Nabé sicarú modo rapa Jiobá ca xpinni ni maʼ nagola
«Qué zusiaanda [Dios] irá enda nachaʼhui ni huayuni tu ca xpinni purti nadxii tu laa.» (HEB. 6:10.)
1, 2. 1) Tuu nga zándaca guietenaláʼdxinu ora guidúʼyanu ti xpinni Cristu ni maʼ nagola ne maʼ natoope guicha ique. 2) Ximodo ruuyaʼ Jiobá ca xpinni ni maʼ nagola.
ORA guidúʼyanu ti xpinni Cristu ni maʼ huaniisi dede natoope guicha ique la? zándaca guietenaláʼdxinu modo na libru stiʼ Daniel naca Jiobá. Ni riguixhená ca guníʼ ximodo biiyabe Jiobá lu ti visión ni gúpabe: «Biiyaruaʼ dede ora bizuhuaacabe stale trono ne gurí Binnigola ni nabani dede maʼ xadxipeʼ que. Ne lari ni nácube que naquichibeni casi nieve, ne guicha íquebe casi lana quichiʼ ni» (Dan. 7:9).
2 Cumu naquichiʼ lana ca ante gutieecabe ni la? ngue runi, Daniel biquiiñeʼ ni para guníʼ zacaca nga naquichiʼ guicha ique Dios. Ora rieeteʼ naquichiʼ guicha ique Dios ne nácabe «Binnigola ni nabani dede maʼ xadxipeʼ que» la? culuiʼni pabiáʼ maʼ stale dxi bibani Jiobá ne pabiáʼ nuu xpiaanibe. Modo riníʼ Biblia nácabe ca rucaani laanu guni respetarnu laabe stale. Peru ximodo nga ruuyaʼ Jiobá ca xpinni ni maʼ nagola yaʼ. Stiidxabe na sicaríʼ: «Guicha toope stiʼ ca binnigola ca zeeda gaca casi ti corona sicarú ora rúnicaʼ ni jneza» (Pro. 16:31). Zacá ni, ca xpinni Cristu ni maʼ nagola ni cadi cusaana de guni ni na Dios nabé risácacaʼ para laabe. Yanna lii, ñee laaca zacaca ruuyaluʼ laacabe la?
Xiñee nabé nadxiicabe cani maʼ nagola
3. Xiñee nabé nadxiinu ca xpinni Cristu ni maʼ nagola.
3 Lade ca xpinni Dios ni maʼ nagola nuu cani naca de Grupu ni Zaniruʼ ne ca binnigola ni riganna ca binni ridagulisaa o ni biʼniʼ dxiiñaʼ ca dxiqué. Laaca nuucabe naca precursor ne ni rucheeche diidxaʼ ne rúnicaʼ xhiiñaʼ Dios ndaaniʼ ca neza binni ridagulisaa ne stale gana. Zándaca runibiaʼluʼ tuuxa xpinni Cristu ni maʼ nagola ne maʼ xadxí de cucheeche diidxaʼ ne stale gana ne laaca riguu gana cani nahuiiniʼ. Caadxi de ca xpinni Cristu ni maʼ nagola ca huacaacaʼ stale dxiiñaʼ ndaaniʼ xquidxi Jiobá ne huazananda binni laacaʼ pur cucheechecaʼ stiidxaʼ Reinu. Jiobá ne «mozo ni nuu xpiaani ne ni runi jneza» ca nabé rudiicaʼ xquíxepeʼ ca xpinni Cristu ni maʼ nagola ca pur dxiiñaʼ maʼ bíʼnicaʼ ne ni cayúnirucaʼ lu xhiiñaʼ Reinu (Mat. 24:45).
4. Xiñee naquiiñeʼ guni respetarnu cani maʼ nagola ne guni orarnu pur laacaʼ.
4 Ca xpinni Dios ni maʼ nagola ca naquiiñeʼ gannaxhiinu laacabe ne guni respetarnu laacabe. Ne lu ley ni bidii Dios Moisés que na pa guni respetárcabe cani maʼ nagola la? cusihuínnicabe ridxíbicabe Jiobá (Lev. 19:32). Nga runi, cadi guiaandaʼ laanu guni orarnu pur ca binnigola ni cadi cusaana de guni xhiiñaʼ Dios, ne gudiʼnu xquíxepeʼ Jiobá pur dxiiñaʼ huayúnicabe pur nadxiicabe laa ne ca xpinni Cristu. Apóstol Pablu biʼniʼ orar pur guiráʼ ca xpinni Cristu, cásica pur cani nahuiiniʼ zaqueca pur cani maʼ nagola (biindaʼ 1 Tesalonicenses 1:2, 3).
