Junio

Guluu Jehová ndaayaʼ ca xpinni Cristu de primé siglu que purtiʼ qué nireecaʼ gana ora bichaa xquendanabánicaʼ. Guzanándacabe laacaʼ ora cadi cabézacaʼ ni. Dxi nacubi guyé Bernabé ne apóstol Pablo Listra, nabé guyuulaʼdxiʼ binni gucaadiaga laacabe. Peru despué bicuudxi ca enemigu stícabe ca binni que para guchacaʼ guié Pablo dede guníʼ íquecaʼ maʼ gútibe (Hech. 14:19). Peru biree Bernabé ne Pablo zecaʼ sti lugar ziguni predicarcaʼ. ¿Xi ndaayaʼ gucuaacabe yaʼ? «gucanécabe stale binni gaca discípulo». Ne ejemplu stícabe ne ca diidxaʼ guníʼcabe guluu ni gana ca hermanu que (Hech. 14:​21, 22). Cumu qué nusaana Bernabé ne Pablo de ñuni predicarcaʼ la? gucanecaʼ stale binni. Nga runi, pa qué guireʼnu gana ne gúninu dxiiñaʼ ni bisaanané Jehová laanu la? zacaanu stale ndaayaʼ. w23.04 16, 17 párr. 13, 14

Bidxiilú rey David stale enemigu biaʼ dxi bibani ne stale biaje biʼniʼ orarbe Jehová para guinábabe laa gacané laabe. Guyuu David seguru rucaadiaga ne ricabi Jehová ca oración stiʼ. Lii laaca zanda chuʼluʼ seguru rucaadiaga ne ricabi Jehová ca oración stiluʼ. Biblia rusiidiʼ rudii Jehová laanu guendabiaaniʼ ne stipa ni caquíʼñenu para guni huantarnu. Ne laaca bidúʼyanu zanda iquiiñebe ca hermanu o ca binni ni qué runi adorar laabe para gacanebe laanu. Nánnanu zacabi Jehová ca oración stinu neca nuu biaje qué zúnibe ni modo cabézanu. Zudii Jehová laanu ni peʼ caquíʼñenu ne ora peʼ caquíʼñenu ni. Nga runi, cadi gusaana de gápanu fe ora guni orarnu, chuʼnu seguru zapa Jehová laanu ne ndaaniʼ Guidxilayú cubi ca zudiibe «guiráʼ ni racalaʼdxiʼ ca ni nabani» (Sal. 145:16). w23.05 8 párr. 4; 13 párr. 17, 18

Galán guiníʼ íqueluʼ ca ndaayaʼ ni zanda guicaaluʼ ora ugaandaluʼ ca meta stiluʼ. Yanna, ¿xi ndaayaʼ racaláʼdxiluʼ guicaaluʼ yaʼ? Pa meta stiluʼ nga gúʼndaluʼ Biblia o guni orarluʼ la? guníʼ ique pabiáʼ zacané ni lii chuʼluʼ jma gaxha de Jehová (Sal. 145:​18, 19). Ne pa racaláʼdxiluʼ gápaluʼ xiixa cualidad, guníʼ ique ximodo zacané ni lii ora guidxaagaluʼ xcaadxi (Col. 3:14). ¿Xiruʼ zanda gúniluʼ yaʼ? Galán gucaaluʼ ximodo racaláʼdxiluʼ ugaandaluʼ meta stiluʼ ne gatigá biiyaʼ ca ni bicaaluʼ. Laaca galán gúniluʼ guidxaagaluʼ binni ni cuʼ gana lii (Prov. 13:20). Guiranu caquiiñeʼ chuʼ tu cuʼ gana laanu. Peru ¿ñee caníʼ nga maʼ qué zanda ugaandanu ca meta stinu la? Coʼ. Neca huaxiéʼ gana nápanu zanda gúninu stipa para ugaandanu ca meta stinu, purtiʼ pa gúninu ni, zabeendunu ni galán. w23.05 27, 28 párr. 5-8

Ra gánnanu laanu nga naquiiñeʼ gudxiilunu ni guizaaca pur ca decisión ni guicaanu la? rucaani laanu guni confesarnu ca cosa malu ni bíninu, guchaʼnu modo nácanu ne gúninu stipa maʼ cadi guibiguetaʼ gúninu ni. Zacá qué zusaana de guxóʼñenu lu carrera ni ziné laanu lu guendanabani. Pa maʼ gucaaluʼ ti decisión ni cadi jneza, ¿xi zanda gúniluʼ? Cadi gudxiibaluʼ donda íqueluʼ, gudxiibaluʼ donda ique xcaadxi o guiníʼ íqueluʼ gastiʼ cayaca. Ni jma jneza gúniluʼ nga gánnaluʼ bicheeluʼ ne gúniluʼ guiráʼ ni nuu lu naluʼ para chuʼluʼ galán. Pa cayuni sentirluʼ nápaluʼ donda pur xiixa ni cadi jneza bíʼniluʼ, guca humilde ne biʼniʼ orar Jehová, gudxi laabe paraa bicheeluʼ ne gunabaʼ laabe guni perdonarbe lii (Sal. 25:11; 51:​3, 4). Pa bininaluʼ tuuxa, gunabaʼ guni perdonarbe lii. Ne pa caquiiñeʼ la? gunabaʼ gacané ca ancianu lii (Sant. 5:​14, 15). Biziidiʼ de ca cosa ni cadi jneza bíʼniluʼ ti cadi guibiguetaʼ gúniluʼ ca ni. Zacané ne ziá Jehová lii (Sal. 103:​8-13). w23.08 28, 29 párr. 8, 9

