3. ¿Xiñee runi sufrir ca binni nachaʼhuiʼ?
¿Xiñee risaca respuesta stiʼ pregunta riʼ?
Cadi justu diʼ nga guni sufrir binni nachaʼhuiʼ. Ne ora ruuyaʼ tuuxa cayacaná ti binni nachaʼhuiʼ, zándaca guiníʼ ique pur gana si nga guni tuuxa stipa pur guni ni jneza.
Guníʼ ique ndiʼ
Stale binni runi cré rátinu ne rálenu stale biaje. Riníʼ íquecabe pa gúninu ni jneza lu guendanabani nápanu yanna, zabáninu jma galán dxi gálenu sti biaje, peru pa gúninu cosa malu, zápanu stale guendanagana. Casi bizéʼtenu riʼ nácabe zanda guni sufrir ti binni nachaʼhuiʼ pur ca malu ni biʼniʼ lu sti vida ni gupa ante. Peru guníʼ ique ca pregunta riʼ:
¿Xiñee ndiʼ guni sufrirnu yanna pur xiixa ni bíninu lu ti guendanabani ni gúpanu dxiqué ni maʼ qué lica rietenaláʼdxinu yaʼ?
Pa maca nexheʼ guibáninu galán pur ni bíninu lu ti vida ni gúpanu ante, ¿xiñee ndiʼ gúninu stipa pur chuʼnu nazaaca ne gápanu laanu para cadi guizaacanu gastiʼ?
PARA GÁNNALUʼ JMA
Guyé lu sitiu jw.org ne biiyaʼ videu ni láʼ ¿Xiñee cudii Dios lugar chuʼ guendananá?
Ni rusiidiʼ Biblia
Cadi naca ca sufrimientu ni nuu ti castigu stiʼ Dios
Stale biaje málasi guizaaca xiixa: zándaca pur nuunu ti lugar ra cadi naquiiñeʼ chuʼnu ne ora cadi naquiiñeʼ.
«Ne laaca biiyaʼ ni cayaca lu guidxilayú, cadi guiráʼ diʼ ora runi ganar tuuxa ni ruxooñeʼ reciu, nin ni nadipaʼ qué runi ganar xiixa guendaridinde, nin ni nuu xpiaaniʼ cadi guiráʼ ora napa ni gó, nin ni riene cadi guiráʼ ora napa cosa risaca, nin ca ni nanna cadi guiráʼ diʼ ora rireendú ni rúnicaʼ, purtiʼ guiranu rizaacanu cosa ni cadi caníʼ íquenu ne ora cadi cabézanu ni» (ECLESIASTÉS 9:11).
Runi sufrirnu purtiʼ dede dxi rálenu maca binni ruchee laanu
Stale biaje riquiiñeʼ binni diidxaʼ pecadu para guiníʼ de ca cosa malu ni runi tuuxa. Peru laaca riquiiñeʼ Biblia diidxaʼ riʼ para guiníʼ binni ruchee de guiranu, tantu ni nachaʼhuiʼ ne ni runi cosa malu, pur donda bisaanané Adán ne Eva laanu.
«Biiyaʼ, maca napa donda dede dxi guleʼ, ne maca binni ruchee naa dede dxi gucaxiiñiʼ jñaaʼ naa» (SALMO 51:5, nota).
Nabé huayuniná pecadu binni
Qué ruxheleʼ si ni laanu de Dios ni bizáʼ laanu, sínuque laaca ruxheleʼ ni laanu de guiráʼ ca cosa ni maʼ bizaʼbe, casi binni ne ca ni nuu gaxha de laanu. Ne pur laani cayacaná guiráʼ ni bizáʼ Dios.
«Ora runeʼ desear guneʼ ni jneza, laga cosa malu maʼ zuhuaa nezaluáʼ» (ROMANOS 7:21).
«Purtiʼ nánnanu juntu cacaalaʼdxiʼ creación ne juntu cayacaná ni dede yanna» (ROMANOS 8:22).