«Cadi gusaana» de chinándaluʼ ejemplu stiʼ Jesús despué de maʼ guyuunísaluʼ

1, 2. ¿Xiñee zanda guininu jma galán ribani binni ora riuunisa?

ORA riuunisa tuuxa reeda gaca parte de familia stiʼ Jehová. Ne riuʼnu nayecheʼ pur laani, ca ni napa privilegiu risaca riʼ nanna dxíchicaʼ dxandíʼ ca diidxaʼ ni bicaa David: «Nayecheʼ ziuu binni ni cuiluʼ [Jehová] ne gucaaluʼ laa guidxiña, para cueza lu ca patiu stiluʼ» (Sal. 65:4).

² Qué rudii Jehová chuʼ tutiica lu ca patiu stiʼ. Casi bidúʼyanu lu artículo ni gudiʼdiʼ que. Laabe ridxíñabe ca ni racalaʼdxiʼ gaca xhamigu laabe (Sant. 4:8). Ora rudiicaʼ xquendanabánicaʼ Jehová ne riuunísacaʼ jma raca xhamígucaʼ laabe. Ne cayuni prometer Jehová: «Zuuyatu […] zundaateʼ ndaayaʼ stinneʼ luguiatu dede ora maʼ cadi guiaadxaʼ gastiʼ laatu» (Mal. 3:10; Jer. 17:​7, 8).

3. ¿Xi naquiiñeʼ guni ca xpinni Cristu ni maʼ guca dedicar ne maʼ guyuunisa? (Eclesiastés 5:​4, 5).

³ Deruʼ peʼ cuzulú cayúniluʼ xhiiñaʼ Jehová ora riuʼnísanu. Guiráʼ ca xpinni Cristu rúninu stipa guni cumplirluʼ voto ni bíninu ra guca dedicarnu neca guidxaagalunu tentación o prueba ni zanda guxheleʼ laanu de Jehová (biindaʼ Eclesiastés 5:​4, 5). Laaca naquiiñeʼ chinándanu ejemplu stiʼ Jesús ne gúninu ni cayuni mandarbe laanu gúninu (Mat. 28:​19, 20; 1 Ped. 2:21). Zacané artículo riʼ laanu gúninu ni.

«CADI GUSAANA» DE CHINÁNDALUʼ EJEMPLU STIʼ JESÚS NECA GUIDXAAGALULUʼ GUENDANAGANA NE TENTACIÓN

4. ¿Ximodo ndiʼ nuáʼ ca discípulo stiʼ Jesús ti «madero de tormento»? (Lucas 9:​23, nota).

⁴ Cadi guiníʼ íqueluʼ qué zápaluʼ guendanagana despué de chuʼnísaluʼ. Jesús peʼ gudxi cada tobi de ca discípulo stiʼ zuaʼcaʼ yaga o «madero de tormento» sticaʼ (biindaʼ Lucas 9:​23, nota). ¿Ni ná Jesús nga qué zusaana de gapa ca xpinni guendanagana la? Coʼ xa. Ni nabe nga cadi ndaayaʼ si zacaacabe, sínuque laaca zadxagalúcabe guendanagana ne nuu de laacani nabe zuniná laacabe (2 Tim. 3:12).

5. ¿Xi ndaayaʼ guníʼ Jesús zacaa ca ni guni jma pur xhiiñaʼ Reinu?

⁵ Zándaca maʼ bicaalú familia stiluʼ lii o bisaanaluʼ xiixa cosa risaca para gúniluʼ xhiiñaʼ Reinu primé lu xquendanábaniluʼ (Mat. 6:33). Pa nga nga ni bizaacaluʼ la? gunna dxichi nanna Jehová xi guiráʼ maʼ bíʼniluʼ pur laa (Heb. 6:10). Zándaca maʼ bidiiluʼ cuenta dxandíʼ ca diidxaʼ ni guníʼ Jesús riʼ: «Guiráʼ tu gusaana lidxi, biʼchiʼ, bizaʼnaʼ, jñaa, bixhoze, xiiñiʼ o layú pur naa ne pur ca noticia galán la? zacaa jma de 100 de ni bisaana tiempu riʼ —lidxi, biʼchiʼ, bizaʼnaʼ, jñaa, xiiñiʼ ne layú, neca gucaalúcabe laa— ne lu ca dxi ni zeeda ca zacaa guendanabani ni qué zaluxe» (Mar. 10:​29, 30). Dxandíʼ peʼ jma stale ndaayaʼ huacaaluʼ que ca sacrificiu ni huayúniluʼ (Sal. 37:4).