Dxi maʼ nahuiiniʼ rey Jehoás biʼniʼ stipa pur guni ni ná Jehová purtiʼ gucané Jehoiadá laabe gácabe ti binni nachaʼhuiʼ. Peru, despué si de guti Jehoiadá la? biʼniʼ Jehoás ni ná ca príncipe ni maʼ bidxiideche Jehová (2 Crón. 24:​4, 17, 18). Neca guizáʼ biuubaʼ ladxidóʼ Jehová, «qué nusaana [ . . . ] de nuseendaʼ profeta ra nuucabe para guibiguétacabe» ra nuu. Peru qué ninácabe nucaadiágacabe. Qué nulábicabe Zacarías, xiiñiʼ Jehoiadá, ni naca profeta ne sacerdote stiʼ Jehová ne xprimu Jehoás. Ne laaca biseendaʼ guti Jehoás Zacarías (2 Crón. 22:11; 24:​19-22). Cumu bisaana Jehoás de guidxibi Jehová la? Jehová maca guníʼ, ca ni gudxii deche laa la? zudxii déchebe laacaʼ (1 Sam. 2:30). Gudiʼdiʼ si tiempu, ti ejércitu ni napa huaxiéʼ soldadu stiʼ ca siriu, biʼniʼ ganarcaʼ ejércitu naroʼbaʼ stiʼ Jehoás, ne guizáʼ gucaná Jehoás raqué (2 Crón. 24:​24, 22). Biiti ca xpinni Jehoás laa purtiʼ biiti Zacarías. w23.06 18, 19 párr. 16, 17

Guyé apóstol Pablo ndaaniʼ guidxi Éfeso para biʼniʼ predicar ne bisiidiʼ binni de ca noticia galán (Hech. 19:​1, 8-10; 20:​20, 21). Nabé nadxiibe ca hermanu stibe ne nuube gacanebe laacaʼ para cadi guixélecaʼ de Jehová. Ca binni de Éfeso biʼniʼ crecaʼ stale cosa ni rusiidiʼ religión ni cadi dxandíʼ ne biʼniʼ crecaʼ brujería. Nabé biʼniʼ ca binni de Éfeso cosa yuudxuʼ o pecadu sexual ne qué lica rituí lucaʼ pur ni cayúnicaʼ. Puru si de inmoralidad sexual riete lu ca obra de teatru ne ca saa ni rúnicabe (Efes. 5:3). Maʼ que ganna ca binni que «xii nga ni jneza ne ni cadi jneza», ni riníʼ ca diidxaʼ riʼ nga maʼ bisaana de guni sentírcabe yuubaʼ (Efes. 4:​17-19). Ni nuunu guininu nga maʼ qué ruchiiñaʼ xquendabiaanicabe laacabe. Cumu maʼ qué ganna ca binni de Éfeso xii nga ni jneza ne ni cadi jneza la? ngue runi guníʼ Pablo «nacahui xquendabiaanicaʼ [ne] qué gápacaʼ guendanabani ni rudii Dios». Peru biree caadxi de ca binni de Éfeso de lu guelacahui ca. w24.03 20 párr. 2, 4; 21 párr. 5, 6

Casi juez stiʼ guidxi Israel la? Gedeón biʼniʼ dxiiñaʼ nadipaʼ. Gueelaʼ bixooñelú ca madianita de laabe ne de ca soldadu stibe yenándabe laaca dede valle stiʼ Jezreel hasta guiiguʼ Jordán (Juec. 7:22). ¿Ñee ziaanadxí Gedeón de chinanda ca madianita la? ¡Coʼ! Neca maʼ bidxágabe ne laaca maʼ bidxaga ca chonna gayuaa hombre zinebe que peru qué nusaana de ninándacabe ca madianita, gudíʼdicabe guiiguʼ que ne despué bigaandacabe ca madianita ne biʼniʼ ganarbe laacaʼ (Juec. 8:​4-12). Gupa Gedeón confianza zudii Jehová stipa laa, ne qué nusaana Jehová laa (Juec. 6:​14, 34). Ti biaje Gedeón ne ca hombre stiʼ zinándacaʼ a pie chupa rey madianita, peru laacaʼ zándaca dxíʼbacaʼ camellu (Juec. 8:​12, 21). Cumu gucané Jehová laacabe la? qué nireecabe gana, bigaandacabe ca Rey riʼ ne biʼniʼ ganárcabe laacaʼ. Tiempu riʼ, ca ancianu laaca zanda gápacaʼ confianza Jehová, purtiʼ «qué rirá stipa stibe ne qué ridxágabe». Qué zusaana de gudiibe stipa laatu ora caquiiñetu ni (Is. 40:​28, 29). w23.06 6 párr. 14, 16

Zanda gápanu ti ladxidóʼ ni qué gusaana Dios neca guidxaagalunu intiica guendanagana. Nga runi, gápanu confianza Jehová. Guidúʼyanu ni bizaaca Barac, gunda guleendú ni galán purtiʼ yenanda ca instrucción ni bidii Jehová laa. Tiempu que cadi nuu ca israelita listu para checaʼ lu guerra. Qué gápacaʼ ni tindenecaʼ, casi escudu nin lanza. Peru Jehová gudxi Barac gucaalú Sísara, jefe stiʼ ejércitu cananeu, ejércitu ni nuu listu para tinde ne napa stale guiibaʼ (Juec. 5:8). Gudxi profetisa Débora Barac guiete de lu dani Tabor para gucaalú Sísara ne ejércitu stiʼ, ni ziné gaʼ gayuaa carru de guerra. Ruluíʼ zuni ganar ejercitu que pur guiráʼ carru sticaʼ ora maʼ nuucaʼ lu layú planu, peru bizuubaʼ Barac diidxaʼ. Ora zedayete ca soldadu stiʼ Barac de lu dani que, bisabaʼ Jehová ti nisaguié nadipaʼ. Bidaabi ca carru que ndaaniʼ beñe, ne zaqué gucané Jehová Barac para guni ganar (Juec. 4:​1-7, 10, 13-16). Pa gápanu confianza ne chinándanu ca instrucción ni rudii xquidxi Jehová laanu la? nanna dxíchinu zacané Jehová laanu guni ganarnu. w23.07 19 párr. 17, 18

