Cadi gusaana de guibániluʼ modo rusiidiʼ Dios despué de chuʼnísaluʼ

1. ¿Xiñee naquiiñeʼ chuʼnu cuidadu né ni riníʼ íquenu?

PA DERUʼ guyuunísanu o pa maʼ xadxí, guiranu racaláʼdxinu guibáninu modo riuulaʼdxiʼ Jehová. Para ganda gúninu ni caquiiñeʼ gápanu cuidadu né ni riníʼ íquenu. ¿Xiñee yaʼ? Purtiʼ ca ni riníʼ íquenu rusihuinni ca ni ximodo laanu. Pa siempre caníʼ íquenu deseu malu la? zaninu ca ni o zúninu ca ni (Efes. 4:17-19). Peru pa guiníʼ íquenu puru cosa jneza la? zaninu ne zúninu ni riuulaʼdxiʼ Bixhózenu Jehová (Gál. 5:16).

2. ¿Gunáʼ nga ca pregunta ni zacábinu lu artículo riʼ?

² Casi bizíʼdinu lu artículo ni gudiʼdiʼ que ziuu ora zaníʼ íquenu cosa ni cadi jneza. Peru zanda gucueezanu laanu para cadi gúninu ca ni. Ante chuʼnísanu caquiiñeʼ gusaana de guininu ne gúninu ca cosa ni nanalaʼdxiʼ Jehová. Ndiʼ nga ni caquiiñeʼ gúninu primé para gusaananu modo gúcanu dxiqué. Para gusiéchenu Jehová la? caquiiñeʼ chinándanu ni ná mandatu riʼ: «Laguibani modo cusiidiʼ Dios laatu» (Col. 3:10). Lu artículo riʼ, zacábinu ca pregunta riʼ: ¿xi riníʼ guibáninu «modo cusiidiʼ Dios» o gácunu personalidad nacubi? ne ¿ximodo zanda gácunu personalidad nacubi riʼ casi rácunu ti lari ne cadi cueenu ni ládinu?

¿XI RINÍʼ GUIBÁNINU «MODO CUSIIDIʼ DIOS» O GÁCUNU PERSONALIDAD NACUBI?

3. Casi ná Gálatas 5:22, 23, ¿xi riníʼ guibáninu «modo cusiidiʼ Dios» o gácunu personalidad nacubi?

³ Guibáninu «modo cusiidiʼ Dios» o gácunu personalidad nacubi riníʼ ni gusihuínninu ca cualidad stiʼ Jehová lu ca cosa ni riníʼ íquenu ne lu ca ni rúninu. ¿Ximodo nga gácunu personalidad nacubi riʼ cásica rácunu ti lari yaʼ? Ra gusihuínninu ca cualidad stiʼ espíritu lu ca ni rúninu, ca ni riníʼ íquenu ne ca ni runi sentirnu (biindaʼ Gálatas 5:22, 23). Guzéʼtenu ti ejemplu, ti binni ni nabani modo rusiidiʼ Dios nadxii Jehová ne nadxii ca xpínnibe (Mat. 22:36-39). Riuu nayecheʼ neca cadxaagalú guendanagana (Sant. 1:2-4). Ruyubi chuʼ paz (Mat. 5:9). Napa paciencia ne nachaʼhuiʼ (Col. 3:12, 13). Nadxii ni jneza ne rusihuínnini (Luc. 6:35). Pur ni runi rusihuinni napa fe Bixhoze ni nuu guibáʼ (Sant. 2:18). Nadóʼ neca gucaalúcabe laa (Tito 3:2). Ne rucaanáʼ ni zándaca gucaa laa guchee (1 Cor. 9:25, 27).

4. ¿Xiñee zanda guininu tobi si nga ca cualidad ni riete lu Gálatas 5:22, 23?

