu ni bisiidiʼ chupa hombre ni guizáʼ nuu xpiaaniʼ. Primeru, guininu de Salomón. Biblia ná bidii Dios Salomón stale guendabiaaniʼ ne guendariene (1 Rey. 4:29). Ne guiropa nga Jesús, hombre ni jma nuu xpiaaniʼ ni huabani lu Guidxilayú riʼ (Mat. 12:42). Sicaríʼ caníʼ ti profecía de laabe: «Luguiabe ziuu espíritu stiʼ Jehová, nga runi zácabe tobi ni nuu xpiaaniʼ, zácabe tobi ni guizáʼ riene» (Isa. 11:2). w22.05 20 párr. 1, 2

Neca maʼ huaniisinu zanda quíxhenu meta ni zanda ugaandanu. Guzéʼtenu ni bizaaca ti hermana de 75 iza ni láʼ Beverley. Cumu huarabe la? raca nagana para laabe sabe galán. Peru racaláʼdxibe guni predicarbe lu campaña para Conmemoración. ¿Xi bíʼnibe yaʼ? Gudixhe Beverley meta ni zanda ugaanda, ne ora bigaandabe ni la? guyuube nayecheʼ. Ni bíʼnibe riʼ gucané ni xcaadxi hermanu guni predicarcaʼ jma. Rusiidiʼ ca ni bizaacabe riʼ laanu rusisaca Jehová stipa ni runi ca hermanu ni maʼ huaniisi neca nuu de laacaʼ huaracaʼ (Sal. 71:17). Quíxhenu meta ni zanda ugaandanu. Gápanu cualidad ni riuulaʼdxiʼ Jehová. Gápanu habilidad ti zacá ganda iquiiñeʼ Dios ne organización stiʼ laanu. Guyúbinu xcaadxi modo gacanenu ca hermanu stinu. Pa gúninu ca ndiʼ, zaguu Jehová ndaayaʼ laanu ne cásica Timoteo, zuuyaʼ ca hermanu pabiáʼ ziyuni progresarnu (1 Tim. 4:15). w22.04 27 párr. 18, 19

Yanna, pa neca maʼ bíʼnitu stale stipa para gacanetu ca xiiñitu peru tobi de laacaʼ gabi laatu maʼ qué racalaʼdxiʼ guni ni ná Jehová yaʼ. Cadi guiníʼ íquetu qué risaca guiráʼ stipa ni bíʼnitu. Maʼ bidii Jehová libertad guiráʼ binni dede né ca xiiñitu para cuicaʼ pa zúnicaʼ ni nabe o coʼ. Cadi guireetu gana, zándaca ziuu ti dxi zabiguétabe. Laguietenalaʼdxiʼ ni guníʼ Jesús de hijo pródigo (Luc. 15:​11-19, 22-24). Bireechú hombrehuiiniʼ riʼ, peru despué biguetaʼ bíʼnibe ni jneza. Padre caʼ, maʼ bidii Jehová laatu ti privilegiu guizáʼ naroʼbaʼ, laani nga gacanetu ca xiiñitu gácacaʼ xpínnibe (Sal. 78:​4-6). Nánnadu ti dxiiñaʼ nadipaʼ ni, nga runi cayuni felicitardu laatu de guidubi ladxidoʼdo purtiʼ cadi gusaana de gúnitu guiráʼ ni nuu lu natu para gacanetu ca xiiñitu gannaxhiicaʼ Jehová ne gusiniisitu laacaʼ casi ná ca conseju stiʼ (Efes. 6:4). Pa gúnitu ni, laganna dxichi guizáʼ zusiéchetu Bixhózetu ni nuu guibáʼ pur dxiiñaʼ ni cayúnitu. w22.05 30-31 párr. 16-18

Pa guiranu gúninu ni ná Jehová de guidubi ladxidoʼno, zacanenu chuʼ congregación tobi si. Nga nga ni biʼniʼ ca xpinni Cristu ni bibani lu primé siglu. Gúpacabe gadxé gadxé habilidad ne responsabilidad (1 Cor. 12:​4, 7-11). Peru neca zacá qué nuyúbicabe nidíʼdicabe lú xcaadxi, sínuque gudxi Pablo laacabe lu carta ni bicaa para ca xpinni Cristu de Éfeso, cada tobi de laacabe «gacané congregación stiʼ Cristu guzuhuaa chaahuiʼ». Ne laaca guniʼbe: «Pa jneza gúninu dxiiñaʼ ni maʼ gucuaanu la? cada dxi zácanu jma nadipaʼ ne zannaxhiisaanu» (Efes. 4:​1-3, 11, 12). Ni yenanda ca conseju stiʼ Pablo gucanecaʼ chuʼ congregación tobi si, ngueca nga rizaacaʼ ndaaniʼ ca congregación nuu tiempu riʼ. Quixhe íquenu cadi guchaaganu laanu né xcaadxi hermanu. Lugar de nga la? chinándanu ejemplu stiʼ Jesús ne gúninu stipa gusihuínninu ca cualidad stiʼ. Cadi guiaandaʼ lii «jneza runi Dios ne qué zusiaandaʼ guiráʼ» ni maʼ bíʼniluʼ pur laa (Heb. 6:10). Cadi gusaana de gúniluʼ ni ná Jehová né guendanayecheʼ, ne cadi guiaandaʼ lii rusisaca Jehová guiráʼ stipa ni rúniluʼ para gusiécheluʼ laabe. w22.04 14 párr. 15, 16