Para ganda guilanu caquiiñeʼ gápanu paciencia. Cásica ca xpinni Dios de dxiqué caquiiñeʼ gápanu paciencia para ganda gúʼyanu gaca ca ni maʼ guníʼ Dios (Heb. 6:​11, 12). Ruchaaga Biblia laanu casi ti campesinu (Sant. 5:​7, 8). Ti campesinu runi dxiiñaʼ nadipaʼ, rusaba semiá ne ruzee ni peru qué ganna pa dxi peʼ guiniisi ni. Nga runi, rápabe paciencia purtiʼ nánnabe zedandá dxi guindísabe cosecha. Ne ngaca runi ca xpinni Cristu: nadipaʼ rúnicaʼ dxiiñaʼ para Jehová neca qué gánnacaʼ padxí gueeda Señor sticaʼ (Mat. 24:42). Ribézanu né stale paciencia purtiʼ nánnanu zedandá dxi zuni Jehová guiráʼ ni maʼ guníʼ. Pa gusaananu de gápanu paciencia zanda gueeda guidxáganu ne chaahuiʼ chaahuiʼ gusaananu Jehová. Ne laaca zándaca guyúbinu gúninu cosa para chuʼnu nayecheʼ ti ratu si. Peru pa gápanu paciencia ne guni huantarnu dede ora gueeda fin zalanu (Miq. 7:7). w23.08 22 párr. 7

Ra guchaaganu profecía ni riete lu Daniel 2:​41-43 né xcaadxi ni zeeda lu libru stiʼ Daniel ne Apocalipsis rudiʼnu cuenta zeeda gaca ca batañee ca Reino Unido ne Estados Unidos, ni naca potencia mundial ni jma napa poder tiempu stinu riʼ. Ora bisiene Daniel xi riníʼ bacaandaʼ stiʼ Nabucodonosor que, ndiʼ nga ni guniʼbe de potencia ca: «Reinu ca, nuu parte de laani zaca naguidxi ne nuu parte zaca nadá». ¿Xiñee nuu parte de laani nadá yaʼ? Purtiʼ ca binni ni zeeda gaca casi beñe ni nabeza ra runi mandar reinu riʼ qué rudiicaʼ lugar gaca reinu riʼ naguidxi casi guiibaʼ. Ni guníʼ Daniel de estatua riʼ racané ni laanu guiénenu caadxi cosa risaca. Primé, potencia mundial stiʼ Reino Unido ne Estados Unidos maʼ bisihuinni pabiáʼ poder napa. ¿Ximodo yaʼ? Nabé gucané potencia riʼ para gaca ganar Primera ne Segunda Guerra Mundial. Peru cuniti potencia riʼ poder ne zunitiruʼ ni purtiʼ qué riuu ca xpinni de acuerdu ne rucaalú gobiernu. Guiropa, laani nga últimu potencia ni ziuu ante gunduuxeʼ Reinu stiʼ Dios guiráʼ ca gobiernu nuu lu guidxilayú. w23.08 10, 11 párr. 12, 13

Pur guiráʼ guendanagana ni cadiʼdiʼ David guyuu biaje biʼniʼ sentir maʼ qué guidxela xi guni (Sal. 18:​4, 5). Peru bibiguetaʼ stipa stibe ora bíʼyabe nadxii ne cayapa Jehová laabe. Biʼniʼ sentirbe yené xhamígube Jehová laabe «lu layú ra nuu guixi nagáʼ» ne lugar ra zanda guiziiláʼdxibe ra daʼ ziáʼ nisa. Nga gucané laabe guibiguetaʼ stipa stibe ne gúnibe ni ná Jehová né guendanayecheʼ (Sal. 18:​28-32; 23:2). Ora cadídinu lu guendanagana, laanu laaca zanda guininu: «Pur qué rusaana Jehová de gannaxhii qué huanitilunu» (Lam. 3:22; Col. 1:11). Gupa David stale enemigu ni qué iquiiñeʼ ne stale biaje guyuu xquendanabánibe lu peligru. Peru biʼniʼ sentirbe qué zazaacabe gastiʼ purtiʼ nánnabe nadxii ne cayapa Jehová laabe, biʼniʼ sentirbe nuu Jehová gaxha de laabe. Nga runi ora bíʼndabe guniʼbe ca diidxaʼ riʼ: «Bilabe naa de guiráʼ ni ruchibi naa» (Sal. 34:4). Neca guyuu biaje nabé bidxibi David, peru gunda bidxiilube ca guendanagana stibe purtiʼ nánnabe nadxii Jehová laabe. w24.01 30 párr. 15-17