5. Xiñee zanda guizíʼdinu stale de ca xpinni Cristu ni maʼ huaniisi.
5 Guiráʼ cani nuu lade neza binni ridagulisaa zanda guiziidicaʼ de ejemplu stiʼ cani maʼ nagola, purtiʼ maʼ biziidicabe stale lu cani huazaacacabe ne nabé huayuundacabe de Biblia ne pur nga nánnacabe stale. Ca xpinni Cristu ca maʼ biziidicaʼ guiénecaʼ sti binni ne cadi guidxiichicaʼ nagueenda, ne nabé riuuláʼdxicaʼ gusiidicaʼ guiráʼ ni nánnacaʼ cani nahuiiniʼ (Sal. 71:18). Cani nahuiiniʼ ca naquiiñeʼ gúnicaʼ stipa pur guiziidicaʼ de cani maʼ huaniisi ca casi ñaca nibeecaʼ nisa ndaaniʼ ti bizé nabé gueteʼ (Pro. 20:5).
6. Xi zanda gúninu ti gudii cani maʼ nagola cuenta runi respetarnu laacaʼ.
6 Xi zanda gúninu para gudii cani nagola ca cuenta nadxiinu laacaʼ cásica nadxii Jiobá laacaʼ yaʼ. Ti modo zanda gúninu ni nga gábinu laacabe nadxiinu laacabe purtiʼ qué huasaanacabe de gúnicabe ni na Dios ne nabé risaca ni riníʼcabe para laanu. Sti modo nga guicaanu ca conseju stícabe, ne zacá zusihuínninu dxandíʼ runi respetarnu laacabe. Ne ngapeʼ nga ni biʼniʼ stale de laacabe dxi gúcacaʼ nahuiiniʼ ora bidii ca xpinni Cristu ni maʼ nagola conseju laacaʼ, yenándacabe cani ne guleendúcabe ni galán.a
Xcaadxi modo gusihuínninu nadxiinu cani maʼ nagola
7. Tuu nga naquiiñeʼ gapa cani maʼ nagola.
7 Jiobá na binnilidxi cani maʼ nagola ca nga naquiiñeʼ gapa laacabe (biindaʼ 1 Timoteo 5:4, 8). Jiobá nabé riecheʼ ora gapa ca binnilidxi cani maʼ nagola ca laacaʼ ne guni respetarcaʼ laacabe cásica rúnibe ni. Ca xpinni Cristu naquiiñeʼ guietenaláʼdxicaʼ zacané Jiobá laacaʼ ne zaguu ndaayabe laacaʼ pur stipa rúnicaʼ ora rápacaʼ binnilídxicaʼ ni maʼ nagola.b
8. Xiñee naquiiñeʼ guizaalaʼdxiʼ ca binni ridagulisaa gacanecaʼ cani maʼ nagola.
8 Peru Jiobá laaca riecheʼ ora gacané ca binni ridagulisaa cani maʼ nagola ni cadi naca binnilídxicaʼ xpinni Cristu o cani qué náʼ binnilídxicaʼ gapa laacaʼ (1 Tim. 5:3, 5, 9, 10). Pa gacané ca binni ridagulisaa laacabe la? zusihuínnicaʼ nadxiicaʼ laacabe ne riacaʼ laacabe (1 Ped. 3:8). Pablu na ora dxandíʼ rizaaláʼdxisaanu la? guiranu racananu ora tuuxa guizaaca xiixa. Zeeda gácani casi ti cuerpu, ora gacaná ti ndaa de laani la? «zacaná irá xixé» ndaa ca (1 Cor. 12:26). Pa guyúbinu modo gacanenu cani maʼ nagola la? zusihuínninu zinándanu conseju ni bidii Pablu riʼ: «Pa nuu tu cadiʼdi ra nagana la? lagacané laa, ne zacá zuni tu ni gudixhe Cristu guni nu» (Gál. 6:2).
9. Xi guendanagana nga ridxagalú cani maʼ nagola.
9 Xi guendanagana nga ridiʼdiʼ cani maʼ nagola yaʼ. Nuu de laacaʼ nabé nagueenda ridxaga ne riuucaʼ triste purtiʼ raca nagana para laacaʼ gúnicaʼ xiixa dxiiñaʼ huiiniʼ, casi chécabe ra nuu doctor, chitíxecabe xiixa ni nuzaabicabe, gusiácabe ra yoo o gúnicabe guendaró. Cumu ora maʼ nagola binni maʼ huaxiéʼ rindaana ne huaxiéʼ rati nisa la? nuu de laacaʼ qué ro chaahuiʼ ne qué reʼpeʼ nisa. Ne ngaca zanda guizaacacabe ne Stiidxaʼ Dios. Nuu xpinni Cristu ni maʼ huaxiéʼ ruuyaʼ ne huaxiéʼ runadiaga raca nagana para laacaʼ gúʼndacaʼ ca libru ne revista ne raca nagana para laacaʼ gucaadiaga chaahuicaʼ ca guendaridagulisaa ca. Ne dede para chúʼcabe listu ti chécabe ca guendaridagulisaa ca ridxágacabe. Xi zanda gúninu para gacanenu laacabe yaʼ.
