Ni runi cré caadxi binni

Hinduismo

Runi cré ca hindú runi sufrir binni pur ca cosa ni runi yanna ne pur ca ni biʼniʼ lu sti vida ni gupa dxiqué. Nácabe maʼ qué runi sufrir binni ora rusaana de gale stale biaje lu gadxé gadxé cuerpu, laani nga ni runibiáʼcabe casi moksha. Ne para guizaaca ndiʼ la? napa xidé gusaana binni de chuʼ xizaa pur ca guendanagana stiʼ.

Islam

Runi cré ca musulmán raca castigar ne runi sufrir binni pur ca pecadu stiʼ ne ti prueba de fe ni para laacaʼ. Sayyid Syeed, ni naca presidente stiʼ Sociedad Islámica de América del Norte guníʼ: «ca yuubaʼ ni nápanu rusietenaláʼdxicani laanu cadi naquiiñeʼ gusaana de gudiʼnu xquixe peʼ Dios pur guiráʼ ca ndaayaʼ stiʼ ne gacanenu ca binni ni caquiiñeʼ tu gacané laa».

Judaísmo

Tradición stiʼ ca judíu ná runi sufrir binni pur ca cosa ni runi. Ne caadxi de laacaʼ runi crecaʼ zabani binni sti biaje ne despué zuni Dios justicia pur ni biʼniʼ sufrir sin ñapa donda. Peru judaísmo místico o cabalístico rusiidiʼ zanda gale binni sti biaje lu sti cuerpu, ne pur laani napa binni oportunidad para guiaana sin pecadu.

Budismo

Runi cré ca budista rale binni stale biaje ne cada biaje gale runi sufrir dede ora gusaana ca deseu, ca sentimientu ne ca cosa ni cadi jneza ni biʼniʼ. Laaca runi crécabe ora runi binni cosa galán pur xcaadxi, ora guni xiixa ne guendabiaaniʼ ne gucueeza ni riníʼ ique, zusaana de guni sufrir, laani nga ni runibiáʼcabe casi nirvana.

Confucionismo

Diccionario de religiones comparadas ná ca xpinni Confucio runi crecaʼ runi sufrir binni jma «pur ca cosa ni rúnicaʼ ni qué riree jneza». Runi crécabe qué zuni sufrir peʼ binni pa guni cosa ni jneza. Peru laaca runi crécabe stale biaje runi sufrirnu pur ca ángel ni jma nadipaʼ que binni. Nga runi ni zanda si guni binni nga guni aceptar destinu stiʼ.

Ca religión tribal

Caadxi religión tribal nacaʼ runi sufrir binni pur brujería. Caadxi binni runi cré zanda guni ca bruju ca xiixa para gapa binni suerte o guizaaca xiixa cosa malu, ne laaca nácabe zanda guiree ca hechizu riʼ ne caadxi ritual. Nga runi, ora raca huará ca binni riʼ la? riecaʼ ra nuu ti curanderu para gudii laacaʼ medicina ne gúnicaʼ caadxi ritual para guiree hechizu stiʼ ca bruju ca.

Cristianismo

Rusiidiʼ ca cristianu runi sufrir binni pur pecadu stiʼ primé guendaxheelaʼ ni riete lu libru stiʼ Génesis. Ne stale grupu cristianu rusiidicaʼ ni riníʼ íquesicaʼ. Guzéʼtenu ti ejemplu, caadxi católicu runi crecaʼ zanda gudiicaʼ yuubaʼ sticaʼ Dios para uguube ndaayaʼ yuʼduʼ sticaʼ o para guilá sti binni.