Modo ruuyaʼ Dios guerra yanna

Gunna dxichi: ruuyaʼ Dios modo cayacaná binni ne zacanebe laacaʼ (Salmo 72:13, 14). Lu Biblia na zaguixhedxí Dios ladxidóʼ cani «cayacaná». Padxí gaca nga yaʼ. «Dxi guiete Señor Jesús de ibáʼ ne ca ángel ni jma nandxóʼ stiʼ. [Ti] usaba ná cani qué nicaa stiidxaʼ, ne qué ñunibiáʼ Dios.» (2 Tesalonicenses 1:7, 8.) Zuni Jesús ni na ca diidxaʼ riʼ lu Armagedón o «dxi uzulú [Dios] cuidxi cuenta binni» (Apocalipsis 16:14, 16).

Ora guedandá dxi ca, zuni mandar Dios Xiiñiʼ, Jesucristu, ne ca ángel stiʼ para tíndenecaʼ ca binni malu. Laacabe zunitilúcabe cani cayuniná laanu (Isaías 11:4; Apocalipsis 19:11-16).

Nga rusihuinni caʼruʼ diʼ guchaa Dios modo ruuyaʼ guerra. Ruuyarube cani casi ti modo ni riquiiñebe para gunduuxebe ca cosa malu ne ni cayuniná binni. Ne cásica dxiqué, Dios si nga napa derechu guiníʼ pora guzulú ti guerra ne tu zanda cheʼ luni. Maʼ bidúʼyanu cadi candaa zunduuxeʼ Dios ca cosa malu ca ne Xiiñibe, Jesucristu, nga sániru lu guerra ca. Pur nga zanda guininu qué riuulaʼdxiʼ Dios guiráʼ guerra cayaca yanna, neca ruluíʼ nuu razón para gaca cani.

Quíxhenu ti ejemplu: bixuiʼlú cadinde chupa hombrehuiiniʼ laga qué guinni bixhózecaʼ. Bisaanacabe de tíndecabe ti ratu ne guniʼnécabe laa pur teléfono. Tobi que na cadi laa diʼ bizulú ni, ne stobi que na biʼchiʼ que nga bichiichi laa. Guirópacabe nuucabe chuʼ bixhózecabe pur laacabe. Peru bicaadiaga si bixhózecabe laacabe, gudxi laacabe chuʼ dxícabe ne cuézacabe de ora guibiguetaʼ. Bizuubacabe diidxaʼ, peru ratu que si gudíndecabe sti biaje. Ora bedandá bixhózecabe que la? bidxiichiné laacabe, ne biʼniʼ castigar guirópacabe purtiʼ qué nuzuubacabe stiidxaʼ.

Ca dxi stinu riʼ, ca guidxi ni cadinde ca rinábacaʼ Dios gacané laacaʼ. Peru laabe qué riuube lu ca guerra ca. Biblia ruzeeteʼ: «Neca uchee né cabe laatu, cadi uquixe tu ni laacabe». Ne laaca ruzeeteʼ ni: «Cadi uquixe tu ni guni cabe laatu» (Romanos 12:17, 19). Ne cayabibe binni cadi guiree gana naquiiñeʼ cueza ora guni chaahuibe cani, ne zácani lu Armagedón (Salmo 37:7). Qué riuuláʼdxibe tindesaa ca guidxi ca, ruuyabe ni casi ñaca racaláʼdxicaʼ gúnicaʼ ti dxiiñaʼ ni laasibe caquiiñeʼ gúnibe. Pur nga, lu Armagedón zusihuínnibe xiana stibe ne zunduuxebe guiráʼ «guendaridinde [cayaca] lu guidubi guidxilayú» (Salmo 46:9; Isaías 34:2). Nga runi, Armagedón nga guerra ra guiluxe xcaadxi guerra.

Tobi de ca ndaayaʼ guedané Reinu stiʼ Dios nga ra cuee guiráʼ guerra cayaca yanna. Bizeeteʼ Jesús de reinu ca ora bisiidiʼ ti oración ni nabé runibiáʼ binni: «Gueeda Reinu stiluʼ. Gaca ni naluʼ ndaaniʼ guidxilayú, cásica raca ni guibáʼ» (Mateo 6:10, TNM). Cadi zunduuxe si ni ca guerra ca, sínuque zabeeni ni rucaa binni guni cani: ca cosa malu ca (Salmo 37:9, 10, 14, 15).a Guiráʼ ca xpinni Cristu maʼ nuunu guedandá dxi guidúʼyanu ca ndaayaʼ ni guedané Reinu stiʼ Dios (2 Pedro 3:13).

Ñee cayaadxaruʼ stale para cuee Reinu stiʼ Dios guiráʼ yuubaʼ, guendaquéiquiiñeʼ ne cani cuquiichináʼ binnila? Cayaca guiráʼ profecía ni ruzeeteʼ Biblia ne nga rusihuinni «mayaca izaa xhi guidxilayú» (2 Timoteo 3:1-5).b Maʼ cadi candaa zuni mandar Reinu stiʼ Dios lu Guidxilayú riʼ tiidiʼ si Armagedón.

Casi maʼ bidúʼyanu, cani gatiʼ lu guerra riʼ nga ca binni ni qué niná nuzuubaʼ Stiidxaʼ Dios ne cani «qué ñunibiáʼ» laabe (2 Tesalonicenses 1:8). Peru bietenalaʼdxiʼ qué riuulaʼdxiʼ Dios gatiʼ binni, dede nin ca binni malu (Ezequiel 33:11). Cumu «qué racalaʼdxi [Dios] initilú nin tobi» lu guerra riʼ la? racaláʼdxibe ganna «idubi naca guidxilayú» ca diidxaʼ nacubi ne galán stibe, ante guiluxe modo nabáninu riʼ (2 Pedro 3:8, 9; Mateo 24:14; 1 Timoteo 2:3, 4). Ya, pur cucheeche ca testigu stiʼ Jiobá diidxaʼ lu guidubi Guidxilayú, guiráʼ binni cayunibiáʼ Dios ne cayúnicaʼ ni na Señor Jesús ne zanda guibánicaʼ ndaaniʼ ti Guidxilayú sin guerra.