Ximodo uzulú gúʼndanenu binni libru Xipeʼ ndiʼ cusiidiʼ Biblia
Stale de laanu ziuláʼdxinu gúʼndanenu tuuxa de Biblia pa idxélanu tobi ni riuulaʼdxiʼ iziidiʼ. Libru cubi Xipeʼ ndiʼ cusiidiʼ Biblia zacané ni laanu. Yaza 3 dede 7 ucuá ni para ganda uzulunu inínenu binni diidxaʼ de lu Biblia. Nga runi, uzululuʼ gúʼndaneluʼ binni qué zácani nagana para lii, dede para cani deruʼ cuzulú cucheeche diidxaʼ.
◼ Zándaca chinándanu modo na lu yaza 3:
Despué de uzeeteluʼ xiixa endanagana bizaaca ne ni naguu xizaa cani nabeza neza ra rucheecheluʼ diidxaʼ la? biluíʼ laabe ca endarinabadiidxaʼ ni cá ne letra nayaasehuiiniʼ lu yaza 3 ne biyubi ximodo icábibe cani. De racá biluíʼ laabe yaza 4 ne 5.
◼ Laaca zanda uzulú uluiʼluʼ laabe yaza 4 ne 5:
Zanda inabadiidxaluʼ: «Cadi galán ñaca iráʼ ni cá raríʼ ca dxandíʼ la?». O iniʼluʼ: «De cani ruuyaluʼ raríʼ xii ndiʼ ni jma ñuláʼdxiluʼ ñaca yaʼ». Bicaadiaga chaahuiʼ xi icábibe lii.
Pa binni ca usihuinni riuulaʼdxiʼ tobi de ca textu ni zeeda ndaaniʼ Biblia la? biindané laabe ca párrafo stiʼ libru ra caníʼ de textu ca para uluiʼluʼ laabe xi rusiidiʼ Biblia de tema ca (laguuyaʼ cuadru ni zeeda lu yaza riʼ). Biindaʼ libru ca casi ñaca cayuundaneluʼ tuuxa Biblia. Ndiʼ zanda ácani primé ca chigánnaluʼ laabe ra puertaʼ lídxibe, ne gaayuʼ o chii si minutu.
◼ Sti modo zanda ácani nga gúʼyaluʼ lu yaza 6 para ucaaluʼ binni ca iníʼ:
Biluíʼ ca endarinabadiidxaʼ zeeda ñee yaza ca ne gudxi laabe: «Huaníʼ íqueluʼ lu tobi de ca endarinabadiidxaʼ riʼ la?». Pa chuláʼdxibe tobi de laacani, biluíʼ laabe ca párrafo stiʼ libru ca ra cacabi ni ca endarinabadiidxaʼ ca (biiyaʼ cuadru ni zeeda lu yaza riʼ). Ra usiéneluʼ cani laabe la? mápeca cayuundaneluʼ laabe Biblia.
◼ Zanda iquiiñeʼ yaza 7 para uluiʼluʼ ximodo ruundanécabe binni Biblia:
Biindaʼ guionnaʼ primé oración ni cá lu yaza ca, de racá la? biiyaʼ lu capítulo 3 ne biquiiñeʼ párrafo 1 dede 3 stini para uluiʼluʼ laabe ximodo raca ni. Biaanané laabe ibiguétaluʼ para gúʼyatu modo cacábini ca endarinabadiidxaʼ ni zeeda lu párrafo 3 ca.
◼ Ximodo gaʼbuʼ laabe zabiguétaluʼ sti biaje:
Ora maʼ biluxe biindaneluʼ laabe primé guyeluʼ ca, gudxi laabe zabiguétaluʼ sti biaje para gúʼndarutu. Zanda iniʼluʼ sicaríʼ: «Ne chupa chonna minutu si maʼ bizíʼidinu de ti tema ni nabé risaca zeeda ndaaniʼ Biblia. Ora ibiguetaʼ sti biaje la? zaninu de [bisaana ti endarinabadiidxaʼ para icábiluʼ despué]. Zanda tiideʼ sti semana ca hora rica la?».
Laga zidxíñanu dxi naguixhe Jiobá la? laabe cudiibe laanu iráʼ ni caquiiñenu para gúninu xhiiñabe (Mat. 28:19, 20; 2 Tim. 3:17). Iquiiñeʼ chaahuinu libru cubi riʼ para uzulunu gúʼndanenu binni Biblia.
[Box on page 3]
Ra zadxélanu modo guiénenu ca textu stiʼ Biblia zeeda lu yaza 4 ne 5
◻ Apocalipsis 21:4 (yaza 27, 28, párr. 1-3)
◻ Isaías 33:24; 35:5, 6 (yaza 36, párr. 22)
◻ Juan 5:28, 29 (yaza 72, 73, párr. 17-19)
◻ Salmo 72:16 (yaza 34, párr. 19)
Ca endaricabi stiʼ ca endarinabadiidxaʼ ni zeeda lu yaza 6
◻ Xiñee racananu (yaza 108, párr. 6-8).
◻ Ximodo udxiilunu ca guendanagana ni riguu xizaa laanu (yaza 184, párr. 1-3).
◻ Xi zanda gúninu ti ganda guibaninenu binnilídxinu jma nayecheʼ (yaza. 142, párr. 20).
◻ Xi rácanu ora maʼ gútinu (yaza 58, párr. 5, 6).
◻ Ñee ziuu dxi gúʼyanu ca binnilídxinu ni maʼ guti la? (Yaza 72, 73, párr. 17-19)
◻ Xiñee nanna dxíchinu zuni Dios cani maʼ guníʼ (yaza 24, párr. 17).