Biaananiáʼ tuuxa guuyaʼ laa

CHIGUIDXEʼ laatu xiñee biaananiáʼ tuuxa guuyaʼ laa, na ti gunaa ni nabeza ndaaniʼ guidxi España.

Biniiseʼ ndaaniʼ ti yoo ra nabé gudinde binnilidxeʼ ne qué ñuucaʼ tobi si. Ne ora guti bizanaʼ ni jma nahuiiniʼ que lu ti desgracia dxi napa tapa iza la? nabé gucaná binnilidxeʼ. Ne pur ca viciu ni gupa bixhozeʼ qué ñanda nibani jñaa nayecheʼ ne laabe. Neca zaqué bisiidiʼ jñaa naa ne bizanaʼ ni jma huaniisi que xii nga ni jma neza gúnidu.

Despué bichaganáʼ bizanaʼ que ne naa laaca bichaganayaʼ. Qué nindaa de ngue bihuinni napa jñaa cáncer. Guendahuará ca nga biiti jñaa, peru bisaananebe laadu ti herencia nabé risaca ante gátibe.

Ti gunaa ni binibiáʼ jñaa guniʼné laabe ziuu ti dxi zandisaʼ Dios ca gueʼtuʼ ca, ne guyuuláʼdxiruʼ jñaa guiziidiʼ jma de Stiidxaʼ Dios. Ni biziidibe lu Biblia ca gucané laabe gusisácabe guendanabani stibe ne chuʼbe nayecheʼ xcaadxi dxi bibánibe que.

Ora bidúʼyadu pabiáʼ cayacané Stiidxaʼ Dios que laabe la? naa ne bizanaʼ que laaca bizuludu bidúʼndadu Stiidxaʼ Dios. Guyuaanisaʼ ne beeda gacaʼ ti testigu stiʼ Jiobá ti beeu ante gapaʼ guiropa xiiñeʼ. Gupaʼ ti dxaapahuiiniʼ nabé sicarú ne gulee laʼyaʼ laa Lucía.

Dxi guyuaanisaʼ que nabé bisácani para naa pur chupa razón. Tobi la? purtiʼ bidiéʼ naa Jiobá para guneʼ ni na biaʼ dxi guibaneʼ. Ne stobi la? purtiʼ maʼ zanda guinieniáʼ ca xiiñehuiineʼ de cani runeʼ cré.

Peru, guiropa razón ca qué ñanda ñuneʼ ni casi gucalaʼdxeʼ. Dxi gupa Lucía tapa iza nabé biuubaʼ ndaanibe. Lu guiráʼ examen biʼniʼ riadiólogo que laabe la? bihuinni nuu ti tumor biaʼ ti naranja cueʼ laʼdxiʼ stibe. Tumor que láʼ neuroblastoma. Doctor que guníʼ nabé malu tumor que ne zuninani laabe. Biʼniʼ huantar Lucía guiráʼ yuubaʼ stiʼ cáncer que gadxe iza ne gudíʼdibe stale dxi ndaaniʼ hospital.

Qué nusaanabe de ñacanebe xcaadxi

Ca iza gupa Lucía guendahuará que nabé triste riuaa ora guuyaʼ pabiáʼ runinani laabe, peru rusiéchebe naa ora quiidxibe ne gudiibe bixiduʼ naa. Nabé bidxagayaa cani runi dxiiñaʼ ra hospital que modo bidxiilube guendahuará que. Gucanebe ca enfermera que quíʼzicaʼ yogur, jugu ne xcaadxi cosa ra nuu ca hombrehuiiniʼ ne dxaapahuiiniʼ ni nuu gaxha de ra nuube que. Dede bidiicaʼ laabe ti lari quiʼchiʼ para cuáquibe ne ti tarjeta huiiniʼ para guicá ladxidoʼbe ra na «ni racané enfermera».

Ti gunaa runi dxiiñaʼ raqué guníʼ: «Yendá Lucía ladxiduáʼ pur guiráʼ ni biʼniʼ. Laabe nabé nagueendabe para gúnibe dxiiñaʼ huiiniʼ ne nabé guyuuláʼdxibe gutieebe cuadru. [...] Naquiite gúcabe ne guníʼ íquebe cásipeʼ binni huaniisi».

Stiidxaʼ Dios bidii stipa Lucía ne gudixhedxini ladxidoʼbe (Heb. 4:12). Gunna dxíchibe «ma qué ziuu ru enda guti nin enda ruuna nin enda racaná ladxidóʼ nin yuubaʼ» ndaaniʼ guidxilayú cubi ca, casi na Biblia (Apo. 21:4). Nabé bizaalaʼdxiʼ Lucía binni ne guiráʼ ora guníʼnebe laacaʼ de Stiidxaʼ Dios. Cumu nanna dxíchibe zandisaʼ Dios ca gueʼtuʼ ca la? nga gucané laabe cadi chuʼbe triste, sínuque chuʼbe nayecheʼ neca nánnabe maʼ que ziándabe (Isa. 25:8). Ne zacá guyuube dede dxi biiti cáncer que laabe.