¿Cadi dxandíʼ ratadxí ladxidoʼno purtiʼ cadi laanu runi decidirnu pa zuni perdonar Jehová tuuxa o coʼ la? Neca zacá, nuu xiixa ni naquiiñeʼ gúninu. ¿Xi laani yaʼ? Guiníʼ íquenu bicheené ti binni laanu ne nabé naroʼbaʼ ni biʼniʼ. Zándaca gunábabe laanu guni perdonarnu laabe o coʼ, peru intiica si guizaaca naquiiñeʼ guni perdonarnu laabe, ndiʼ riníʼ cadi guidaʼnu xiana né laabe. Ni dxandíʼ nga zándaca ziné tiempu para guni perdonarnu laabe jmaruʼ si pa guizáʼ bininabe laanu. Sicaríʼ ná La Atalaya 15 de septiembre iza 1994: «Guni perdonarnu tuuxa qué riníʼ diʼ ni zazanu guininu ni bíʼnibe laanu. Para ti xpinni Cristu la? guni perdonar riniʼni gapa confianza Jehová ne gusaana guirani lu nabe. Jehová nga Juez chaʼhuiʼ lu guidubi naca universu ne zúnibe ni jneza pa cuézanu laabe». w22.06 9 párr. 6, 7

Guníʼ Jehová tiempu riʼ zucaalisaa ti grupu de binni ni zeeda «de guiráʼ nación, tribu, guidxi ne idioma» ne zuni adorarcaʼ laabe. Laacabe nga ti grupu de «stale binni» o ti gran muchedumbre (Apoc. 7:​9, 10). Lu grupu riʼ nuu hombre, gunaa, xcuidi, binni de gadxé gadxé raza, idioma ne guidxi. Ne guirácabe nácacabe ti familia ni nuu tobi si lu guidubi Guidxilayú (Sal. 133:1; Juan 10:16). Laaca runi predicárcabe né stale gana, nuucabe listu para guiníʼcabe de ca cosa galán ni chiguni Jehová lu Guidxilayú riʼ (Mat. 28:​19, 20; Apoc. 14:​6, 7; 22:17). Pa né lii nga nuuluʼ lu grupu riʼ, zándaca guizáʼ rusisácaluʼ guiráʼ ni cabézanu. Qué racalaʼdxiʼ Binidxabaʼ guicaanu ca cosa sicarú ni cabézanu. Racaláʼdxibe guiníʼ íquenu qué zuni cumplir Jehová ca promesa stiʼ. Pa gucaabe laanu guiníʼ íquenu sicaríʼ la? maʼ qué zácanu nadxibalú ne zándaca gusaana de gúninu ni ná Jehová. w22.06 20, 21 párr. 2, 3

Pa dxandíʼ runi crenu maʼ cadi candaa zabáninu galán la? zacané ni laanu gudxíʼlunu ca guendanagana ni nápanu. Cadi guiaandaʼ laanu guníʼ Jesús zazananda binni laanu (Juan 15:20). Ra guiníʼ íquenu guiráʼ ni cayuni prometer Jehová gudii laanu, racané ni laanu cadi guiréʼchunu de lu neza stiʼ. Guidúʼyanu ximodo gucané esperanza ca Jesús para cadi gucheené Dios neca nanna nabé feu modo chigati. Lu Pentecostés stiʼ iza 33, guníʼ apóstol Pedro ti profecía ni zeeda lu Salmos ni rusihuinni pabiáʼ nuudxí Jesús ne napa confianza Dios ca dxi ante gatiʼ. Ndiʼ nga profecía bizeeteʼ Pedro: «Ne zapaʼ confianza lii lu xquendanabaneʼ, purtiʼ qué zusaanaluʼ naa ndaaniʼ Baʼ, ne qué zudiiluʼ lugar guiuʼdxuʼ cuerpu stiʼ siervu stiluʼ ni qué rusaana lii. [ . . . ] Ne zuchá típaluʼ ladxiduáʼ de guendanayecheʼ ora maʼ nuaaʼ nezaluluʼ» (Hech. 2:​25-28; Sal. 16:​8-11). Dxandíʼ peʼ biʼniʼ cré Jesús zandisaʼ Bixhoze laa de lade gueʼtuʼ ne zabiguetaʼ guibáʼ ra nuu Bixhoze (Heb. 12:​2, 3). w22.10 25 párr. 4, 5

