Ni chitiidiʼ lu dxi bibí para guidagulisaanu

Tema stiʼ guendaridagulisaa de ti dxi stiʼ iza 2008 nga «Laanu zeeda gácanu casi beñe, ne Jiobá zanda guni laanu modo gacalaʼdxiʼ» (Isa. 64:8). Guiráʼ ca conseju ni chiguieeteʼ lu guendaridagulisaa ca zacané cani laanu guiénenu ne gusisácanu guendanuuxpiaaniʼ ni napa Jiobá, Dios ni zanda guni laanu modo gacalaʼdxiʼ. Laaca zanda guiénenu ne gusisácanu guendaruni jneza, guendarannaxhii ne guendanandxóʼ stibe.

Libana ni chigudii binnigola ni riganna ca neza binni ridagulisaa, «Seamos “vasos honrosos” en el ministerio», zuluiʼni laanu zeʼ dxi jma stale ndaayaʼ huacaa binni purtiʼ cayunibiaʼcaʼ cani dxandíʼ zeeda gusiidiʼ Biblia ne cusiidicaʼ ni xcaadxi binni. Lu libana ni láʼ «La meditación nos salvaguardará» zazíʼdinu ximodo rulá cani rusiidiʼ Jiobá laanu ora guiníʼ íquenu de laacani. Bíʼchinu ni chiganna laanu zudii ca libana ni láʼ «Cesen de amoldarse a este sistema de cosas» ne «Moldeados por el Gran Alfarero». Cani napa xiiñiʼ ne ca ni nahuiiniʼ ziuuláʼdxicaʼ gucaadiágacaʼ libana ni láʼ «Jóvenes que son útiles a Jehová» ne «El papel fundamental de los padres en el proceso de moldeado». Laaca zadiʼdiʼ caadxi xpinni Cristu ni zanabadiidxacabe laacaʼ xi huabeenducaʼ ora guninecaʼ binni de stiidxaʼ Dios o gusihuínnicaʼ ximodo huayúnicani. Pa tuuxa racalaʼdxiʼ chúʼnisa para gusihuinni maʼ bidii laa Dios la? naquiiñeʼ guiniʼné binnigola ni rapa guiráʼ stiʼ binni ridagulisaa nagueendaca. Cadi guiaandaʼ chinenu revista Torre stiʼ ni rapa ni chiguiuundaʼ semana ca.

Jiobá, ni zanda guni laanu modo gacalaʼdxiʼ runi guiráʼ ni riguixhe ique. Peru naquiiñeʼ gusihuínninu pa zudiʼnu lugar guni Jiobá laanu modo riuulaʼdxiʼ. Guiráʼ cani guni ni na Jiobá ne gudiicaʼ lugar guchaabe modo nabánicaʼ la? reeda gácacaʼ casi beñe ni riuu lu torno stiʼ ti binni ni ruzáʼ guisu ne maʼ zigucaa biéquebe ni dede ra gúnibe ti guisu ni zanda iquiiñeʼ. Pa gudiʼnu lugar gacané Jiobá laanu, zusihuínninu laasibe nga ni jma nandxóʼ ne zaguu ndaayabe laanu.