¿Ximodo nga nuu Jesús tobi si né bixhoze?

Yanna maʼ zeʼ Jesús Jerusalén dxi cayaca Saa de Dedicación (o Janucá). Raca Saa riʼ para guietenaláʼdxicabe dxi guca dedicar templu que sti biaje. Despué de biʼniʼ conquistar ca siriu Jerusalén, bizaaca ndiʼ ti gayuaa iza ante, bizáʼ rey sirio Antíoco IV Epífanes ti altar para ca dios falsu luguiáʼ altar naroʼbaʼ ni nuu ndaaniʼ templu stiʼ Dios. Peru despué, ca xiiñiʼ ti sacerdote judíu biʼniʼ conquistarcaʼ Jerusalén ne biʼniʼ dedicarcaʼ Jehová templu que sti biaje. Dede dxiqué guiráʼ iza rúnicabe saa riʼ, ruzulú ni 25 stiʼ beeu kislev. Beeu judíu riʼ riábani ra maʼ ziluxe beeu noviembre ne ra ruzulú diciembre.

Tiempu nananda ngue. Nuu Jesús ndaaniʼ templu ne canazá ndaaniʼ Corredor stiʼ Salomón, málasi bidxiña caadxi judíu ne gunabadiidxacaʼ laabe: «¿Dede padxí nga gábiluʼ laadu ni dxandíʼ de lii pue? Bisiá diidxaʼ pa lii nga Cristu» (Juan 10:22-24). Para bicabi Jesús: «Maʼ gudxeʼ ni laatu, peru qué runi cretu». Caʼruʼ diʼ gusiá Jesús diidxaʼ ne gabi laacabe laa nga Cristu, casi gúdxibe xa samaritana ruaa xa bizé que (Juan 4:25, 26). Peru Jesús maʼ guníʼ padé zeeda, purtiʼ laa guníʼ: «Ante gale Abrahán, naa maca nuaaʼ» (Juan 8:58).

Racalaʼdxiʼ Jesús stubi si ca binni que gudiicaʼ cuenta laabe nga Cristu, ra guchaagacaʼ guiráʼ ni cayúnibe né guiráʼ ni maca cá chiguni Mesías. Ngue runi, stale biaje gudxi Jesús ca discípulo stiʼ cadi guiniʼcaʼ laabe nga Mesías. Peru biaje riʼ, bisiá Jesús diidxaʼ ra gudxi ca judíu tercu riʼ: «Ca dxiiñaʼ ni runeʼ lu lá Bixhozeʼ, rusihuínnicani tu naa. Peru qué runi cretu» (Juan 10:25, 26).

¿Xiñee qué runi cré ca judíu riʼ Jesús nga Cristu yaʼ? Bisiénebe ni sicaríʼ: «Peru qué runi cretu, purtiʼ cadi dendxuʼ stinneʼ laatu. Runebiaʼyaʼ ca dendxuʼ stinneʼ, rucaadiágacaʼ stidxeʼ, ne rinándacaʼ naa. Rudieeʼ laacaʼ guendanabani ni qué zaluxe, qué ziuu dxi guinitilucaʼ, ne guirutiʼ zaxha laacaʼ ndaaniʼ nayaʼ. Jma risaca ni maʼ bidii Bixhozeʼ naa que intiica cosa». Despué bisiene Jesús pabiáʼ tobi si nuuné Bixhoze, ora guníʼ: «Naa ne Bixhozeʼ, nuudu tobi si» (Juan 10:26-30). Peru cumu nuu Jesús lu Guidxilayú ne Bixhoze nuu guibáʼ la? qué zanda diʼ gácacabe ti cuerpu si. Ni caníʼ Jesús raríʼ nga tobi si rúnicabe dxiiñaʼ ne tobi si ni naguixhe íquecabe gúnicabe.

Guizáʼ bidxiichi ca judíu que pur ni caníʼ Jesús, ne gundísacaʼ guié para guchacaʼ laabe, peru qué nidxibi Jesús. Gúdxibe laacaʼ: «Maʼ biiyatu bineʼ stale dxiiñaʼ galán ni biʼniʼ mandar Bixhozeʼ naa. ¿Nuutu guchatu guié naa pur tobi de laacani la?». Para bicabi ca judíu que: «Cadi chiguchadu guié lii pur ca dxiiñaʼ galán ni ruʼnuʼ, sínuque chigúnidu ni purtiʼ riniʼluʼ contra Dios; purtiʼ lii, [...] rúniluʼ lii ti dios» (Juan 10:31-33). Nánnanu qué huayuu dxi guiníʼ Jesús naca ti dios, peru ¿xiñee cugaanicabe donda íquebe yaʼ?

Purtiʼ nácabe caníʼ Jesús napa poder, peru ca judíu nacaʼ Dios si nga napa poder. Casi dxi bizeeteʼ Jesús de ca «dendxuʼ», laa guníʼ: «Rudieeʼ laacaʼ guendanabani ni qué zaluxe» (Juan 10:28). Peru cadi cayetenalaʼdxiʼ ca judíu, Jesús peʼ guníʼ maʼ bidii Bixhoze laa autoridad.

Para gusihuinni Jesús cadi dxandíʼ ni nácabe que la? gunabadiidxaʼ laacabe: «¿Ñee cadi cá lu Ley stitu [lu Salmo 82:6]: “Gunieeʼ: «Nácatu dios»” la? Gúdxibe laacaʼ dios neca nuu stiidxabe contra laacaʼ [...]. Peru gulí Bixhozeʼ naa ne biseendaʼ naa lu guidxilayú riʼ, ¿yanna cayábitu naa: “Caniʼluʼ contra Dios” purtiʼ gunieeʼ “Xiiñiʼ Dios naa” la?» (Juan 10:34-36).

Dede lu Stiidxaʼ Dios riete naca ca juez ni qué runi ni jneza «dios». Yanna, ¿xiñee cugaaniʼ ca judíu que donda ique Jesús purtiʼ si caníʼ «Xiiñiʼ Dios» laa yaʼ? Guníʼ Jesús xiixa ti guni crécabe laa: «Pa cadi cayuneʼ xhiiñaʼ Bixhozeʼ la? cadi guni cretu naa. Peru pa cayuneʼ ni, neca qué guni cretu naa, laguni cré ni cayuneʼ. Zacá zánnatu ne ziene chaahuitu nuuné Bixhozeʼ naa tobi si ne naa nuaaniaʼ Bixhozeʼ tobi si» (Juan 10:37, 38).

Para gucalaʼdxiʼ ca judíu ninaazecaʼ Jesús, peru bixooñebe de lu nacaʼ sti biaje. Ngue runi bireebe de Jerusalén, guyebe chericaʼ guiiguʼ Jordán ne yendabe neza ra bizulú Juan guluunisa binni raca biaʼ tapa iza. Zándaca riaana lugar riʼ ladu gueteʼ de nisadóʼ stiʼ Galilea.

Ne beeda stale binni ra nuube ne bizulú caniʼcaʼ: «Nin ti milagru qué ñuni Juan, peru dxandíʼ guiráʼ ni guníʼ Juan de hombre riʼ» (Juan 10:41). Ngue runi, stale judíu gupa fe Jesús.