14 ndaa
Ximodo runi ca testigu stiʼ Jiobá dxiiñaʼ
Padxí bizulú historia stiʼ ca testigu stiʼ Jiobá de ca dxi stinu (1)
Ximodo runi ca testigu stiʼ Jiobá guendaridagulisaa sticaʼ (2)
Ximodo riaxa guiráʼ ni riquiiñecabe (3)
Tuu nga zaniruʼ ndaaniʼ cada neza binni ridagulisaa (4)
Xi xcaadxi guendaridagulisaa roʼ raca guiráʼ iza (5)
Xi dxiiñaʼ runi ca testigu stiʼ Jiobá ndaaniʼ yoo ni jma risaca ne stuudxi yoo roʼ stícabe (6)
1. Historia stiʼ ca testigu stiʼ Jiobá la? bizuluni iza 1870 a 1880. Dxiqué biree lácabe Binni Ruundaʼ Biblia, peru iza 1931 biree lácabe testigu stiʼ Jiobá (Isaías 43:10). Dxi bizulú dxiiñaʼ stiʼ ca testigu stiʼ Jiobá la? huaxiéʼcabe; yanna maʼ biroobani stale ne maʼ nápani millón de binni ni rucheeche diidxaʼ stiʼ Reinu lu chupa gayuaa treinta y cinco guidxi roʼ.
2. Stale de ca guendaridagulisaa stiʼ ca testigu stiʼ Jiobá raca cani chonna biaje lu ti semana. Cayaca invitarluʼ para cheluʼ ra ridagulisaacabe (Hebreos 10:24, 25). Guiráʼ ni riziidicabe racá la? zeeda ni lu Biblia. Ca guendaridagulisaa ca ruzulú cani ne riluxe cani ne ti oración, ne ruundacabe para Dios de guidubi ladxidóʼcabe (Efesios 5:18, 19). Zanda chuʼ tutiica binni sin quixe ne qué rinábacabe guna (Mateo 10:8).
3. Stale de ca binni ca ridagulisaacabe ndaaniʼ ti Yoo stiʼ Reinu. Ca yoo ca la? qué gapa cani stale luju, ca testigu stiʼ Jiobá nga bicuícani de guidubi ladxidoʼcaʼ sin guiáxacaʼ. Ndaaniʼ ni qué zuuyuʼ bidóʼ nin cruz nin xiixa de ca nga. Ca gastu ca riaxa cani ne bueltu ni rudii binni de ladxidóʼ. Ca ni racalaʼdxiʼ gudii xiixa la? zanda uguucabe ni ndaaniʼ tobi de ca caja ni nuu raqué (2 Corintios 9:7).
4. Lu guiráʼ ra ridagulisaa binni la? nuu binnigola o binni rapa, ni zaniruʼ para gusiidiʼ Stiidxaʼ Dios (1 Timoteo 3:1-7; 5:17). Ca binnigola riʼ la? racané ca siervu ministerial (ni racané ca binnigola) laacabe (1 Timoteo 3:8-10, 12, 13). Nin tobi de laacabe cadi dxiibaʼ diʼ jma que ca binni ridagulisaa ca (2 Corintios 1:24). Qué gápacabe ti lá para gudxiibaʼ laacabe (Mateo 23:8-10). Cadi gadxé diʼ xhábacabe que stuudxi binni ni riuu raqué. Laaca qué riáxacabe pur xhiiñacabe. Ca binnigola riʼ rusiidicabe ca binni ridagulisaa ca Stiidxaʼ Dios de guidubi ladxidóʼcabe. Rudiicabe stipa, ne ruluíʼcabe neza cheʼ binni ora napa ti guendanagana (Santiago 5:14-16; 1 Pedro 5:2, 3).
5. Ca testigu stiʼ Jiobá rúnicaʼ guiráʼ iza guendaridagulisaa roʼ sticaʼ. Racá la? ridaagu stale binni para gucaadiágacaʼ ca libana ni zeeda de lu Biblia. Lu guiráʼ ca guendaridagulisaa ca la? riuunisa cani nacubi (Mateo 3:13-17; 28:19, 20).
6. Yoo jma risaca ra raca dxiiñaʼ stiʼ ca testigu stiʼ Jiobá la? nuuni Nueva York. Racá nuu Grupu ni Zaniruʼ. Laacabe nga tuudxi binnigola ni bibí ne nanna stale para guʼyaʼ ximodo zeʼ dxiiñaʼ ni runi ca testigu stiʼ Jiobá lu guidubi naca Guidxilayú. Laaca nuu lu guidubi naca guidxilayú riʼ jma de ti gayuaa yoo roʼ ni racané saʼ dxiiñaʼ stiʼ ca testigu stiʼ Jiobá. Ca ni runi dxiiñaʼ racá la? cayacanécabe gaca jma libru de lu Biblia ne ruseendacabe cani sin guiáxacabe. Dede raqué la? rusanírucabe dxiiñaʼ de guendarucheeche diidxaʼ riʼ. Xiñee qué chigannu tobi de ca yoo roʼ ra riaʼ ca guiʼchiʼ riʼ ni riaana lii maʼ gaxha yaʼ.