Capítulo 4
Cani riguixhená de dxiqué bizeetecaʼ de laabe
1. Ximodo guyuuné Jesús Bixhoze ante gale lu Guidxilayú riʼ.
DIOS la? «nadxii be Xiiñi be ne ruluíʼ be laa irá ni runi be» (Juan 5:20). Ya, Xiiñiʼ Dios nabé nayecheʼ guyuunebe Bixhózebe, Jiobá. Dede dxi guyaʼbe bibaninebe laa stale mil de iza ante gálebe lu Guidxilayú riʼ. Ne stubi lucha Dios bizáʼ laabe. Ne laabe nga ni biquiiñeʼ Dios para guyáʼ guiráʼ ni nuu guibáʼ ne cani nuu lu Guidxilayú (Colosenses 1:15, 16). Laabe laaca beeda gácabe Stiidxaʼ Dios, purtiʼ pur laabe nga gunna binni xiná Bixhózebe. Dios nabé gunnaxhii Xiiñiʼ, ne laabe nga biree labe Jesucristu dxi guyuube lu Guidxilayú riʼ (Proverbios 8:22-30; Juan 1:14, 18; 12:49, 50).
2. Xi guníʼ cani riguixhená que de Jesús.
2 Ante chaʼ Jesús ndaaniʼ jñaa la? gudxi Dios cani riguixhená stiʼ gucaacaʼ xi guiráʼ zuni Xiiñibe. Apóstol Pedru gúdxibe Corneliu: «De laabe [Jesús] bizeete ca profeta dede ma xadxí» (Hechos 10:43). Stiidxaʼ Dios nabé ruzeeteʼ de ni chigúnibe, dede ti ángel stiʼ Dios gudxi apóstol Juan: «Stiidxa Jesús ruiʼ cani rabi Dios laa xi iníʼ» (Apocalipsis 19:10). Guiráʼ diidxaʼ ni gucuá riʼ bisihuínnicani laabe nga Mesías que ne xi guiráʼ dxiiñaʼ chigúnibe para gaca cani maʼ guníʼ Dios, ne guiráʼ ndiʼ naquiiñeʼ gánnanu ca dxi stinu riʼ.
Xi biluíʼ ca diidxaʼ riguixhená que de Jesús
3. 1) De ni cuzeeteʼ Génesis 3:15, tuu nga zeeda gaca beendaʼ que, gunaa que ne ni za de beendaʼ que. 2) Xiñee racalaʼdxiʼ ca xpinni Jiobá gánnacaʼ ximodo igaache ique beendaʼ que.
3 Primé diidxaʼ riguixhená ni guníʼ Jiobá, guniʼbe ni despué de bicaalúcabe laabe ndaaniʼ jardín ni guyuu Edén que. Jiobá gudxi beendaʼ que: «Ne zucaa gacananaláʼdxisaatu, lii ne gunaa ca, ne zaqueca ni za de lii ne ni za de laabe. Ni za de gunaa ca zucaache íqueluʼ ne lii zuninaluʼ xatini ñeebe» (Génesis 3:15). Ca diidxaʼ riʼ gúdxibe ni Binidxabaʼ, ni zeeda gaca beendaʼ ca. «Gunaa» ca nga guiráʼ ca ángel chaʼhuiʼ stiʼ Jiobá ni nuu guibáʼ ne laacabe nga zeeda gácacabe casi xheelaʼ Jiobá ni qué rusaana laabe. Cani za de beendaʼ ca nga guiráʼ ca ángel ne guiráʼ ca binni ni rusihuinni riníʼ ique casi Binidxabaʼ, nga nga cani cucaalú Jiobá ne xquidxi. Dxi igaache, o igaʼdxe, ique beendaʼ ca nga dxi guinitilú Binidxabaʼ, ni guníʼ mal de Jiobá ne pur laa cadiʼdiʼ binni stale guendananá. Yanna, tupeʼ nga ni jma risaca «ni za» de gunaa ca, ni chigucaache ique beendaʼ ca yaʼ. Gudiʼdiʼ stale iza guirutiʼ tu ñanna ni purtiʼ xadxí guyuuni «nagaʼchi» (Romanos 16:20, 25, 26).
