¿Tu bidii poder Jesús para guni milagru?

Gudiʼdiʼ si caadxi dxi de guníʼ Jesús ra lidxi Simón, fariseu que, naquiiñeʼ guni perdonar binni, guyebe sti biaje guidxi Galilea para guni predicarbe. Maʼ chupa iza de cayuni Jesús xhiiñaʼ Dios ne yanna zinanda ca 12 apóstol stiʼ laa ne caadxi gunaa ni guleebe «espíritu malu luguiáʼ ne bianda» (Lucas 8:2). Ládecabe nuu María Magdalena, Susana ne Juana, xheelaʼ encargadu de ra lidxi Herodes Antipas.

Ra jma ziyanna binni de Jesús, jma caniʼcaʼ ni cayúnibe. Casi dxi bisianda Jesús ti hombre mudu, ciegu ne nuu demonio lu xcuerpu. Nabé bidxagayaaʼ ca binni que ora bíʼyacaʼ maʼ biree demonio que lu cuerpu stiʼ hombre que, maʼ ruuyaʼ ne maʼ riníʼ, ne canabadiidxaʼ ca binni que: «¿Ñee cadi laabe nga Xiiñiʼ David la?» (Mateo 12:23).

Nabé nuu stale binni ra yoo ra nuu Jesús ne ca discípulo stiʼ dede qué gápacaʼ tiempu para gocaʼ. Peru cadi guiráʼ binni runi cré naca Jesús «Xiiñiʼ David», ni nexheʼ gueeda que. Beeda caadxi escriba ne fariseu de Jerusalén ra nuu Jesús, peru cadi para gacanecaʼ laabe nin para guiziidicaʼ de laabe, sínuque cayábicaʼ binni «nuu Belcebú lu xcuérpube» ne runinebe dxiiñaʼ «gobernante stiʼ ca demonio» (Marcos 3:22). Ora binadiaga familia stiʼ Jesús bulla ni cayaca que, bireecaʼ ziyúbicaʼ laabe para chinecaʼ laabe. ¿Xiñee yaʼ?

Qué runi cré ca biʼchiʼ Jesús pa laa nga Xiiñiʼ Dios (Juan 7:5). Ora bíʼyacaʼ pur Jesús cayaca bulla que la? guníʼ íquecaʼ cadi zaqué diʼ laabe dxi gúcabe nahuiiniʼ, nga runi nacaʼ «cayaca íquebe» (Marcos 3:21).

Peru ¿xi rusihuinni ca milagru cayuni Jesús que yaʼ? Maʼ guleebe demonio luguiáʼ ti hombre ne yanna maʼ ruuyaʼ ne maʼ riníʼ. Cumu dxandíʼ guca ndiʼ la? ngue runi biyubi ca escriba ne ca fariseu modo gusaanacaʼ mal Jesús. Nacaʼ: «Ribeebe demonio pur poder stiʼ Belcebú, gobernante stiʼ ca demonio» (Mateo 12:24).

Nanna Jesús xi caníʼ ique ca escriba ne ca fariseu, pur nga gúdxibe laacaʼ: «Guiráʼ reinu nuu divididu, zanitilú, ne guiráʼ guidxi o familia nuu divididu, zabiá. Ngaca nga laani, pa Binidxabaʼ ribee Binidxabaʼ la? nuu divididu. Yanna pa zacá ni, ¿ximodo ndiʼ guzuhuaa dxiichiʼ reinu stibe yaʼ?» (Mateo 12:25, 26)

¡Jneza modo bicabi Jesús laacabe! Nanna ca fariseu que nuu judíu ribee demonio luguiáʼ binni (Hechos 19:13). Ngue runi, gunabadiidxaʼ Jesús laacabe: «Pa ribeeʼ demonio pur poder stiʼ Belcebú, ¿tu pur ribee ca xiiñitu demonio yaʼ?». Zacá ni, pa cugaanicabe donda ique Jesús pur ni cayuni, laaca zaguiʼbaʼ donda íquecabe pur ni cayúnicabe. Gúdxiruʼ Jesús laacabe: «Peru pa pur espíritu stiʼ Dios ribeeʼ demonio la? qué lica nudiitu cuenta bigaanda Reinu stiʼ Dios laatu» (Mateo 12:27, 28).

De raqué, biquiiñeʼ Jesús ti ejemplu para gusiene laacabe zanda cuee demonio luguiáʼ binni purtiʼ jma napa poder que Binidxabaʼ. Gúdxibe laacaʼ: «Pa racalaʼdxiʼ tuuxa chichuu ra lidxi ti hombre nadipaʼ ne cuanaʼ ca cosa stibe, ¿cadi dxandíʼ naquiiñeʼ gundiibibe hombre que primeru la? Zacatiʼ zanda cuánacabe ni nuu ndaaniʼ lidxi. Ne tu cadi nuu pur naa la? cucaalú naa, ne tu cadi cutopané naa la? cuxhii» (Mateo 12:29, 30). Cumu cucaalú ca escriba ne ca fariseu Jesús la? nga ruluíʼ tobi si nuunécabe Binidxabaʼ. Nga runi, ruxhélecabe binni de Xiiñiʼ Dios, ni cayuni milagru pur poder ni cudii Jehová laa.

Ngue runi, gudixhená Jesús ca enemigu stiʼ: «Zaca perdonar guiráʼ ni guni binni, intiica pecadu guni o intiica modo cuʼ dí. Peru tutiica cuʼ dí contra espíritu santu qué ziuu dxi gaca perdonar. Siempre zapa donda pur pecadu stiʼ» (Marcos 3:28, 29). Guiníʼ íquenu xi riníʼ ca diidxaʼ riʼ para ca ni ná cayuni Jesús milagru pur mediu de Binidxabaʼ ne cadi pur espíritu stiʼ Dios.