Ti biaje gudxi apóstol Santiago ne Juan jñaacaʼ guinabaʼ Jesús gudii laacabe ti puestu risaca lu Reinu stiʼ Dios (Mat. 20:​20, 21). Bisihuinni ni biʼniʼ guiropaʼ apóstol riʼ nabé orgulloso laacaʼ ne racaláʼdxicaʼ guisácacaʼ jma que xcaadxi apóstol que (Prov. 16:18). Cadi Santiago ne Juan si nga cadi jneza guníʼ íquecaʼ. ¿Xi biʼniʼ xcaadxi apóstol que yaʼ? Biblia ná: «Ora binadiaga xcaadxi que ni, bidxiichinecaʼ xhupa que» (Mat. 20:24). Guiníʼ íquenu modo gudinde diidxacabe. ¿Xi biʼniʼ Jesús yaʼ? Qué nidxiichi. Qué niníʼ diʼ Jesús maʼ qué zácacabe apóstol stiʼ ne chiyubi xcaadxi hombre ni qué rusaana de gannaxhii ne ni jma humilde para gácacaʼ apóstol stibe. Laaca qué nidindené Jesús laacabe, sínuque guniʼné laacabe né diidxaʼ nadóʼ purtiʼ nanna racaláʼdxicabe gúnicabe ni jneza (Mat. 20:​25-28). w23.03 28, 29 párr. 10-13

Guníʼ ique guiráʼ ni maʼ bíʼniluʼ, zándaca maʼ xadxí de cayuni estudiarluʼ Biblia ne maʼ bidiiluʼ cuenta laani nga Stiidxaʼ Dios. Peru ni jma risaca nga, maʼ runibiaʼluʼ ne nadxiiluʼ binni ni guníʼ xi guicá lu Biblia. Cumu guizáʼ nadxiiluʼ Jehová la? gudixhe íqueluʼ gaca dedicarluʼ ne chuʼnísaluʼ. ¡Ne galán peʼ bíʼniluʼ ni! Zándaca ante chuʼnísaluʼ gudíʼdiluʼ lu xiixa guendanagana ni bicaa lii gusihuínniluʼ pa nápaluʼ fe. Peru ra tidiʼ tiempu zadxaagaluluʼ xcaadxi guendanagana. Zuyubi Binidxabaʼ modo gusaana de gannaxhiiluʼ Jehová ne guixéleluʼ de laa (Efes. 4:14). Cadi gudiiluʼ lugar guireenebe xtémabe. Cadi gusaana de guni progresarluʼ, ndiʼ riníʼ naquiiñeʼ gácaluʼ ti binni ni maʼ huaniisi lu Stiidxaʼ Dios (Heb. 6:1). w22.08 2 párr. 1, 2

Guiranu cadi naquiiñeʼ guininu ni rizaaca ndaaniʼ familia stinu. Guzéʼtenu ti ejemplu, zándaca runi xheelaʼ ti hermanu xiixa cosa ni rucaa laa guxidxi. Cumu nadxii hermanu riʼ xheelaʼ qué zusituí lube ne qué zazá zaníʼ ni rúnibe (Efes. 5:33). Cadi naquiiñeʼ guiaandaʼ ca padre riuulaʼdxiʼ ca xiiñicabe ni naca adolescente guni tratárcabe laacaʼ né respetu. Nga runi, qué zuzituícabe lucaʼ ora guiníʼcabe xiixa cosa cadi jneza rúnicaʼ nezalú stiʼ binni (Col. 3:21). Ne ca xcuidi naquiiñeʼ chuʼcaʼ cuidadu cadi guiniʼcaʼ cosa ni gusituí lú familia sticaʼ. Pa guiráʼ guni stipa cadi guiníʼ cosa ni bizaaca ndaaniʼ familia stiʼ, ziuu familia ca tobi si. w22.09 10 párr. 9

Jehová peʼ guniʼné Job ne gúdxibe laa pabiáʼ nuu xpiaanibe ne rápabe ca ni bizaʼbe. Bizeetebe de stale maniʼ (Job 38:​1, 2; 39:​9, 13, 19, 27; 40:15; 41:​1, 2). Laaca biseendaʼ Jehová Elihú para cuʼ gana ne quixhedxí ladxidóʼ Job. Bisietenalaʼdxiʼ hombre joven riʼ laabe riguu ndaayaʼ Dios ca ni runi ni ná neca cadxaagalucaʼ guendanagana. Peru laaca gucalaʼdxiʼ Jehová gudii Elihú laabe caadxi conseju. Né diidxaʼ nadóʼ gucané Elihú Job cadi guiníʼ ique puru si ni cazaaca, bisietenaláʼdxibe laa guizáʼ napa Jehová poder purtiʼ laa nga bizáʼ guidubi naca universu. Laaca gunabaʼ Jehová Job guni orar pur guionnaʼ xhamigu, ca ni bichee que (Job 42:​8-10). Tiempu riʼ, ¿ximodo racané Jehová laanu ora cadídinu lu guendanagana? Tiempu riʼ, qué riniʼné diʼ Jehová laanu cásica guniʼné Job. Peru riquiiñebe Stiidxabe, Biblia, para gúnibe ni (Rom. 15:4). w22.08 11 párr. 10, 11

