Carta stiʼ Grupu ni Zaniruʼ

Bíʼchidu ne bizáʼnadu ni nadxiidu:

«Qué riaana dxí du de udíʼ du diuxquixe Dios pur irá tu, ne cada iní né du laabe ruzeʼte du laatu. Runi tu xhiiña Dios purti runi cre tu laa ne nadxii tu laa, ne qué huasaana tu de icá lú tu Jesucristu Señor stinu. Ne irá nga ruzeʼte du lu Dios ora riní né du laa.» (1 Tes. 1:2, 3.) ¡Nabé galán modo cusihuinni ca diidxaʼ riʼ ni runi sentirdu pur laatu! Rudiʼdu xquíxepeʼ Jiobá purtiʼ nuunetu laadu ne purtiʼ galán dxiiñaʼ cayúnitu.

Lu guidubi iza gudiʼdiʼ ca bíʼnitu «xhiiña Dios purti runi cre tu laa ne nadxii tu laa» ne zacá rusihuínnitu cayúnitu xhiiñaʼ Reinu. Stale de laatu maʼ biyubi modo guni jma lu xhiiñaʼ Dios. Casi nuu tu laa maʼ yendeza sti lugar ra jma caquiiñeʼ tu gucheeche stiidxaʼ Reinu, zándaca ndaaniʼ xquidxi o ndaaniʼ sti guidxi. Nuu xcaadxi rucheeche diidxaʼ ra ridiʼdiʼ stale binni. Ne stale tu laa gudixhe ique gaca precursor auxiliar tiempu guca Conmemoración, lu beeu yeganna superintendente de circuito laatu o dxi guca campaña lu beeu agosto 2014. Riguʼdu naróʼ stitu purtiʼ cayúnitu xhiiñaʼ Jiobá de guidubi ladxidoʼto biaʼ gándatiʼ (Col. 3:23, 24). Rudiʼdu xquíxepeʼ Dios stinu pur dxiiñaʼ sicarú cayúnitu.

Laaca nabé rudiʼdu xquíxepeʼ laatu purtiʼ rusihuínnitu «nadxii tu» Dios ra gucanetu cuiʼ ca yoo ni riquiiñeʼ para guni adorarnu laa. Cumu zeʼ dxi ziroobaʼ xquidxi Jiobá la? jma caquiiñeʼ cuiʼ ca yoo riʼ (Is. 60:22). Iza gudiʼdiʼ ca guyuu 8,201,545 publicador ne biaʼ 9,499,933 binni bíʼndanenu Biblia cada beeu. Cumu stale binni nga caziidiʼ la? caquiiñeʼ guiroobaʼ o gaca chaahuiʼ stale sucursal. Ne laaca pur nga caquiiñeʼ cuiʼ jma Yoo stiʼ Reinu. Ndaaniʼ stale guidxi laaca caquiiñeʼ cuiʼ yoo ra ribiʼxhiʼ diidxaʼ para cueza ca traductor ne gutiixhicaʼ diidxaʼ lugar ra riníʼcabe stiidxacaʼ.

Pur cani maʼ gúninu ca, xi zanda gúninu para gacanenu gaca ca dxiiñaʼ riʼ yaʼ. Nuu de laanu zanda chigacané ra cayaca cani. Peru neca nánnanu modo ribí yoo o qué gánnanu la? guiranu nápanu ndaayaʼ de gacanenu ra gudiʼnu «ca cosa risaca» nápanu (Prov. 3:9, 10). Ante guni ca israelita tabernáculo, bidiicaʼ stale cosa ni caquiiñeʼ para gaca ni dede gupa xidé gúdxicabe laacaʼ maʼ cadi gudiirucaʼ (Éx. 36:5-7). Ca ejemplu zeeda lu Biblia riʼ runiibi cani ladxidoʼno ne rucaa cani laanu gúninu casi biʼniʼ ca binni rieeteʼ lúcani. Bíʼchidu ne bizáʼnadu ni nadxiidu, laaca rusihuínnitu «nadxii tu» Dios ora racanetu lu ca dxiiñaʼ riʼ ne nga nga sti razón nápadu para gudiʼdu xquíxepeʼ Jiobá.

Sti cosa ni nabé rusiecheʼ laadu nga guidúʼyadu modo runi huantar ca hermanu intiica guendanagana ne qué rusaana de gúnicaʼ ni na Dios. Guzéʼtenu ni cayúnicabe ca hermanu de Corea del Sur. Dede iza 1950 maʼ biseguyoocabe stale Testigu ni nahuiiniʼ purtiʼ qué rinacaʼ gucheenecaʼ Dios, nuu de laacaʼ xadxí rieguyoocaʼ ne nuu la? ti tiempuhuiiniʼ si. Stale iza maʼ biʼniʼ huantar ca hermanu stinu guendanagana riʼ sin guireecaʼ gana. Ejemplu stícabe riʼ nabé ruquidxi ni fe stinu.

Ndaaniʼ guidxi Eritrea nuu chonna hermanu stinu ni maʼ napa jma de gande iza de deguyoo. Xcaadxi hermanu, dede né hermana ne xiiñiʼ, maʼ huaseguyoocabe laacaʼ ti tiempuhuiiniʼ si. Neca huayaca stale stipa para gundaacabe ca hermanu riʼ, peru dede nagasi qué ganda gaca xiixa. Neca zacá, cadi cudxiideche ca hermanu stinu riʼ Dios. Ne laadu qué riaanadxidu de guzéʼtedu laacabe lu oración stidu (Rom. 1:8, 9).

Stale de laatu cadi deguyooto pur ni runi cretu. Peru laaca napa xidé gudxiilutu ca guendanagana rapa binni ora maʼ nagola, ora huará, ora rucaaluʼ xfamilia ni cadi Testigu laa ne nuu xcaadxi laasicaʼ nánnacaʼ xi guendanagana nápacaʼ. Neca zacá, cadi cusaana de gúnitu ni na Jiobá (Sant. 1:12). ¡Jnézapeʼ cayúnitu! Rudiʼdu xquíxepeʼ Jiobá purtiʼ cayuni huantartu guiráʼ guendanagana ca.

Rihuinni dxíchica: rúnitu xhiiñaʼ Dios purtiʼ runi cretu laa, nadxiitu laa ne qué huasaana de gúnitu ni na ne nga nga ca razón nápadu para gudiʼdu «xquíxepeʼ Jiobá, purtiʼ nachaʼhuiʼ» (Sal. 106:1). Nabé nadxiidu laatu ne runi orardu Jiobá para gudii stipa laatu, guinaaze dxiichiʼ ne uguu ndaayaʼ laatu ti qué chuʼ dxi gusaana de gúnitu xhiiñaʼ.

Ca bíʼchitu ne bizáʼnatu,

Grupu ni Zaniruʼ stiʼ ca Testigu stiʼ Jiobá