6. ¿Xiñee naquiiñeruʼ gudxiiluluʼ ca «deseu stiʼ beela ladi binni» despué de chuʼnísaluʼ?

⁶ Despué de chuʼnísaluʼ, naquiiñeruʼ gucaanaluʼ ca «deseu stiʼ beela ladi binni» (1 Juan 2:​16, nota). Purtiʼ binni ruchee lii. Ne zándaca ziuu biaje zuni sentirluʼ casi biʼniʼ sentir apóstol Pablo, laa guníʼ: «De ndaaniʼ ladxiduáʼ riecheniaʼ ley stiʼ Dios, peru ruuyaʼ nuu sti ley lu cuerpu stinneʼ ni cadindené ley ni nuu lu xquendabiaaneʼ, ne laani nga ruseguyooni naa lu ley stiʼ pecadu ni nuu lu cuerpu stinneʼ» (Rom. 7:​22, 23). Zándaca guireeluʼ gana pur cudxiiluluʼ xiixa deseu ni cadi jneza. Peru pa guiníʼ íqueluʼ promesa ni bíʼniluʼ Jehová ra bidiiluʼ laa xquendanabániluʼ, zudiini lii stipa para gudxiiluluʼ ca tentación ni guidxaagaluluʼ. Voto ni bíʼniluʼ Jehová ra guca dedicarluʼ nabé zacané ni lii ora guidxaagaluluʼ xiixa tentación. ¿Xiñee yaʼ?

7. Ora rudii tuuxa xquendanabani Jehová, ¿ximodo racané ni laa para cadi guixeleʼ de laabe?

⁷ Ora rudii tuuxa xquendanabani Jehová, rusaana de guni ca cosa ni riuulaʼdxiʼ. Ndiʼ riníʼ rusaana de gúnibe ca deseu stibe ne ca cosa ni qué riuulaʼdxiʼ Jehová (Mat. 16:24). Nga runi, ora tídinu xiixa prueba, qué zaníʼ ique xhaatanu xi gúninu. Para laanu la? ti cosa si nga zanda gúninu: cadi guchéʼnenu Jehová. Zuyúbinu gusiéchenu laabe. Dxi bidiʼnu xquendanabáninu Jehová, gudixhe íquenu gúninu puru si ni riuuláʼdxibe. Gácanu casi Job, neca gudíʼdibe lu guendanagana nabé feu, de guidubi ladxidoʼbe guniʼbe ca diidxaʼ riʼ: «¡Dede dxi gateʼ, qué zucheeniaʼ Dios!» (Job 27:5).

8. Ora guiníʼ íquenu voto ni bíninu ra guca dedicarnu, ¿ximodo zacané ni laanu gudxíʼlunu ca tentación ni guidxaagalunu?

⁸ Ora guiníʼ íquenu gúdxinu Jehová zúninu ni racalaʼdxiʼ zacané ni laanu gápanu stipa para gudxíʼlunu intiica tentación. ¿Ñee siempre ruyúbinu guidxaaganu tuuxa ni maʼ bichaganáʼ dede rusihuínninu riuuláʼdxinu laa la? Coʼ, ¿njaʼ? Purtiʼ gudixhe íquenu cadi gúninu ni dxi guca dedicarnu Jehová. Cumu dede ti principiu qué nudiʼnu lugar nicaa xcu ca deseu malu ca ndaaniʼ ladxidoʼno la? qué zúninu stipa gáxhanu ca ni despué. Zaxélenu de neza stiʼ ca binni malu (Prov. 4:​14, 15).

9. Ora guiníʼ íquenu voto ni bíninu ra guca dedicarnu, ¿ximodo racané ni laanu gúninu xhiiñaʼ Jehová primé lu xquendanabáninu?