Biziidiʼ de ca decisión cadi jneza gucuaa Jehoás. Guti si sumo sacerdote Jehoiadá, guca xhamigu Jehoás binni ni qué runi ni jneza (2 Crón. 24:​17, 18). Bicaadiágabe ca conseju stiʼ ca príncipe de Judá ni qué runi ni ná Jehová. Cadi naquiiñeʼ nucaadiágabe ca conseju sticaʼ. Peru bíʼnibe ni cadi jneza ne bíʼnibe ni ná ca xhamígube. Ne ora gucalaʼdxiʼ xprímube Zacarías niguu jneza laabe, biʼniʼ mandarbe gúticabe laa (2 Crón. 24:​20, 21; Mat. 23:35). Guizáʼ feu ni bíʼnibe, ¿njaʼ? Bisihuinni Jehoás maʼ cadi nuu xpiaaniʼ. Dxi ndaʼ nahuiiniʼ biʼniʼ cosa ni jneza peru beeda gácabe ti apóstata ne biitibe binni. Despué, laaca ca xpínnibe biiti laabe (2 Crón. 24:​22-25). Pa ñaca qué nusaana de nucaadiágabe Jehová ne ca ni nadxii laabe la? maʼ gadxé si ñaca xquendanabánibe. w23.09 9 párr. 6

Nanna Jesús zanda guni apóstol Pedro ni jneza. Ngue runi né diidxaʼ nadóʼ gudxi Jesús laabe: «Maʼ cadi guidxíbiluʼ». Qué lica ñaandaʼ apóstol Pedro ora biiyaʼ pabiáʼ napa Jesús confianza laa. Despué, laabe ne Andrés, bíʼchibe, bisaanacabe negocio de pesca ni gúpacabe para chinándacabe Mesías. Ne pur ni gudixhe íquecabe riʼ, gucuaacabe stale ndaayaʼ sicarú (Mar. 1:​16-18). Stale cosa sicarú nga ni bizaaca Pedro dxi guca discípulo stiʼ Cristu. Biiyabe bisianda Jesús binni huará, gulee demonio luguiáʼ binni ne dede bisibani ca ni maʼ gutiʼ (Mat. 8:​14-17; Mar. 5:​37, 41, 42). Ne laaca biiyabe ti visión ra bihuinni gloria ni zapa Jesús ora maʼ nuu lu Reinu stiʼ. Qué ñuu dxi nusiaandaʼ Pedro ni biʼyaʼ que (Mar. 9:​1-8; 2 Ped. 1:​16-18). Zacá ni, biiyaʼ Pedro caadxi cosa ni qué lica ñuu dxi niníʼ ique pa ñuuyaʼ. ¡Nanna pabiáʼ biecheʼ Pedro pur qué nusaana de nudxiilú ca guendanagana gupa! Pa nireebe gana, maʼ qué nicaabe guiráʼ ca ndaayaʼ sicarú que. w23.09 21 párr. 4, 5

Lu primé carta ni bicaa apóstol Pedro biquiiñebe diidxaʼ «gannaxhiisaatu». Pa gannaxhiisaanu zacá la? zuni perdonarnu ni gúnicabe laanu, ne cadi ti biaje si, sínuque siempre ziuʼnu dispuestu guni perdonarnu (1 Ped. 4:8). Zándaca bietenalaʼdxiʼ Pedro dxi bisiidiʼ Jesús laa caadxi iza ante ximodo nga naquiiñeʼ guni perdonar. Dxi gudxi Pedro Jesús zuni perdonar tuuxa «hasta gadxe biaje», zándaca guníʼ íquebe zaqué cusihuínnibe nabé nacháʼhuibe. Peru bisiidiʼ Jesús laabe naquiiñeʼ guni perdonarbe «hasta 77 biaje», ni riníʼ ca diidxaʼ riʼ nga, siempre naquiiñeʼ guni perdonarbe. Laanu laaca caquiiñeʼ chinándanu conseju riʼ (Mat. 18:21). ¿Ñee raca nagana para lii gúniluʼ ni la? Pa zaca ni, cadi guireeluʼ gana. Cumu nácanu binni ruchee la? guiranu casi xpinni Jehová huayuu biaje raca nagana para laanu guni perdonarnu. Yanna, ¿xi zanda gúniluʼ yaʼ? Ni jma risaca nga, gúniluʼ guiráʼ ni nuu lu naluʼ para guni perdonarluʼ hermanu stiluʼ ne guyúbiluʼ chuʼluʼ tobi si né laa. w23.09 29 párr. 12

Laga nuu Jonás ndaaniʼ benda que, peru nánnabe zucaadiaga oración stibe, purtiʼ dxandíʼ guca arrepentirbe ne gunna dxíchibe zacané Jehová laabe. Bilá si Jehová Jonás, guyuube listu para gúnibe ni gudxi Jehová laabe (Jon. 2:​10–3:4). Ora cadíʼdiluʼ lu xiixa guendanagana, ¿ñee riuuluʼ xizaa dede raca nagana para lii guni orarluʼ la? ¿O qué rápaluʼ stipa para guni estudiarluʼ la? Cadi guiaandaʼ lii riene chaahuiʼ Jehová ni cazaacaluʼ ca. Nga runi, dede ora gúniluʼ ti oración nachucu, gunna dxichi zudiibe ni caquiiñeluʼ (Efes. 3:20). Ne pa raca nagana para lii guni estudiarluʼ pur xiixa yuubaʼ nápaluʼ o naná nuu ladxidoʼloʼ la? zanda gucaadiágaluʼ audio stiʼ Biblia o stiʼ ca publicación stinu. Sti cosa zanda gacané lii nga ca canción o videu ni nuu lu jw.org. Ora runi orarluʼ Jehová ne ruuyaluʼ ximodo ricábibe lii lu ca cosa ni maʼ huayúnibe pur lii la? zeeda gácani casi ora ñábiluʼ laabe: «Rinabaʼ lii gudiiluʼ naa stipa». w23.10 13 párr. 6; 14 párr. 9

