Xii nga ni jma risaca lu xquendanabániluʼ
1 Xi nicábiluʼ yaʼ. Guiranu nga racaláʼdxinu gúninu xhiiñaʼ Reinu primé lu xquendanabáninu (Mat. 6:33). Peru, rusihuínninu pur cani rúninu zacá ni la? Biblia na: «Laguuya chaahui ximodo nuu tu» (2 Cor.13:5). Ximodo zanda ganna chaahuinu pa cuyúbinu Reinu stiʼ Dios primé yaʼ.
2 Ximodo caquiiñenu stiémpunu. Zanda guzulú guidúʼyanu ximodo caquiiñenu stiémpunu (Efe. 5:15, 16). Pabiáʼ tiempu riquiiñenu ora maʼ nuunu lade ca bíʼchinu ne ca bizáʼnanu lu ca guendanayecheʼ, guidúʼyanu tele o iquiiñenu Internet yaʼ. Pa cueenu cuenta pabiáʼ tiempu riquiiñenu lu cani maʼ guninu ca, ne uchaaganu ni ne tiempu ribeenu para gúninu xhiiñaʼ Dios la? zándaca dede zadxagayaanu. Ora maʼ cayúninu dxiiñaʼ, ñee rúninu hora extra para si gápanu xiixa luju neca nánnanu dxi ca zúninu xhiiñaʼ Jiobá la? Ñee nabé riáʼdxanu ca guendaridagulisaa ca o qué rigucheechenu diidxaʼ pur chizanu sti ladu ca sábadu ne ca domingu ca la?
3 Cani jma risaca para laanu. Nuu stale de laanu qué rudii tiempu laa para guni guiráʼ ni racalaʼdxiʼ. Nga runi, para gúninu xhiiñaʼ Reinu primé lu xquendanabáninu la? naquiiñeʼ guidúʼyanu gunáʼ nga ni jma risaca para laanu ti cueenu tiempu para «ca cosa ni dxandíʼ risaca» (Fili. 1:10). Ne caadxi de ca cosa ni jma risaca gúninu nga, guidúʼndanu Biblia, gucheechenu diidxaʼ, gápanu binnilídxinu ne chuunu ca guendaridagulisaa ca (Sal. 1:1, 2; Rom. 10:13, 14; 1 Tim. 5:8; Heb. 10:24, 25). Nuuruʼ xcaadxi cosa ni laaca galán gúninu, casi gúninu ejerciciu ne chúʼnenu ca bíʼchinu ne ca bizáʼnanu nayecheʼ ti ratu (Mar. 6:31; 1 Tim. 4:8). Peru laacani qué risácapeʼ cani ne maca nuu ora naquiiñeʼ gaca cani.
4 Ti hombrehuiiniʼ Testigu biyúbibe gúnibe xhiiñaʼ Reinu primeru, ne gúcabe precursor lugar de nuyúbibe ñuundabe jma. Biziidibe sti diidxaʼ ne guyebe sti lugar ra jma caquiiñeʼ guireeche diidxaʼ. Laabe guniʼbe sicaríʼ: «Ndiʼ nga ni jma galán cadiideʼ lu guendanabani stinneʼ. ¡Gucheecheʼ diidxaʼ nabé galán ni para naa! Ñuuladxeʼ ñuni guiráʼ cani nahuiiniʼ zacaca ne ñuni sentírcabe galán casi cayuneʼ sentir riʼ. Gástiruʼ sti cosa ni jma galán que gúninu ni na Jiobá ne guiráʼ cosa ni nápanu». Zacá ni, gúninu xhiiñaʼ Reinu primé lu xquendanabáninu la? zedané ni stale ndaayaʼ, peru ni jma risaca nga ni gúninu ca rusiécheni Jiobá, Bixhózenu ni nuu guibáʼ (Heb. 6:10).