⁹ Yanna, ¿pa gudiicabe laanu ti dxiiñaʼ ni zucaa laanu guiáʼdxanu guiráʼ reunión stinu yaʼ? Maca nánnanu xi gúninu. Purtiʼ dede ante gudiicabe laanu dxiiñaʼ ca, maca gudixhe íquenu qué zacaanu ni. Nga runi qué zacaanu ti dxiiñaʼ ni gaxha tiempu stinu ne despué guyúbinu ximodo gúninu ni ná Jehová primé lu xquendanabáninu. Zanda gacané ejemplu stiʼ Jesús laanu. Laabe la? gudixhe íquebe gúnibe ni riuulaʼdxiʼ Bixhózebe, laanu laaca nagueendaca zucaʼnanu intiica cosa ni nánnanu qué riuulaʼdxiʼ Dios (Mat. 4:10; Juan 8:29).

10. ¿Ximodo zacané Jehová laanu chinándanu ejemplu stiʼ Jesús despué de maʼ guyuʼnísanu?

¹⁰ Ni dxandíʼ nga, ora guidxaagalunu guendanagana o xiixa tentación, nápanu oportunidad gusihuínninu maʼ gudixhe íquenu qué zusaana de chinándanu ejemplu stiʼ Jesús. Ne nánnanu zacané Jehová laanu gúninu ni purtiʼ lu Biblia riete: «Jneza runi Dios ne qué zudii lugar gueeda xiixa prueba luguiatu ni qué zanda guni huantartu, sínuque zacané laatu guni huantartu prueba ca» (1 Cor. 10:13).

XI ZANDA GÚNILUʼ PARA CADI GUSAANA DE CHINÁNDALUʼ EJEMPLU STIʼ JESÚS

11. ¿Gunáʼ nga tobi de ca cosa ni zanda gúniluʼ para cadi gusaana de chinándaluʼ Jesús? (Biiyaʼ ca imagen ca).

¹¹ De guidubi ladxidóʼ Jesús biʼniʼ ni ná Jehová, ne cumu nabé biʼniʼ orarbe la? nga gucané laabe chuʼbe gaxha de laa (Luc. 6:12). Tobi de ca cosa ni zanda gúniluʼ para cadi gusaana de chinándaluʼ ejemplu stiʼ Jesús despué de chuʼnísaluʼ nga gúniluʼ cosa ni guchiña lii jma gaxha de Jehová. Lu Biblia riete: «Dede biaʼ ra biʼniʼ progresarnu, cadi gusaana de gúninu ni» (Filip. 3:16). Gatigá zándaca gunadiágaluʼ historia stiʼ caadxi hermanu ni gudixhe ique guni jma lu xhiiñaʼ Jehová. Zándaca guyécabe Escuela para Evangelizadores del Reino o yendézacabe ti lugar ra caquiiñeʼ tu guni predicar. ¿Zanda gúniluʼ ni bíʼnicabe ca la? Pa zanda la? biʼniʼ ni. Ruyubi ca xpinni Jehová ximodo gúnicaʼ jma lu xhiiñabe (Hech. 16:9). Peru ¿pa qué ganda gúniluʼ ni yanna yaʼ? Cadi guiníʼ íqueluʼ qué risácaluʼ purtiʼ si qué ganda gúniluʼ ni. Ni jma risaca nga guni huantarluʼ (Mat. 10:22). Cadi guiaandaʼ lii, nabé riecheʼ Jehová purtiʼ cudiiluʼ laa ni jma galán de lii ne biaʼ zanda gudiiluʼ. Nga zacané lii cadi gusaana de chinándaluʼ Jesús despué de chuʼnísaluʼ (Sal. 26:1).

12, 13. ¿Xi zanda gúniluʼ pa gudiiluʼ cuenta maʼ huaxiéʼ nayecheʼ cayuni sentirluʼ? (1 Corintios 9:​16, 17; biiyaʼ cuadru ni láʼ «Xi zanda gúniluʼ para cadi gusaana de guxooñeluʼ»).

