Usihuínninu rizaaláʼdxinu binni ra ácanu nachaʼhuiʼ ne gápanu respetu laacaʼ
1 Neca Jiobá nga runi mandar idubi naca ibáʼ ne Guidxilayú la? nacháʼhuibe ne rápabe respetu binni neca gulenecaʼ donda (Gén. 13:14; 19:18-21, 29). Ra gápanu ca guenda ni napa Jiobá zanda ucheechenu ca diidxaʼ nacubi ne galán ca jma jneza (Col. 4:6). Ndiʼ rucaani laanu cadi usihuínnisinu galán xpiaʼnu ora maʼ caninenu laacabe.
2 De yoo pur yoo. Xi gúninu pa binni ca nuu xhiiñabe stale para ucaadiágabe laanu yaʼ. Ni jma jneza gúninu nga inínenu laabe ti ratuhuiiniʼ si o gábinu laabe zadiidinu sti dxi. Yanna, para usihuínninu nápanu respetu binni la? qué zábinu laacabe guiaananépecabe revista, libru, o xiixa guiʼchihuiiniʼ ni zinenu pa binni ca maʼ gudxi laanu qué riuulaʼdxiʼ guiaanané cani. Laaca riquiiñeʼ usihuínninu nápanu respetu lídxicabe, casi ora ireʼnu uséʼgunu xpuértacabe ne usíʼdinu ca xiiñinu guni zacaca. Ne pa usaananu xiixa revista o libru ndaaniʼ ti yoo ra irutiʼ guinni la? cadi usaananu ni ra guuyaʼ binni tiidiʼ lu calle ni. Pa gápanu respetu laacabe ne ácanu nachaʼhuiʼ la? nga zucaa laanu gúninu laacabe ni racaláʼdxinu gúnicabe laanu (Luc. 6:31).
3 Lu calle. Ora ucheechenu diidxaʼ lu calle, cadi uchíʼñanu ra cadiʼdiʼ binni ne cadi uzuhuaanu pur grupu ne uchiʼnu ra cutoo binni, zacá zusihuínninu runi respetarnu laacabe. Laaca zusihuínninu riénenu binni ora inínenu cani ruluíʼ napa jma tiempu que cani cayaca purá. Ziuu ora zaquiiñeʼ ininu nadipaʼ pur ca ruidu ni raca lu calle, peru naquiiñeʼ gúninuni biaʼ galán para cadi uchíʼñanu sti binni (Mat. 12:19).
4 Ora ucheechenu diidxaʼ pur teléfono. Para cadi uchiichinu binni la? riquiiñeʼ inínenu laacabe pur teléfono ra gastiʼ ruidu. Galán nga ora uzulú ininu gábinu laacabe tu laanu ne xi pur ulídxinu, zacá zánnacabe galán xpiaʼnu ne nápanu respetu laacabe. Ra ininu dede ruaa teléfono ca ne ininu modo chuláʼdxicabe la? zacané nga laanu ininérunu laacabe de Biblia ne zaziidicabe de laani (1 Cor. 14:8, 9). Nga runi, ácanu nachaʼhuiʼ casi Jiobá ne gápanu respetu binni.