Ndaaniʼ congregación de Roma guyuu stale xpinni Cristu judíu ne ni zeeda de xcaadxi guidxi. Cumu maʼ cadi zinándacabe Ley stiʼ Moisés la? maʼ randa rócabe caadxi guendaró ni biʼniʼ prohibir Ley que (Mar. 7:19). Guyuu caadxi xpinni Cristu judíu ni qué nuchiiñaʼ conciencia sticaʼ laacaʼ ne gudocaʼ ca guendaró que, peru guyuu xcaadxi xpinni Cristu judíu ni guníʼ ique cadi jneza ni. Ne pur ngue maʼ qué ñuu congregación que tobi si. Bisiene Pablo laacabe pabiáʼ risaca nga chúʼcabe tobi. Gucané Pablo ca hermanu gúʼyacaʼ zanda guniná ca tipu guendanagana riʼ laacaʼ ne congregación (Rom. 14:​19, 20). Laapebe guyuube dispuestu guchaabe para cadi gúnibe xiixa ni gusirá fe stiʼ ca hermanu (1 Cor. 9:​19-22). Cásica Pablo, laanu laaca zanda gacanenu xcaadxi ne chuʼnu tobi si pa qué guyúbinu gaca ni racaláʼdxinu. w22.08 22 párr. 7

¿Cadi dxandíʼ rúninu stipa para ugaandanu xiixa meta ni maʼ gudíxhenu la? Pue ngaca nga naquiiñeʼ gúninu pa racaláʼdxinu gúninu ni jneza. Ne cadi guiaandaʼ laanu, zacané Jehová laanu né stale paciencia para guni progresarnu ne gúninu ni jneza ra zidiʼdiʼ dxi (Sal. 84:​5, 7). Né stale guendarannaxhii rusietenalaʼdxiʼ Jehová laanu cadi nagana chinándanu ca mandamientu stiʼ (1 Juan 5:3). Rapa ca ni laanu ne caquiiñenu ca ni guiráʼ dxi. Guiníʼ íquenu de armadura espiritual ni bizeeteʼ apóstol Pablo (Efes. 6:​14-18). ¿Xi parte de armadura ca nga rapa ladxidoʼno yaʼ? «Coraza, laa ni nga ni jneza», ne zeeda gaca ni ca ley stiʼ Jehová. Cásica rapa ti coraza ladxidóʼ binni, zacaca rapa ca ley stiʼ Jehová ladxidoʼno ni zeeda gaca ni nácanu pur dentru. Nga runi, guizáʼ risaca cadi gusiáʼndanu coraza stinu ora gácunu armadura espiritual ca (Prov. 4:23). w22.08 29 párr. 13, 14

Maʼ raca stale iza, huayacané Stiidxaʼ Dios ca xpinni. ¿Ximodo yaʼ? Biiyaʼ Jehová guni binni copia stiʼ Stiidxaʼ. Ca binni ni biʼniʼ copia que nácacaʼ binni ruchee, peru gúpacaʼ stale cuidadu ora bíʼnicaʼ dxiiñaʼ riʼ. Sicaríʼ guníʼ ti hombre ni runi estudiar chaahuiʼ Biblia de Escrituras Hebreas: «Zanda guni crenu gastiʼ nin ti libru ni maʼ xadxí de gucuá ni huayaca copiar biaʼsi peʼ casi laani». Nga runi nánnanu cá guiráʼ ni guníʼ Jehová luni. «Guiráʼ regalu sicarú ne guiráʼ cosa nachaʼhuiʼ» zeeda ni de Jehová ne Biblia nga tobi de ca regalu jma risaca bidiibe laanu (Sant. 1:17). Ora rudii tuuxa laanu ti regalu rusihuinni ni runibiaʼbe laanu ne nánnabe caquiiñenu ni. Nga nga rizaaca né Biblia. Ora ridúʼndanu ni rizíʼdinu stale de Jehová. Rudiʼnu cuenta runibiáʼ chaahuibe laanu ne nánnabe xi caquiiñenu. w23.02 2, 3 párr. 3, 4

¿ÑEE ruxuíʼlunu pabiáʼ sicarú zaca dxi maʼ guzulú guiasa ca binni ni maʼ guti lu Guidxilayú dxi maʼ guni mandar Cristu ti mil iza la? Guiranu, ca ni maʼ guti ti binni ni nadxiinu, racaláʼdxinu guidúʼyanu laacabe sti biaje. Ne ngaca racalaʼdxiʼ Jehová (Job 14:15). Guiníʼ íquenu panda binni ziecheʼ lu guidubi Guidxilayú riʼ ora guʼyaʼ familia stiʼ sti biaje. «Ca ni biʼniʼ ni jneza» ni maʼ cá lá lu libru de guendanabani, ziásacaʼ para guicaacaʼ guendanabani (Hech. 24:15; Juan 5:29). Zándaca stale de ca binni ni nadxiinu ni maʼ guti zácacaʼ primé de ca ni guiasa lu Guidxilayú riʼ. Ne ca binni «ni qué ñuni ni jneza», ni qué ñapa oportunidad de ñunibiáʼ Jehová ne ñuni ni nabe ante gatiʼ la? ziásacaʼ «para gaca juzgarcaʼ». Guiráʼ ca binni ni guiasa de lade gueʼtuʼ, zaziidicaʼ stale cosa (Is. 26:9; 61:11). Nga runi, ziuu ti programa lu guidubi Guidxilayú ra zaziidiʼ binni (Is. 11:10). w22.09 20 párr. 1, 2

