Ndaa ra rinabadiidxaʼ
◼ Ximodo naquiiñeʼ gácunu lari ora chigunibiaʼnu ca yoo ra raca xhiiñaʼ Jiobá.
Lu guidubi naca Guidxilayú runibiáʼ binni ca Yoo stiʼ Reinu, ca Yoo ra raca ca guendaridagulisaa jma naroʼbaʼ ne ca Yoo Betel ca casi lugar ra raca xhiiñaʼ Jiobá. Ca yoo riʼ la? cadi napa diʼ cani stale luju, peru nayá cani, sicarú rihuinni cani, ne rihuinni ca gadxé cani de xcaadxi lugar ni nuu ndaaniʼ guidxilayú stiʼ Binidxabaʼ riʼ. Nga runi, cani chigunibiáʼ ca lugar ra raca xhiiñaʼ Jiobá ca naquiiñeʼ gusihuínnicaʼ xpinni Dios laacaʼ ne cayúnicaʼ ni nabe.
Casi xpinni Cristu la? rusihuínninu cayúninu «xhiiña Dios» ora rácunu lari jneza ne ora ruzuchaahuinu (2 Cor. 6:3, 4). Laaca naquiiñeʼ gaca xpiaʼnu galán. Modo rácunu lari ne modo ruzuchaahuinu naquiiñeʼ gusihuínnini guiráʼ ora xpinni Jiobá laanu, ne jmaruʼ si ora maʼ zigunibiaʼnu Betel ni nuu Nueva York o xcaadxi Yoo Betel ni nuu lu guidxilayú.
Lu ni rizaané Xhiiñaʼ Reinu ni rúninu stiʼ junio 2007, bizeeteni pabiáʼ jneza gaca binni nayá, zaqueca lari ni gacu, guzuchaahuiʼ jneza ora maʼ zigucheeche diidxaʼ ne ora maʼ zeʼ ca guendaridagulisaa ca, ne laaca bizeeteni ndiʼ (lu yaza 4, párrafo 7): «Galán guietenaláʼdxinu diidxaʼ Betel ca riniʼni Lidxi Dios. Nga runi, modo gácunu lari ne ni gúninu ca lugar ca naquiineʼ gácani cásica ora maʼ ziuunu ndaaniʼ Yoo stiʼ Reinu para guni adorarnu Dios». Zacá nga naquiiñeʼ guni tutiica ni rucheeche diidxaʼ ni racalaʼdxiʼ chigunibiáʼ Betel, nécapeʼ nabézabe gaxha de laani o zitu. Pa gúninu zacá la? zusihuínninu rusisácanu Dios ne runi respetarnu xquidxi (Sal. 29:2).
Modo rácunu lari naquiiñeʼ gusihuínnini rúninu ni «jneza casi naquiiñe guni ca xpinni Dios» (1 Tim. 2:10). Pa gácunu lari jneza ne guzuchaahuinu jneza la? zanna binni tu Dios cayuni adorarnu. Triste guininu ni, peru nuu caadxi bíʼchinu ne bizáʼnanu cadi jneza diʼ modo rácucaʼ lari ora maʼ zigunibiaʼcaʼ ca lugar ra raca xhiiñaʼ Jiobá riʼ, nuu tu racu lari ni guíʼchipeʼ, o lari ni ridiʼdiʼ biaaniʼ o lari ni rácucaʼ ora maʼ zizacaʼ. Cadi jneza diʼ gacu ca xpinni Cristu lari zacá neca nuucaʼ sti lugar. Lu guiráʼ ni gúninu naquiiñeʼ gusihuínninu cayúninu cani «para usisaca [nu] Dios», ne zacá zahuinni gadxé ca xpinni Jiobá de binni guidxilayú (Rom. 12:2; 1 Cor. 10:31).
Nga runi, ora quixhe íquenu chigunibiaʼnu Betel ni nuu Nueva York ne sti lugar ra raca xhiiñaʼ Jiobá ndaaniʼ guidxi ca, purtiʼ maʼ gudixhe íquenu chuunu o laga zizanu neza ca tiidicanu ca lugar riʼ la? galán guinabadiidxanu ndiʼ laanu: Ñee rusihuinneʼ runeʼ respetar ca lugar ra chaa riʼ pur modo nacuaʼ lari ne modo nuzuchaahueʼ la? Ñee rusihuínnini tuu nga Dios cayuneʼ adorar la? Ñee rucaa binni guyadxí naa pur modo nacuaʼ lari o ruchiichini laa la? Nga runi, ora tiica ne lu guiráʼ ni gúninu, casi ora cuinu xi lari gácunu ne modo guzuchaahuinu la? gúninu ni jneza «ti zacá guʼya irá binni pabiáʼ sicarú stiidxa Dios ni bilá laanu» (Tito 2:10).