Cuáquinu lari jneza ne nayá ni guiníʼcabe galán de laa
1. Xiñee naquiiñeʼ guiníʼ íquenu modo cuáquinu lari ora maʼ cayuʼnu listu para chuunu guendarudagulisaa de chonna gubidxa stinu yaʼ.
1 «¡Ca testigu stiʼ Jiobá nga cani jma nachaʼhuiʼ! Nabé runi respetárcabe binni ne sicarú modo ribáʼquicabe lari». Nga nga ca diidxaʼ ni guníʼ ti hombre ni runi dxiiñaʼ ndaaniʼ ti hotel, pur ni biiyabe de ca bíchinu ne bizánanu ni biaanacaʼ ndaaniʼ hotel que ca dxi guca guendaridagulisaa roʼ de chonna gubidxa iza gudiʼdiʼ ca. Sti baʼdudxaapaʼ ni runi dxiiñaʼ ndaaniʼ sti hotel guníʼ sicaríʼ: «Rihuinnidxíchica de que laatu ribáʼquitu lari para Dios». Cumu nabé ruuyadxí binni cani rie ca guendaridagulisaa roʼ riʼ la? nga runi racaláʼdxinu cuáquinu lari «jneza casi na stiidxa Cristu». Modo ribáʼquinu lari rucaani binni guiníʼ galán de laanu ne rusihuinni cani de que nácanu xpinni Dios (Fili. 1:27). Ora maʼ gaxha zeeda guendaridagulisaa de chonna gubidxa stinu la? naquiiñeʼ guiníʼ íquenu dede ante modo cuáquinu lari.
2. Xiñee ndiʼ nagana raca para laanu cuáquinu lari jneza ne guzuchaahuinu galán yaʼ.
2 «Guendananna stálepeʼ ni zeeda de guiaʼ, primeru la? nayaguiéʼ ni», bicaa disípulo Santiago (Sant. 3:17 NM). Zándaca gaca nagana gusihuínninu de que jneza ribáʼquinu lari, purtiʼ Guidxilayú biidiʼ stiʼ Binidxabaʼ ra nabézanu riʼ nabé rucaani laanu chinándanu modo laacaʼ, casi cuáquinu lari ni cadi jneza, ni cuidxi binni, ne ni nuu de moda, guiráʼ ca ndiʼ cadi jneza diʼ cani (1 Juan 2:15-17). Nga runi, ora guiníʼ íquenu ximodo cuáquinu lari ne ximodo guzuchaahuinu la? naquiiñeʼ gúninu ni cayabi Biblia laanu de «usaana nu irá ni bini nu dxi caʼru gunibiáʼ nu laabe, ne irá ni riulaʼdxi binni guidxilayú guni, [...] ndaani guidxilayú ri» (Tito 2:12). Qué liica ñuláʼdxinu de que pur modo ribáʼquinu lari nuchiiñanu ca bíchinu ne bizánanu ni ridagulisaanenu o cani runi dxiiñaʼ ndaaniʼ ti hotel ne ndaaniʼ ti restauran, o stuudxi binni (1 Cor. 10:32, 33).
3. Xi riquiiñeʼ inabadiidxanu laca laanu ni zacané para gúʼyanu ximodo ribáʼquinu lari.
3 Guzuchaahuinu jneza. Ra maʼ cayuʼnu listu para guendaridagulisaa roʼ riʼ la? naquiiñeʼ inabadiidxanu laaca laanu cani zeeda raríʼ: «Ñee jneza modo ribaqueʼ lari o nabé ribidxi ni binni la? Ñee ruluiʼni de que napaʼ respetu modo riníʼ ique stuudxi la? Ñee naróʼbapeʼ yanni blusa stinneʼ o nachúcupeʼ ni la? Ñee rucaa bestidu stinneʼ riʼ guyadxí binni naa o nabé ruquiichi ni naa la? Ñee nayá nuu xhabaʼ ne qué rindáʼ dxabaʼ ni la? Ora maʼ chiguee ndaaniʼ ti hotel o chizayaʼ xiixa lugar iluxe si guendaridagulisaa roʼ ca, ñee nayá zahuinni xhabaʼ ne galán casi tobi ni zinanda Cristu la? O zahuinni ni modo tiica si casi ora zinandaʼ cani caree de moda la? Ñee huaxiéʼ galán ni para tobi ni zeʼ ti guendaridagulisaa roʼ ne cá ti guiʼchiʼ ladxidóʼ ni caníʼ paraa zeʼ la? Ora maʼ gastiʼ cayuneʼ, ñee nituiluaʼ ninieʼ de stiidxaʼ Dios pur modo nabaqueʼ lari la?» (Rom. 15:2, 3; 1 Tim. 2:9).
4. Ximodo zanda gacané stuudxi laanu para cuáquinu lari jneza yaʼ.
4 Zanda inabadiidxanu ca Testigu ni nanna xii nga jneza ne ni cadi jneza. Casi ca bizánanu ni maʼ bichaganá, naquiiñeʼ inabadiidxacaʼ xheelacaʼ ximodo rihuinni lari nácucaʼ. Cani napa xiiñiʼ, naquiiñeʼ gacanécabe laacaʼ modo cuáquicaʼ lari. Ca bizánanu ni maʼ huaniisi ni canazá modo naquiiñeʼ sá ca xpinni Dios la? «usiidi ca ni jneza [...] ca gunaa ni nahuiini ruʼ, [...] cuʼ xpiaani caʼ [...] guni ca [...] [ni] jneza», ora cuáquica lari ti cadi «gapa binni xi pur iníʼ stiidxa Dios» (Tito 2:3-5). Ndaaniʼ ca libru ca zanda guidxélanu foto stiʼ stuudxi Testigu ni zuchaahuicaʼ jneza.
5. Ximodo zanda acané guiranu para gusisácanu Jiobá lu guendaridagulisaa roʼ ca yaʼ.
5 Gusisácanu Jiobá. Lu ca guendaridagulisaa de chonna gubidxa riʼ la? guiranu zanda gusisácanu Jiobá, cadi cani chitiidiʼ si luni. Ya, cásica modo rininu ne zaqueca xpiaʼnu laaca rudxiibaʼ cani laabe. Peru, ni ruyadxí binni primé nga modo ribáʼquinu lari ne modo ruzuchaahuinu. Guiranu acanenu para gusisácanu Jiobá ra cuáquinu lari jneza ne nayá ni guiníʼcabe galán de laa (Sal. 148:12, 13).
[Box on page 6]
Ni zacané laanu ti cuáquinu lari jneza ni guiníʼcabe galán de laa
◼ Stiidxaʼ Dios
◼ Inabadiidxanu laaca laanu
◼ Ni gabi xcaadxi laanu de xhábanu
◼ Ca libru ne ca guiʼchiʼ ricaanu