¹² Yanna, ¿pa despué de chuʼnísaluʼ gudiiluʼ cuenta tobi si modo cayuni orarluʼ ne ngueca ca ngueca cayúniluʼ lu xhiiñaʼ Jehová o maʼ huaxiéʼ riuuláʼdxiluʼ guni predicarluʼ ne gúʼndaluʼ Biblia yaʼ? Cadi guiníʼ íqueluʼ maʼ qué gápaluʼ espíritu stiʼ Jehová. Cumu binni ruchee laanu la? normal nga guireʼnu gana. Ne pa gudiiluʼ cuenta maʼ huaxiéʼ nayecheʼ nuuluʼ, guníʼ ique ejemplu stiʼ apóstol Pablo. Neca bíʼnibe stipa pur chinándabe ejemplu stiʼ Jesús, gúnnabe ziuu biaje ziaadxaʼ laabe stipa para gúnibe ni jneza (biindaʼ 1 Corintios 9:​16, 17). Sicaríʼ guniʼbe: «Pa guneʼ ni neca qué gapaʼ gana la? laaca si naquiiñeʼ guneʼ ni purtiʼ laani nga responsabilidad stinneʼ». Ni guníʼ Pablo raríʼ nga zuni xhiiñaʼ Jehová modo tiica si cayuni sentir.

¹³ Zaqueca nga laanu, cadi naquiiñeʼ chinándanu ni cayuni sentirnu ora guicaanu xiixa decisión. Ni jma galán nga gucaa íqueluʼ gúniluʼ ni jneza neca qué gápaluʼ deseu de gúniluʼ ni. Ne pa gúniluʼ zacá, ra tidiʼ tiempu zuni sentirluʼ jma galán. Pa gápaluʼ estudiu personal stiluʼ, guni orarluʼ, cheluʼ reunión ne guni predicarluʼ la? qué zusaana de chinándaluʼ ejemplu stiʼ Jesús despué de chuʼnísaluʼ. Ne ora guʼyaʼ ca hermanu ne ca hermana stipa ni cayúniluʼ, guizáʼ zaguuluʼ gana laacaʼ (1 Tes. 5:11).

«SIEMPRE LAGUUYAʼ XIMODO NUUTU»

14. ¿Xi ti cosa nabé risaca gúniluʼ, ne xiñee? (2 Corintios 13:5).

¹⁴ Despué de chuʼnísaluʼ, nabé risaca gúʼyaluʼ ximodo nabániluʼ ne xi cayúniluʼ (biindaʼ 2 Corintios 13:5). Galán gúʼyaluʼ pa cayuni orarluʼ ne pa cayuundaluʼ ne cayuni estudiarluʼ Biblia guiráʼ dxi, pa rieluʼ guiráʼ reunión ne pa cayuni predicarluʼ. Biyubi modo cueenduluʼ ni galán ne chuʼluʼ nayecheʼ ora gúniluʼ ca ni. Guníʼ ique ndiʼ: «¿Ñee zanda gusieneʼ ca cosa ni cadi nagana zeeda lu Biblia la? ¿Zanda guneʼ xiixa para chuaaʼ jma nayecheʼ ora maʼ cayuneʼ xhiiñaʼ Jehová la? ¿Ñee rinabaʼ Jehová ni peʼ caquiiñeʼ ne rusihuinneʼ napaʼ stale confianza laa la? ¿Runeʼ stipa cadi guiaadxaʼ nin ti reunión la? ¿Xi zanda guneʼ para quixheʼ atención lu ca reunión ne ganda gudieeʼ comentariu jma galán pue?».

15, 16. ¿Xi rusiidiʼ ni bizaaca Robert lii?

