«Laatu nga xhamigua»
«Laatu nga xhamigua pa guni tu ni rabeʼ.» (JUAN 15:14)
1, 2. 1) Ximodo nánnanu gadxé gadxé nga ni gunna ca xhamigu Jesús, gadxé gadxé ni gudíʼdicabe ne modo bibánicabe. 2) Xiñee nabé risaca nga gaca xhamígunu Jesús.
TI HUAXHINNI biʼniné Jesús ca apóstol stiʼ Pascua lu guiropa pisu stiʼ ti yoo ni nuu ndaaniʼ guidxi Jerusalén. Guiráʼ ca apóstol que gadxé gadxé ni nánnacabe, ni huadíʼdicabe ne modo nabánicabe. Casi Pedru ne bíʼchibe Andrés la? rinaazecaʼ benda. Mateu guca tobi de cani ruquixe impuestu, ne ca judíu que guca nanaláʼdxicaʼ cani runi dxiiñaʼ ca. Zándaca xcaadxi casi Santiagu ne Juan binibiaʼcaʼ Jesús dede dxi nahuiinicaʼ, ne xcaadxi casi Natanael cadi tan xadxipeʼ de runibiaʼcaʼ laabe (Juan 1:43-50). Peru neca zacá la? guirácabe runi crécabe Jesús nga Mesías ni bieeteʼ gueeda que, Xiiñiʼ Dios ni nabani (Juan 6:68, 69). Nabé biecheʼ ca discípulo ora gudxi Jesús laacaʼ: «Ma xhamigua laatu purti ma gudxe laatu irá ni gudxi Bixhoze naa» (Juan 15:15).
2 Ca diidxaʼ ni guníʼ Jesús ca cadi ca apóstol si stibe gúdxibe cani, sínuque ne ca xpinni Cristu ni bibí pur espíritu santu ni nuu yanna riʼ, ne cani zeeda gaca «xcaadxi dendxu» ca (Juan 10:16). Laanu, ca xpinni Cristu, neca gadxé gadxé nga ni nánnanu, ni huadídinu ne modo nabáninu la? guiranu zanda gaca xhamígunu Jesús. Ne nabé risaca nga para laanu, purtiʼ ora gaca xhamígunu Jesús la? laaca cayaca xhamígunu Jiobá. Qué liica zanda chuʼnu gaxha de Dios pa cadi primeru chuʼnu gaxha de Xiiñibe (biindaʼ Juan 14:6, 21). Xi naquiiñeʼ gúninu para gaca xhamígunu Jesús yaʼ. Ne xi naquiiñeʼ gúninu para cadi gusaananu de gaca xhamígunu laabe yaʼ. Ante guicábinu cani gunabadiidxanu ca, chiguidúʼyanu ximodo bisihuinni Jesús guca xhamigu ca discípulo stiʼ ne ximodo bisihuínnicabe laaca xhamígucabe laabe.
Jesús bisihuinni ximodo gaca xhamígunu binni
3. Tuu nga cani biyubi Jesús gaca xhamigu.
3 Salomón, rey ni nabé nuu xpiaaniʼ que, bicaa ca diidxaʼ riʼ: «Stale nga ca xhamigu ti binni ricu» (Pro. 14:20). Cumu gulené binni donda la? jma nga ruyubi gaca xhamigu cani gudii laa xiixa lugar de guicá ique laa gudii. Peru cadi zacá diʼ guca Jesús. Laabe qué liica nuyúbibe nidxaagabe ca binni risaca o ni napa bueltu. Dxandíʼ nga gunnaxhiibe ti hombre ricu ni naca xaíque stiʼ ti guidxi, ne gúdxibe laa gaca discípulo stibe. Peru laaca gúdxibe laa gutoo cani napa ne gacané ca binni pobre (Mar. 10:17-22; Luc. 18:18, 23). Qué ñunibiáʼ diʼ binni Jesús purtiʼ bidxaaga binni ricu ne risaca, sínuque binibiáʼcabe laabe pur guca xhamígube binni pobre ne ni bíʼnicabe menu laa (Mat. 11:19).