⁴ Para guibáninu «modo cusiidiʼ Dios» caquiiñeʼ gusihuínninu ca cualidad ni riete lu Gálatas 5:22, 23 ne zaqueca ni zeeda lu xcaadxi textu.b Cadi zeeda gaca ca cualidad riʼ casi gadxé gadxé lari, sínuque tobi si ca ni. Guzéʼtenu ti ejemplu, pa dxandíʼ nadxiinu binni zápanu paciencia ne zácanu nachaʼhuiʼ né laacaʼ. Ne para gácanu nachaʼhui la? caquiiñeʼ gácanu nadóʼ ne gucueezanu laaca laanu.

¿XIMODO GUIBÁNINU «MODO CUSIIDIʼ DIOS» LAANU?

5. ¿Ximodo nga guiníʼ íquenu casi riníʼ ique Cristu, ne xiñee naquiiñeʼ guni estudiarnu modo bibani Jesús? (1 Corintios 2:16).

⁵ (Biindaʼ 1 Corintios 2:16). Para ganda guibáninu modo rusiidiʼ Dios, caquiiñeʼ gánnanu ximodo riníʼ ique Cristu ne chinándanu ejemplu stiʼ. Guizáʼ biaʼsi bisihuinni Jesús ca cualidad stiʼ espíritu stiʼ Dios. Bisihuínnibe nácabe casi Bixhózebe purtiʼ jneza bisihuínnibe ca cualidad stiʼ (Heb. 1:3). Ra jma guiníʼ íquenu cásica riníʼ ique Jesús jma zusihuínninu ca cualidad stibe lu ca cosa ni rúninu (Filip. 2:5).

6. ¿Xi cadi naquiiñeʼ guiaandaʼ laanu ora gúninu stipa guibáninu modo rusiidiʼ Dios?

⁶ ¿Dxandíʼ nga zanda chinándanu ejemplu stiʼ Jesús la? Zándaca guiníʼ íqueluʼ: «Peru Jesús perfectu laa. ¡Qué ziuu dxí gacaʼ casi laabe!». Pa zacá caníʼ íqueluʼ, cadi guiaandaʼ lii guionnaʼ cosa riʼ. Primé, guyaʼluʼ para gácaluʼ casi Jehová ne Jesús. Nga runi, zanda cuiluʼ chinándaluʼ ejemplu stícabe dede biaʼ gándatiʼ (Gén. 1:26). Guiropa, espíritu santu stiʼ Dios nga stipa ni jma nadipaʼ. Ne zanda gacaneni lii gúniluʼ cosa ni qué ñuu dxi niníʼ íqueluʼ ñúniluʼ. Ne guionna, cadi cabeza diʼ Jehová gusihuínninu ca cualidad stiʼ espíritu modo peʼ biʼniʼ Jesús ni purtiʼ laa guca perfectu. Bietenalaʼdxiʼ zudii Bixhózenu ni nadxii laanu ca ni chiguibani lu Guidxilayú riʼ 1,000 iza para gácacaʼ perfectu (Apoc. 20:1-3). Ni canabaʼ Jehová laanu nga, gúninu stipa biaʼ gándatiʼ ne gápanu confianza zacané laanu.

7. ¿Xi zazíʼdinu lu xcaadxi párrafo riʼ?

⁷ Ra guizíʼdinu de tapa cualidad ni rudii espíritu stiʼ Dios, zacané ni laanu chinándanu ejemplu stiʼ Jesús. Zazíʼdinu ximodo bisihuinni Jesús cada tobi de ca cualidad riʼ ne xi zanda guizíʼdinu de modo bíʼnibe ni. Laaca zadúʼyanu caadxi pregunta ni zacané laanu guiníʼ íquenu pa nabáninu modo cusiidiʼ Dios.

8. ¿Ximodo bisihuinni Jesús nadxii Jehová ne binni?