4. Ra gunna ca binni de dxiqué tu de za Jesús, ximodo gucané nga laacabe para gúnnacabe laabe nga Mesías ni gueeda que.
4 Gudiʼdiʼ si biaʼ chupa mil iza de nabani binni lu Guidxilayú riʼ, guníʼ Jiobá xcaadxi cosa de ni za de gunaa que. Jiobá guníʼ zálebe lade ca xiiñiʼ Abrahán (Génesis 22:15-18). Peru cadi tutiica si ni gale lade ca xiiñiʼ Abrahán nga gaca Mesías, sínuque Dios nga chindí tupeʼ. Neca gunnaxhii Abrahán Ismael, xiiñiʼ Agar la? Jiobá gudxi laabe: «Pactu stinneʼ zaguíxheni ne Isaac, ni chigapa Sara» (Génesis 17:18-21). Qué nidiʼdiʼ diʼ pactu que ne Esaú, baʼduʼ primé stiʼ Isaac, sínuque ne Jacob, ne ca xiiñibe nga guca doce tribu stiʼ Israel (Génesis 28:10-14). Laaca guníʼ Jiobá zale xiiñiʼ gunaa que lu tribu stiʼ Judá lade ca binnilidxi David (Génesis 49:10; 1 Crónicas 17:3, 4, 11-14).
5. Ora bizulú Jesús bicheeche diidxaʼ, xi bisihuinni laabe nga Mesías que.
5 Xiruʼ guníʼ cani riguixhená que para ganda gánnacabe tuu nga ni za de gunaa que. Jma de gadxe gayuaa iza ante gálebe ndaaniʼ Guidxilayú riʼ maca cá lu Biblia zálebe ti lugar láʼ Belén ne laaca cá luni maca nuube guibáʼ maʼ raca stálepeʼ iza (Miqueas 5:2). Ne laaca zeeda lu Biblia ra guníʼ Daniel ni riguixhená que padxipeʼ zahuínnibe lu Guidxilayú riʼ casi Mesías (Daniel 9:24-26). Ne dxi gulí Jiobá laabe ne espíritu santu, ora beeda gácabe Mesías que, stídxipeʼ Dios biree dede guibáʼ guníʼ Xiiñiʼ laabe (Mateo 3:16, 17). ¡Raqué nga bihuinni Jesús nga ni za de gunaa que! Nga runi, Felipe qué nuchee diʼ ora guníʼ: «Ma bidxela du dxa hombre de ni bicaa Moisés lu guiʼchi ra cá ca ley ne ni bizeete ca profeta que, ne laabe nga Jesús xiiñi José de Nazaret» (Juan 1:45).
6. 1) Casi na Lucas 24:27, xidé bidii ca discípulo stiʼ Jesús cuenta. 2) Tuu nga ni jma risaca lade cani za de gunaa que, ne ximodo chigucaachebe ique beendaʼ que.
6 Despué la? ca discípulo stiʼ Jesús que bidiicaʼ cuenta stale de ni guníʼ cani riguixhená que de laabe zeedacani lu Stiidxaʼ Dios (Lucas 24:27). Ne bihuinni laabe nga ni jma risaca ni za de gunaa que, ni chigucaache ique beendaʼ que o ni chigunitilú Binidxabaʼ. Jesús nga chiguiquiiñeʼ Jiobá para guni guiráʼ ni maʼ bizabiruaa para binni, o guiráʼ ni racaláʼdxinu (2 Corintios 1:20).