4. Xi biʼniʼ ca xhamigu Jesús ni bisihuinni gulenecaʼ donda.
4 Bihuinni dxíchica gulené ca xhamigu Jesús donda. Casi ti biaje guníʼ Pedru xiixa ni bisihuinni qué ruuyaʼ ca cosa ca casi ruuyaʼ Dios cani (Mat. 16:21-23). Santiagu ne Juan bisihuínnicaʼ ruyúbicaʼ gápacaʼ stale cosa risaca para laasicaʼ ora gunábacaʼ Jesús gudii laacaʼ ti lugar risaca lu Reinu stiʼ, ne ni bíʼnicabe ca bichiichini xcaadxi apóstol que. Ne nabé gudinde diidxacabe para gánnacabe tuu nga jma risaca ládecabe. Peru Jesús qué nidxiichiné laacabe pur nga, sínuque guiráʼ ora guluu jneza laacabe ne diidxaʼ nadóʼ (Mat. 20:20-28).
5, 6. 1) Xiñee qué nusaana Jesús de ñaca xhamigu ca once apóstol stiʼ. 2) Xiñee maʼ qué ñaca xhamigu Jesús Judas.
5 Xiñee qué nusaana Jesús de ñaca xhamigu ca apóstol stiʼ. Cadi purtiʼ qué ninabe ñuuyabe paraa cuchee ca discípulo stibe o purtiʼ bidiibe lugar laacaʼ gúnicaʼ ni racaláʼdxicaʼ, sínuque biiyabe ca guenda sicarú nápacaʼ ne ca cosa galán ni racaláʼdxicaʼ gúnicaʼ. Casi gueelaʼ jma nagana gudiʼdiʼ Jesús lu Guidxilayú riʼ, lugar de ñacané Pedru, Santiagu ne Juan laabe la? laga gúsicaʼ. Laabe guyuube triste peru laaca biénebe cadi biʼniʼ diʼ ca discípulo que ni purtiʼ racaláʼdxicaʼ. Nga runi gúdxibe laacaʼ: «Neca ndaani ladxidóʼ to racalaʼdxi tu guni tu jneza peru cuerpu stitu nagueenda riguudxi» (Mat. 26:41).
6 Peru Jesús maʼ qué ñaca xhamigu Judas Iscariote. Xiñee yaʼ. Purtiʼ nécapeʼ ruluíʼ dxandíʼ xhamigu Judas laabe la? bidii Jesús cuenta bidiibe lugar gucaa ladxidoʼbe laabe gúnibe cosa malu. Cumu guca xhamigu Judas binni guidxilayú la? beeda gácabe xhenemigu Dios (Sant. 4:4). Ngue runi, gudxi Jesús Judas guiree ante gábibe ca once apóstol stibe que xhamígube laacaʼ (Juan 13:21-35).
7, 8. Ximodo bisihuinni Jesús nadxii ca xhamigu.
7 Jesús qué ñuuyaʼ diʼ guiráʼ ra cuchee ca xhamigu, sínuque guníʼ íquebe xii nga ni jma galán para laacaʼ. Laabe gunábabe Bixhózebe gapa laacaʼ ora gápacaʼ guendanagana (biindaʼ Juan 17:11). Laabe laaca guníʼ íquebe xi caquiiñecaʼ (Mar. 6:30-32). Ne cadi gúdxisibe laacaʼ xi riníʼ íquebe, sínuque laaca bicaadiágabe laacaʼ purtiʼ guyuuláʼdxibe gánnabe xi riníʼ íquecaʼ ne xi runi sentircaʼ (Mat. 16:13-16; 17:24-26).
8 Guiráʼ ni biʼniʼ Jesús lu xquendanabani dede dxi guti la? bíʼnibe cani para gacanebe ca xhamígube. Para gunda yenanda Jesús ley stiʼ Dios ne biʼniʼ ni jneza la? gupa xidé guti (Mat. 26:27, 28; Heb. 9:22, 28). Peru ni bicaa laabe gúnibe cani nga purtiʼ gunnaxhiibe laacaʼ. Sicaríʼ guniʼbe: «Iruti zanda ganaxhii jma que biaʼ nadxii tobi ni udii xpida pur ca xhamigu» (Juan 15:13).
Ximodo bisihuinni ca discípulo stiʼ Jesús xhamígucaʼ laabe
9, 10. Xi biʼniʼ binni pur gunnaxhii Jesús laacaʼ ne gucané laacaʼ.
9 Jesús bisihuinni nadxii binni ne biquiiñeʼ tiempu stiʼ ne cani gupa para gucané binni, ngue runi guyuulaʼdxiʼ binni guidxiña laabe ne gusihuinni laaca xhamígucaʼ laabe (Luc. 8:1-3). Pur cani biʼniʼ Jesús gunda guníʼ ca diidxaʼ riʼ: «Lagacané stobi de ni caquiiñeʼ, ne laca zacané Dios laatu de ni caquiiñe tu. Zuchá tipa be ná tu dede zaxii. Purti biaʼ ca udii tu stobi biaʼ queca icaa tu» (Luc. 6:38).
