Guníʼ Jesús xii nga ni dxandíʼ rusiecheʼ laanu

Casi biluxe guníʼ Jesús pabiáʼ risaca cadi gusaana de guni orarnu, peru bisiidirube xcaadxi cosa biaʼ dxi bíʼnibe xhiiñaʼ Dios. Dxi nuube Galilea, guníʼ binni rúnibe milagru pur poder stiʼ gobernante stiʼ ca demonio. Ne laaca ngaca caníʼ binni ndaaniʼ guidxi Judea.

Nabé bidxagayaa guiráʼ binni que ora gulee Jesús ti demonio lu xcuerpu ti hombre ni biaana mudu pur demonio que. Peru cadi guiracaʼ bidxagayaacaʼ. Nuu de laacaʼ guniʼcaʼ mal de laabe, ne nacaʼ: «Ribeebe demonio pur poder stiʼ Belcebú, gobernante stiʼ ca demonio» (Lucas 11:15). Ne xcaadxi gunábacaʼ laabe gudiibe ti señal de guibáʼ para gusihuínnibe tu laabe.

Cumu nanna Jesús xi cá íquecabe gúnicabe la? bicabi laacabe casi modo bicábibe ca ni guníʼ mal de laabe Galilea. Bisiénebe laacaʼ guiráʼ reinu ni nuu divididu, zanitilú ne guníʼrube: «Pa nuu Binidxabaʼ divididu, ¿ximodo ndiʼ guzuhuaa dxiichiʼ reinu stibe yaʼ?». Despué nabé nayaʼniʼ ni bisiene Jesús laacabe: «Pa pur poder stiʼ Dios [bicuinináʼ Dios] ribeeʼ demonio la? qué lica nudiitu cuenta bigaanda Reinu stiʼ Dios laatu» (Lucas 11:18-20).

Ora bizeeteʼ Jesús de «bicuinináʼ Dios», zándaca bietenalaʼdxiʼ ca binni nuu raqué ni bizaaca gayuaa iza ante, tiempu stiʼ ca israelita. Ora biʼyaʼ ca ni runi xhiiñaʼ Faraón milagru biʼniʼ Moisés, guniʼcaʼ: «¡Bicuinináʼ Dios nga!». Laaca «bicuinináʼ Dios» nga bicaa ca Chii Mandamientu lu chupa tabla de guié (Éxodo 8:19; 31:18). Ne «bicuinináʼ Dios» (espíritu santu stiʼ o stipa stiʼ) nga cayacané Jesús para cuee demonio ne gusianda binni huará. Pur nga, qué lica nudii ca enemigu stiʼ Jesús cuenta bigaanda Reinu stiʼ Dios laacaʼ, purtiʼ maʼ cayuni Jesús, Rey stiʼ Reinu ca, milagru nezalucaʼ.

Ora cuee Jesús demonio lu xcuerpu binni rusihuinni jma napa poder que Binidxabaʼ, cásica ora rucaalú ne runi ganar ti hombre jma nadipaʼ sti hombre ni naaze guiibaʼ ni cayapa palaciu stiʼ. De raqué bibiguetaʼ guníʼ Jesús de ti demonio ni biree lu xcuerpu ti hombre. Pa qué cuʼ hombre riʼ cosa jneza ndaaniʼ ique la? zabiguetaʼ espíritu malu que peru né xcadxe espíritu malu, nga runi jma malu modo guiluxe hombre riʼ que dxi bizulú (Mateo 12:22, 25-29, 43-45). Ngue peʼ nga ni cazaaca guidxi Israel.

De raqué lade ca binni que nuu ti gunaa cucaa ridxi ne caníʼ: «¡Dichosa gunaa ni gucaxiiñiʼ lii ne ni bigadxi lii!». Guiráʼ ca gunaa judía ñuulaʼdxiʼ ñapa ti profeta jmaruʼ si pa ñeeda gaca Mesías. Zándaca guníʼ ique gunaa riʼ pabiáʼ nayecheʼ nuu María purtiʼ laa nga jñaa Jesús. Peru gudxi Jesús gunaa que xii nga ni dxandíʼ peʼ riguu binni nayecheʼ: «Coʼ, sínuque, ¡dichoso nga ca ni rucaadiaga stiidxaʼ Dios ne rúnicaʼ ni ná ni!» (Lucas 11:27, 28). Qué ñuu dxi niníʼ Jesús naquiiñeʼ gusisaca binni María. Ni bisiidibe nga ni dxandíʼ peʼ rusiecheʼ binni nga cadi gusaana de guni servir Jehová, ne cadi purtiʼ si familia stinu tuuxa binni risaca ninca pur xiixa meta ni bigaandanu.

Laaca gudindené Jesús ca binni riʼ cásica gudindené ca binni de Galilea purtiʼ canábacaʼ laabe ti señal de guibáʼ. Gúdxibe laacaʼ qué zacaacaʼ nin ti señal, sínuque señal si stiʼ Jonás. Guca profeta Jonás ti señal, purtiʼ guyuu chonna gubidxa ndaaniʼ ti benda ne purtiʼ biʼniʼ predicar né valor, pur ni bíʼnibe ca guca arrepentir ca ninivita que. Ne gudxi Jesús laacabe: «Peru, laguuyaʼ, nuu tobi raríʼ jma risaca que Jonás» (Lucas 11:29-32). Laaca jma risaca Jesús que Salomón, yeguuya reina de Seba hombre riʼ para gucaadiaga pabiáʼ nuu xpiaaniʼ.

Ne guniʼruʼ Jesús: «Guirutiʼ rucaaguí ti lámpara ne rucaachiʼ ni o riguu ni xaʼnaʼ ti dxumi, sínuque riguu ni lu candelabru» (Lucas 11:33). Zándaca ndiʼ riníʼ, neca cusiidiʼ Jesús ca binni que ne cayuuyacaʼ ca milagru cayúnibe peru qué nacaʼ guni crecaʼ laabe, casi ñaca nucaaguícabe ti lámpara ne nucaachicabe laa. Cumu cadi jneza modo ruuyacabe Jesús, ngue runi cadi cayénecabe xiñee cayúnibe ca milagru que.

Deruʼ gulee Jesús ti demonio luguiáʼ ti hombre ne bisiándabe ti mudu. Niguu ndiʼ gana ca binni que nusisácacaʼ Dios ne ñábicaʼ xcaadxi binni xi guiráʼ cayuni Jehová. Ngue runi gudxi Jesús ca binni ni caníʼ mal de laa ca diidxaʼ riʼ: «Guyuu cuidadu ti cadi gaca biaaniʼ stiluʼ guelacahui. Pa guidubi naca cuerpu stiluʼ ruzaaniʼ ne gastiʼ ra nacahui la? guidubi naca cuerpu stiluʼ zuzaaniʼ, cásica ruzaaniʼ biaaniʼ stiʼ ti lámpara lii» (Lucas 11:35, 36).