⁸ Tantu nadxii Jesús Jehová, nga runi guyuu dispuestu gacaná pur laabe ne pur laanu (Juan 14:31; 15:13). Ne bisihuínnibe nadxiibe binni pur modo bibánibe dxi guyuube lu Guidxilayú. Bisihuínnibe nadxiibe binni ne riabe laacaʼ dede né ca ni bicaanáʼ laabe. Ne jma bisihuínnibe ni ra guníʼnebe laacaʼ de Reinu stiʼ Dios (Luc. 4:43, 44). Laaca bisihuínnibe pabiáʼ nadxiibe Dios ora guyuube dispuestu guni sufrirbe ne guuti binni ruchee laabe. Ne pur ni bíʼnibe ca zanda guibáninu sin qué chuʼ dxi gátinu.

9. ¿Ximodo zanda gusihuínninu nadxiinu binni casi biʼniʼ Jesús ni?

⁹ Guca dedicarnu Jehová ne guyuunísanu purtiʼ nadxiinu laa. Nga runi cásica biʼniʼ Jesús, gusihuínninu nadxiinu binni pur modo guni tratarnu laacaʼ. Sicaríʼ bicaa apóstol Juan: «Pa cadi nadxiibe hermanu stibe nin ne ruuyabe laa, ximodo zanda gannaxhiibe Dios pa qué ruuyabe laa» (1 Juan 4:20). Guiníʼ íquenu ndiʼ: «¿Ñee dxandíʼ nadxieeʼ binni la? ¿Ñee galán modo runeʼ tratar binni neca guni tratarcaʼ naa mal la? ¿Ñee rusihuinneʼ nadxieeʼ binni ra iquiiñeʼ tiempu stinneʼ ne ca cosa ni napaʼ para guinieniaʼ laacaʼ de Jehová la? ¿Ñee runeʼ ni neca qué gucaadiaga binni naa o dede gucaalucaʼ naa la? ¿Ñee zándaruʼ guneʼ predicar jma la?» (Efes. 5:15, 16).

10. ¿Xi biʼniʼ Jesús para gacané binni cadi tinde?

¹⁰ Qué nuyubi Jesús nuquixe ni bíʼnicabe laa. Biyúbibe modo chuʼbe tobi si né binni ne gucanebe laacaʼ guni chaahuicaʼ ca guendanagana ni napanecaʼ sti binni. Bisiidibe laacaʼ naquiiñeʼ guni chaahuicaʼ guendanagana ni napanecaʼ bíʼchicaʼ pa racaláʼdxicaʼ guicaa Jehová adoración sticaʼ (Mat. 5:9, 23, 24). Ne stale biaje gúdxibe ca apóstol stibe cadi tinde diidxacaʼ pur gánnacaʼ tuu nga ni jma risaca ládecaʼ (Luc. 9:46-48; 22:24-27).

11. ¿Xi zanda gúninu para chuʼnu tobi si né ca hermanu stinu?

¹¹ Cadi caquiiñeʼ siʼ gacanenu binni para cadi chúʼdinde, laaca caquiiñeʼ guni chaahuinu guendanagana ni gapanenu tuuxa. Ne gacanenu ca hermanu para guni chaahuicaʼ guendanagana ni napanecaʼ sti hermanu (Filip. 4:2, 3; Sant. 3:17, 18). Guiníʼ íquenu ndiʼ: «¿Ñee nuaaʼ dispuestu guneʼ chaahueʼ guendanagana napaniaʼ tuuxa la? ¿Ñee rapaʼ xiana ora guni ti hermanu xiixa ni guniná naa la? ¿Ñee ribezaʼ hermanu ni bininá naa nga guidxiña ra nuaaʼ para guni chaahuidu ca guendanagana nápadu la? ¿O naa nga ruyubeʼ laabe para guni chaahuidu guendanagana ca neca laabe nápabe donda? Pa zanda, ¿ñee riguaaʼ gana ca hermanu guni chaahuicaʼ guendanagana ni napanecaʼ sti hermanu la?».

12. ¿Ximodo bisihuinni Jesús nachaʼhuiʼ?

