Xiñee gudiiluʼ dxiiñaʼ guni sti binni ne ximodo gúniluʼ ni

DEDE ante chaʼ Guidxilayú riʼ, maca guyuu tu bidii dxiiñaʼ guni sti binni. Jiobá bizáʼ tobi lucha Xiiñiʼ ne despué biquiiñebe laa «casi tobi ni runi xhiiñabe jnézapeʼ» para bizáʼcabe guibáʼ ne Guidxilayú (Pro. 8:22, 23, 30; Juan 1:3). Dxi bizáʼ Jiobá primé hombre ne primé gunaa bidiibe laacaʼ dxiiñaʼ riʼ: «Laguchá guidxilayú riʼ ne laguni dxiiñaʼ luni» (Gén. 1:28). Bidiibe laacaʼ dxiiñaʼ de gusiroobacaʼ paraísu ni guyuu Edén que lu guidubi naca Guidxilayú. Casi maʼ bidúʼyanu ca, maʼ xadxí nga rudii Jiobá dxiiñaʼ guni sti binni ne zacaca huayuni xquídxibe.

Ximodo nga rudiʼnu dxiiñaʼ guni sti binni. Xiñee naquiiñeʼ guiziidiʼ ca binnigola ca gudiicaʼ xcaadxi dxiiñaʼ ca binni ni ridagulisaanecaʼ. Ximodo zanda gúnicabe ni.

Ximodo nga rudiʼnu dxiiñaʼ guni stobi

Ora tuuxa gudii xiixa dxiiñaʼ guni sti binni nga «gudii derechu laabe para gúnibe xiixa pur laa» (Diccionario de uso del español, de María Moliner). Ni na diccionariu ca nga gacané tuuxa binni laanu para ganda gúninu xiixa cosa ni cá íquenu. Ne para ganda gaca ni naquiiñeʼ gudiʼnu derechu laabe para gúnibe ni.

Ca xpinni Cristu ni ricaa xiixa dxiiñaʼ para guni ndaaniʼ neza binni ridagulisaa naquiiñeʼ guicá íquecaʼ gúnicaʼ ni. Laaca naquiiñeʼ gábicaʼ binni ni bidiini laacaʼ ximodo cayaca ni ne pa nuu xiixa ni cadi cayénecaʼ la? galán guinabadiidxacaʼ laabe. Neca zacá, binni ni naquiiñeʼ guʼyaʼ gaca dxiiñaʼ ca jneza nga binnigola ni bidii dxiiñaʼ ca ne gusiénebe binni ca ximodo guni ni. Peru zándaca chuʼ tuuxa guiníʼ: «Xi para gudiéʼ dxiiñaʼ guni stobi pa zanda guneʼ ni naa».

Xiñee caquiiñeʼ gudiiluʼ dxiiñaʼ guni sti binni

Guiníʼ íquenu ni biʼniʼ Jiobá: primé bizaʼbe tobi lucha Xiiñibe ne despué bidiibe lugar gacané laabe para chaʼ xcaadxi cosa. Biblia na: «Dxi bizáʼ be irá xixé ni nuu ibáʼ ne ni nuu guidxilayú la? Xiiñi be biʼni irá ni, casi ni rihuinni, zaqueca ni qué rihuinni» (Col. 1:16). Ñándaca ñuni Jiobá dxiiñaʼ que laasi, peru bidiibe lugar Xiiñibe guni ni, ti guʼyaʼ pabiáʼ nayecheʼ nga riuu ti binni ora guni ti dxiiñaʼ ni risaca (Pro. 8:31). Ni bíʼnibe riʼ gucaneni Xiiñibe gunibiáʼ chaahuiʼ ca guenda nápabe. Ra bidiibe dxiiñaʼ ca tobi lucha Xiiñibe bisiidibe laa modo guni dxiiñaʼ jneza.