Maʼ bisihuinni Jehová jma napa poder que ca gobernante ni rieeguʼ para gucaalucaʼ laabe. Gudíndebe pur ca israelita ne gucanebe laacaʼ guinitilú 31 rey cananeu ni bieeguʼ para gucaalú laacaʼ. Ne laaca gucanebe ca israelita guni ganarcaʼ stale layú stiʼ Tierra Prometida (Jos. 11:​4-6, 20; 12:​1, 7, 24). Stale biaje maʼ bisihuinni Jehová laa nga ni jma risaca. Guzéʼtenu yanna ni bizaaca sti rey de Babilonia ni láʼ Nabucodonosor. Bichabe naróʼ stibe pur stipa stibe, autoridad ni nápabe ne gloria stibe, ne qué ñácabe humilde ne niniʼbe Jehová si nga naquiiñeʼ guisaca, ngue runi biʼniʼ Jehová cheʼ xpiaanibe. Despué de biguetaʼ xpiaaniʼ Nabucodonosor, bisisaca Dios ni nuu jma luguiáʼ lu guidubi naca Guidxilayú ne gúnnabe qué zusaana Jehová de guni mandar. Ne guniʼbe guirutiʼ zanda gucueeza Dios para cadi guni ni cá ique guni (Dan. 4:​30, 33-35). Sicaríʼ guníʼ ti hombre ni bicaa salmo: «Nayecheʼ nuu guidxi ni napa Jehová casi Dios stiʼ, guidxi ni maʼ gulí para gaca herencia stiʼ» (Sal. 33:​10, 12). ¡Guizáʼ racané ca diidxaʼ riʼ laanu para cadi guchéʼnenu Jehová! w22.10 15, 16 párr. 13-15

Ra gánnanu cayaca cumplir stale de ca profecía ni ruzeeteʼ Biblia racané ni laanu gánnanu zaca cumplir stale de ca profecía ni chigaca ca dxi ni zeeda ca. Runi sentirnu casi biʼniʼ sentir hombre ni bicaa Salmo ora gudxi Jehová: «Racaladxeʼ gulaluʼ naa, purtiʼ stiidxaluʼ nga esperanza stinneʼ» (Sal. 119:81). Lu Biblia riete, cumu nadxii Jehová laanu la? cudii laanu «ti futuro ne ti esperanza» (Jer. 29:11). Esperanza ni nápanu de guibáninu galán despué, zácani pur ca promesa ni maʼ guníʼ Jehová ne cadi pur ca ni maʼ guníʼ binni. Cadi gusaana de guni estudiarnu ca profecía ni zeeda lu Biblia para gaca confianza ni nápanu Stiidxaʼ Dios jma naguidxi. Sti razón nápanu para gápanu confianza Biblia nga purtiʼ racané ni ca binni ni rinanda ca conseju stini (Sal. 119:​66, 138). Guzéʼtenu ti ejemplu, ca guendaxheelaʼ ni mayaca gaca divorciar, yanna maʼ nuucaʼ nayecheʼ ne tobi si. Ca xiiñiʼ ca guendaxheelaʼ riʼ nabánicaʼ nayecheʼ purtiʼ nánnacaʼ nadxii bixhózecaʼ ne jñaacaʼ laacaʼ ne cayápacabe laacaʼ (Efes. 5:​22-29). w23.01 5 párr. 12, 13

Guiníʼ íquenu ca cosa ni maʼ biʼniʼ Jehová pur laanu. ¿Ñee maʼ bidúʼyanu ximodo maʼ guca cumplir caadxi de ca promesa stiʼ Jehová lu xquendanabáninu la? Guzéʼtenu ti ejemplu, biʼniʼ prometer Jesús zudii Bixhoze laanu guiráʼ ni caquiiñenu para guibáninu (Mat. 6:​32, 33). Laaca guníʼ Jesús zudii Jehová laanu espíritu santu pa guinábanu ni laa (Luc. 11:13). Maʼ biʼniʼ cumplir Jehová ca promesa riʼ. Ne zándaca rietenaláʼdxinu maʼ biʼniʼ cumplirbe ca promesa riʼ lu xquendanabáninu; maʼ biʼniʼ perdonarbe laanu, maʼ gudixhedxibe ladxidoʼno ne qué rusaana de gudiibe laanu guendaró espiritual (Mat. 6:14; 24:45; 2 Cor. 1:3). Pa guiníʼ íquenu guiráʼ ni maʼ biʼniʼ Jehová pur laanu, zaguidxi esperanza ni nápanu lu ni chigúnibe maʼ cadi candaa. Nga runi biaʼsi nga ni guníʼ ti hombre ni bicaa salmo: «Nayecheʼ nga [ . . . ] ni napa esperanza Jehová Dios stiʼ, [ . . . ] ni siempre runi ni riníʼ» (Sal. 146:​5, 6). w22.10 27 párr. 15; 28 párr. 17