7. Neca maʼ nánnanu tuu nga Ni cuzeeteʼ ca diidxaʼ riguixhená ca, xi naquiiñeʼ guiénenu.
7 Xi naquiiñeʼ gúninu ora gánnanu ca ndiʼ yaʼ. Biblia cuzeeteʼ xi biʼniʼ ti hombre de Etiopía. Biindaʼ si hombre riʼ chupa chonna ra caníʼ de Mesías ni chigulá laanu que la? gunabadiidxabe Felipe, tobi de cani bicheeche diidxaʼ: «Gudxi naa tu cuzeete profeta Isaías raríʼ». Ora gudxi Felipe laabe tuu ndiʼ cayeeteʼ raríʼ gucaláʼdxibe ñánnabe jma. Bicaadiágasibe ni bisiene Felipe laabe que la? biénebe naquiiñeʼ gúnibe xiixa, naquiiñeʼ chúʼnisabe (Hechos 8:32-38; Isaías 53:3-9). Ñee zacaca cayúninu la?
8. 1) Ora gucalaʼdxiʼ Abrahán ñuuti Isaac para nudiibe laa Jiobá, xi bisihuinni ngue chigaca. 2) Xiñee gudxi Jiobá Abrahán zaguu ndaayaʼ guiráʼ guidxi pur ni za de gunaa que, ne xi naquiiñeʼ gucaa nga laanu gúninu.
8 Guiníʼ íquenu xi bizaaca ora gucalaʼdxiʼ Abrahán ñuuti Isaac, tobi lucha xiiñibe ni gupanebe Sara, para gudiibe laa Jiobá (Génesis 22:1-18). Ngue biluíʼ zudii Dios tobi lucha Xiiñiʼ: «Nadxii xhaata Dios binni guidxilayú ngue runi bidii tobi lucha Xiiñiʼ, ti irá tu guni cre Xiiñi be que la? cadi initilú sínuque gapa enda nabani ni qué zaluxe» (Juan 3:16). Gánnanu ndiʼ la? rucaani laanu guni crenu de guidubi ladxidoʼno zudii Jiobá laanu guiráʼ ni caquiiñenu cásica bidiibe tobi lucha Xiiñibe para gaca ni maʼ gudixhe íquebe (Romanos 8:32). Peru xi naquiiñeʼ gúninu yaʼ. Casi na Génesis 22:18, Jiobá gudxi Abrahán zaguu ndaayaʼ guiráʼ guidxi pur tobi ni za de gunaa que, purtiʼ bicaadiágabe Dios. Laanu laaca naquiiñeʼ gucaadiáganu Jiobá ne Xiiñiʼ purtiʼ «tu runi cre Xiiñi be la? napa enda nabani ni qué zaluxe, peru tu qué uzuuba stiidxa Xiiñi be, qué zapa di enda nabani, sínuque xiana stibe nuu luguiáʼ» (Juan 3:36).
9. Ximodo zanda gusihuínninu rudiʼnu xquíxepeʼ Jiobá purtiʼ chigudiibe laanu ti guendanabani ni qué zaluxe pur guti Jesús para gulá laanu.
9 Pa rudiʼnu xquíxepeʼ Jiobá pur guendanabani ni qué zaluxe ni chigudiibe laanu pur guti Jesús para gulá laanu la? zúninu cani cayábibe Xiiñibe, nga nga ca mandatu ni na gannaxhiinu Dios ne binni (Mateo 22:37-39). Jesús guníʼ zusíʼdinu xcaadxi binni «guni ca irá ni ma gudx[ibe]» laanu purtiʼ nadxiinu Jiobá (Mateo 28:19, 20). Laanu laaca racaláʼdxinu gusihuínninu nadxiinu ca xpinni Jiobá ora cadi gusaananu de guidagulisaanenu laacaʼ (Hebreos 10:25; Gálatas 6:10). Ora gucaadiáganu Dios ne Xiiñiʼ la? cadi guiníʼ íquenu canábacabe laanu cadi liica gucheʼnu. Hebreos 4:15 na «zanda guiá [Jesús] laanu purti nanna pe be xii nga nagana para laanu». Nabé ratadxí ladxidoʼno gánnanu ni, jmaruʼ si ora rinábanu Dios de lu lá Jesús gacané laanu gucueezanu ni rucaa laanu gucheʼnu (Mateo 6:12).