Cásica guca tabernáculo que zaqueca guca ca templu ni guyuu ndaaniʼ guidxi Jerusalén despué, gupa ni chupa sección «Lugar Santo» ne «Santísimo», ne nuu ti cortina galaa de guiropaʼ ca ni (Heb. 9:​2-5; Éx. 26:​31-33). Ndaaniʼ Santo guyuu ti candelabro de oro, ti altar para guzaaquicabe inciensu ne ti mexaʼ para quíxhecabe pan para ofrenda. Ca sacerdote si ni maʼ bibí nga zanda chuʼ ndaaniʼ Santo que para gúnicaʼ xhiiñacaʼ (Núm. 3:​3, 7, 10). Ndaaniʼ Santísimo que nuu arca stiʼ pactu ni bíʼnicabe de oro, ne rusihuinni ni raqué nga nuu Jehová (Éx. 25:​21, 22). Sumo sacerdote si que nga zanda tidiʼ chericaʼ cortina que ne chuʼ ndaaniʼ Santísimo que. Dxi rixá stonda binni ni raca ti biaje lu ti iza, riuu sumo sacerdote que né rini stiʼ maniʼ para guxhá ca donda stiʼ ne zaqueca para guxhá stonda guidubi guidxi que (Lev. 16:​2, 17). Biluíʼ Jehová xi peʼ riníʼ ca ni nuu ndaaniʼ tabernáculo que (Heb. 9:​6, 7). w23.10 27 párr. 12

Stale biaje riete lu Biblia mandamientu riʼ: «Lagannaxhiisaa» (Juan 15:​12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Peru de ndaaniʼ ladxidoʼno nga riale guendarannaxhii ca; guirutiʼ zanda guʼyaʼ ni. Yanna, ¿ximodo zanda gusihuínninu nadxiinu ca hermanu stinu yaʼ? Zanda gusihuínninu ni pur ca diidxaʼ guininu ne pur ni gúninu. Nuu stale modo zanda gusihuínninu nadxiinu ca hermanu stinu. Guidúʼyanu caadxi textu ni zeeda lu Biblia ni zacané laanu gúninu ni. «Naquiiñeʼ guiniʼtu ni dxandíʼ entre laatu» (Zac. 8:16). «Lachuu tobi si» (Mar. 9:50). «Primeca laatu nga gusihuínnitu runi respetartu xcaadxi binni» (Rom. 12:10). «Lachuu nayecheʼ ora guidxaagalutu stobi» (Rom. 15:7). «Laguni [ . . . ] perdonar» (Col. 3:13). «Pa nuu tu cadiʼdiʼ ra nagana la? lagacané laa» (Gál. 6:2). «Laguiníʼ guiráʼ ni maʼ bizéʼtenu riʼ para gatadxí ladxidoʼto» (1 Tes. 4:18). «Lagacané stobi guzuhuaa chaahuiʼ» (1 Tes. 5:​11, nota). «Cada tobi guni orar pur stobi» (Sant. 5:16). w23.11 9 párr. 7, 8

Guiráʼ dxi ricaanu decisión ra caquiiñeʼ gaca fe stinu naguidxi. Casi tu gaca xhamígunu, xi zanda gúʼyanu o quítenu para chuʼnu nayecheʼ, pa ziuunu scuela, pa zachagananu, pa zápanu xiiñinu ne xi tipu dxiiñaʼ gúninu. Nga runi, galán guiníʼ íquenu: «¿Xi rusihuinni ca decisión ni ricaaʼ? ¿Ñee rusihuinni ca ni runeʼ cré zidiʼdiʼ si guidxilayú riʼ ne maʼ cadi candaa zaca ni ti paraísu la? o rusihuinni ca ni riníʼ iqueʼ casi ca binni ni qué gapa esperanza? (Mat. 6:​19, 20; Luc. 12:​16-21). Nga runi, pa gaca fe stinu naguidxi ne guni crenu zabáninu ndaaniʼ Guidxilayú cubi zacaanu decisión galán. Laaca ridxaagalunu guendanagana ra caquiiñeʼ gaca fe stinu naguidxi. Casi ora sanándacabe laanu, gápanu xiixa guendahuará malu o guidxaagalunu xiixa ni cuee ganna laanu. Ora guidxaagalunu ca guendanagana riʼ cadi guiníʼ íquenu stúbinu zanda guni huantarnu ca ni, purtiʼ óraca nga ra jma caquiiñeʼ gaca fe stinu naguidxi para guni huantarnu ca ni ne gúninu ni ná Jehová né guendanayecheʼ (1 Ped. 1:​6, 7). w23.04 27 párr. 4, 5

Ribeza Jehová gúninu xiixa despué de guinínenu laa. Guiníʼ íquenu ti hermanu ni racalaʼdxiʼ cheʼ asamblea regional ne canábabe Jehová ganda guicaabe permisu ra dxiiñaʼ. ¿Xi zanda guni Jehová para guicabi oración stibe yaʼ? Zándaca gudii laabe valor para guiníʼnebe jefe stibe. Peru naquiiñeʼ guni hermanu riʼ xiixa, naquiiñeʼ guiníʼnebe jefe stibe ne zándaca naquiiñeʼ gúnibe ni chupa chonna biaje. Dede zanda gábibe jefe stibe pa zanda guchaanebe tuuxa compañeru stibe de dxi o zanda gábibe laa cadi quixe laabe ca dxi qué zúnibe dxiiñaʼ. Ribeza Jehová cadi gusaana de gábinu laa guiráʼ ni riguu xizaa laanu. Bisihuinni Jesús cadi nagueendaca zacabi Dios guiráʼ ni guinábanu laa (Luc. 11:9). ¡Nga runi cadi guireʼnu gana! Cadi gusaana de guni orarnu (Luc. 18:​1-7). Ora qué rusaana de gúninu ni, cadi cayábidinu Jehová guni ni purtiʼ si racaláʼdxinu gúnibe ni, sínuque zacá rusihuínninu nápanu fe zanda gacanebe laanu. w23.11 22 párr. 10, 11