Dxi ca nga biaananiáʼ tuuxa guuyaʼ laa casi guniéʼ ora bizuluáʼ que. Lucía maʼ qué ganda guxheleʼ lú. Bixhózebe gudapi ti chú nabe ne naa gudapeʼ sti chú que. Óraque gudxeʼ laabe chaahuidugá: «Cadi guizaalaʼdxuʼ, qué zusaanadiáʼ lii stúbiluʼ, gucuaa bi chaahuidugá. Ora guibániluʼ maʼ nazaacaluʼ, maʼ qué ziuubaʼ abatiʼ lii, ne naa ziuaaniáʼ lii».

Yanna napaʼ xi guneʼ ni maʼ guniéʼ ne chuaa para guuyaʼ binni ni biaananiáʼ ca. Nannaʼ nagana nga cueezaʼ dede dxi ca. Peru pa qué guiree gana, gapaʼ fe Jiobá, ne guzuubaʼ stiidxaʼ Jiobá la? zuuyaʼ xiiñeʼ ora guiasa.

Ejemplu ni bisaana Lucía para laadu

Nabé bidxaagayaa xheelaʼ ni cadi naca Testigu ora biiyaʼ pabiáʼ nadxibalú guca Lucía ne modo gucané ca binni ridagulisaa laadu. Dxi guti xiiñidu que gúdxibe naa chiguiníʼ ique chaahuibe xi naquiiñeʼ gúnibe. Gudiʼdiʼ si chupa chonna semana gúdxibe ti binnigola ni nuu lade ca binni ridagulisaa guʼndané laabe. Qué nindaa de ngue bizulú guyebe ca guendaridagulisaa. Gucané Jiobá laabe gusaanabe de cúbabe gueza, ti viciu ni nabé guca nagana para laabe gusaanabe dxiqué.

Caʼruʼ tiidiʼ chaahuiʼ yuubaʼ biaananiáʼ dede dxi guti xiiñeʼ, peru rudiéʼ xquíxepeʼ Jiobá pur ejemplu bisaanabe. Naa ne xheelaʼ rigúʼsaadu gana laadu ora guiníʼ íquedu ziuu dxi guiasa ca gueʼtuʼ ca, ne dede riníʼ íquedu dxi guibiguetaʼ guidúʼyadu lú xiiñihuiinidu cuxidxi dede gade chupa guiruʼ xhaga.

Tobi de ca gunaa ni nabeza ladu ralidxeʼ que nabé bidxagayaa ora gunna guti xiiñeʼ. Lucía ne xiiñibe tobi si scuela guyecaʼ. Ti sábadu dxipeʼ cayaba dxacha nisaguié guyé gunaa riʼ ralídxidu siadoʼroʼ. Guti ti hombrehuiiniʼ stibe de 11 iza laaca pur guendahuará ni gupa Lucía que. Ora gúnnabe xi bizaaca Lucía la? biyúbibe paraa nabézadu ne yegánnabe laadu. Gunaa riʼ gunabadiidxaʼ naa xi gucané naa para gutadxí ladxiduáʼ pur ni bizaaca xiiñeʼ que, ne gúdxibe naa ñúnidu ti grupu para ñacanedu xcaadxi gunaa ni maʼ guti xiiñiʼ.

Naa gudxeʼ laabe ni gudixhedxí ladxiduáʼ nga tobi de cani cá lu Biblia chiguni Dios. Ndiʼ nga ti cosa ni jma nandxóʼ ni qué zanda guni hombre. Dede biecheʼ gunaa riʼ ora biindaniáʼ laa ca diidxaʼ ni guníʼ Jesús ni zeeda lu Juan 5:28, 29. Gunábabe naa guundaniáʼ laabe Biblia ne qué nindaa gutadxí ladxidoʼbe (Fili. 4:7). Stale biaje ora maʼ cadúʼndadu Biblia la? riaanadxidu ti ratu para guiníʼ íquedu ximodo guidxaagaludu ca binnilídxidu ora guiásacaʼ lade gueʼtuʼ lu guidxilayú cubi ca.

Biaʼ dxi bibani Lucía bisaana ti ejemplu ni qué ziuu dxi guiaandaʼ. Fe ni gúpabe que gucaneni naa ne binnilidxeʼ chuʼdu tobi si para gúnidu xhiiñaʼ Dios ne cayacaneni naa para cadi liica guiníʼ iqueʼ gusaanaʼ fe stinneʼ. Guiranu, cani maʼ guti ti binnilídxinu ne cabézanu guiásacabe la? laacabe nga cani biaananenu guidúʼyanu.

[Dibuju/foto ni zeeda lu yaza 20]

Dibuju ni biʼniʼ Lucía ra culuíʼ ximodo chigaca Paraísu que