Biyubi gápaluʼ jma xhamíguluʼ
Ni rizaaca
Pa qué guidxaaganu ca binni ni qué riníʼ ique casi laanu, zanda gápanu jma prejuiciu. Ne pa puru si binni casi laanu raca xhamígunu la? zanda guiníʼ íquenu jma jneza modo riníʼ íquenu, ni runi sentirnu ne modo laanu.
Conseju zeeda lu Biblia
«Laguxheleʼ ladxidoʼto» (2 CORINTIOS 6:13).
¿Xi riníʼ ni? Ora riete diidxaʼ ladxidóʼ caninu de ni runi sentirnu. Pa puru si binni casi laanu ridxaaganu la? cásixa ñaca cuséʼgunu ladxidoʼno. Para cadi guizaacanu nga, naquiiñeʼ gaca xhamígunu binni gadxé peʼ de laanu.
Ximodo racané guyúbiluʼ gápaluʼ jma xhamíguluʼ
Ora runibiáʼ chaahuinu tuuxa, riénenu xiñee gadxé modo runi ca cosa ca. Ne ora ridxaaganu laa riaandaʼ laanu pa de sti grupu laa. Rusisácanu laa jma ne runi sentirnu ni runi sentir.
Guidúʼyanu ejemplu stiʼ ti gunaa láʼ Nazaré, laabe bíʼnibe stipa para cadi guni juzgarbe ca binni de sti guidxi. Sicaríʼ guniʼbe: «Bidxaagaʼ laacabe ne bineniaʼ laacabe dxiiñaʼ. Ne binebiaʼyaʼ xcaadxi binni ni gadxé peʼ laacaʼ de modo guníʼ binni nácacaʼ. Ora raca xhamíguluʼ tuuxa de stiʼ cultura, riziidiluʼ cadi guni juzgarluʼ laa, rannaxhiiluʼ laa ne rusisácaluʼ laa».
Ni zanda gúniluʼ
Biʼniʼ stipa guiníʼneluʼ binni de sti guidxi, raza ne idioma. ¿Xiñee qué gúniluʼ ndiʼ?
Gunabaʼ laacabe gábicabe lii xiixa de laacabe.
Biʼniʼ invitar laacabe ti guendaró.
Bicaadiaga laacabe ne biiyaʼ xi risaca para laacabe.
Pa gúniluʼ stipa guiéneluʼ ni maʼ gudíʼdicabe, ziéneluʼ laacabe jma ne zuchaa ni riníʼ íqueluʼ de laacabe.