Biʼniʼ prometer Jehová Abrahán, xhamigu, pur descendencia stiʼ guiráʼ ca guidxi ni nuu lu Guidxilayú zacaacaʼ ndaayaʼ (Gén. 15:5; 22:18). Cumu guizáʼ gupa Abrahán fe Dios la? gunna dxichi zuni cumplir Jehová promesa que. Peru dxi napa Abrahán 100 iza ne xheelaʼ 90, caʼruʼ gapa ca xpinni Dios riʼ nin ti xiiñicaʼ (Gén. 21:​1-7). Sicaríʼ ruzeeteʼ Biblia de Abrahán: «Gúpabe esperanza ne gúpabe fe zeeda gácabe bixhoze stale guidxi casi maca gúdxicabe laabe» (Rom. 4:18). Ne casi nánnanu, guca cumplir esperanza ni gulézabe que: gupa Abrahán Isaac, xiiñibe ni cabézabe gudii Dios laabe que. ¿Xiñee gunna dxichi Abrahán zuni cumplir Jehová promesa ni biʼniʼ laabe yaʼ? Cumu runibiáʼ chaahuiʼ Abrahán Jehová la? «guyuube seguru zuni Dios ni maʼ biʼniʼ prometer laabe» (Rom. 4:21). Pur fe stibe biiyaʼ Jehová laabe casi ti binni nachaʼhuiʼ ne guyuulaʼdxiʼ ni bíʼnibe (Sant. 2:23). w23.12 8 párr. 1, 2

Pa nácaluʼ ti joven ne napa xcaadxi confianza lii, zuni cumplirluʼ né guiráʼ dxiiñaʼ ni guicaaluʼ. Guníʼ ique ejemplu sicarú ni bisaana Jesús. Qué nusaanabe xhiiñabe para despué, sínuque bíʼnibe guiráʼ ni gudxi Jehová laabe, neca guyuu ora gúcani nagana para laabe. Gunnaxhiibe binni, jmaruʼ si ca discípulo stibe ne dede bidiibe xquendanabánibe pur laacaʼ (Juan 13:1). Cásica biʼniʼ Jesús, biʼniʼ stipa gúniluʼ intiica dxiiñaʼ ni gudiicabe lii. Pa qué gánnaluʼ ximodo gúniluʼ ni, guca humilde ne gunabaʼ gacané ti hermanu ni maʼ biniisi ndaaniʼ xquidxi Dios lii. Biyubi gúniluʼ jma de biaʼ ni zanda gúniluʼ (Rom. 12:11). Binduuxeʼ ca dxiiñaʼ ni gudiicabe lii; biʼniʼ ni «para Jehová [ . . . ] ne cadi para binni» (Col. 3:23). Cadi guiaandaʼ lii binni ruchee lii, nga runi gunna nuu cosa ni qué zanda gúniluʼ ne ziuu biaje zucheeluʼ (Prov. 11:2). w23.12 26 párr. 8

Ora riuunisa tuuxa reeda gaca parte de familia stiʼ Jehová. Ne riuʼnu nayecheʼ pur laani, ca ni napa privilegiu risaca riʼ nanna dxíchicaʼ dxandíʼ ca diidxaʼ ni bicaa David: «Nayecheʼ ziuu binni ni cuiluʼ [Jehová] ne gucaaluʼ laa guidxiña, para cueza lu ca patiu stiluʼ» (Sal. 65:4). Qué rudii Jehová chuʼ tutiica lu ca patiu stiʼ. Casi bidúʼyanu lu artículo ni gudiʼdiʼ que. Ribibe ca ni racalaʼdxiʼ gaca xhamigu laabe (Sant. 4:8). Ora rudiicaʼ xquendanabánicaʼ Jehová ne riuunísacaʼ runi prometerbe laacaʼ: «Zuuyatu […] zundaateʼ ndaayaʼ stinneʼ luguiatu dede ora maʼ cadi guiaadxaʼ gastiʼ laatu» (Mal. 3:10; Jer. 17: 8). Deruʼ peʼ cuzulú cayúniluʼ xhiiñaʼ Jehová ora riuʼnísanu. Guiráʼ ca xpinni Cristu rúninu stipa guni cumplirlnu voto ni bíninu ra guca dedicarnu neca guidxaagalunu tentación o prueba ni zanda guxheleʼ laanu de Jehová (Ecl. 5:​4, 5). Laaca naquiiñeʼ chinándanu ejemplu stiʼ Jesús ne gúninu ni cayuni mandarbe laanu gúninu (Mat. 28:​19, 20; 1 Ped. 2:21). w24.03 8 párr. 1-3