¹² Guca Jesús ti binni nachaʼhuiʼ (Mat. 11:28-30). Gunnaxhiibe binni ne biénebe laacaʼ neca ora gúcani nagana para laabe. Casi dxi gunabaʼ ti gunaa fenicia laabe gusiándabe dxaapahuiiniʼ stiʼ, qué ninágabe ñúnibe ni. Peru gúcabe nachaʼhuiʼ né gunaa riʼ ora bíʼyabe pabiáʼ naroʼbaʼ fe stiʼ ne bisiándabe dxaapahuiiniʼ que (Mat. 15:22-28). Neca guca Jesús nachaʼhuiʼ qué nudii lugar nucueeza ni laa para nudii conseju ca binni ni nadxii. Guzéʼtenu ti ejemplu, dxi gudxi Pedro Jesús guiá laca laa para cadi guni ni ná Jehová, gudindenebe laa nezalú xcaadxi discípulo (Mar. 8:32, 33). Qué ñúnibe ni para nusituibe lú Pedro, sínuque bíʼnibe ni para gusiidibe laa ne xcaadxi discípulo que gacanecaʼ laabe gúnibe ni ná Dios ne cadi gucueezacaʼ laabe. Zándaca bituí lú Pedro, peru gucané conseju que laa.

13. ¿Xi caquiiñeʼ gúninu para gusihuínninu nácanu binni nachaʼhuiʼ?

¹³ Laaca rusihuínninu nácanu ti binni nachaʼhuiʼ ora rudiʼnu conseju ti binni ni nadxiinu. Ora gúninu ni, chinándanu ejemplu stiʼ Jesús ne gudiʼnu conseju ni zeeda lu Biblia. Cadi gácanu naduxhuʼ ne cadi guiníʼ íquenu qué zuchaacabe, sínuque guiníʼ íquenu pa nadxiicabe Jehová ne nadxiicabe laanu la? zacaacabe conseju gudiʼnu laacabe. Guiníʼ íquenu ndiʼ: «Ora guuyaʼ cayuni ti binni ni nadxieeʼ cosa ni cadi jneza, ¿ñee rabeʼ ni laabe la? ¿Ximodo runeʼ ni? ¿Ñee rinieeʼ né diidxaʼ nadóʼ la? o naduxhuaʼ? ¿Xiñee rudieeʼ conseju binni? ¿Ñee runeʼ ni purtiʼ cadxiicheniáʼ laabe la? o purtiʼ racalaʼdxeʼ gacaniáʼ laabe?».

14. ¿Ximodo bisihuinni Jesús nachaʼhuiʼ?

¹⁴ Cadi nanna si Jesús xii nga ni jneza, laaca rúnibe ni jneza. Nadxiibe Bixhózebe nga runi siempre rúnibe ni jneza ne qué rúnibe ni para guicaabe xiixa cosa. Ti binni nachaʼhuiʼ siempre ruyubi modo gacané xcaadxi binni. Cadi caquiiñeʼ si gánnanu xii nga ni jneza, laaca naquiiñeʼ gúninu ni ne cadi gúninu ni purtiʼ racaláʼdxinu guicaanu xiixa. Zándaca guiníʼ íqueluʼ: «¿Zándaxa guneʼ xiixa cosa jneza purtiʼ si racalaʼdxeʼ guicaaʼ xiixa?». Zanda. Guzéʼtenu ti ejemplu, guníʼ Jesús de ca binni ni rudii bueltu ca pobre peru ruyúbicaʼ ganna xcaadxi ni cayúnicaʼ. Ca cosa riʼ la? nánnanu qué rusiecheʼ diʼ ca ni Jehová (Mat. 6:1-4).

15. ¿Ximodo zanda gusihuínninu dxandíʼ nácanu binni nachaʼhuiʼ?

¹⁵ Zanda gácanu binni nachaʼhuiʼ pa gúninu cosa galán pur xcaadxi binni ne cadi guyúbinu puru si para laanu. Naquiiñeʼ guiníʼ íquenu ndiʼ: «¿Ñee nannaʼ xii nga ni jneza ne runeʼ ni la? ¿Xi rucaaʼ naa guneʼ cosa galán pur xcaadxi?».