Dxi bibani Jesús lu Guidxilayú riʼ, biʼniʼ cásica biʼniʼ Bixhoze, laaca bidiibe dxiiñaʼ guni xcaadxi. Chaahuiʼ chaahuiʼ bisiidibe ca discípulo stibe modo naquiiñeʼ gúnicaʼ dxiiñaʼ. Biseendabe doce apóstol stibe ne despué sti 70 discípulo para gucheechecaʼ diidxaʼ ca lugar ra chebe despué (Luc. 9:1-6; 10:1-7). Biaʼsi ora chindabe ca lugar que maʼ nanna ca binni que de laabe. Cumu maca bisiidiʼ Jesús ca discípulo stiʼ ximodo gúnicaʼ dxiiñaʼ la? ante guibiguétabe guibáʼ bidiibe laacaʼ sti dxiiñaʼ jma naroʼbaʼ gúnicaʼ: gucheechecaʼ diidxaʼ lu guidubi naca Guidxilayú (Mat. 24:45-47; Hech. 1:8).

Ca xpinni Cristu nabé binibiáʼ binni laacaʼ purtiʼ bidiicaʼ dxiiñaʼ guni xcaadxi binni ne bisiidicaʼ laacabe gúnicabe ni. Apóstol Pablu gudxi Timoteu: «Bisiidi ni cani nannu zanda usiidi ni stobi» (2 Tim. 2:2). Nga runi, guiráʼ cani nanna guni xiixa dxiiñaʼ naquiiñeʼ gusiidicaʼ xcaadxi binni, ne laacaʼ naquiiñeʼ gusiidicaʼ xcaadxi.

Ca binni ni guicaa xiixa dxiiñaʼ laaca zuni sentircaʼ nayecheʼ cásica ca binnigola ca ora gusiidicaʼ ne gápacaʼ ca dendxuʼ stiʼ Dios. Ca binnigola ca naquiiñeʼ gánnacaʼ cadi guiráʼ diʼ cosa ni rápacaʼ gana nga zanda gúnicaʼ. Nga runi naquiiñeʼ guinábacaʼ sti xpinni Cristu gacané laacaʼ para gaca xiixa dxiiñaʼ. Biblia na ti binni nuu xpiaaniʼ la? qué rudxiibaʼ laca laa (Pro. 11:2). Ti binni ni qué rudxiibaʼ laca laa nanna qué zanda guni guiráʼ cosa. Pa gacalaʼdxiʼ tuuxa guni guiráʼ ca dxiiñaʼ ca laasi, zándaca gusidxaga cani laa ne maʼ qué zapa tiempu para binnilidxi. Nga runi, ni jma jneza nga gudiibe dxiiñaʼ guni stobi. Guzéʼtenu ti ejemplu. Ni ruuyaʼ dxiiñaʼ runi grupu de binnigola, zanda guinabaʼ xcaadxi binnigola para gúʼyacaʼ pa jneza nuu ca guiʼchiʼ ra cá pagala napa neza binni ridagulisaa sticaʼ. Ora gúʼyacabe ximodo nuu ca guiʼchiʼ ca, zudiicabe cuenta pagala napa neza binni ridagulisaa ca.

Ora rudii ca binnigola ca xiixa dxiiñaʼ para guni sti binni racaneni binni ca guiziidiʼ guni ni jneza, ne laaca racaneni binnigola ca guʼyaʼ ximodo runi ca binni ca dxiiñaʼ ni bisaananebe laacaʼ. Ora rúnicabe zacá ruuyacabe ximodo runi binni ca dxiiñaʼ ne pa zanda gueeda gaca ti siervu ministerial (1 Tim. 3:10).