Bisihuinni nápaluʼ fe Cristu
10. Xiñee Jesucristu si nga zanda gulá laanu.
10 Bisiene si apóstol Pedru ca binni ni naca justicia guidxi Jerusalén que, luguiáʼ Jesús nga guca ni na ca diidxaʼ zeeda lu Biblia que la? sicaríʼ gúdxibe laaca ora bilúxebe: «Laasi be zanda ulá be laanu, purti iruti ru stobi ndaani guidxilayú ni huaguixhe Dios ulá binni, sínuque laasi be» (Hechos 4:12). Cumu guiráʼ ca xiiñiʼ Adán gulené donda la? pa gati tobi de laacabe qué zanda diʼ gulá laanu. Peru Jesús qué ñalené diʼ donda, nga runi zanda gudiibe xquendanabánibe pur laanu (Salmo 49:6-9; Hebreos 2:9). Guendanabani ni gudíxenebe Dios que risácani biaʼpeʼ risaca guendanabani sin donda ni biniti Adán que (1 Timoteo 2:5, 6). Zacá nga bixele ti neza para guicaanu ti guendanabani ni qué zaluxe ndaaniʼ guidxilayú cubi stiʼ Dios.
11. Jesús bixhii rini stiʼ pur laanu, ximodo racané nga laanu.
11 Ni biaxa pur laanu ca racaneni laanu dede yanna. Tobi ra racaneni laanu nga neca gulenenu donda zanda gápanu ti guendabiaaniʼ nayá, purtiʼ ne rini bixhii Jesús ca rutiidilaʼdxiʼ Jiobá ca stóndanu. Ne laani nga jma risácani que rini stiʼ ca maniʼ ni biiti ca israelita dxiqué casi na Ley ni gucuaa Moisés que (Hechos 13:38, 39; Hebreos 9:13, 14; 10:22). Peru para tiidilaʼdxiʼ stóndanu naquiiñeʼ gánnanu caquiiñepenu rini bixhii Jesús ca, purtiʼ «pa gabi nu qué huachéʼ nu la? cusiguii nu laca laanu ne qué lica ganna nu xii nga ni dxandíʼ. Peru pa uxhuba donda nu lú be nanna dxichi nu zuni be ni ma uníʼ be, zuxhá be stonda nu ne zusiá be ladxidóʼ no de irá ni nadxabaʼ, purti jneza ni runi be» (1 Juan 1:8, 9).
12. Xiñee risaca nga chúʼnisanu para sanu modo na Dios.
12 Ximodo rusihuinni ca binni ruchee nápacaʼ fe Cristu ne nápacaʼ fe lu rini bixhiibe yaʼ. Lu primé siglu que, ca binni biʼniʼ cré Jesús bisihuínnicaʼ ni ora guyuunisacaʼ nezalú guiráʼ binni. Xiñee yaʼ. Purtiʼ Jesús biʼniʼ mandar ca xpinni gúnicaʼ zacá (Mateo 28:19, 20; Hechos 8:12; 18:8). Binni ni rudii xquíxepeʼ Jiobá pur guendarannaxhii ni biluiʼbe ora biseendabe Jesús la? riuunisa. Rusaana ca cosa malu ni biʼniʼ, rudii laa Jiobá ne rabi ni laabe lu ti oración ne rusihuinni ni ora chúʼnisa. Ora gusihuínnibe fe stibe zacá la? canábabe lu Dios gacané laabe sabe modo na (1 Pedro 3:21).
