Gusihuínninu rizaaláʼdxinu binni ora gucheechenu diidxaʼ ra nuu guiráʼ clase binni
1 Apóstol Juan biiyabe ti visión ra zipapa ti ángel galaa guibáʼ ne ziguiníʼnebe binni stiidxaʼ Cristu ni qué ziuu dxi guinitilú ne laaca ziguiníʼnebe ni binni de «irá ladu, de irá guidxi, ni riníʼ adxé adxé idioma» (Apo. 14:6). Ñee rinínenu guiráʼ clase binni ora maʼ zigucheechenu diidxaʼ casi biʼniʼ ángel ca la? Zándaca qué rudiʼnu cuenta pur modo riníʼ íquenu rusihuínninu qué riuuláʼdxinu ti clase binni. Modo guinínenu binni ca diidxaʼ nacubi ne galán ca zusihuínnini xi riníʼ íquenu de laacabe. Nga runi, ora gucheechenu diidxaʼ naquiiñepeʼ gusihuínninu rizaaláʼdxinu binni ni biniisi gadxé gadxé modo.
2 Binibiáʼ binni nabeza neza ra rucheecheluʼ diidxaʼ. Ñee nuu binni nabeza neza ra rucheecheluʼ diidxaʼ ni biree de xquidxi pur zeeda guni dxiiñaʼ o pur nuu guendanagana xquidxi la? Cadi tiiduʼ ra nuucabe sin guiníʼneluʼ laacabe. Biyubi laacabe ne binibiáʼ chaahuiʼ laacabe. Xi caquiiñecabe, xi naguu xizaa laacabe, xi riuuláʼdxicabe, xi qué riuuláʼdxicabe, xi ruchibi laacabe ne tu clase binni qué riuuláʼdxicabe guidxaagacabe. Pa gánnanu ca ndiʼ la? zánnanu xidé naquiiñeʼ guinínenu laacabe (1 Cor. 9:19-23). Laanu laaca naquiiñeʼ guni sentirnu casi biʼniʼ sentir apóstol Pablu guinínenu guiráʼ clase binni de Stiidxaʼ Dios cásica binni de sti guidxi, ni gadxé gadxé modo biniisi, ni riníʼ sti diidxaʼ, o cani napa stale bueltu (Rom. 1:14).
3 Ximodo zanda guiníʼneluʼ ti binni riníʼ sti diidxaʼ ora maʼ zigucheecheluʼ diidxaʼ yaʼ. Zanda iquiiñeluʼ folletu Buenas nuevas para gente de todas las naciones. Laaca zanda chineluʼ chupa chonna folletu o tratadu de sti diidxaʼ ni riníʼcabe neza ra rucheechetu diidxaʼ (laguuyaʼ Nuestro Ministerio del Reino julio 2003, yaza 4, párr. 2, 3). Nuu caadxi de cani rucheeche diidxaʼ cadi rinésicaʼ folletu o tratadu ora maʼ zigucheechecaʼ diidxaʼ, sínuque huaziidicaʼ ugapadiúxicaʼ o guiniʼcaʼ chupa chonna diidxaʼ ni riníʼ binni neza ra rucheechecaʼ diidxaʼ. Nuu binni nabé ridxagayaa ora guiniʼnécabe laacaʼ stiidxacaʼ neca narenda, nga zanda gucaa binni chuulaʼdxiʼ gucaadiaga ca diidxaʼ nacubi ne galán ca.
4 Biʼniʼ casi runi Jiobá. Ora gúninu stipa pur guinínenu binni ni gadxé gadxé modo biniisi ca diidxaʼ nacubi ne galán ca, zinándanu ejemplu stiʼ Dios stinu Jiobá, purtiʼ laa «racalaʼdxi ulá irá binni, ne [gánnacabe] ni dxandíʼ» (1 Timoteo 2:3, 4).