Bidieeʼ cuenta xii nga ni dxandíʼ risaca lu xquendanabaneʼ
Gaspar Martínez guníʼ ni bizaaca
Zanda guininu zeeda gaca historia stinneʼ casi historia stiʼ ti hombrehuiiniʼ ni runi dxiiñaʼ lu layú ne yendeza ndaaniʼ guidxi ne guca ricu. Peru ora gúʼndaluʼ historia stinneʼ zúʼyaluʼ gucaʼ ricu peru cadi modo guníʼ íquediaʼ.
BINIISEʼ ndaaniʼ ti guidxihuiiniʼ ra nabé pobre binni, ti lugar ni láʼ La Rioja ni nuu ladu guiáʼ stiʼ España, despué de iza 1930. Neca bisaanaʼ de chaaʼ scuela dxi napaʼ chii iza la? biziideʼ guundaʼ ne gucaaʼ. Naa ne xhonna bicheʼ ne guionnaʼ bizanaʼ gúpadu ca dendxuʼ stidu guiráʼ dxi ne bínidu dxiiñaʼ lu layú stidu.
Nabé pobre laadu, ne guníʼ íquedu jma risaca nga gápadu bidxichi. Nabé ridxiichidu nga guidúʼyadu cani napa jma que laadu. Neca zaqué, ti dxi gudxi ti obispo laadu guidxihuiiniʼ ra nuudu que nga jma ricá ique binni cheʼ yuʼduʼ que guiráʼ guidxihuiiniʼ ra riebe. Peru qué niníʼ íquebe pa despué stale de cani rié yuʼduʼ que zaxélecaʼ de laani.
Biyubeʼ modo guibaneʼ jma galán
Bichaganaʼyaʼ ti baʼdudxaapaʼ de xquidxeʼ ni láʼ Mercedes, ne qué nindaa maʼ gúpadu ti baʼduhuiiniʼ ni naquiiñeʼ gusiniisidu. Lu iza 1957 yendézadu guidxi Logroño, ni riaana gaxha de xquidxeʼ, ne despué xcaadxi de ca binnilidxeʼ laaca yendézacaʼ raqué. Qué nindaa de yendayaʼ raqué bidieeʼ cuenta nabé nagana zaca para naa guneʼ ganar biaʼ bueltu caquiiñeʼ para gudieeʼ ni iquiiñeʼ binnilidxeʼ, purtiʼ qué gannaʼ nin ti dxiiñaʼ. Guníʼ iqueʼ paraa chaaʼ para gacanécabe naa. Primeca ni bineʼ nga guyaaʼ ra biblioteca stiʼ guidxi que, neca qué gannaʼ xi chiyubeʼ raqué.
Despué binadiaʼgaʼ lu radiu caníʼcabe zanda guicaa binni ti cursu de Biblia pur correu, ngue runi gunabaʼ laacabe ti cursu, ne ora biluxeʼ ni guniʼné caadxi evangelista naa. Guyaaʼ chupa chonna biaje ra yuʼduʼ stícabe, ne ngue si bidieeʼ cuenta nabé ridindesaa ca xaíque stícabe. Ngue runi guníʼ iqueʼ maʼ qué ziaaruaʼ raqué ne guníʼ iqueʼ zándaca zaqué nga guiráʼ religión.
Biiyaʼ xii nga ni dxandíʼ risaca
Lu iza 1964 guyé Eugenio ralidxeʼ, ti hombrehuiiniʼ ni naca testigu stiʼ Jiobá. Qué huayuu dxi gunadiaʼgaʼ de religión stibe, peru nabé guyuuladxeʼ guiníʼnebe naa de Biblia. Naa rabeʼ guizáʼ nannaʼ de Biblia, ne ra canidu diidxaʼ que guniéʼ caadxi textu ni zeeda lu Biblia ni biziideʼ lu cursu gucuaaʼ que. Neca gucalaʼdxeʼ nuluéʼ jneza caadxi cosa ni rusiidiʼ ca protestante la? cadi de guidubi ladxiduáʼ runeʼ cré cani.
Chupa biaje gunieniáʼ Eugenio diidxaʼ xadxí, despué de ngue bidieeʼ cuenta nánnabe iquiiñebe Biblia jneza, laandabe jma huaxiéʼ iza guzabe scuela que naa. Nabé bidxagayaaʼ nagueenda ridxélabe ca textu que ne nánnabe gusiénebe cani. Eugenio biluíʼ naa ne Biblia nabáninu lu ca últimu dxi ne maʼ qué zandaa diʼ zaca Guidxilayú riʼ ti paraísu ora guni mandar Reinu stiʼ Dios. Nabé bidxagayaaʼ nga (Sal. 37:11, 29; Isa. 9:6, 7; Mat. 6:9, 10).