Ximodo zanda gacanenu laacabe
10. Xi runi cani naca binnigola lade ca binni ridagulisaa para gacanecaʼ cani maʼ huaniisi.
10 Stale de ca neza binni ridagulisaa nabé sicarú modo rápacaʼ cani maʼ huaniisi. Racanécabe laacaʼ guiá ralídxicaʼ ne rúnicabe guendaró sticaʼ. Laaca racanécabe cani maʼ huaniisi ca ora maʼ chiguundacaʼ Stiidxaʼ Dios, ora checaʼ ca guendaridagulisaa ca ne ora chigucheechecaʼ diidxaʼ. Laaca racanécabe laacaʼ para checaʼ ra gacaláʼdxicaʼ. Ne pa qué zanda guiree cani maʼ nagola ca de ralídxicaʼ la? runi grabárcabe ca guendaridagulisaa ca para gucaadiágacaʼ o riquiiñecabe teléfono para gucaadiágacaʼ ca guendaridagulisaa ca ora maʼ cayácacani. Cani naca binnigola lade ca neza binni ridagulisaa ca rúnicaʼ stipa pur gúʼyacaʼ chuʼ tu gacané cani maʼ huaniisi ni nuu ra ridagulisaacaʼ.c
11. Bisiene ximodo gucané ti familia ti binni huaniisi.
11 Ne cada tóbinu zanda guni invitar cani maʼ nagola ralidxi ne gaca nachaʼhuiʼ ne laacabe. Guidúʼyanu ni bizaaca ti xpinni Cristu ni maʼ nagola. Guti xheelabe ne maʼ qué ñanda diʼ niguíxebe ra nabézabe, purtiʼ maʼ ti pensión si gucuaabe. Laabe ne xheelabe biindanécabe ti guendaxheelaʼ ne chupa xiiñidxaapacaʼ de Biblia. Ora biiyaʼ guendaxheelaʼ que modo nuu binnigola que la? guníʼ íquecabe chinécabe laabe ralídxicabe purtiʼ raqué nabé naroʼbaʼ, ne bidiicabe laabe chupa cuartu. Biaʼ quince iza gulézabe ra nuu ca binni que ne nabé sicarú guyuucabe. Ca xiiñidxaapaʼ guendaxheelaʼ que nabé biziidicaʼ stale de binnigola que pur fe ni gupa ne pur guiráʼ ni nanna, ne cumu nayecheʼ ca binni que la? nabé gucané ngue laabe. Binnigola ca gulezanebe ca binni ca dede ora gútibe dxi nápabe 89 iza. Ca xpinni Cristu ni gulézabe ralidxi ca nabé rudiicaʼ xquíxepeʼ Dios pur guiráʼ ndaayaʼ gucuaacaʼ ora gúpacaʼ binnigola ca. Casi maʼ bidúʼndanu ca, mápeca gudixe Dios familia ca pur gucanecaʼ xpinni Cristu ni maʼ nagola ca (Mat. 10:42).d
12. Ximodo zanda gusihuínninu nadxiinu ca xpinni Cristu ni maʼ nagola.
12 Zándaca gaca nagana para laanu gacanenu ca bíʼchinu ne bizáʼnanu ni maʼ nagola casi biʼniʼ familia ca, peru zanda gacanenu laacabe para chécabe ca guendaridagulisaa o chigucheechenenu laacabe diidxaʼ. Laaca zanda guni invitarnu laacabe ralídxinu ne ora chizanu paxaraa. O pa huarácabe ne qué zanda guireecabe de ralídxicabe la? cadi guiaandaʼ laanu chigánnanu laacabe. Nga runi, qué chuʼ dxi gusaananu de guni respetarnu cani maʼ nagola. Pa rudiirucabe cuenta la? naquiiñeʼ guinabadiidxanu laacabe xi riuuláʼdxicabe purtiʼ dede ca binni ni maʼ huaxiéʼ rudii cuenta nanna pa runi respetarnu laacaʼ o coʼ.
