Usíʼdinu binni jneza ti guiénecaʼ ora maʼ caninu
1. Xi historia zeeda lu Biblia chigúʼndanu ne xiñee.
1 Libana ni bidii apóstol Pablu ndaaniʼ yuʼduʼ stiʼ Antioquía guidxi Pisidia, ni zeeda lu libru stiʼ Hechos 13:16-41 rusiidiʼ ni laanu stale de ximodo zanda ininu ti ganda guiene binni laanu. Apóstol Pablu uniʼné binni de ni caquiiñeʼ ganna ora bisiidibe ca diidxaʼ nacubi ne galán stiʼ Cristu, peru uníʼ íquebe modo laacaʼ ne ximodo riníʼ ique cani cucaadiaga laabe. Gúʼndanu historia riʼ ti izíʼdinu ximodo zanda gúninu zacaca ora maʼ canagucheechenu diidxaʼ.
2. Xi rizíʼdinu pur modo bizulú Pablu libana stiʼ.
2 Ininu de xiixa ni runibiáʼcabe. Neca Pablu uníʼ de dxiiñaʼ ni risaca napa Jesucristu para aca iráʼ ni maʼ udixhe ique Dios guni la? qué nuzulúdibe libana stibe zaqué. Coʼ, sínuque uniʼbe de xiixa ni runibiaʼbe ne ni runibiáʼ ca binni cucaadiaga laabe que: historia stiʼ xquidxi ca judíu, purtiʼ stale de ca binni que judíu laacaʼ (Hech. 13:16-22). Laaca zanda gúninu zacá, zanda chindá cani caninu ndaaniʼ ladxidóʼ binni pa ininu de xiixa ni runibiaʼnu ne ni runibiáʼcabe. Para gánnanu xipeʼ nga riuláʼdxicabe gánnacabe la? naquiiñeʼ inabadiidxanu laacabe xiixa sin uchiichinu laacabe ne ucaadiaga chaahuinu laacabe ni icábicabe.
3. Xiñee uca nagana para ca binni cucaadiaga Pablu que guni crecaʼ Jesús nga Mesías ni maca nexheʼ gueeda que yaʼ.
3 Ora caniʼbe de historia stiʼ ca judíu que la? Pablu bisietenalaʼdxiʼ laacabe maca uníʼ Dios zuseendaʼ tuuxa ni ulá laacabe ne zálebe lade ca xiiñiʼ David. Peru stale judíu ulézacaʼ ñeeda ti xaíque ni ñacané laacaʼ nucaalucaʼ Roma purtiʼ guidxi que nga runi mandar laacaʼ, ne ñuni xquidxi ca judíu tobi ni jma risaca que xcaadxi guidxi. Ne laaca nánnacabe bidxiideche cani zaniruʼ ndaaniʼ yuʼduʼ stiʼ ca judíu ni nuu Jerusalén que Jesús, ne bidiicaʼ laabe ca xaíque stiʼ Roma para guuticaʼ laabe. Ximodo zanda acané Pablu laacabe ti guiénecabe laabe nga Mesías ni maca nexheʼ gueeda que yaʼ.
4. Xi biʼniʼ Pablu para bisiénebe ca judíu que ni zeeda lu Biblia.
4 Inínenu binni de ni caquiiñeʼ. Cumu nánnabe modo riníʼ ique ca binni cucaadiaga laabe la? Pablu biquiiñebe Stiidxaʼ Dios para bisiénebe laacaʼ cani maca runi crecaʼ. Uniʼbe Jesús nga ni zeeda lade ca xiiñiʼ David ne de laabe nga uníʼ Juan ni Riguunisa que, ni stale de laacabe nánnacabe gúcabe tobi ni udixhená stiʼ Dios (Hech. 13:23-25). Pablu uníʼ uca iráʼ ni bicaa cani riguixhená stiʼ Dios que, ora bidxiidéchecabe Jesús ne ora unábacabe gátibe (Hech. 13:26-28). De raqué bisiénebe uyuu tu biʼyaʼ Jesús maʼ biasa lade gueʼtuʼ ne uniʼbe de caadxi textu stiʼ Biblia ni uca ni na ora biasa Jesús lade gueʼtuʼ (Hech. 13:29-37).
5. 1) Xi biʼniʼ Pablu ora uníʼnebe ca binni griegu que. 2) Ximodo zanda gúninu casi biʼniʼ Pablu ora maʼ canagucheechenu diidxaʼ yaʼ.
5 Peru dxi uníʼnebe caadxi binni griegu ra Areópago stiʼ Atenas la? maʼ gadxé modo uniʼbe (Hech. 17:22-31). Neca zaqué laaca bisiidibe ca diidxaʼ nacubi ne galán stiʼ Cristu, ne iropaʼ lugar riʼ bidxélabe binni ni biʼniʼ cré ca diidxaʼ uniʼbe (Hech. 13:42, 43; 17:34). Zacaca nga ca dxi stinu riʼ, jma nagueenda zindá cani caninu ndaaniʼ ladxidóʼ binni pa ininu de xiixa ni runibiaʼnu ne ni runibiáʼcabe ne ininu de xiixa ni caquiiñeʼ gánnacabe ra idúʼyanu ximodo laacabe ne ximodo riníʼ íquecabe.