Tiempu riʼ, ¿ñee laaca cayaca cumplir profecía ra caníʼ zaca adorar Dios modo racalaʼdxiʼ la? Laaca pue. Dede lu iza 1919, millón de binni caree de Babilonia guidxi roʼ, laani nga guiráʼ religión ni cadi dxandíʼ ni nuu lu Guidxilayú. Maʼ nuu ca binni riʼ ndaaniʼ ti paraísu espiritual, ti lugar jma galán que Tierra Prometida ni gucuaa ca israelita que (Is. 51:3; 66:8). Dede iza 1919, maʼ nuu ca ungidu ndaaniʼ paraísu espiritual. Ra maʼ gudiʼdiʼ tiempu, ca xpinni Cristu ni cabeza guibani ndaaniʼ Guidxilayú, «xcaadxi dendxuʼ», laaca cayuucaʼ ndaaniʼ paraísu espiritual ne huacaacaʼ stale ndaayaʼ ni zeeda de Jehová (Juan 10:16; Is. 25:6; 65:13). Ra tiica si nabézanu zanda chuʼnu ndaaniʼ paraísu riʼ pa gúninu ni ná Jehová modo racalaʼdxiʼ ne de guidubi ladxidoʼno. w22.11 11, 12 párr. 12-15

¿Ñee raca nagana para lii guiéneluʼ naca Jehová «ti Dios ni qué ziuu dxi guinitilú» la? (Is. 40:28). Pa zacá cazaacaluʼ, cadi lii si cazaacaluʼ ni. Ti biaje guníʼ Elihú qué rugaanda xpiaaniʼ binni guiene panda iza nabani Jehová (Job 36:26). Yanna, ¿ñee cadi tisi qué riénenu xiixa riníʼ nga cadi dxandíʼ ni la? Guzéʼtenu ti ejemplu, zándaca qué riénenu ximodo riáʼ biaaniʼ ne ximodo redandá ni dede ra nuunu, peru nánnanu nuuni. Zacaca nga laanu, zándaca qué riénenu xiñee qué gapa Jehová ra ruzulú ne ra riluxe. Peru ni dxandíʼ nga qué ziuu dxi guinitilube. Cadi guiaandaʼ laanu, cadi tisi qué riénenu xiixa cosa de Jehová riníʼ nga cadi dxandíʼ ni rusiidiʼ Biblia de laabe (Rom. 11:​33-36). Ne laaca maca nuube ante chuʼ universu, ra nuu gubidxa ne xcaadxi beleguí. Ne laabe nga «bichiaabe guibáʼ» purtiʼ maca nuube (Jer. 51:15). w22.12 2, 3 párr. 3, 4

Zándaca nuu biaje guinábacabe laanu guni orarnu nezalú xcaadxi. Guzéʼtenu ti ejemplu, zándaca guinabaʼ ti hermana compañera stiʼ guni oración ora chigudiicaʼ ti estudiu. Cumu qué runibiaʼ peʼ compañera ca estudiante ca la? zándaca jma galán gúnibe últimu oración. Purtiʼ zacá zanda guzeetebe xi caquiiñeʼ estudiante ca. Yanna, ¿xi guni ti hermanu pa guinábacabe laa guni ti oración lu ti reunión de predicación o lu ti reunión de congregación yaʼ? Cadi naquiiñeʼ guiaandaʼ ca hermanu ca xi para raca ca reunión riʼ ti gánnacaʼ xi guiniʼcaʼ lu ca oración ni gúnicaʼ. Cadi naquiiñeʼ gudiicabe conseju congregación ne cadi naquiiñeʼ gúnicabe anunciu. Cumu gaayuʼ si minutu nuu para canción ne oración la? nga runi jma galán cadi iquiiñecaʼ «stale diidxaʼ» lu oración ni gúnicaʼ, jmaruʼ si ora ruzulú reunión (Mat. 6:7). w22.07 24 párr. 17, 18

Jesús guníʼ lu ca últimu dxi ziuu epidemia «ti lugar ne sti lugar» (Luc. 21:11). Riguixhedxí ndiʼ ladxidoʼno. ¿Xiñee yaʼ? Purtiʼ maca nánnanu zazaaca ni. Cadúʼyanu cayaca cumplir ca cosa ni guníʼ Jesús. Nga runi rinándanu conseju ni bidiibe ca binni ni nabani lu ca últimu dxi. Laabe guniʼbe: «Lachuu cuidadu, cadi guidxíbitu». Ora nuu epidemia, raca nagana para laanu gúninu cosa ni bíninu dxiqué. Peru cadi gudiʼnu lugar gucueeza ni laanu para cadi gápanu estudiu personal o chuunu reunión. Lu ca publicación ne videu ridxélanu experiencia stiʼ ca hermanu ni cadi caxélecaʼ de Jehová neca cadxaagalucaʼ guendanagana casi ca ni cadídinu. w22.12 17 párr. 4, 6

Guiráʼ binni gunna guizáʼ gunnaxhii Jacob José (Gén. 37:​3, 4). Ngue runi ca biʼchiʼ José ni jma huaniisi bidxiichinecaʼ laabe. Ne ora gúpacabe ti oportunidad la? bitoocabe laabe lu caadxi madianita. Ne yené ca hombre que José Egipto, ti guidxi ni riaana zitu de ra nabézabe. Ne raqué bitoocabe laabe lu Potifar, jefe stiʼ guardia stiʼ faraón. Nagueenda bichaa xquendanabani José, nuube ra lídxibe nadxii bixhózebe laabe ne málasi maʼ nuube Egipto casi esclavu (Gén. 39:1). Nuu biaje ridxaagalunu guendanagana ni laaca rapa xcaadxi binni (1 Cor. 10:13). O zándaca guni burla binni laanu, gucaalucaʼ, o sanándacaʼ laanu pur nácanu discípulo stiʼ Jesús (2 Tim. 3:12). Intiica si guizaacanu zacané Jehová laanu para guiree guiráʼ ni gúninu jneza. w23.01 14, 15 párr. 3, 4