10 Laaca guyuu tu biyubi Jesús para si gúʼyacaʼ xi gudiibe laacaʼ. Ti biaje, cani cadi dxandíʼ xhamigu Jesús que gadxé modo biénecaʼ cani guniʼbe, lugar de ñuni crecaʼ laabe neca cadi cayénecaʼ la? nagueendaca bidxiidéchecaʼ laabe. Peru ca apóstol stibe qué nusaanacaʼ laabe. Neca nabé gupa ca apóstol stibe guendanagana pur guca xhamígucaʼ laabe la? bíʼnicaʼ stipa pur chúʼnucaʼ laabe ora gudíʼdibe ra galán ne zaqueca ora bidxaagalube guendanagana (biindaʼ Juan 6:26, 56, 60, 66-68). Gueelaʼ ante gati Jesús que guniʼbe qué nusaana ca xhamígube laabe, nabe: «Laatu huayuu né tu naa lu irá ni nagana huadideʼ» (Luc. 22:28).
11, 12. 1) Xi biʼniʼ Jesús ora bisaana ca discípulo que laa. 2) Xi biʼniʼ ca discípulo que despué.
11 Peru caadxi dxi despué de guníʼ Jesús qué huasaana ca apóstol que laa la? bisaanacaʼ laabe. Ne pur bidxíbicabe binni maʼ qué nusihuínnicabe dxandíʼ nadxiicabe Jesús. Peru Jesús bitiidilaʼdxiʼ stóndacabe sti biaje. Despué de guti Jesús ne biasa de lade gueʼtuʼ guyé ra nuucabe ne gudxi laacabe xhamigu laacabe. Ne bidii laacabe ti dxiiñaʼ ni zeeda de Dios: gusiidicabe «binni de guiráʼ guidxi» gaca xpinni Cristu ne guiniʼcaʼ de laabe lu «idubi naca guidxilayú» (Mat. 28:19, NM; Hech. 1:8). Xi biʼniʼ ca discípulo stibe yaʼ.
12 Ca discípulo stiʼ Jesús bicheechecaʼ stiidxaʼ Reinu de guidubi ladxidoʼcaʼ. Qué nindaa de ngue bisiidicabe guiráʼ ca binni de Jerusalén que de Jiobá purtiʼ gucané espíritu stibe laacaʼ (Hech. 5:27-29). Neca guyuu tu gudxi laacabe záticabe pa gacanécabe binni gaca xpinni Cristu la? qué nusaanacabe de ñúnicabe ni gudxi Jesús laacabe que. Gudiʼdiʼ si caadxi iza gunda guníʼ apóstol Pablu maʼ bireeche ca diidxaʼ nacubi ne galán ca lu «idubi naca guidxilayú» (Col. 1:23). Rihuinni dxíchica nabé bisisaca ca discípulo que nácacaʼ xhamigu Jesús.
13. Ximodo bisihuinni ca primé xpinni Cristu que yenándacaʼ cani bisiidiʼ Jesús lu xquendanabánicaʼ.
13 Ca binni ni guca xpinni Cristu despué que bisihuínnicaʼ dxandíʼ zinándacaʼ cani bisiidiʼ Jesús lu xquendanabánicaʼ. Stale de laacabe bichaacaʼ modo nabánicaʼ ne modo laacaʼ. Nuu de laacabe bisaanacaʼ de gácacaʼ muxeʼ, maʼ qué ñuunecaʼ ni cadi xheelacaʼ, maʼ qué nixúdxicaʼ ne qué nibáʼnacaʼ (1 Cor. 6:9-11). Xcaadxi bichaa modo riníʼ ique de ca binni de sti raza (Hech. 10:25-28). Peru guirácabe bizuubacabe stiidxaʼ Jesús, bisaanacabe ca cosa ni bíʼnicabe dxiqué ne bisihuínnicabe maʼ gadxé laacabe de xcaadxi binni (Efe. 4:20-24). Gúpacabe «xquendabiaaniʼ Cristu», nga riníʼ biziidicabe ximodo riníʼ íquebe ne xi bíʼnibe, ne bíʼnicabe stipa pur chinándacabe ejemplu stibe (1 Cor. 2:16, NM).