Ora rudii ca binnigola ca xiixa dxiiñaʼ sti binni, rusihuínnicaʼ nánnacaʼ zuni binni ca dxiiñaʼ ni bidiicabe laa. Dxi yené Pablu Timoteu lu ca biaje stiʼ casi misioneru bisiidibe laa ximodo guni dxiiñaʼ. Ngue runi nabé guca xhamígucabe dede bizeetebe naca Timoteu casi xiiñibe «neza Jesucristu» (1 Tim. 1:2). Zacaca nga guyuu Jiobá ne Jesús dxi bizáʼcabe guiráʼ ca cosa ni nuu. Ca binnigola ca laaca zanda gúnicaʼ zacaca ora gudiicaʼ xiixa dxiiñaʼ ca binni ridagulisaa.

Xiñee nuu tu qué riná gudii xiixa dxiiñaʼ guni stobi

Neca nanna ca binnigola ca galán gudiicaʼ dxiiñaʼ guni sti binni, peru nuu tiru qué rinacaʼ gudiicaʼ ni, purtiʼ riníʼ íquecaʼ maʼ qué zápacaʼ derechu de guni mandarcaʼ. Zándaca guiníʼ íquecabe laasicabe nga naquiiñeʼ gúnicabe guiráʼ ni. Peru galán guietenaláʼdxicabe xi biʼniʼ Jesús ante guibiguetaʼ guibáʼ. Laabe bidiibe ca discípulo stibe ti dxiiñaʼ nabé risaca purtiʼ maca nánnabe zúnicaʼ cosa jma naroʼbaʼ que ni bíʼnibe (Mat. 28:19, 20; Juan 14:12).

Zándaca bidii ti binnigola xiixa dxiiñaʼ guni tuuxa, peru qué ñuni binni que ni jneza ne pur nga guiníʼ íquebe jma jneza zúnibe ni laabe ne jma nagueenda. Guidúʼyanu ejemplu stiʼ Pablu: laabe gúnnabe nabé risaca gudiibe dxiiñaʼ guni stobi, peru laaca gúnnabe cadi guiráʼ diʼ ca binni ni bisiidibe zúnicaʼ dxiiñaʼ que jneza casi ñuuláʼdxibe. Dxi bíʼnibe primé biaje stibe casi misioneru, bisiidibe Marcos ximodo guni dxiiñaʼ que, peru guyuube triste dxi bisaana Marcos dxiiñaʼ bidiibe laa que para guibiguetaʼ ralidxi (Hech. 13:13; 15:37, 38). Peru qué nucaa diʼ nga laabe niníʼ íquebe maʼ qué zusiidibe sti binni. Casi maʼ bizéʼtenu, biʼniʼ invitarbe Timoteu chiné laabe ne dxi biiyabe maʼ zanda guicaa dxiiñaʼ jma naroʼbaʼ bisaanabe laa Éfeso. Laaca bidiibe laa derechu de cuí tu laa gaca binnigola ne siervu ministerial ndaaniʼ neza binni ridagulisaa que (1 Tim 1:3; 3:1-10, 12, 13; 5:22).

Ca dxi stinu riʼ, ca binnigola ca cadi naquiiñeʼ gusaana de gusiidicaʼ xcaadxi xpinni Cristu purtiʼ si guyuu tu qué ñuni ni bisiidicabe laa jneza. Xiñee naquiiñeʼ gudii ca binnigola ca xiixa dxiiñaʼ guni sti binni yaʼ. Purtiʼ zacá zusihuínnicabe nuu xpiaanicabe, runi crécabe zanda guni binni ca dxiiñaʼ ni cudiicabe laa ne zacanécabe laa. Peru, xi naquiiñeʼ gúʼyacabe ante gudiicabe tuuxa guni xiixa dxiiñaʼ yaʼ.