Zándaca chuʼ biaje guinínenu ti hermanu ni bininá laanu. Peru ante gúninu ni, galán guiníʼ íquenu ndiʼ: «¿Ñee nannaʼ xi guiráʼ bizaaca la?» (Prov. 18:13). «¿Ñee bíʼnibe ni sin ñánnabe la?» (Ecl. 7:20). «¿Ñee laaca huayuneʼ xiixa cásica ni bíʼnibe naa ca la?» (Ecl. 7:​21, 22). «¿Ñee zusiroobaʼ guendanagana ca jma pa guinieniaʼ laabe de ni bizaaca ca la?». Pa cueenu tiempu ne guiníʼ íquenu ca pregunta riʼ la? zudiʼnu cuenta ni jma jneza gúninu nga guluinu guendarannaxhii ne gusiáʼndanu ni bíʼnibe laanu. Yanna, cada tobi de laanu ¿ximodo zanda gusihuínninu ni yaʼ? Ra guluinu dxandíʼ peʼ nadxiinu ca hermanu stinu neca rucheecaʼ. Ne pur nga, xcaadxi binni zanda gudii cuenta gunáʼ nga religión ni rusiidiʼ ni dxandíʼ ne gacaláʼdxicaʼ guni adorarnecaʼ laanu Jehová. Nga runi cadi gusaana de guluinu guendarannaxhii ni rusihuinni ca ni dxandíʼ xpinni Cristu. w23.03 31 párr. 18, 19

Racané Biblia laanu guiénenu cualidad ni jma risaca stiʼ Jehová nga guendarannaxhii (1 Juan 4:8). Cumu nadxii Jehová laanu la? bidiibe laanu información ni caquiiñeʼ si gánnanu para gúninu ni nabe (Juan 21:25). Rusihuinni Jehová nadxii laanu ora guiniʼné laanu. Qué nucaabe lu Biblia ti lista naroʼbaʼ para gábibe laanu xi caquiiñeʼ gúninu ne xi cadi caquiiñeʼ gúninu. Ni bíʼnibe nga guniʼbe guicá ni bizaaca binni dxiqué, profecía ne stale conseju para gacané ca ni laanu guicaanu decisión jneza. Zacá nga racané Biblia laanu gannaxhiinu Dios ne guzúʼbanu stiidxaʼ de guidubi ladxidoʼno. Biblia rusiidiʼ nabé rizaalaʼdxiʼ Jehová laanu. Ne nánnanu zacá ni purtiʼ luni zeeda stale relatu ni racané laanu guni sentirnu casi biʼniʼ sentir ca binni ni riete lu Biblia purtiʼ gúpacabe «sentimientu cásica laanu» (Sant. 5:17). Ne ora guidúʼndanu modo gucanebe ca binni de dxiqué, ni naca casi laanu, riene chaahuinu «nadxii Jehová binni» ne riá laanu (Sant. 5:11). w23.02 6 párr. 13-15

Ndiʼ nga ca diidxaʼ ni ruzuluné últimu libru stiʼ Biblia: «Ti revelación ni bidii Dios Jesucristu, para guluíʼ ca esclavu stiʼ ca cosa ni mayaca guizaaca» (Apoc. 1:1). Nga runi, ruyúbinu gánnanu xi cazaaca lu guidxilayú para guidúʼyanu ximodo cayaca cumplir ca profecía ni zeeda lu Biblia. Ne dede zándaca riuuláʼdxinu guiníʼnenu ca hermanu stinu de tema riʼ. Ora maʼ caninu ximodo cayaca cumplir ca profecía ni zeeda lu Biblia, naquiiñeʼ chuʼnu cuidadu. ¿Xiñee yaʼ? Purtiʼ qué racaláʼdxinu guininu ni riníʼ íquesinu ne pur laani maʼ qué chuʼ ca hermanu de congregación tobi si. Guzéʼtenu ti ejemplu, zándaca gunadiáganu guiníʼ ca gobiernu ni nuu lu Guidxilayú zucueezacaʼ guerra ni cayaca ne zeedanecaʼ paz ne guendariuudxí. Lugar de guiníʼ íquenu pa cayuni cumplir ni caniʼcabe ca profecía ni zeeda lu 1 Tesalonicenses 5:​3, naquiiñeʼ gánnanu xi maʼ gulee mozo ni nuu xpiaaniʼ lu ca publicación de tema riʼ. Pa guiráʼ ni guininu zeeda ni de ni maʼ gulee xquidxi Jehová, zacanenu chuʼ congregación tobi si ne guiranu zaníʼ íquenu ti modo si (1 Cor. 1:10; 4:6). w23.02 16 párr. 4, 5