¹⁵ Laaca galán gúʼyaluʼ gunáʼ nga ca cosa ni zanda gucaa lii gucheeneluʼ Jehová. Guidúʼyanu ti experiencia ni rusihuinni pabiáʼ risaca gúninu ni. Sicaríʼ guníʼ ti hermanu láʼ Robert: «Dxi napaʼ biaʼ 20 iza bineʼ dxiiñaʼ galaa si dxi. Ti dxi despué de dxiiñaʼ biʼniʼ invitar ti compañera stinneʼ naa ra lidxi. Cumu gúdxibe naa stúbisidu ziuʼdu la? zanda guizaaca intiica cosa. Primeru ga que la? bidxibeʼ ne biraruʼ ni gudxeʼ laabe para cadi chaaʼ. Peru despué gudxeʼ laabe qué ziaaʼ ne bisieneʼ laabe xi pur qué zuneʼ ni». Gunda bicaanáʼ Robert tentación riʼ ne galán ni bíʼnibe ca. Peru despué guníʼ íquebe ni bizaacabe que ne bidiibe cuenta ñanda nudxiilube ni de sti modo. Laabe guniʼbe: «Qué ñacaʼ casi José purtiʼ laa nagueendaca bicaanáʼ xheelaʼ Potifar (Gén. 39:​7-9). Qué lica niníʼ iqueʼ pa ñaca nagana para naa ñabeʼ laabe qué ziaaʼ. Ni bizaacaʼ riʼ gucané ni naa gudieeʼ cuenta naquiiñeʼ chuaaʼ jma gaxha de Jehová ne gacaʼ xhamiguaʼ laa».

¹⁶ Guníʼ ique bidxaagaluluʼ ti tentación ne bicaanaluʼ ni. Neca zacá, ¿xiñee qué gúniluʼ ni biʼniʼ Robert yaʼ? Galán guinabadiidxaluʼ: «¿Ñee bindaa para bicaanaʼyaʼ ni la?». Pa bidiiluʼ cuenta naquiiñeʼ gúniluʼ dxiiñaʼ lu xiixa cosa la? cadi guireeluʼ gana, sínuque guníʼ ique galán nga bidiiluʼ cuenta nuu xiixa cosa ra naquiiñeʼ guchaaluʼ. Gudxi ni Jehová ne biʼniʼ stipa gaca deseu ni nápaluʼ de gúniluʼ xhiiñabe jma nadipaʼ (Sal. 139:​23, 24).

17. Ra maʼ bidúʼyanu ni bizaaca Robert, ¿xi rizaaca ora qué ruchéʼnenu Jehová?

¹⁷ Peru cadi nga si nga ni bizaaca Robert. Laaca bizeetebe: «Ora gudxeʼ compañera stinneʼ qué ziaaʼ ra lidxi, laabe gúdxibe naa “gudíʼdiluʼ prueba ca”. Gudxeʼ laabe xii ngue cayábibe naa. Gúdxibe naa gudxi ti xhamígube laabe, ni guca Testigu dxiqué, guiráʼ ca joven ni naca Testigu rucaachicaʼ tu nácacaʼ, ne ora gápacaʼ oportunidad de gúnicaʼ xiixa cosa malu la? rúnicaʼ ni sin guiníʼ íquecaʼ. Ngue runi gúdxibe xhamígube que chiguuyabe pa ganda gusábabe naa. ¡Guizáʼ riecheʼ purtiʼ qué ñuneʼ biideʼ lá Jehová!».

18. ¿Xi maʼ gudixhe íqueluʼ gúniluʼ despué de chuʼnísaluʼ? (Biiyaʼ cuadru ni láʼ «Chupa artículo ni nabé zacané lii»).

¹⁸ Ora rudiiluʼ xquendanabániluʼ Jehová ne riuunísaluʼ, rusihuínniluʼ racaláʼdxiluʼ guni santificarluʼ labe intiica si guizaaca. Ne zanda chuʼluʼ seguru nanna Jehová xi guendanagana cadxaagaluluʼ ne xi tentación cudxiiluluʼ. Cayuuyabe stipa ni cayúniluʼ para cadi guixéleluʼ de laabe ne zaguube ndaayaʼ lii. Cadi guiaandaʼ lii, zaquiiñebe espíritu santu stibe para gudiibe lii stipa ti ganda gúniluʼ ni jneza (Luc. 11:​11-13). Dxandíʼ peʼ zacané Jehová lii para cadi gusaana de chinándaluʼ ejemplu stiʼ Jesús despué de chuʼnísaluʼ.