13. Pa nánnanu bicheʼnu, xi naquiiñeʼ gúninu ne xiñee.
13 Cumu binni ruchee laanu la? neca maʼ guyúʼnisanu zuchéʼrunu. Xi naquiiñeʼ gúninu óraca yaʼ. Apóstol Juan guníʼ: «Cucaa iráʼ ndi lú tu para cadi uchee tu. Peru pa chuʼ tu uchee la? napa nu tu caníʼ né Dios pur laanu, Jesucristu ni qué ñuu dxi nuchee. Laabe gudixe be saca bixá stonda nu» (1 Juan 2:1, 2). Ñee cayabi nga laanu intiica gúninu zutiidilaʼdxiʼ Dios stóndanu pa guinábanu ni laabe la? Coʼ. Para gutiidiláʼdxibe stóndanu naquiiñeʼ gusihuínninu dxandipeʼ cayaca arrepentirnu. Zándaca iquiiñenu gacané tuuxa de cani ridagulisaanenu ni maʼ huaniisi ni ganda gacané laanu. Naquiiñeʼ guininu dxandíʼ bicheʼnu ne guluinu dxandíʼ cayuubaʼ ladxidoʼno pur laani, ti zacá gúninu stale stipa para cadi guibiguetaʼ gúninu ni (Hechos 3:19; Santiago 5:13-16). Pa gúninu ni zacá la? naquiiñeʼ ganna dxíchinu zacané Jesús laanu ne zacaanu ndaayaʼ stiʼ Jiobá sti biaje.
14. 1) Bizeeteʼ ximodo huayacané rini stiʼ Jesús laanu. 2) Pa dxandíʼ nápanu fe, xi zúninu.
14 Rini bixhii Jesús que bixhéleni ti puertaʼ para ti guendanabani ni qué zaluxe guibáʼ ni chiguicaa «grupu huiiniʼ de dendxuʼ», laacabe laaca zácabe de gunaa ni rieeteʼ lu Génesis 3:15 (Lucas 12:32, NM; Gálatas 3:26-29). Pur laani laaca zanda guicaa stale binni ti guendanabani ni qué zaluxe ndaaniʼ ti paraísu lu Guidxilayú riʼ (Salmo 37:29; Apocalipsis 20:11, 12; 21:3, 4). Guendanabani ni qué zaluxe ca nga «ni rudii Dios [...], pur Cristu Jesús Señor stinu» (Romanos 6:23; Efesios 2:8-10). Pa runi crenu zudii Dios ni laanu ne rudiʼnu xquíxepeʼ laabe pur ni bíʼnibe para guicaanu ni la? zusihuínninu ni. Cumu riénenu nabé galán modo biquiiñeʼ Jiobá Xiiñiʼ para guni ni nabe ne riénenu naquiiñeʼ sanu modo guzá Jesús la? jma zusisácanu dxiiñaʼ ni nápanu casi xpinni Cristu. Zudii binni cuenta nápanu fe pa ora guinínenu laacabe gusihuínninu dxandíʼ runi crenu nabé sicarú nga ni cusigaʼdeʼ Dios laanu (Hechos 20:24).
15. Xiñee zanda guininu pur fe ni nápanu Jesucristu ca nuunu tobi si.
15 Fe ca racaneni laanu chuʼnu tobi si, purtiʼ ruchíñani laanu jma gaxha de Jiobá, de Xiiñibe ne de guiráʼ cani zinanda Cristu (1 Juan 3:23, 24). Nabé riéchenu gánnanu pur guendanachaʼhuiʼ stiʼ Jiobá «bidxiiba [Xiiñiʼ] ne bisisaca laabe jma que irá xixé [Jiobá si nga jma dxiibaʼ que laabe], ti ora guiete lá be guzuxibi irá cani nuu ibáʼ ne irá cani nuu ndaani guidxilayú ne irá cani nuu xaguete guidxilayú, ne iníʼ ca nezalú iráʼ: “Jesucristu nga Señor”, ne zacá usisaca ca Dios Bixhoze be» (Filipenses 2:9-11).
Ni guietenaláʼdxinu
• Dxi bihuinni Mesías que, xiñee gunda binibiáʼ cani dxandíʼ runi cré Stiidxaʼ Dios que laabe.
• Ximodo zusihuínninu rudiʼnu xquíxepeʼ Jiobá pur rini bixhii Jesús.
• Ximodo huayacané rini bixhii Jesús laanu. Ximodo racaneni laanu ora rinábanu Jiobá gutiidilaʼdxiʼ stóndanu.
[Dibuju/foto ni zeeda lu yaza 36]
Jesús gudxi ca discípulo stiʼ naquiiñeʼ gusiidicabe xcaadxi binni chinanda ca mandamientu stiʼ Dios