¿Xiñee nadxiiluʼ Jesucristu? Nadxii Jesús ni dxandíʼ ne ni jneza ne rusiidiʼ laanu gácanu humilde. Pa nadxiiluʼ ni dxandíʼ ne ni jneza la? laaca nadxiiluʼ Jesús. Né stale valor bisihuinni Jesús nadxii ni dxandíʼ ne ni jneza (Juan 18:37). Peru ¿ximodo rusiidiʼ Jesús laanu gácanu humilde yaʼ? Rusiidiʼ guiráʼ ni guníʼ ne ni biʼniʼ Jesús laanu gácanu humilde. Guca Jesús humilde ra bisisaca Bixhoze ne qué nuyubi nusisácacabe laa (Mar. 10:​17, 18; Juan 5:19). Bisihuinni Jesús humilde laa, ¿xi rusiidiʼ ni laanu? ¿Ñee rucaa nga lii gannaxhiiluʼ Xiiñiʼ Dios ne chinándaluʼ ejemplu stiʼ la? Yanna, ¿xiñee naca Jesús humilde yaʼ? Purtiʼ naca Bixhózebe humilde, nadxiibe Jehová ne nácabe casi laa (Sal. 18:35; Heb. 1:3). ¿Cadi dxandíʼ rucaa nga lii gannaxhiiluʼ Jesús la? w23.03 3, 4 párr. 6, 7

Biblia ruzeeteʼ de chupa grupu de binni ni ziasa de lade gueʼtuʼ ne zápacaʼ oportunidad de guibánicaʼ sin qué chuʼ gáticaʼ lu Guidxilayú, guiropaʼ grupu riʼ nga: «ca ni biʼniʼ ni jneza ne ca ni qué ñuni ni jneza». «Ca ni biʼniʼ ni jneza» nga ca ni biʼniʼ ni ná Jehová biaʼ dxi bibánicaʼ. Ne «ca ni qué ñuni ni jneza» nga ca binni ni qué ñuni ni ná Jehová. Ne zándaca dxi bibánicabe qué lica ninándacabe ca ley stiʼ Dios. Cumu ziasa guiropaʼ grupu riʼ de lade gueʼtuʼ, ¿ñee riníʼ nga maʼ cá lácabe lu libru de guendanabani la? «Ca ni biʼniʼ ni jneza» maʼ cá lá lu libru de guendanabani. ¿Ñee bixiá lácabe ora gúticabe la? Coʼ, purtiʼ nuurucabe ndaaniʼ xquendabiaaniʼ Jehová. Biblia ná: «Cadi Dios stiʼ ca ni maʼ guti laabe, sínuque Dios stiʼ ca ni nabani, purtiʼ para laabe guiracaʼ nabánicaʼ» (Luc. 20:38). Ndiʼ riníʼ ora guiasa ca ni biʼniʼ ni jneza de lade gueʼtuʼ, caruʼ lacaʼ lu libru de guendanabani. Peru zanda guininu né lápiz nga cá lácabe (Luc. 14:14). w22.09 16 párr. 9, 10

Ni gucalaʼdxiʼ Jehová nga ñechené primé hombre que guiráʼ ni bizaʼbe. Ngue runi guluube Adán ndaaniʼ ti jardín sicarú para gapaʼ ni, guʼyaʼ ni, ne gusiroobaʼ ni (Gén. 2:​8, 9). Bixuiʼlú ni biʼniʼ sentir Adán ora biʼyaʼ gundani ca yagahuiiniʼ que ne bieleʼ ca guieʼ que. Ti privilegiu para laabe nga gápabe jardín de Edén que. Laaca gunabaʼ Jehová Adán quixheʼ lá ca maniʼ que (Gén. 2:​19, 20). Neca ñanda ñuni Jehová ni, peru bidiibe Adán guni dxiiñaʼ que. Zándaca para gudixhe Adán lácame gupa xidé biiyaʼ chaahuibe ximodo laacame ne xi guiráʼ rúnicame. Sicarú dxiiñaʼ que, purtiʼ ora cayúnibe ni, bidiibe cuenta pabiáʼ nuu xpiaaniʼ Bixhózebe Jehová ne pabiáʼ napa gracia pur modo bizáʼ de guiráʼ ni. w23.03 15 párr. 3

Ñee estatua que runi representar Reino Unido ne Estados Unidos, nga runi laacani nga últimu potencia mundial ni riete lu Biblia (Dan. 2:​31-33). Ndiʼ riníʼ despué de laani maʼ qué ziuuruʼ sti potencia. Purtiʼ lu Armagedón zunitilú Reinu stiʼ Dios potencia riʼ ne xcaadxi gobiernu ni nuu lu Guidxilayú (Apoc. 16:​13, 14, 16; 19:​19, 20). ¿Ximodo racané profecía riʼ laanu? Cudiiruʼ profecía stiʼ Daniel laanu xcaadxi prueba ni rusihuinni maʼ nabáninu tiempu ra mayaca gueeda fin. Raca jma de 2,500 iza laabe guniʼbe lu ti profecía despué de guiaba Babilonia, ziasa xtapa potencia mundial ne zucaalucaʼ xquidxi Dios. Ne laaca guniʼbe Reino Unido ne Estados Unidos nga últimu potencia. Riguixhedxí ndiʼ ladxidoʼno ne rudiini esperanza laanu purtiʼ nánnanu maʼ cadi candaa zunitilú Reinu stiʼ Dios guiráʼ gobiernu ne zuni mandar ni lu Guidxilayú riʼ. w22.07 4 párr. 9; 5 párr. 11, 12