Guyúbinu gaca xhamígunu Jesús
14. Xi guníʼ Jesús zuni «dxi mayaca [...] iluxe guidx[i]layú» riʼ.
14 Stale de ca xpinni Cristu ni bibani lu primé siglu que binibiáʼcabe Jesús dxi bicheeche diidxaʼ, ne nuu tu biiyacabe laabe biásasibe de lade gueʼtuʼ. Peru ca dxi stinu riʼ maʼ qué ridúʼyanu Jesús. Yanna, ximodo zanda gaca xhamígunu laabe yaʼ. Ora gúninu ni gabi mozo ni nuu xpiaaniʼ ne ni runi ni jneza ca laanu, ca xpinni Cristu ni bibí pur espíritu santu, cani nabániruʼ lu Guidxilayú riʼ. Jesús guníʼ «dxi mayaca [...] iluxe guidx[i]layú» zudiibe mozo ca gapa «irá ni napa[be]» (Mat. 24:3, 45-47). Stale de ca binni ni cayuni stipa pur gaca xhamigu Cristu cadi nácacaʼ de grupu ca. Ximodo zanda gusihuínnicabe dxandíʼ xhamígucabe Cristu ora gabi mozo ni nuu xpiaaniʼ ne ni runi jneza laacabe gúnicabe xiixa yaʼ.
15. Xii nga zusihuinni pa zaca tuuxa binni casi dendxuʼ o chiva.
15 (Biindaʼ Mateo 25:31-40.) Jesús gudxi cani zeeda gaca mozo ni nuu xpiaaniʼ ca «hermanu», o bicheʼ. Lu ejemplu ni guníʼ Jesús de dendxuʼ ne chiva que bisiénebe intiica cosa gúninu ca bíʼchibe casi ñaca ñúninu ni laabe. Ne laaca guniʼbe pur modo guidxaagalunu ca bíʼchibe nga zusihuínninu pa zácanu casi dendxuʼ o chiva. Nga runi, pa ti xpinni Cristu ni chiguibani lu Guidxilayú riʼ racalaʼdxiʼ gaca xhamigu Jesús la? naquiiñeʼ gúnibe ni gabi mozo ni nuu xpiaaniʼ ne ni runi jneza ca laabe.
16, 17. Ximodo zanda gusihuínninu laaca xhamígunu ca biʼchiʼ Cristu.
16 Laanu cani chiguibáninu lu Guidxilayú riʼ ora guni mandar Reinu stiʼ Dios, ximodo zanda gusihuínninu xhamígunu ca biʼchiʼ Cristu yaʼ. Guidúʼyanu chonna modo zanda gusihuínninu ni. Primé ni naquiiñeʼ gúninu nga gucheechenu ca diidxaʼ nacubi ne galán ca ne stale gana. Jesús gudxi ca discípulo stiʼ gúnicaʼ dxiiñaʼ ca lu guidubi naca Guidxilayú (Mat. 24:14). Peru nagana ñaca para xcaadxi biʼchiʼ Jesús ni bibí pur espíritu santu, ni nuu lu guidxilayú riʼ, ñúnicaʼ dxiiñaʼ ca pa qué ñacané xcaadxi dendxuʼ ca laacaʼ. Nga runi, cada biaje gucheeche tobi ni naca de xcaadxi dendxuʼ ca diidxaʼ la? cayacanebe ca xpinni Cristu ni bibí ca gúnicaʼ dxiiñaʼ ni bidii Dios laacaʼ. Pa gúnicabe zacá zuuyaʼ mozo ni nuu xpiaaniʼ ca xhamígucabe laacaʼ ne zaqueca zuuyaʼ Cristu ni.
17 Guiropa modo zanda gusihuínninu xhamígunu ca biʼchiʼ Cristu nga gudiʼnu bueltu ni nápanu para ganda guireecheruʼ diidxaʼ. Jesús gudxi ca discípulo stiʼ iquiiñecaʼ guiráʼ ni nápacaʼ lu Guidxilayú riʼ para gápacaʼ xhamígucaʼ (Luc. 16:9). Peru qué riníʼ diʼ nga riguíxenu Jiobá ne Jesús para gaca xhamígunu laacaʼ. Ni caniʼbe racá nga ora iquiiñenu cani nápanu para guireeche stiidxaʼ Reinu ca cusihuínninu nadxiinu Jiobá ne Jesús ne xhamígunu laacaʼ, ne cadi rinísinu xhamígunu laacabe, sínuque rusihuínninu ni lu guiráʼ cani rúninu (1 Juan 3:16-18). Laanu riquiiñenu cani nápanu para gucheechenu diidxaʼ. Laaca rudiʼnu bueltu ni nápanu para dxiiñaʼ ni raca lu guidubi naca Guidxilayú ne para gaca chaahuiʼ ca yoo ra ridagulisaanu. Neca stale o huaxiéʼ ni rudiʼnu, Jiobá ne Jesús rudiicabe xquíxepeʼ laanu pur cani rudiʼnu de guidubi ladxidoʼno (2 Cor. 9:7).
