10 ndaa

Ca guendaquéiquiiñeʼ ni nanalaʼdxiʼ Dios

Ximodo naquiiñeʼ gúʼyaluʼ cani na Dios cadi jneza (1)

Xi tipu de guendaratané stobi raca nanalaʼdxiʼ Dios (2)

Ximodo naquiiñeʼ guʼyaʼ cani zinanda Cristu guendarusiguii (3)

Ne guendariguite de bueltu (3) Ne guendaribaʼnaʼ (3) Ne guendaridinde (4) Ne guendariniʼné gueʼtuʼ (5)

Ne guendarixudxi (6)

Ximodo zanda guixeleʼ ti binni de ca guendaquéiquiiñeʼ riʼ (7)

1. Ca xpinni Dios nadxiicaʼ ni jneza, peru laaca naquiiñeʼ guiziidicaʼ gaca nanaláʼdxicaʼ ni cadi jneza (Salmo 97:10; 1 Pedro 3:11). Nga riníʼ naquiiñeʼ guiree cuéʼcabe de cani nadxabaʼ ni nanalaʼdxiʼ Dios. Gunáʼ ndiʼ caadxi de laacani yaʼ.

2. Guendaratané ni cadi xheelaʼ: Guendaratané stobi ante guichaganá, guendariuuné stobi ni cadi xheelaʼ, guendaratané maniʼ, guendariuuné binnilidxi, guendamuxeʼ ne gunaa nguiuʼ, guiráʼ ndiʼ la? Dios nanalaʼdxiʼ cani (Levítico 18:6; Romanos 1:26, 27; 1 Corintios 6:9, 10). Pa ti hombre ne ti gunaa caʼruʼ guichaganacaʼ peru nabézacaʼ la? naquiiñeʼ guichaganacaʼ nezalú ti juez o pacaa la? naquiiñeʼ guixálecaʼ (Hebreos 13:4).

3. Guendarusiguii, guendariguite de bueltu, guendaribaʼnaʼ: Jiobá Dios qué zándadiʼ gusiguiibe (Tito 1:2). Pur nga runi ca binni ni racalaʼdxiʼ chulaʼdxiʼ Dios ni cayúnicaʼ la? qué riquiiñeʼ gusiguiicaʼ (Proverbios 6:16-19; Colosenses 3:9, 10). Guiráʼ guendariguite de bueltu la? runiibini ladxidóʼ binni gachelú gapa jma. Pur nga runi ca ni zinanda Cristu qué riguítecaʼ loteriá nin qué riecaʼ apuesta ora guxooñeʼ maniʼ ne ninruʼ stobi casi laacani (Efesios 5:3-5). Ne nin qué ribáʼnacaʼ nin riziʼcaʼ xiixa nanna dxíchicaʼ ni guláʼnacabe ne nin rinecaʼ xiixa sin guiniʼcaʼ (Éxodo 20:15; Efesios 4:28).

4. Guendaridxiichi xhaataʼ, guendaridinde: Ora tobi guidxiichi xhaataʼ ne qué rucueeza laa la? zanda gucaani laa tinde (Génesis 4:5-8). Ca ni nagueenda ridxiichi qué zanda gaca xhamígucaʼ Dios (Salmo 11:5; Proverbios 22:24, 25). Ora tobi guniná laanu la? cadi jneza diʼ guquíxenu laa pur ni guni laanu (Romanos 12:17-21; 1 Tesalonicenses 5:15).

5. Brujería ne guendariniʼné gueʼtuʼ: Nuu binni rinabaruaa gacané ca espíritu ca laacaʼ ti ganda gusiándacaʼ binni huará. Xcaadxi la? rúnicaʼ brujería xhenemígucaʼ para guni huarácabe o para guuticabe laacaʼ. Neza deche guiráʼ ndiʼ la? nuu Binidxabaʼ. Pur nga runi ca ni zinanda Cristu qué riquiiñeʼ diʼ gúnicaʼ nin tobi de laacani (Deuteronomio 18:9-13; Apocalipsis 21:8). Naquiiñeʼ chuʼnu gaxha de Jiobá ti ganda guilanu de ca brujería ca (Proverbios 18:10).

6. Guendarixudxi: Cadi malu diʼ gueʼ tobi tuudxi vinu o tuudxi nisa dxuʼniʼ (Salmo 104:15; 1 Timoteo 5:23). Peru ni qué riulaʼdxiʼ Dios nga guendaréʼ xhaataʼ ne guendarixudxi (1 Corintios 5:11-13; 1 Timoteo 3:8). Pa xhúdxiluʼ la? zándaca guni huarani lii o zándaca guninani binniliʼdxuʼ. Ne laaca zándaca guiaʼbu lu stuudxi guendaruchee (Proverbios 23:20, 21, 29-35).

7. Guiráʼ binni ni riulaʼdxiʼ guni ni qué riulaʼdxiʼ Dios la? qué ziuucabe ra chiguni mandar Dios [reinu stiʼ Dios] (Gálatas 5:19-21). Pa dxandipeʼ nadxiiuʼ Dios ne napuʼ gana guʼnuʼ ni nabe la? zanda gusaanuʼ ca guendanadxabaʼ ni qué riuláʼdxibe (1 Juan 5:3). Biziidiʼ gaca nanaláʼdxiluʼ ni nanalaʼdxiʼ Dios (Romanos 12:9). Bidxaaga binni ni runi ni na Dios (Proverbios 13:20; 1 Coríntios 15:33). Ca xhamígunu ni napa stale iza de zinanda Cristu la? zanda gacané laanu (Santiago 5:14). Peru ni jma zacané laanu nga guiníʼnenu Dios lu oración (Filipenses 4:6, 7, 13).

[Dibuju/foto ni zeeda lu yaza 20]

Dios raca nanalaʼdxiʼ guendarixudxi, guendaribaʼnaʼ, guendariguite de bueltu ne guendaridinde