Gudxeʼ laabe zaa gúʼndanebe naa Biblia. Guiráʼ ni biziideʼ que nacubi cani para naa, ne yendácani ndaaniʼ ladxiduáʼ. Cani caziideʼ que gucanécani naa guneʼ stale cosa ne gannaʼ nuu xi pur nabaneʼ. Óraque guníʼ iqueʼ maʼ bidxelaʼ ni canayubeʼ. Ne maʼ qué nicá iqueʼ nuyubeʼ ñapaʼ stale cosa risaca ne maʼ qué nuyubeʼ ti dxiiñaʼ ra ñuneʼ ganar stale bidxichi. De raqué guníʼ iqueʼ, pa zaree guendahuará ne guendaguti la? laaca zanda gaca chaahuiʼ guiráʼ xixé guendanagana (Isa. 33:24; 35:5, 6; Apo. 21:4).
Nagueendaca gunieniáʼ ca binnilidxeʼ de ni caziideʼ que. Gudxeʼ laacabe maʼ bizabiruaa Dios guni Guidxilayú riʼ ti paraísu ra zabani guiráʼ binni ni guni ni na Dios sin qué chuʼ dxi gáticaʼ.
Ca binnilidxeʼ biziidicaʼ de Biblia
Qué nindaa, naa ne doce de ca binnilidxeʼ bidagulisaadu guiráʼ ca domingu huadxí ca ralidxi tobi de ca stiuaʼ para guinidu de caadxi tema zeeda lu Biblia. Ora maʼ cayúʼndadu rindaʼdu biaʼ chupa o chonna hora. Ora biiyaʼ Eugenio stale de ca binnilidxeʼ racaláʼdxicaʼ guiziidicaʼ jma de lu Biblia la? gudíxhebe gúʼndanebe cada familia ralidxi.
Caadxi de ca binnilidxeʼ nabézacaʼ Durango, guidxihuiiniʼ ni riaana biaʼ 120 kilómetru de Logroño ne gastiʼ nin ti testigu stiʼ Jiobá raqué. Gudiʼdiʼ si chonna beeu gucuaaʼ caadxi dxi de vacación para chigannaʼ laacabe ne guinieniáʼ laacabe de ni caziideʼ. Ca dxi guyuaaʼ raqué bidagualisaaniáʼ biaʼ chii de laacabe guiráʼ huaxhinni para guinidu de Biblia, ridiʼdiʼ galaa gueelaʼ canírudu diidxaʼ. Guirácabe guyuuláʼdxicabe ni bisiideʼ laacabe. Dxi maʼ chiguibiguetaʼ ralidxeʼ que bisaananiáʼ laacabe caadxi Biblia ne xcaadxi libru ne revista, ne qué nusaanaʼ de ninieniáʼ laacabe.
Guníʼ ique pabiáʼ nayecheʼ biʼniʼ sentir ca Testigu ni yendacaʼ Durango primé biaje zigucheechecaʼ diidxaʼ ora bidxélacaʼ dieciocho binni ni cabeza laacaʼ para guiziidicaʼ de Biblia. Ca xpinni Cristu que óraqueca biindanecaʼ cada familia.
Ca dxi que, qué niná diʼ Mercedes niziidiʼ de stiidxaʼ Dios purtiʼ bidxibi. Ca dxi que gobiernu stiʼ España qué niná nucheeche ca testigu stiʼ Jiobá diidxaʼ raqué, ne bidxibi Mercedes nibee gobiernu guiropaʼ xiiñidu de ra scuela ne ñuni ca binni guidxi que menu laadu. Peru ora bíʼyabe caziidiʼ guiráʼ binnilidxeʼ de Dios la? laaca biziidibe.
Lu chupa iza que maʼ cuarenta de ca binnilidxeʼ bidiicaʼ laacaʼ Dios ne guyuunísacaʼ. Óraque maʼ tobi si ni naguixhe ique guiradu, ne ngue bicaa naa guneʼ sentir maʼ bigaandaʼ ti cosa nabé risaca lu xquendanabaneʼ. Gucuaadu stale ndaayaʼ stiʼ Dios.
Cayáparuaʼ stale cosa ni risaca
Lu xcande iza despué que bisiniiseʼ guiropaʼ xiiñidu ne gucaniáʼ ca binni ridagulisaa, raqué bidiicabe naa stale dxiiñaʼ guneʼ. Dxi yendezaniáʼ Mercedes ndaaniʼ guidxi Logroño ra nabeza 100,000 binni la? nuu biaʼ gande si testigu stiʼ Jiobá raqué.