Xi gúniluʼ ante gudiiluʼ dxiiñaʼ guni stobi

Ca binnigola ca naquiiñeʼ gúʼyacaʼ xi zanda guni cada tobi de ca xpinni Cristu ni cá íquecabe gudiicabe xiixa dxiiñaʼ. Guzéʼtenu ti guendanagana ni bizaacaʼ ndaaniʼ guidxi Jerusalén. Dxiqué biiyaʼ ca apóstol que caquiiñeʼ guʼyaʼ tuuxa modo guiaaziʼ guendaró para ca viuda que, ngue runi biyúbicabe «gadxe hombre [...] ni dxá ladxidóʼ de Espíritu Santu, ne ni riene» para gúnicaʼ dxiiñaʼ que (Hech. 6:3). Pa lii guinábaluʼ tuuxa binni ni qué rizaalaʼdxiʼ guni dxiiñaʼ la? zándaca qué zúnibe ni gudiiluʼ laabe. Nga runi, jma galán guzulú gudiiluʼ laabe xiixa dxiiñaʼ nasisi ne ora gúʼyaluʼ maʼ rúnibe cani jneza, zándaca maʼ guzulú gudiiluʼ laabe xcaadxi dxiiñaʼ jma naroʼbaʼ.

Peru nuu xcaadxi cosa ni naquiiñeʼ gúʼyaluʼ ante gudiiluʼ xiixa dxiiñaʼ. Naquiiñeʼ gánnaluʼ gadxé gadxé modo binni, gadxé gadxé ni zanda guni cada tobi de laacabe ne zándaca nuu tuuxa jma nanna guni xiixa dxiiñaʼ que stobi. Pa nuu tuuxa nabé nayecheʼ ne napa gracia para guiníʼ la? zándaca jma galán guidxagalube binni, peru pa nuu stobi nabé riuulaʼdxiʼ quixhe chaahuiʼ guiráʼ ni runi, jma galán gacanebe secretariu stiʼ neza binni ridagulisaa. Ne pa nuu ti gunaa Testigu ni nabé nanna guzuchaahuiʼ xiixa lugar la? zanda gábicabe laabe guzuchaahuibe ca guieʼ ni chiguzuhuaa ra chiguietenaláʼdxinu guendaguti stiʼ Jesús.

Ne binni ni gudii dxiiñaʼ ca naquiiñeʼ gusiene chaahuibe xi racaláʼdxibe guni ni cacaa dxiiñaʼ ca. Ante guseendaʼ Juan ni Riguunisa cani cheʼ ra nuu Jesús, bisiénebe laacaʼ xi racaláʼdxibe gánnabe ne gúdxibe laacaʼ xi guiniʼcaʼ ora guinabadiidxacaʼ (Luc. 7:18-20). Ne ora bisaana Jesús lu náʼ ca discípulo stiʼ gutópacaʼ guiráʼ guendaró biaana ra bíʼnibe milagru que, gúdxibe laacaʼ gúʼyacaʼ xiruʼ cayaadxaʼ gaca (Juan 6:12, 13). Zanda guni binni ca dxiiñaʼ ca jneza pa cadi nagánapeʼ ni ne pa nánnabe gúnibe ni. Cásica binni ni gudii dxiiñaʼ ca zaqueca binni ni chiguni ni, galán gánnacabe xi caquiiñeʼ guni cada tobi de laacabe ne pora naquiiñeʼ guiníʼcabe ximodo cayúnicabe ni. Guirópacabe naquiiñeʼ gánnacabe xi zanda guni cada tobi de laacabe lu xiixa dxiiñaʼ. Pa chitixhe binnigola ca ti dxi para guiluxe dxiiñaʼ ca, galán guinabadiidxabe binni ca pa zanda guilúxeni dxi caguíxhebe, ne cadi gábisibe laa naquiiñeʼ guilúxeni dxi nabe.

Xpinni Cristu ni gucuaa dxiiñaʼ ca naquiiñeʼ gudiicabe laa guiráʼ ni zaquiiñeʼ, gacanécabe laa ne gudiicabe laa bueltu para siʼ ni iquiiñeʼ lu dxiiñaʼ ca. Laaca galán ganna xcaadxi binni laabe cayúnibe dxiiñaʼ ca. Dxi bisaana Jesús «ca llave sti ibáʼ» lu náʼ Pedru bíʼnibe ni nezalú xcaadxi discípulo stibe (Mat. 16:13-19). Zacaca, nuu tiru naquiiñeʼ gabi ca binnigola ca cani ridagulisaanecaʼ tuu nga cayuni xiixa dxiiñaʼ ra ridagulisaacaʼ.

