Carta stiʼ Grupu ni Zaniruʼ

Bíʼchidu ne bizáʼnadu ni nadxiidu:

Nabé nayecheʼ nuudu cucaʼdu ca diidxaʼ riʼ ra nuutu ra cuzulú iza nabé risaca riʼ. Ante guiluxe iza 2014, zazaa ti gayuaa iza de cayuni mandar Jesucristu lade ca xhenemigu (Sal. 110:1, 2).

Ra bizulú beeu octubre guca reunión anual stiʼ Watch Tower Bible and Tract Society of Pennsylvania, dxi ca biluíʼ Comité stiʼ Traducción del Nuevo Mundo Biblia ni jma galán huabiʼxhiʼ peru ni maʼ biʼniʼ chaahuicabe lu diidxaʼ inglés, ne zanda gapa guiráʼ binni ni. Biquiiñeʼ Jiobá ca xiiñiʼ ni bibí pur espíritu santu para gúnicaʼ Traducción del Nuevo Mundo (Rom. 8:15, 16). Cadi dxandíʼ risaca dxiiñaʼ ni bíʼnicabe riʼ la?

Maʼ raca stale iza Comité ni Ruuyaʼ xi Guicá lu ca Guiʼchiʼ Ricaanu stiʼ Grupu ni Zaniruʼ huayuuyacabe jma risaca nga gutiixhicabe Biblia lu xcaadxi diidxaʼ. Ca dxi riʼ huaree Traducción del Nuevo Mundo lu 121 diidxaʼ guidubi ni o pur ndaa. Rinábadu laatu guluiʼtu Jiobá pabiáʼ rusisácatu Biblia ni nápatu ca. Laguundaʼ ni ne laguiníʼ ique ni cayuundatu ca guiráʼ dxi; pa gúnitu zacá la? zadxíñatu jma gaxha de Jiobá, Dios ni guníʼ xi guicá luni (Sant. 4:8).

Nabé triste riuʼdu gánnadu cadiʼdiʼ ca bíʼchinu ne bizáʼnanu lu xiixa guendanagana Ne riénenu xiñee nuu biaje nagana raca para laacabe chúʼcabe nayecheʼ. Casi ti familia de Asia bichaa modo nabánicaʼ dxi málasi guti xcuerpu jñaacaʼ. Ca especialista ni biiyaʼ laabe nabé triste guyuucaʼ purtiʼ qué lica ñanda ñacanecaʼ laabe. ¡Guizáʼ triste ni cadiidicabe ca! Yanna la? napa xidé gapa xheelabe laabe ridxíʼ ne huaxhinni. Ne ti hombrehuiiniʼ xiiñicabe ne chupa xiiñidxaapacabe racané laacabe, zacá rusihuínnicaʼ dxandíʼ xpinni Cristu laacaʼ. Cásica familia riʼ, guiratu laaca huayanda huadxiilutu ca guendanagana huayápatu ne huayuuyatu pabiáʼ nayecheʼ riuu binni guni huantar cani purtiʼ rusihuinni pabiáʼ naguidxi fe stiʼ (Sant. 1:2-4). Jiobá cayabi ca xpinni Cristu ni bibí ne cani naca de xcaadxi dendxuʼ ziéchecaʼ ora gúʼyacaʼ biʼniʼ huantarcaʼ stale guendanagana yanna purtiʼ laabe zaguube ndaayaʼ laacaʼ ora gudiibe laacaʼ ti guendanabani ni qué zaluxe (Sant. 1:12).

Iza gudiʼdiʼ ca guyé 19,241,252 binni conmemoración. ¡Guizáʼ riuʼnu gana guidúʼyanu stale binni cusisaca Jiobá ne Jesucristu ora riecaʼ guendaridagulisaa jma risaca ni rapa xquidxi Dios guiráʼ iza! Ne riéchenu gánnanu lu beeu marzo ne abril bisisaca jma de chupa millón de ca xpinni Cristu Jiobá ora gúcacaʼ precursor auxiliar. Ñee cadi galán gánnanu laaca zanda chuʼ cani gaca precursor auxiliar lu guidubi guendaridagulisaa ni rapa binnigola ni riganna ca binni ridagulisaa né ca precursor regular, neca cadi lu beeu marzo o abril chigánnabe laacaʼ. Cani riene xii nga na Stiidxaʼ Dios nánnacaʼ pabiáʼ risaca nga cadi gusaanacaʼ de gucheechecaʼ diidxaʼ ne gúnicaʼ xcaadxi dxiiñaʼ ni naquiiñeʼ guni ca xpinni Dios. Ne nga zacané laanu guzuhuaa dxiichinu ne gucáʼnanu guiráʼ ni cayuni Binidxabaʼ para guxheleʼ laanu de Jiobá (1 Cor. 15:58).

Nabé riéchenu gánnanu lu iza dxiiñaʼ gudiʼdiʼ ca bisihuinni 277,344 binni maʼ bidiicaʼ laacaʼ Jiobá ora guyuunísacaʼ ne maʼ nuucaʼ né xcaadxi xpinni Cristu ni nuu lu guidubi naca Guidxilayú lu neza ra zalacaʼ (Mat. 7:13, 14). Cani nacubi riʼ caquiiñecaʼ gacanenu laacaʼ «uzuhuaa dxiichi[caʼ] lu ni runi cre[caʼ]» (Col. 2:7). Cadi gusaana de cúʼsaanu gana laanu para guni huantarnu (Mat. 24:13). Biblia rudii conseju riʼ laanu: «Lagacané cani cadxibi, ne cani caʼru uzuhuaa chaahui, ne cadi ixhacalaʼdxi tu laacaʼ» (1 Tes. 5:14). Nga runi, de guidubi ladxidoʼno guni orarnu Dios sicaríʼ: «Biseendaʼ reinu stiluʼ» (1 Tes. 5:17; Mat. 6:10, TNM).

Ribézadu chuuláʼdxitu gúʼndatu Anuario 2014, ne racaláʼdxidu gánnatu nadxiidu cada tobi de laatu purtiʼ nadxiitu Jiobá.

Ca bíʼchitu ne bizáʼnatu,

Grupu ni zaniruʼ stiʼ ca Testigu stiʼ Jiobá