NI RINABADIIDXAʼ CA JOVEN
¿Ñee caquiiñeʼ gapaʼ jma xhamiguaʼ la?
«Galán runeʼ sentir né ca xhamiguaʼ ni jma ridxaagaʼ, peru raca nagana para naa guidxaagaʼ xcaadxi binni» (Alan).
«Riuuladxeʼ gapaʼ chupa chonna si xhamiguaʼ, qué randa rinieniáʼ tuuxa ni qué runebiaʼyaʼ» (Sara).
¿Ñee laaca zacaca rácaluʼ la? ¿Ñee nápaluʼ ti grupu si de xhamíguluʼ ni qué rixéleluʼ de laa ne raca nagana para lii gápaluʼ xcaadxi xhamíguluʼ la?
Pa zacá ni, ¡caquiiñeʼ gúʼndaluʼ tema riʼ!
¿Ñee malu nga gápaluʼ ti grupu si de xhamíguluʼ la?
Coʼ, cadi malu diʼ. Purtiʼ ora nápaluʼ chupa chonna si binni ni jma xhamíguluʼ, zuni sentirluʼ galán ne zuni sentirluʼ nadxiicabe lii neca gucheeluʼ.
«Ora chuuláʼdxicabe modo lii ne chuʼluʼ lu ti grupu zuni sentirluʼ galán. Ora nahuiiniluʼ, ni racaláʼdxisiluʼ nga gaca xhamígucabe lii» (Karen de 19 iza).
¿Ñee nannuʼ ni la? Neca gupa Jesús stale xhamigu, ládecabe zeeda ca 12 apóstol stibe, peru cani jma guca xhamígube nga Pedro, Santiago ne Juan (Marcos 9:2; Lucas 8:51).
Pa siempre guidxaaganu laca ca binni queca ne qué gaca xhamígunu xcaadxi, cadi galán diʼ ni purtiʼ:
Zándaca maʼ qué zunibiaʼluʼ xcaadxi binni ni gacané lii.
«Pa puru si biaʼ lii nga ca xhamíguluʼ la? qué zunibiaʼluʼ xcaadxi cosa nacubi ne binni ni nabé nachaʼhuiʼ» (Evan de 21 iza).
Zándaca gusihuínniluʼ jma risácaluʼ que xcaadxi.
«Pa nápaluʼ ti grupu si de xhamíguluʼ, zándaca gusihuínniluʼ qué rulábiluʼ xcaadxi» (Sara de 17 iza).
Zándaca despué maʼ gúniluʼ bullying tuuxa.
«Zándaca qué zaníʼ íqueluʼ gúniluʼ bullying tuuxa binni, peru pa runi ca xhamíguluʼ ni, qué zandaa zuuyaluʼ ni casi ti cosa galán ne dede chuuláʼdxiluʼ ni» (James de 17 iza).
Zándaca gápaluʼ guendanagana, jma pa gúniluʼ guiráʼ ni gábicabe lii para cadi cueecabe lii de lu grupu stícabe.
«Lade ti grupuhuiiniʼ, ti binni si zanda gucaa xcaadxi guni cosa malu» (Martina de 17 iza).
Ni zanda gúniluʼ
Guníʼ ique gunáʼ nga ca principiu stiluʼ
Gunabadiidxaʼ laca lii: «¿Gunáʼ nga ca principiu ni napaʼ? ¿Ñee racané ca xhamiguaʼ naa chinandaʼ ca principiu stinneʼ, o runeʼ sentir qué zanda guneʼ ni jneza ora ridxaagaʼ laacabe la? ¿Ñee nuaaʼ dispuestu guneʼ intiica cosa para si cadi gusaana de gaca xhamígucabe naa la?».
Textu ni zanda gacané lii: «Pa idxaagu ni nadxaba la? zacá ni lii [o zunítiluʼ ca costumbre galán nápaluʼ]» (1 Corintios 15:33).
«Ora qué rinanda chupa chonna de ca xhamíguluʼ ca principiu ni nápaluʼ zándaca zucaacabe lii gúniluʼ xiixa cosa ni qué ñuu dxi niníʼ íqueluʼ ñúniluʼ» (Ellen de 14 iza).
Guníʼ ique xii nga ni jma risaca para lii
Gunabadiidxaʼ laca lii: «¿Ñee riuuladxeʼ guneʼ ni ná ca xhamiguaʼ dede nuaaʼ dispuestu guneʼ ni cadi jneza para cadi guniteʼ laacabe la? ¿Xi guneʼ pa tobi de ca xhamiguaʼ guni xiixa ni cadi jneza yaʼ?».
Textu ni zanda gacané lii: «Rulidxe cani nadxiee ne ridinde nia laacaʼ» (Apocalipsis 3:19).
«Pa tobi de ca xhamíguluʼ guni xiixa ni cadi jneza ne qué gánnaluʼ tu pur chuʼluʼ, zándaca guiníʼ íqueluʼ zudxiidécheluʼ laabe pa guiniʼluʼ ni bíʼnibe» (Melanie de 22 iza).
Gupa jma xhamíguluʼ
Gunabadiidxaʼ laca lii: «¿Ñee galán gunebiaʼyaʼ xcaadxi binni la?»
Textu ni zanda gacané lii: «Cadi sti si tu ma cá ique tu, sínuque laucaa ique ni caquiiñe stobi» (Filipenses 2:4).
«Nuu joven ni huaxiéʼ runibiáʼcabe laacaʼ nápacaʼ guendanagana ra lídxicaʼ. Peru ora gunibiáʼ chaahuiluʼ laacabe zudiiluʼ cuenta guizáʼ nacháʼhuicabe» (Brian de 19 iza).
Ni rizíʼdinu: Cadi malu diʼ nga gápanu ti grupu si de xhamígunu. Peru laaca galán gápanu jma xhamígunu ne gunibiaʼnu xcaadxi binni. Biblia náʼ: «Ti binni ni rudii de ni napa, zié ni laa galán» (Proverbios 11:25).