Ucané iziidirúcabe jma
1 Ora rucheechenu ca diidxaʼ nacubi ne galán ca, nabé ridxélanu binni ni cadi nabeza ra rucheechenu diidxaʼ o riníʼcabe sti diidxaʼ gadxé, zándaca seña o sti diidxaʼ stiʼ Méjicu. Ne xcaadxi binni ni nabé riulaʼdxiʼ iníʼneluʼ laacaʼ de Biblia zándaca chindézacabe sti ladu. Xi zanda gúninu ti irácabe iziidirúcabe jma yaʼ. Bichá guiʼchiʼ Sírvase visitar (S-43-S).
2 Jma rucaadiaga binni ora rininu ca diidxaʼ nacubi ne galán ca lu stiidxacaʼ (Hech. 22:1, 2). Nga runi, stale biaje jma nga naquiiñeʼ uchanu guiʼchiʼ ca ora idxélanu binni ni riníʼ sti diidxaʼ neca qué ruluíʼ pa riuláʼdxicabe ucaadiágacabe stiidxaʼ Reinu. Peru, ra nabeza stale binni ni riníʼ sti diidxaʼ stiʼ sti guidxi roʼ ra maʼ rireecheʼ diidxaʼ riʼ lu stiidxacabe la? maʼ cadi naquiiñeʼ diʼ idxá ni, zácani ora si gúʼyanu riuláʼdxicabe.
3 Ximodo idxá guiʼchiʼ ca. Biyubi ximodo gannuʼ tu lá binni ca, pa neza lídxibe ne xi númeru teléfono stibe. Bicaa pabiáʼ uyuláʼdxibe, pora zanda idxélacabe laabe, xi bisaananeluʼ laabe o xi unábabe, ne xi diidxaʼ jma riénebe. Ora maʼ bichaluʼ iráʼ ni la? bidiica guiʼchiʼ ca secretariu stiʼ ca binni ridagulisaa, laabe zuseendabe ni ra nuu grupu o ra nuu ca binni ridagulisaa ra naquiiñeʼ cheni.
4 Modo cheʼ guiʼchiʼ ca. Pa secretariu ca qué ganna paraa useendaʼ guiʼchiʼ ca casi pa ra nuu ti grupu o ti neza binni ridagulisaa, o qué gápabe pa neza cheni para ucaabe luni la? zanda inabadiidxabe Betel ra nuu Cani Rudii Paraa Ireecheʼ Diidxaʼ (Sección de Territorios). Maʼ cadi naquiiñeʼ diʼ gábibe ni bíchinu ni ruuyaʼ dxiiñaʼ ni raca ndaaniʼ guidxi (superintendente de ciudad) para useendabe ni.
5 Cada icaa ti neza binni ridagulisaa o ti grupu guiʼchiʼ Sírvase visitar ca la? naquiiñeʼ chécabe nagueendaca ra cayábini laacabe. Pa ácanu nagueenda ne dxiiñaʼ stinu la? zanda iníʼ íquenu de que Jiobá zuxheleʼ ladxidóʼ cani «maʼ nuu listu para icaa endanabani ni qué zaluxe» (Hech. 13:48).