Ximodo iquiiñetu bueltu stitu

Guiranu riquiiñenu bueltu para gudiʼnu ni iquiiñeʼ familia stinu (Proverbios 30:8). Ne nánnanu «rapa bidxichi ca binni» (Eclesiastés 7:12). Zándaca nuu tiru zaca nagana para lii guiniʼneuʼ xheeluʼ de bueltu riquiiñeʼ familia stitu, peru cadi gudiiluʼ lugar chuʼ xiixa guendanagana lu xquendaxheelaluʼ ora güitu de laani (Efesios 4:32). Naquiiñeʼ gápatu confianza laatu ne juntu gúʼyatu ximodo iquiiñetu bueltu stitu.

1 GUDIXHE XIMODO IQUIIÑETU BUELTU STITU

NI RUSIIDIʼ BIBLIA: «Lácaxa nuzulú tobi hombre ti yoo sin que nirudóʼ nibí ñuuya chaahui pa zugaanda xpidxichi para iluxe ni. Oraque ru nuzulú ni» (Lucas 14:28). Guirópatu nga guʼyaʼ chaahuitu ximodo iquiiñetu bueltu stitu (Amós 3:3). Laguuyaʼ xi caquiiñeʼ situ ne pabiáʼ zanda gúnitu gastu (Proverbios 31:16). Cadi tiisi nápatu bueltu situ intiica cosa. Laguni stipa cadi guzaabitu ne laiquiiñeʼ bueltu si ni nápatu (Proverbios 21:5; 22:7).

NI ZANDA GUʼNUʼ:

• Pa guiaana ti ndaa bueltu stitu ra guiluxe semana o ra guiluxe beeu la? laguuyaʼ ximodo zanda iquiiñetu ni

• Pa qué zudii bueltu stitu la? laguuyaʼ xi cadi caquiiñeʼ situ. Casi lugar de situ guendaró ni maca guca la? jma galán pa gúnitu ni ra lídxitu

2 GUNÍʼ NI DXANDÍʼ NE BIIYAʼ PA ZUDII BUELTU STITU

NI RUSIIDIʼ BIBLIA: Guníʼ ni dxandíʼ «cadi nezalú [Jiobá] si, sínuque ne nezalú binni» (2 Corintios 8:21). Gudxi xheeluʼ pabiáʼ runi ganarluʼ ne pabiáʼ rúniluʼ gastu.

Biiyaʼ xiná xheeluʼ ante gúniluʼ gastu bueltu lu xiixa cosa risaca (Proverbios 13:10). Qué zadinde xheelatu, pa guirópatu güitu xi guninetu bueltu stitu. Guníʼ ique stiʼ familia stiuʼ bueltu ni runi ganarluʼ ne cadi stiʼ stúbiluʼ ni (1 Timoteo 5:8).

NI ZANDA GUʼNUʼ:

• Laquixhe pabiaʼtiʼ zanda guni gastu cada tobi de laatu sin guinabadiidxasaatu

• Cadi cuézaluʼ dede ora maʼ nápatu ti guendanagana guni bueltu oraqueruʼ guiniʼtu xi gúnitu