¿XI ZACANÉ LAANU CADI GUSAANA DE GUIBÁNINU «MODO CUSIIDIʼ DIOS»?

16. ¿Xi caquiiñeʼ gúninu guiráʼ dxi, ne xiñee?

¹⁶ Cadi guiníʼ íquenu tisi maʼ guyuunísanu maʼ nabáninu modo rusiidiʼ Dios ne maʼ cadi caquiiñeʼ guchaʼnu. Guibáninu modo cusiidiʼ Dios laanu zeeda gácani casi ti lari ni caquiiñeʼ gápanu ti cadi gaca feu. Guiráʼ dxi naquiiñeʼ gusihuínninu ca cualidad stiʼ espíritu stiʼ Dios. ¿Xiñee yaʼ? Siempre cayuni Jehová dxiiñaʼ ne siempre caniibi espíritu stiʼ (Gén. 1:2). Ndiʼ rusiidiʼ laanu guiráʼ ca cualidad stiʼ espíritu zanda gacané ca ni laanu guibáninu modo ná Dios. Guzéʼtenu ti ejemplu, sicaríʼ bicaa discípulo Santiago: «Zaqueca qué iquiiñeʼ fe stinu pa qué gusihuínninu ni né ca obra stinu» (Sant. 2:26). Nga ca nga runi xcaadxi cualidad ni zeeda de espíritu stiʼ Dios. Cada biaje gusihuínninu ca ni cusihuínninu cayuni espíritu stiʼ Dios dxiiñaʼ luguianu.

17. ¿Xi zanda gúninu ora gaca nagana para laanu gusihuínninu ca cualidad stiʼ espíritu?

¹⁷ Dede né ca xpinni Cristu ni maʼ ziné stale iza de guyuunisa nuu biaje raca nagana para laacaʼ gusihuínnicaʼ ca cualidad stiʼ espíritu santu peru cadi naquiiñeʼ guireʼnu gana. Guzéʼtenu ti ejemplu, pa málasi nireza lari ni jma riuuláʼdxiluʼ, cadi dxandíʼ cadi nagueendaca zusáʼbiluʼ ni la? Zándaca zuyúbiluʼ modo guni chaahuiluʼ ni ne ziuuluʼ jma cuidadu. Zaqueca nga laanu, pa chuʼ biaje gaca nagana para laanu gácanu nachaʼhuiʼ o gápanu paciencia xcaadxi, cadi guireʼnu gana. Zanda guinábanu gutiidiláʼdxicabe laanu para chuʼnu galán né sti binni. Ne para sti biaje la? gúninu stipa gusihuínninu ca cualidad stiʼ espíritu stiʼ Dios.

18. ¿Xi cadi naquiiñeʼ guiaandaʼ laanu?

¹⁸ ¡Guizáʼ riéchenu purtiʼ bisaana Jesús ti ejemplu galán para laanu! Ra jma gúninu stipa guiníʼ íquenu modo riníʼ íquebe qué zaca nagana para laanu gusihuínninu ca cualidad ni bisihuínnibe ne zacá zabáninu modo rusiidiʼ Dios. Lu artículo riʼ maʼ bizíʼdinu de tapa cualidad stiʼ espíritu stiʼ Dios. Peru galán cueenu tiempu para guni estudiarnu xcaadxi de ca cualidad riʼ ne guiníʼ íquenu ximodo gusihuínninu ca ni. Lu folletu ni láʼ Ca tema ni huabee ca testigu stiʼ Jehová, ra ná «Modo nabani ca xpinni Cristu» ne «Guenda ni rudii espíritu santu» zadxélaluʼ artículo ni zacané lii. Nga runi, cadi guiaandaʼ laanu pa gúninu stipa guibáninu modo rusiidiʼ Jehová siempre zacanebe laanu.