Jiobá qué zusiaandaʼ diʼ ni bíʼnicabe
13. Xiñee nabé risaca nga guiénenu modo runi sentir cani maʼ nagola.
13 Nabé jneza nga guiénenu modo runi sentir ca xpinni Cristu ni maʼ nagola ca. Cadi guendaridxagayaa diʼ nga pa guidúʼyanu gatigá chúʼcabe triste purtiʼ maʼ qué randa rúnicabe ni bíʼnicabe dxi nahuiinicabe. Casi ti gunaa xpinni Cristu ni napa 50 iza de naca testigu la? málasi guca huará ne nabé nagana guca para laa cheʼ guendaridagulisaa. Ti biaje ora bietenaláʼdxibe jma bíʼnibe xhiiñaʼ Dios dxi gúcabe precursora regular la? bizulube biinabe. Bigaanda íquebe ne dede gucuaaláʼdxibe, óraque guniʼbe: «Yanna huaxa maʼ qué randa diʼ runeʼ gastiʼ».
14. Ximodo riguu ca salmo ca gana ca xpinni Jiobá ni maʼ nagola.
14 Pa maʼ nagólaluʼ, ñee huayuni sentirluʼ zacá la? Ñee huayuu biaje huayuni sentirluʼ maʼ bisiaandaʼ Jiobá lii la? Zándaca hombre bicaa Salmo 71 ca biʼniʼ sentir zacá dxi mayaca gati, purtiʼ gunábabe Jiobá: «Cadi gucaanaluʼ naa ora maʼ nagolaʼ; cadi gusaanaluʼ naa órapeʼ maʼ qué gapa stipa. [...] Neca guioxhuaʼ ne guitoope iqueʼ, cadi gusaanaluʼ naa Dios stinneʼ» (Sal. 71:9, 18). Jiobá qué nusaana diʼ hombre bicaa Salmo ca, ne qué zusaanadibe lii. Lu sti Salmo guníʼ David qué rusaana Jiobá de gacané laanu (biindaʼ Salmo 68:19). Cadi guiaandaʼ lii, pa qué gusaanaluʼ de gúniluʼ ni na Jiobá la? ziuube gaxha de lii ne zacanebe lii guiráʼ dxi.
15. Xi naquiiñeʼ guni cani maʼ nagola para guiníʼ íquecaʼ xi zacané laacaʼ.
15 Qué ziuu dxi gusiaandaʼ Jiobá ni maʼ bíʼniluʼ ne ni cayúniluʼ para gusisácaluʼ laabe. Biblia na laabe «qué zusiaanda[be] irá enda nachaʼhui ni huayuni tu ca xpinni purti nadxii tu laa» (Heb. 6:10). Nga runi, cadi guiníʼ íqueluʼ ca cosa ni zaguu lii triste. Cadi guiníʼ íqueluʼ maʼ qué iquiiñeluʼ para Jiobá. Guníʼ ique cani zacané lii, casi ca ndaayaʼ ni maʼ gucuaaluʼ ne cani cabézaluʼ chiguni Dios para lii. Laanu ca xpinni Cristu nánnanu nabé sicarú ni cabézanu chigudii Dios laanu, ne Jiobá peʼ maʼ guníʼ zudii ni laanu (Jer. 29:11, 12; Hech. 17:31; 1 Tim. 6:19). Guníʼ ique cani, biʼniʼ stipa pur cadi guireeluʼ gana ne cadi guiaandaʼ lii nabé risácaluʼ lade ca binni ridagulisaa.e
16. Xi bicaa ti xpinni Cristu ni maʼ huaniisi guiníʼ ique gusaana de gaca binnigola, ne xi bicaa laabe guchaabe modo guníʼ íquebe.
16 Guidúʼyanu ni bizaaca ti xpinni Cristu ni naca binnigola lade ca binni ridagulisaa. Labe Juan, ne maʼ nápabe 80 iza ne xheelasibe Sara maʼ cayápabe purtiʼ maʼ qué rizá.f Stale de ca gunaa xpinni Cristu riguíxhecaʼ xi dxi chicaacaʼ Sara para cheʼ guendaridagulisaa ne chigucheeche diidxaʼ. Peru cadi xadxí diʼ de guníʼ Juan maʼ bidxaga pur modo nuu xheelaʼ ne guníʼ ique gusaana de gaca binnigola. Cayuunabe guniʼbe ca diidxaʼ riʼ: «Xi para gácaruaʼ binnigola. Maʼ qué rúnediaʼ gastiʼ ni gacané ca binni ridagulisaa». Xcaadxi binnigola nuu ra ridagulisaabe gúdxicaʼ laabe guiníʼ ique chaahuibe ni, ne gánnabe neca huaxiéʼ ni rúnibe la? nabé risaca guiráʼ ni nánnabe para ca binni ridagulisaa. Ca diidxaʼ ca guluucani gana Juan ne maʼ qué nusaanabe de ñácabe binnigola, ne zaqué nabé bisiéchebe ca binni ridagulisaa.
