Gacanenu xcaadxi binni gaca xhamígucaʼ Dios
1 Binni de guiráʼ guidxi roʼ caziidicaʼ gúnicaʼ ni na Jiobá yanna (Isa. 2:2, 3). Peru para guireendú ni gúnicabe ne qué guixélecabe de Jiobá la? naquiiñeʼ gannaxhiicabe laabe (Luc. 8:15; Mar. 12:30). Purtiʼ pa qué gúnicabe ni la? qué zanda diʼ gucaanácabe ca cosa ni zándaca guxheleʼ laacabe de Jiobá ne qué zápacabe stipa para gúnicabe ni jneza. Ni zacané laacabe para ganda guidxíñacabe Jiobá nga gusíʼdinu laacabe gusisácacabe modo laabe. Nga runi, bicaa laacabe guiníʼ íquecabe de cani zeeda lu libru Xipeʼ ndiʼ cusiidiʼ Biblia.
2 Ejemplu stiluʼ. Pur cani gúniluʼ, zanda gacaneluʼ tuuxa ni cayuundaneluʼ guni ni jneza. Ora guʼyaʼ binni ca rusihuínniluʼ dxandíʼ xhamíguluʼ Jiobá ne rúniluʼ guiráʼ ni nabe la? zándaca guiale de ladxidoʼbe gúnibe zacaca (Luc. 6:40). Ne ni jma nagueenda zacané xcaadxi binni nga ni gúninu que ni guininu.
3 Cani napa xiiñiʼ la? ejemplu stícabe nga tobi de ca modo ni jma galán para gusiidicabe ca xiiñicabe (Deu. 6:4-9). Ti guendaxheelaʼ ni bicaa ique gusiniisi xiiñiʼ ndaaniʼ xquidxi Dios, gunábacabe conseju xcaadxi binni ni maʼ bisiniisicaʼ xhiiñicaʼ ndaaniʼ xquidxi Dios. Hombre riʼ guníʼ: «Guiráʼ binni gunabadiidxaʼ gúdxicaʼ naa ejemplu sticaʼ nga ni gucané ca xiiñicaʼ». Nga runi, pur modo nabani cani napa xiiñiʼ la? zanda gusiidicabe ca xiiñicabe gánnacaʼ ximodo nga raca xhamigu tuuxa binni Jiobá (Sant. 2:23).
4 Oración ni guiree de ndaaniʼ ladxidoʼno. Laaca zanda gacanenu xcaadxi binni gaca xhamígucaʼ Jiobá ra gusíʼdinu laacabe guni orárcabe de guidubi ladxidóʼcabe. Zanda guluinu laacabe oración ni biʼniʼ Jesús ni rábicabe padrenuestro, o xcaadxi oración zeeda ndaaniʼ Biblia ni biʼniʼ ca xpinni Dios de guidubi ladxidoʼcaʼ (Mat. 6:9, 10). Ne ca oración stinu zanda gusíʼdinu ca xiiñinu ne cani cayuundanenu Biblia guni orarcaʼ. Ora gunadiácabe de ndaaniʼ ladxidoʼno caree ni canábanu Dios la? zudiicabe cuenta dxandíʼ xhamígunu Jiobá. Guluu gana laacabe cadi gusaanacabe de guiníʼnecabe Dios ora cadíʼdicabe ra nagana (Rom. 12:12). Ra gúʼyacabe racané Jiobá laacabe ora maʼ cadíʼdicabe ra nagana la? zannaxhiicabe laabe jma casi ti xhamígucabe ne zuni crécabe zúnibe guiráʼ ni maʼ guniʼbe (Sal. 34:8; Fili. 4:6, 7).