Galán gucheecheluʼ diidxaʼ ca domingu
1. Xi rizíʼdinu de ni biʼniʼ Pablu ne ca xcompañeru ndaaniʼ guidxi Filipos.
1 Chiguzéʼtenu de ca judíu de guidxi Filipos, stale de laacaʼ riziiláʼdxicaʼ sábadu, ne dxi sábadu riʼ nga nuu Pablu ne ca xcompañeru ni ziné lu viaje de misioneru raqué. Laacabe ñanda ñaanacabe dxi riʼ sin nucheechecabe diidxaʼ ne guirutiʼ ñabi laacabe xiixa. Peru cumu nánnacabe ridagulisaa ca judíu fuera de guidxi que para chiguni orarcaʼ la? qué nuníticabe tiempu ne guyécabe raqué para gucheechecabe diidxaʼ. Pur ni bíʼnicabe que guyuunisa Lidia ne guiráʼ binnilidxi. ¡Nanna pabiáʼ nayecheʼ biʼniʼ sentir Pablu ne ca xcompañeru yaʼ! (Hech. 16:13-15.) Ca dxi stinu riʼ, stale binni riziilaʼdxiʼ domingu. Cadi dxandíʼ galán gucheechenu diidxaʼ neca ti ratu ca domingu la?
2. Xi guiráʼ guendanagana bidxiilú ca binni ni nuu ndaaniʼ xquidxi Jiobá para gunda bicheechecaʼ diidxaʼ ca domingu.
2 Ca guendanagana gúpacabe para gunda bicheechecabe diidxaʼ domingu. Lu iza 1927, guluucabe gana ca xpinni Cristu ni nuu ndaaniʼ xquidxi Jiobá gucheechecaʼ diidxaʼ neca ti ratu ca domingu. Peru qué liica nindaa de ngue guyuu binni ni biquiiñeʼ ca ley stiʼ gobiernu para gucaalucaʼ laacabe. Tobi de ca lugar bíʼnicabe zacá nga Estados Unidos. Raqué gunaazecabe stale xpinni Cristu, purtiʼ nácabe cadi zinándacaʼ ni na ca ley nápacabe casi guiziilaʼdxiʼ binni domingu, chuʼ binni tobi si ne cadi gutoocaʼ pa qué gápacaʼ permisu stiʼ gobiernu. Neca zaqué, qué nireecabe gana. Xi bíʼnicabe para gunda bicheechecabe diidxaʼ yaʼ. Lu iza 1930, cani rucheeche diidxaʼ ni nuu ndaaniʼ ca neza binni ridagulisaa ni nuu gaxha de raqué guyecaʼ pur grupu ca lugar ra gúdxicabe laacaʼ checaʼ. Ne nuu biaje riree stale tu rucheeche diidxaʼ, ngue runi neca ñacalaʼdxiʼ ca xaíque guidxi que ninaazecaʼ laacabe la? qué ñanda diʼ ninaazecaʼ guirácabe. Pur guiráʼ ni biʼniʼ ca xpinni Cristu que, yanna riʼ maʼ randa rucheechenu diidxaʼ ca domingu. Ñee rusisácanu guiráʼ ni bíʼnicabe ca la?
3. Xiñee galán gucheechenu diidxaʼ ca domingu.
3 Ti dxi nabé galán para gucheechenu diidxaʼ. Cumu stale binni qué runi dxiiñaʼ domingu la? zándaca jma nuudxicaʼ. Ne zándaca jma zaná ca binni yuʼduʼ gucaadiágacaʼ de Dios dxi riʼ. Pa domingu rápanu guendaridagulisaa stinu la? maca nuunu listu para chigucheechenu diidxaʼ, nga runi galán quixhe íquenu chigucheechenu diidxaʼ ante o despué de guendaridagulisaa stinu. Pa caquiiñeʼ la? zanda chineluʼ xiixa ni goloʼ.
4. Xi cosa galán zanda cueendunu pa gucheechenu diidxaʼ neca ti ratu ca domingu.
4 Pa gucheechenu diidxaʼ neca ti ratu ca domingu la? záparunu tiempu para guiziiláʼdxinu. Ne ni jma galán nga: ziuʼnu nayecheʼ ra gúninu xhiiñaʼ Dios (Pro. 19:23). Ne zándaca dede guidxélanu tuuxa binni casi Lidia.