Usihuínninu rizaláʼdxinu binni ra inabadiidxanu ne ucaadiáganu laacaʼ
1 Stale binni riuulaʼdxiʼ iníʼ xi riníʼ ique peru qué riuulaʼdxiʼ chuʼ tu gabi laa cadi jneza cani o qué riná chuʼ tu inabadiidxaʼ laa stale cosa. Nga runi laanu cani rúninu xhiiñaʼ Cristu naquiiñeʼ ganna chaahuinu ximodo inabadiidxanu binni ti gánnanu xi riníʼ íquecaʼ (Pro. 20:5).
2 Cani inabadiidxanu ca cadi naquiiñeʼ uchibi cani binni para icabi, sínuque ucaani laacabe icábicabe sin idxíbicabe. Ra yegucheeche ti bíchinu diidxaʼ de yoo pur yoo unabadiidxabe: «Ñee huaníʼ íqueluʼ pa ziuu ti dxi gapa saa binni respetu la?». Modo tiica icabi binni, laabe rinabadiidxabe: «Xi raʼbuʼ cayaadxaʼ para gaca ndiʼ yaʼ», o «Xiñee runi creluʼ nga yaʼ». Sti bíchinu ni rucheeche diidxaʼ ra tiica si o ca lugar ra riuu stale binni, laabe rinabadiidxabe cani napa xiiñiʼ: «Xi jma riuuláʼdxiluʼ yanna ra maʼ nápaluʼ xiiñiluʼ yaʼ». Oraqueruʼ rinabadiidxabe: «Xi jma riguu xizaa lii yaʼ». Ni ridúʼyanu raríʼ nga cani unabadiidxaʼ guiropa bíchinu riʼ bidii cani lugar icabi cani cucaadiaga ca sin nidxíbicaʼ. Cumu gadxé gadxé nga ni riguu xizaa binni la? zanda uchaʼnu modo inabadiidxanu binni ra idúʼyanu xi caquiiñecabe neza ra rucheechenu diidxaʼ.
3 Xi naquiiñeʼ gúninu para ganda icábicabe. Pa ca binni riʼ icábicaʼ la? bicaadiaga ne cadi ucueezuʼ laacabe pur intiica si cosa (Sant. 1:19). Gudxi laacabe galanpeʼ modo bicábicabe (Col. 4:6). O zanda iniʼluʼ: «Jneza modo naluʼ ca». Bisihuinni de ladxidoʼloʼ nga cayaʼbuʼ laacabe ca diidxaʼ riʼ ne biʼniʼ ni cada ganda. Ne biyubi ximodo inabadiidxaluʼ laacabe xhupa xhonna cosa para gannuʼ xi riníʼ íquecabe ne xiñee riníʼ íquecabe zacá. Biyubi iníʼneluʼ laacabe de ni runibiáʼcabe. Ante uluiʼluʼ laacabe ti textu stiʼ Biblia, zanda iniʼluʼ: «Ñee huaníʼ íqueluʼ de ndiʼ la?». Cadi iníʼ íqueluʼ lii si nga nápaluʼ razón, purtiʼ zándaca ni iníʼ binni ca jneza ni. Ne cadi tinde diidxaneluʼ binni (2 Tim. 2:24, 25).
4 Zacabi ca binni ca ni inabadiidxanu laacaʼ, pa laanu nánnanu ucaadiáganu laacabe. Ca binni ca zudiicabe cuenta pa dxandíʼ cucaadiáganu laacabe. Ti binnigola ni riganna ca binni ni ridagulisaa uníʼ: «Ra cuézanu iluxe iníʼ si binni para ininu, zusihuínninu riuuláʼdxinu ucaadiáganu laacabe ne zacané ni ti ganda ucaadiágacabe laanu ne nga nga ti modo jma galán para usihuínninu nadxiinu ne rizaláʼdxinu binni». Ra ucaadiáganu binni la? zusihuínninu cusisácanu laacabe ne nga zándaca ucaa laacabe ucaadiágacabe ca diidxaʼ nacubi ne galán ni racaláʼdxinu gánnacabe (Rom. 12:10).