Iquiiñenu stiémpunu ne endabiaaniʼ
1 Cumu riuláʼdxinu usiéchenu Jiobá la? nga rucaa laanu gúninu jma lu xhiiñabe. Nga runi stiidxabe cayabi laanu cadi usaana de uyúbinu Reinu stiʼ Dios primeru ne «ganna[nu] cui[nu] ni dxandí risaca» (Mat. 6:33; Fili. 1:10). Ximodo zanda gápanu jma tiempu para gúninu jma lu xhiiñaʼ Reinu ne cadi udiʼnu lugar xcaadxi cosa ni huaxiéʼ risaca ucueeza laanu de gúninu cani yaʼ. (Efe. 5:15-17.)
2 Biʼniʼ xhiiñaʼ Reinu primé. Udixhe chaahuiʼ stiémpuluʼ ti cadi guʼnuʼ ni huaxiéʼ risaca. Nuu tu laa casi uzulú beeu rucaacaʼ lu calendariu padxí chigucheechecaʼ diidxaʼ, ne rúnicaʼ stipa pur qué ucueeza gastiʼ laacaʼ de gúnicaʼ ni. Ne zacaca zanda gúninu ne ca endaridagulisaa ca, ora gúʼndanu Biblia ne ora chuunu ca guendaridagulisaa roʼ ca. Stale tu laa riguixhe ti hora iráʼ dxi para guʼndaʼ Biblia; nuu tu runi ni siadóʼ o huaxhinni. Ulee ti tiempu para guʼnuʼ xiixa ni risaca ne cadi udiiluʼ lugar xcaadxi cosa ni cadi caquiiñepeʼ ucueeza lii de guʼnuʼ ni (Ecl. 3:1; 1 Cor. 14:40).
3 Cadi tan unítiluʼ stiémpuluʼ ne cani nuu lu guidxilayú. Nuu guidxi nabé riulaʼdxiʼ binni quite xiixa, o chizacaʼ o gúnicaʼ xiixa ni nabé riuláʼdxicaʼ ne xcaadxi cosa ra runíticaʼ tiempu. Stale binni nabé runiti xhaatacaʼ tiempu maʼ cayuuyacaʼ tele o maʼ caquiiñecaʼ computadora. Peru ca binni ni nabé riulaʼdxiʼ chizá o riuláʼdxicaʼ iquiiñecaʼ ca cosa nacubi caree ndaaniʼ guidxilayú riʼ la? qué zabeenducaʼ gastiʼ galán (1 Juan 2:15-17). Nga runi stiidxaʼ Dios cayabi laanu cadi tan unítinu stiémpunu lu cani nuu lu guidxilayú riʼ (1 Cor. 7:31). Pa laanu ucaadiáganu conseju riʼ la? zuluinu Jiobá jma risaca para laanu lu xquendanabáninu guni adorarnu laabe (Mat. 6:19-21).
4 Maʼ huaxiéʼ dxi riaana para iráʼ cosa nuu lu guidxilayú nabézanu ndaaniʼ riʼ. Cani guni xhiiñaʼ Reinu primeru lu xquendanabánicaʼ la? ziuucaʼ nayecheʼ ne ziuulaʼdxiʼ Dios modo rúnicaʼ (Pro. 8:32-35; Sant. 1:25). Nga runi, iquiiñenu stiémpunu ne endabiaaniʼ.