Cani nagola ca nabé risácacaʼ para Jiobá
17. Xi rabi Biblia cani maʼ nagola.
17 Biblia na zanda guni ca xpinni Cristu ni maʼ nagola ca xhiiñaʼ Dios neca nuu ni ruchiiñaʼ laacaʼ. Ti hombre ni bicaa Salmo guníʼ ca diidxaʼ riʼ: «Ca binni ni zuhuaa ndaaniʼ lidxi Jiobá [...] zaguichebiiturucaʼ casi ti yaga neca maʼ bióʼxhocaʼ, zácarucaʼ nadipaʼ ne nagáʼ» (Sal. 92:13, 14). Apóstol Pablu laaca gupa ti guendahuará, ne laa guníʼ: «Qué riréʼ du gana. Neca ze dxi ziyaana xcuerpu du sin stipa» (biindaʼ 2 Corintios 4:16-18).
18. Xiñee caquiiñeʼ gacanenu cani maʼ nagola ne zaqueca cani rapa laacabe yaʼ.
18 Zacá ni, cani maʼ nagola ca zándaruʼ gúnicaʼ xhiiñaʼ Jiobá, ne rihuinni zacá cayuni stale xpinni Cristu de yanna. Peru ni dxandíʼ nga laaca nagana raca para laacabe ora ridxagalúcabe ca guendahuará ca o xcaadxi yuubaʼ ni rápacabe pur maʼ bióʼxhocabe neca cayacané ca binnilídxicabe laacabe. Ne nuu biaje laaca zaree cani cayapa laacabe gana. Nga runi, guiráʼ ca binni ridagulisaa nga naquiiñeʼ gapa cani maʼ nagola ne gusihuínnicaʼ nadxiicaʼ laacabe ne zaqueca gannaxhiicaʼ cani rapa laacabe (Gál. 6:10). Laanu cadi rábisinu laacabe: «Sicarú uyé, uyuu xidxaa ne gudó de ra idxá luʼ», sínuque racanenu laacabe dede ra gándatiʼ (Sant. 2:15-17).
19. Xi nanna ca xpinni Cristu qué zuni Jiobá laacaʼ ora maʼ nagólacaʼ.
19 Nécapeʼ ora maʼ nagola ti xpinni Cristu maʼ huaxiéʼ zuni xhiiñaʼ Jiobá la? cadi pur nga maʼ huaxiéʼ nadxii Jiobá laabe. Dios nabé rusisaca ca xpinni ni maʼ nagola ne qué ziuu dxi gusaana laacabe (Sal. 37:28; Isa. 46:4). Nanna dxíchinu zacané Jiobá laacabe guiráʼ dxi guibánicabe (Sal. 48:14).
[Cani cá ñee yaza]
a Biiyaʼ tema ni láʼ «Ca binni ni maʼ nagola ca nácacaʼ ti ndaayaʼ para cani nahuiiniʼ», ni biree lu Torre stiʼ ni rapa 1 stiʼ junio 2007.
b Biindaʼ revista ¡Despertad! 8 stiʼ febrero 1994 yaza 3-10.
c Nuu guidxi zanda gacanécabe cani maʼ nagola para guyúbicaʼ ximodo zanda gacané gobiernu laacaʼ. Biindaʼ Tema ni láʼ «Dios rizaalaʼdxiʼ cani maʼ nagola», ni biree lu La Atalaya 1 stiʼ junio 2006.
d Biindaʼ tema ni láʼ «Jiobá qué rusaana de gapa laanu», ni biree lu La Atalaya 1 stiʼ septiembre 2003.
e Biindaʼ tema ni láʼ «Ca binni huaniisi ca risácacaʼ», ni biree lu La Atalaya 15 stiʼ marzo 1993.
f Bidxaa lácabe.
Xi nicábiluʼ
• Xiñee nabé nadxiinu cani maʼ nagola.
• Ximodo zanda gusihuínninu nadxiinu cani maʼ nagola.
• Xi zacané ca xpinni Cristu ni maʼ nagola guiníʼ íquecaʼ cani zacané laacaʼ.
[Ca dibuju/foto ni zeeda lu yaza 18]
Guiráʼ ca binni ridagulisaa rusisácacaʼ cani maʼ nagola