TEMA STIʼ PORTADA
Xi riníʼ ique Dios de guerra
Stale binni riníʼ ique jneza ruuyaʼ Dios gaca guerra. Riníʼ íquecabe zacá purtiʼ lu Biblia zeeda biseendabe ca xpínnibe chitíndecaʼ dxiqué. Peru laaca nuu binni nanna bisiidiʼ Jesucristu, Xiiñiʼ Dios, ca discípulo stiʼ dxiqué gannaxhiicaʼ ca xhenemígucaʼ (Mateo 5:43, 44). Riníʼ íquecabe bichaa Dios modo riníʼ ique de guerra ne yanna maʼ qué riuuláʼdxibe gaca cani.
Yanna yaʼ, ñee riuulaʼdxiʼ Dios gaca guerra la? o coʼ. Pa zacá ni, paladu raʼbuʼ riuube ora maʼ cadinde binni ca dxi riʼ yaʼ. Ra guicábinu ca guendarinabadiidxaʼ riʼ zándaca zucaa cani lii guchaaluʼ modo riníʼ íqueluʼ de guerra. Peru pa ñánnaluʼ qué riuulaʼdxiʼ si Dios tinde binni, sínuque dede nepeʼ laa nuu ladu nuuluʼ que para gucaalú, ñándaca niníʼ íqueluʼ jneza guerra cayaca que ne seguru zuni ganar cani nuuluʼ pur laa que. Laga pa ñannuʼ cayacané Dios ca enemigu que yaʼ. Ñee nuchaaluʼ modo riníʼ íqueluʼ de guerra la?
Peru nuuruʼ ni naquiiñeʼ gánnanu. Ora gánnaluʼ xi riníʼ ique Dios de guerra, zuchaa modo riníʼ íqueluʼ de laabe. Xiñee yaʼ. Pa nuuluʼ lade millón de binni ni huayuniná guerra laa la? ziuuláʼdxiluʼ gánnaluʼ pa Dios peʼ nga runi cani ne pa laapebe nga rudiibe lugar gaca cani o gacaná binni pur laacani. O zándaca rinabadiidxaluʼ pa rizaaláʼdxibe ca binni ni racaná lúcani.
Zadxagayaaluʼ gánnaluʼ gadxé ni rusiidiʼ Biblia. Ne laaca rusiidiʼ ni caʼruʼ diʼ guchaa Dios modo riníʼ ique de guerra. Guidúʼyanu ni rusiidiʼ Biblia de xi riníʼ ique Dios de ca guerra guca dxiqué ne cani guca ca dxi beeda Jesucristu lu Guidxilayú riʼ. Ra guizíʼdinu cani, zacané cani laanu guiénenu xi riníʼ ique Dios de ca guerra cayaca yanna, ne pa zácaruʼ guerra despué.