¿Xi zacané lii ne xheelaluʼ pa qué riuuláʼdxitu chuʼtu juntu? Guníʼ ique ti guí. Ora deruʼ guicaguí ni la? nahuiiniruʼ bele stini ne para ganda guiroobaʼ bele ca la? chaahuiʼ chaahuiʼ zaguʼnu yaga luni. Zaqueca laatu zanda cueetu tiempu guiráʼ dxi ti ganda chuʼtu juntu. Laguyubi gúnitu xiixa ni riuulaʼdxiʼ guirópatu (Sant. 3:18). Pa guzulú gúnitu caadxi cosa juntu neca ruluíʼ nahuiiniʼ ca ni la? zacanetu guiroobaʼ bele stiʼ guendarannaxhii ni nápatu. Nabé risaca gapa ca guendaxheelaʼ respetu. Zeeda gaca ni casi oxígeno ni riquiiñeʼ ti guí, purtiʼ pa gastiʼ oxígeno la? zazuíʼ guí ca. Zaqueca nga rizaaca ndaaniʼ ti guendaxheelaʼ. Pa gastiʼ respetu la? chaahuiʼ chaahuiʼ zará guendarannaxhii ca. Peru pa nuu respetu la? qué zazuíʼ bele stiʼ guendarannaxhii stícabe. Ne galán guietenaláʼdxiluʼ, cadi lii si nga naquiiñeʼ guni sentirluʼ runi respetarluʼ xheelaluʼ sínuque laaca naquiiñeʼ guni sentir xheelaluʼ runi respetarluʼ laa. w23.05 22 párr. 9; 24 párr. 14, 15

Lu Biblia zeeda historia stiʼ caadxi xpinni Dios ni guníʼ guizáʼ bidxíbicaʼ pur ca xhenemígucaʼ ne pur ca guendanagana ni nabé bininá laacaʼ (Sal. 18:4; 55:​1, 5). Yanna, ¿laanu yaʼ? ¿Ñee cucaalú ca compañeru ni rinenu scuela o dxiiñaʼ laanu la? ¿Cucaalú ca familia stinu o ca ni runi xhiiñaʼ Gobiernu laanu la? ¿Ñee nápanu xiixa guendahuará malu ni zándaca guuti laanu la? Ora cadídinu lu tipu guendanagana ca nga zándaca guni sentirnu qué zanda laanu, cásica runi sentir ti xcuidihuiiniʼ. ¿Ximodo racané Jehová laanu yaʼ? Riguixhedxibe ladxidoʼno ne rusiéchebe laanu. Nga runi nabé risaca gápanu costumbre guni orarnu Jehová ne guidúʼndanu Stiidxa, zacá casi xa ñaca ñuínenu laabe diidxaʼ (Sal. 77:​1, 12-14). Pa gúninu ni la? ora maʼ cadídinu lu ti guendanagana ni cayuniná laanu, jma nagueenda zuyúbinu Bixhózenu ni nuu guibáʼ para gacané laanu. Gábinu Jehová xii nga naguu xizaa laanu ne xi ruchibi laanu ne gudiʼnu lugar guicábibe laanu ne quixhedxibe ladxidoʼno ra iquiiñebe Stiidxabe (Sal. 119:28). w24.01 24, 25 párr. 14-16

Risaca nga chuuláʼdxinu ugaandanu xiixa meta espiritual. ¿Xiñee yaʼ? Purtiʼ ti binni ni riuulaʼdxiʼ guni xiixa runi stipa para guni ni. Ne ngaca nga rizaaca ne ca meta stinu, pa dxandíʼ racaláʼdxinu ca ni jma nagueenda zugaandanu ca ni. Yanna, ¿xi zacané lii jma chuuláʼdxiluʼ ugaandaluʼ ca ni yaʼ? Gunabaʼ Jehová guiale de lii ugaandaluʼ ca meta stiluʼ. Zudii Jehová lii espíritu santu stiʼ para ganda chuuláʼdxiluʼ ugaandaluʼ ca meta stiluʼ. Cumu nánnanu caquiiñeʼ quíxhenu xiixa meta la? rúninu ni, peru nuu biaje qué gápanu deseu de gúninu ni. Guníʼ ique ni maʼ biʼniʼ Jehová pur lii (Sal. 143:5). Cumu guníʼ ique apóstol Pablo modo guca Jehová nachaʼhuiʼ né laa la? gucané ni laabe gúnibe xhiiñaʼ Dios de guidubi ladxidoʼbe (1 Cor. 15:​9, 10; 1 Tim. 1:​12-14). Pa guiníʼ íqueluʼ guiráʼ ni maʼ biʼniʼ Jehová pur lii la? zacané ni lii chuuláʼdxiluʼ ugaandaluʼ ca meta stiluʼ (Sal. 116:12). w23.05 27 párr. 3-5

Jehová nga Bixhózenu ni nuu guibáʼ, ne nabé riuuláʼdxibe gusisácanu labe (Sal. 119:108). ¿Ñee riníʼ nga naca Dios ni jma napa poder casi binni ruchee, ni ruyubi gusisaca xcaadxi laa para si guni sentir galán la? Coʼ. Maʼ xadxí guníʼ Binidxabaʼ ti cosa ni cadi dxandíʼ ne laaca runiná ni laanu yanna. Riniʼbe nin ti binni qué zusisaca lá Dios ora tidiʼ lu xiixa guendanagana. Ne para laabe la? zudxiʼdéchenu Dios para gusaana de gacananu (Job 1:​9-11; 2:4). Peru Job, ti hombre fiel, bisihuinni cadi dxandíʼ ni guníʼ Binidxabaʼ. Yanna, ¿laanu yaʼ? ¿Ximodo zanda gúninu ni biʼniʼ Job? Rusihuínninu rusiguii Binidxabaʼ ora rusisácanu Jehová. Nápanu ti privilegiu guizáʼ naroʼbaʼ: guni defendernu lá Jehová ne gusiéchenu laa ra cadi gucheʼnu (Prov. 27:11). w24.02 8, 9 párr. 3-5