18. Xiñee naquiiñeʼ chinándanu conseju ni rudii ca binnigola laanu de lu Biblia.
18 Guionna modo zanda gusihuínninu xhamígunu ca biʼchiʼ Cristu nga guzúʼbanu stiidxaʼ ca binnigola de guidubi ladxidoʼno. Cumu Cristu nga Xaíque stiʼ ca binni ridagulisaa la? riquiiñebe espíritu santu para cuibe ca binnigola ca (Efe. 5:23). Apóstol Pablu bicaa ca diidxaʼ riʼ: «Lauzuuba stiidxa cani nuu de xaíque stitu. Laguni ni gabi ca laatu» (Heb. 13:17). Peru nuu biaje zándaca gaca nagana para laanu chinándanu ca conseju ni gudii ca binnigola ca laanu de lu Biblia. Pa guidúʼyanu paraa si cucheecabe la? zándaca gucaa nga laanu maʼ cadi gulábinu ca conseju stícabe. Peru neca binni ruchee laacabe la? nabé riecheʼ Cristu, ni naca Xaíque stiʼ ca binni ridagulisaa, iquiiñeʼ laacabe. Nga runi, pa guzúʼbanu stiidxacabe, zusihuínninu xhamígunu Jesús. Pa guzúʼbanu stiidxaʼ ca binnigola ca de guidubi ladxidoʼno lugar de guidúʼyanu ra cucheesícabe la? zusihuínninu nadxiinu Jesús.
Paraa zanda guidxélanu binni ni dxandíʼ gaca xhamígunu
19, 20. 1) Xi zadxélanu lade ca binni ridagulisaa. 2) Xi zazíʼdinu lu sti tema ca.
19 Cadi ca binnigola si nga riquiiñeʼ Jesús para gacané laanu, sínuque laaca riquiiñebe ca xpínnibe ni zeeda gaca casi jñaanu, bíʼchinu ne bizáʼnanu lade ca binni ridagulisaa (biindaʼ Marcos 10:29, 30). Ñee rietenaláʼdxiluʼ ximodo biʼyaʼ ca binnilídxiluʼ lii dxi cuzulú cayuuluʼ ndaaniʼ xquidxi Dios la? Zándaca biéchecabe pur nga. Peru Jesús guníʼ ziuu biaje laaca «ca binni lidxi pe hombre zaca nanalaʼdxi laa» (Mat. 10:36). Nga runi, ratadxí ladxidoʼno gánnanu lade ca binni ridagulisaa zanda guidxélanu tuuxa ni dxandíʼ gaca xhamígunu jma que ti bíʼchinu ni gulenenu (Pro. 18:24).
20 Lu ca diidxaʼ ni guníʼ Pablu ra ziluxe carta ni bicaa ra nuu ca xpinni Cristu de Roma que biseendabe diuxi, nga rusihuinni gúpabe xhamígube ni nabé gunnaxhiibe (Rom. 16:8-16). Apóstol Juan bicaa ca diidxaʼ riʼ ra maʼ ziluxe guionna carta stiʼ: «Bigapa diuxi laʼ cada tobi de ca xhamigu nu» (3 Juan 1). Casi maʼ bidúʼyanu ca, laabe laaca bidxélabe binni ni dxandíʼ guca xhamígube. Ximodo zanda gusihuínninu zinándanu ejemplu stiʼ Jesús ne stiʼ ca primé xpínnibe yaʼ. Ximodo zanda gápanu xhamígunu lade ca binni ridagulisaa ne cadi gusaana de gaca xhamígunu laacabe yaʼ. Lu sti tema ca zacábinu cani gunabadiidxanu ca.
Xi nicábiluʼ
• Ximodo bisiidiʼ Jesús laanu naquiiñeʼ gaca xhamígunu binni.
• Ximodo bisihuinni ca discípulo stiʼ Jesús dxandíʼ guca xhamígucaʼ laabe.
• Ximodo zanda gusihuínninu xhamígunu Cristu.
[Dibuju/foto ni zeeda lu yaza 14]
Jesús bisihuinni racalaʼdxiʼ ganna xi riníʼ ique ca xhamigu ne xi runi sentircaʼ
[Ca dibuju/foto ni zeeda lu yaza 16]
Ximodo rusihuínninu racaláʼdxinu gácanu xhamigu Cristu