Dxi maʼ napaʼ 56 iza, bitaagucabe fábrica ra runeʼ dxiiñaʼ, ngue runi biniteʼ xhiiñaʼ. Cumu maca guyuuladxeʼ guneʼ jma lu xhiiñaʼ Dios la? ngue runi gucaʼ precursor regular. Pensión ni bidiicabe naa que maʼ qué nugaanda ni para nizidu guiráʼ ni iquiiñedu. Ngue runi biʼniʼ Mercedes dxiiñaʼ para gacané naa. Zaqué gunda gúpadu ni iquiiñedu ne qué liica ñaadxaʼ gastiʼ laadu. Ne dede yannadxí nácaruaʼ precursor, ne xheelaʼ raca precursora auxiliar gatigá. Laabe nabé riuuláʼdxibe gucheechebe diidxaʼ.
Raca chupa chonna iza, yené Mercedes revista ra nuu ti baʼdudxaapaʼ ni láʼ Merche, dxi nahuiinibe biindanécabe laabe Biblia. Laabe guyuuláʼdxibe gúʼndabe ca revista que, ne Mercedes biiyaʼ dxandíʼ riuuláʼdxirube guiziidibe de Dios. Despué maʼ guyuulaʼdxiʼ Merche gúʼndanebe laa Biblia ne bizulú biʼniʼ guiráʼ ni caziidiʼ. Peru xheelabe Vicente nabé guxudxi ne runiti dxiiñaʼ stiʼ, pur ngue qué rudiibe ni iquiiñeʼ binnilídxibe. Cumu nabé rixúdxibe la? dede yaca nilaa xquendaxheelacabe.
Mercedes gudxi Merche gabi xheelaʼ pa zaa guinieniáʼ laa. Ne guná Vicente guinieniáʼ laa, ne despué de yegannaʼ laabe chupa chonna biaje maʼ bizulú bidúʼndadu Biblia. Chaahuidugá bichaabe: primé que chupa chonna gubidxa si riaanabe sin xhúdxibe, de raqué maʼ ti semana, despué jma rindaabe sin xhúdxibe ne despué bisaanapebe ni. Ne maʼ galán modo bihuínnibe ne maʼ guyuunebe binnilídxibe tobi si. Yanna maʼ nabézabe islas Canarias, racá nuube ne xheelabe ne xiiñidxaapabe cayacanécabe lade ca binni ridagulisaa.
Yanna maʼ nannaʼ xii nga ni dxandíʼ risaca lu xquendanabaneʼ
Nécapeʼ caadxi de ca binnilidxeʼ ni guca Testigu maʼ gúticaʼ la? cadáleruʼ binnilidxeʼ ne cacaacaʼ ndaayaʼ stiʼ Dios (Pro. 10:22). Guizáʼ nayecheʼ nuaaʼ purtiʼ casi guiráʼ cani biiyaʼ bizulú biʼndaʼ Biblia raca cuarenta iza que dede yanna cayúnicaʼ ni na Jiobá ne ca xiiñicaʼ ne ca xhiágacaʼ.
Napaʼ stale binnilidxeʼ ni naca Testigu, ne stale de laacabe nácacaʼ binnigola, siervu ministerial o precursor. Baʼduʼ lugola stinneʼ ne xheelaʼ cayúnicaʼ dxiiñaʼ ndaaniʼ Betel ni nuu Madrid. Dxi guyuaaniʼsaʼ nuu biaʼ chonna mil xpinni Cristu España, peru yanna maʼ nuu jma de ti gayuaa mil. Nabé riuuladxeʼ gucheecheʼ diidxaʼ casi precursor, ne guizáʼ rudieeʼ xquíxepeʼ Jiobá purtiʼ huadiibe lugar iquiiñeʼ xquendanabaneʼ para guneʼ xhiiñabe. Neca huaxiéʼ guzayaʼ scuela, nuu biaje ruseendacabe naa para chaaʼ lugar stiʼ binnigola ni riganna ca binni ridagulisaa.
Raca chupa chonna iza de gunnaʼ maʼ guirútipeʼ tu nabeza ndaaniʼ guidxihuiiniʼ ra biniiseʼ que. Cumu guizáʼ pobre binni raqué la? stale de laacabe bisaana ca layú sticaʼ ne lídxicaʼ para checaʼ sti lugar ra zanda guibánicaʼ jma galán. Galanpeʼ nga stale de ca binni ca ne naa la? maʼ bidiʼdu cuenta ni jma risaca nga gúnidu ni na Jiobá. Laacabe laaca biiyacabe xii nga ni dxandíʼ risaca lu xquendanabánicabe ne maʼ bidiicabe cuenta jma nayecheʼ ribani binni ora guni ni na Jiobá.
[Dibuju/foto ni zeeda lu yaza 32]
Casi guiráʼ ca binnilidxeʼ ni naca Testigu