Despué de ca dxi bibani Moisés ne Josué, gulí Jehová juez para gabi xquidxi xi naquiiñeʼ guni. Ne tiempu guyuu rey ndaaniʼ guidxi Israel gulibe profeta para guni dxiiñaʼ ca. Ca rey ni biyubi chuʼ gaxha de Jehová la? bicaadiágacaʼ ca conseju ni bidii ca profeta que laacaʼ. Casi rey David la? guca humilde ne bicaadiaga ora guluu jneza profeta Natán laa (2 Sam. 12:​7, 13; 1 Crón. 17:​3, 4). Bicaadiaga rey Jehosafat ni gudxi profeta Jahaziel laa ne guluube gana ca binni de Judá gápacaʼ fe ca profeta stiʼ Dios (2 Crón. 20:​14, 15). Ne tiempu gudiʼdiʼ rey Ezequías lu guendanagana, gunábabe profeta Isaías gacané laabe (Is. 37:​1-6). Ora qué rusaana ca rey que de chinándacaʼ ni gabi Jehová laacaʼ la? riguube ndaayaʼ laacaʼ ne rápabe guidubi naca guidxi que (2 Crón. 20:​29, 30; 32:22). Rihuinni dxíchica biquiiñeʼ Jehová ca profeta que para gabi xquidxi xi naquiiñeʼ guni. w24.02 21 párr. 8

Racalaʼdxiʼ Binidxabaʼ guidxaaganu binni ni gucaa laanu guchéʼnenu Jehová. Yanna riʼ jma caquiiñeʼ gápanu laanu que ca binni de Éfeso que. ¿Xiñee yaʼ? Purtiʼ ca dxi riʼ maʼ cadi naquiiñeʼ peʼ chuʼnu gaxha de ca tipu binni ca, laaca nuucabe lu ca red social. Neca guiníʼ binni gastiʼ naca gúninu cosa inmoral, cadi gudiʼnu lugar quítecabe laanu purtiʼ nánnanu cadi dxandíʼ ni (Efes. 4:​19, 20). Guiníʼ íquenu ndiʼ: «¿Ñee runeʼ stipa cadi guidxaagaʼ ca compañeru de scuela, de dxiiñaʼ o ca binni ni qué ruzuubaʼ stiidxaʼ Jehová la? ¿Ñee racaʼ nadxibalú ne runeʼ defender ca principiu zeeda lu Biblia neca guiníʼ binni qué runeʼ respetar laacaʼ la?». Ne casi ná 2 Timoteo 2:​20-22, laaca naquiiñeʼ gápanu cuidadu ora cuinu tu gaca xhamígunu ndaaniʼ congregación. Cadi guiaandaʼ laanu, cadi guirácabe zacanécabe laanu chuʼnu gaxha de Jehová. w24.03 22, 23 párr. 11, 12

Ora runi orarluʼ Jehová, ¿ñee huaníʼ íqueluʼ ximodo laabe la? Neca qué zanda guidúʼyanu Jehová, Biblia racané laanu gánnanu ximodo laabe. Riete nácabe casi «gubidxa ne escudu», ne casi «ti bele ni runitilú» (Sal. 84:11; Heb. 12:29). Lu ti visión biiyaʼ profeta Ezequiel naca Jehová casi ti guié zafiro, casi ti guiibaʼ ni guizáʼ ruzaaniʼ ne casi xtuxhu ti arcoíris (Ezeq. 1:​26-28). Cumu qué ridúʼyanu Jehová la? zándaca gaca nagana para laanu guni crenu nadxiibe laanu. Zándaca gaca nagana para tuuxa guni cré nadxii Jehová laa pur modo bibani. Peru galán nga riene Jehová laanu, nánnabe xi runi sentirnu ne nánnabe xiñee raca nagana para laanu chuʼnu gaxha de laabe. Para gánnanu pabiáʼ nadxiibe laanu la? rábibe laanu lu Stiidxabe de ca cualidad nabé sicarú nápabe. Ti diidxaʼ ni jma racané laanu gánnanu ximodo naca Jehová nga guendarannaxhii (1 Juan 4:8). Rusihuinni cualidad riʼ ximodo peʼ naca Jehová; guiráʼ ni rúnibe, rúnibe ca ni purtiʼ nadxiibe laanu. Nabé nadxiibe binni dede né ca ni cadi nadxii laabe (Mat. 5:​44, 45). w24.01 26 párr. 1-3

Gulí Jehová Moisés para cuee ca israelita de guidxi Egipto ne bisihuínnibe zacá ni ra biquiiñebe ti columna de za para gapa laacaʼ de gubidxa ne ti columna de bele para guzaaniʼ neza ra zizacaʼ huaxhinni (Éx. 13:21). Yenanda Moisés columna ca, ne pur ngue gunda yendanebe ca israelita que ruaa nisadóʼ Xiñáʼ. Guizáʼ bidxibi ca israelita que ora bíʼyacaʼ nanda ejércitu egipciu que laacaʼ, ne guníʼ íquecaʼ maʼ gastiʼ ra guilacaʼ purtiʼ nuu nisadóʼ que raqué ne qué gápacaʼ ra guxooñecaʼ. Peru qué nuchee diʼ Moisés purtiʼ Jehová peʼ nga bicaa laabe chinebe ca israelita que lugar ca (Éx. 14:2). Ne despué biʼniʼ Jehová ti milagru ni cadi cabézacabe para bilá laacabe (Éx. 14:​26-28). Biaʼsi 40 iza yenanda Moisés columna de za que para biʼniʼ guiar xquidxi Dios lu desiertu (Éx. 33:​7, 9, 10). Ne de ra nuu columna que nga riniʼné Jehová Moisés ne despué rabi Moisés guidxi que xi instrucción cudii Jehová laacaʼ. Napa ca israelita que stale prueba para guni crecaʼ caquiiñeʼ Jehová Moisés para gabi laacaʼ xi naquiiñeʼ gúnicaʼ. w24.02 21 párr. 4, 5