Peru naquiiñeʼ ganna ca binnigola ca sti cosa. Pa maʼ bidiicabe ti dxiiñaʼ guni sti binni ne maʼ nándacabe laa para gúʼyacabe ximódopeʼ cayuni ni la? zusihuínnicabe qué runi crécabe pa zúnibe ni jneza. Zándaca nuu tiru qué zuni binni ca dxiiñaʼ ni bidiicabe laa casi modo racaláʼdxicabe. Peru pa gábicabe binni ni gucuaa dxiiñaʼ ca zanda guni ni modo nanna la? jma zaziidiʼ ne zuni ni jma jneza. Peru cadi pur nga maʼ qué liica guizaalaʼdxiʼ binnigola ca guʼyaʼ ximodo cayaca dxiiñaʼ ca. Casi Jiobá, neca bidiibe lugar guzáʼ Xiiñibe guiráʼ cani nuu, peru laaca gucanebe laa guni cani. Gúdxibe Xiiñibe: «Gúninu binni casi laanu» (Gén. 1:26). Nga runi, galán gusihuínniluʼ pur ni gúniluʼ ne ni guiniʼluʼ cayacaneluʼ laabe lu dxiiñaʼ ni cayúnibe, ne guluu gana laabe pur stipa ni cayúnibe. Laaca zanda gacaneluʼ laabe ra gúʼyatu ximodo cayaca dxiiñaʼ ca. Pa cadi cayácani jneza la? zanda gacaneluʼ laabe o gudiiluʼ conseju laabe. Bietenalaʼdxiʼ, naquiiñeʼ gánnaluʼ pa guiluxe dxiiñaʼ ca jneza o coʼ, lii nga stiluʼ ni (Luc. 12:48).

Stale xpinni Cristu huaziidicaʼ stale cosa purtiʼ huadii ca binnigola ca laacaʼ xiixa dxiiñaʼ para gúnicaʼ ne zacá rusihuínnicaʼ rizaaláʼdxicaʼ laacabe. Guiráʼ ca binnigola ca naquiiñeʼ gánnacaʼ nabé risaca nga gudiicaʼ dxiiñaʼ guni stobi ne ximodo zanda gúnicaʼ ni, cásica runi Jiobá.

[Cuadru ni zeeda lu yaza 29]

ORA GUDIʼNU DXIIÑAʼ GUNI STOBI,

• racanenu sti binni chuʼ nayecheʼ pur ni guni

• rúninu jma dxiiñaʼ

• rusihuínninu nuu xpiaaninu ne qué rudxíʼbanu laanu

• rusíʼdinu xcaadxi binni

• rusihuínninu runi crenu zúnibe ni

[Cuadru ni zeeda lu yaza 30]

XI GÚNILUʼ ANTE GUDIILUʼ DXIIÑAʼ GUNI STOBI

• Biyubi binni ni zanda guni cada dxiiñaʼ

• Bisiene chaahuiʼ xii nga racalaʼdxuʼ

• Gudxi laabe xipeʼ naquiiñeʼ gúnibe

• Bidii laabe guiráʼ ni caquiiñebe para gúnibe ni

• Bizaalaʼdxiʼ dxiiñaʼ ca ne bisihuinni runi creluʼ zanda gúnibe ni

• Naquiiñeʼ gánnaluʼ pa guiluxe dxiiñaʼ ca jneza o coʼ, lii nga stiluʼ ni

[Ca dibuju/foto ni zeeda lu yaza 31]

Gudiʼnu dxiiñaʼ guni stobi ne gúʼyanu ximodo cayácani