Ximodo chindanu ndaaniʼ ladxidóʼ cani cucaadiaga laanu
1. Xi biʼniʼ sentir ca discípulo stiʼ Jesús ora bisiidibe laacaʼ.
1 Yendá Jesús ndaaniʼ ladxidóʼ cani bicaadiaga laa. Ngue runi, ti biaje na Biblia «biniibi dxacha» ladxidóʼ ca discípulo stibe ora bisiénebe laacaʼ xiná Xquiʼchiʼ Dios (Luc. 24:32). Dede ndaaniʼ ladxidoʼno nga naquiiñeʼ guiale guzúʼbanu stiidxaʼ Dios; nga runi, ximodo zanda gacanenu ca estudiante stinu quixhe íquecaʼ guchaacaʼ modo nabánicaʼ yaʼ (Rom. 6:17).
2. Xiñee galán guyúbinu modo guinínenu binni ne guiénenu laa ti chindanu ndaaniʼ ladxidóʼ.
2 Guyúbinu modo guininu ne guiénenu binni. Cadi tiisi gábinu binni xii nga ni jneza ne ni cadi jneza maca bichaacaʼ modo laacaʼ. Ne ora guidúʼndanenu laacabe caadxi versículo ni cusihuinni cadi jneza cani runi crécabe la? zándaca maʼ qué zanácabe gucaadiágacabe laanu. Para cuʼnu gana laacabe, primeru naquiiñeʼ guiénenu xiñee runi crécabe cani ne xi pur rúnicabe xiixa cosa. Ora guiníʼ ique chaahuinu xi guinabadiidxanu ne guyúbinu modo gúninu ni la? zanácabe gábicabe laanu xi riníʼ íquecabe (Prov. 20:5). Zacatiʼ nga zanda cuinu xi versículo stiʼ Biblia zindá ndaaniʼ ladxidóʼcabe. Nga runi, nabé risaca guizaaláʼdxinu laacabe ne gápanu paciencia (Prov. 25:15). Cadi guiaandaʼ lii gadxé gadxé nga modo riniisi cada binni en sentidu espiritual. Caquiiñeʼ tiidiʼ tiempu para gacané espíritu santu stiʼ Jiobá binni ca guchaa modo riníʼ ique ne modo laa (Mar. 4:26-29).
3. Ximodo zanda gacanenu ca estudiante stinu gápacaʼ ca guenda rapa ca xpinni Cristu.
3 Gacanenu laacabe gápacabe ca guenda rapa ca xpinni Cristu. Ora guidúʼndanenu laacabe caadxi textu ni caníʼ de modo nachaʼhuiʼ Jiobá ne pabiáʼ nadxii laanu la? zacané ni laacabe gápacabe ca guenda rapa ca xpinni Cristu. Para gudiicabe cuenta pabiáʼ rizaalaʼdxiʼ Dios laanu, zanda guidúʼndanenu laacabe Salmos 139:1-4 ne Lucas 12:6, 7. Pa dxandíʼ rudiicabe xquíxepeʼ Jiobá pur guendanachaʼhuiʼ stiʼ la? jma zannaxhiicabe laa ne ziuucabe jma gaxha de laa (Rom. 5:6-8; 1 Juan 4:19). Ne ora guiziidicabe riecheʼ Jiobá o riuu triste pur cani gúnicabe la? zuyúbicabe modo gusiéchecabe Dios ne gusisácacabe laa (Sal. 78:40, 41; Prov. 23:15).
4. Ximodo zanda chinándanu ejemplu stiʼ Jiobá ora gusíʼdinu binni de Biblia.
4 Qué rucaa diʼ Jiobá laanu gúninu ni na ca mandamientu stiʼ, sínuque ruluíʼ laanu pabiáʼ galán chinándanu conseju stiʼ (Is. 48:17, 18). Zinándanu ejemplu stiʼ Jiobá pa gusaananu lu náʼ estudiante stinu cuiʼ guni ni jneza. Pa gúninu nga la? zuchaabe modo nabánibe ne maʼ qué ziuuruʼ dxi gúnibe ni bíʼnibe dxiqué (Rom. 12:2). Zacá jma ziuube gaxha de Jiobá, ni ruuyaʼ xi nuu ndaaniʼ ladxidóʼ binni (Prov. 17:3).