Ñee caquiiñeluʼ ca revista ca jneza la?
1 Sicaríʼ guníʼ ti bizánanu ora biluxe biʼndaʼ revista La Atalaya 1 stiʼ enero 2008, (lu diidxazá Torre stiʼ ni rapa enero-marzo 2008) nabe: «¡Maʼ rapa gana iquiiñeʼ revista riʼ ora gucheeche diidxaʼ!». Guniʼbe sicaríʼ purtiʼ nabé galán ca tema reeda lu revista ni riquiiñenu para gucheechenu diidxaʼ ca. Maʼ biindaluʼ cani sti biaje la? Maʼ guníʼ íqueluʼ ximodo zanda iquiiñeluʼ cani jma jneza ora gucheecheluʼ diidxaʼ la?
2 «Cani bisiidiʼ Jesús.» Tema riʼ zanda iquiiñeni para guzulú guidúʼndanenu binni de Biblia, cadi dxandíʼ la? Pa caʼruʼ guʼnuʼ ni la? zanda guʼnuʼ sicaríʼ: biindaʼ tema stini ca para gunadiágabe lii, de racá biluíʼ laabe primé párrafo ra cá ni guníʼ Jesús. Pa guʼyuʼ cayuuláʼdxibe ni la? guníʼneruʼ laabe ne biquiiñeʼ ca letra yaaseʼ ra guinabadiidxaluʼ laabe xiixa. Gudxi laabe guiniʼbe xi riníʼ íquebe, biluíʼ laabe ca dibuju ni caníʼ de ni biindatu ca ne bisiene cani laabe, de racá gudiʼdiʼ lu sti párrafo. Zanda gúʼndaneluʼ laabe biaʼ galaani primé biaje guiníʼneluʼ laabe, ne sti galaa ca gúʼndaluʼ ora guibiguétaluʼ sti biaje. Biyúbica lu libru Xipeʼ ndiʼ cusiidiʼ Biblia xiixa ni zanda iquiiñeluʼ para gúʼndarutu jma de Biblia.
3 «Ni zacané binnilídxiluʼ chuʼ nayecheʼ.» Tema riʼ rireeni para gacaneni ca hombre ne ca gunaa ni maʼ bichaganáʼ, ne para cani napa xiiñiʼ, ti iquiiñecaʼ ca conseju stiʼ Biblia ora gápacaʼ xiixa guendanagana ndaaniʼ lídxicaʼ ti guibánicaʼ nayecheʼ. Laaca zanda gacaneni ca binni ni cadi Testigu para gúʼyacaʼ pabiáʼ galán nga guiráʼ ni zeeda lu Biblia (2 Tim. 3:16, 17).
4 «Para ca hombrehuiiniʼ ne ca dxaapahuiiniʼ.» Tema riʼ rucaani ca hombrehuiiniʼ ne ca dxaapahuiiniʼ ca gúʼndacaʼ jma de ca historia stiʼ Biblia, peru cadi ngasi, sínuque laaca rucaani laacaʼ guiniʼcaʼ de laacani. Nga runi, nabé galán guluinu ni ca hombrehuiiniʼ ni nuu neza ra rucheechenu diidxaʼ, para gábinu laacaʼ pabiáʼ risaca nga gúʼndacaʼ Stiidxaʼ Dios (Sal. 119:9, 105). Laaca zanda guluiʼluʼ tutiica binni ni maʼ bichaganáʼ ni napa xiiñiʼ ra na «Ni gusiiditu ca xiiñitu»; zanda iquiiñecabe ni para gusiidicabe ca xiiñicabe ejemplu galán stiʼ ca hombre ne gunaa ni ruzeeteʼ Biblia. Ñee maʼ gudixhe íqueluʼ gúʼndaneluʼ ni ca xiiñiluʼ la?
5 Xcaadxi ni zeeda lu revista ca. Laaca reeda ndiʼ luni «Cani ruundaʼ revista riʼ racaláʼdxicaʼ gánnacaʼ», laani rusiéneni ni zándaca guinabadiidxaʼ tuuxa binni ni cadi naca Testigu. Zanda iquiiñenu ni ora gucheechenu diidxaʼ. Ra na «Carta stiʼ...» caníʼ ni rizaaca ca misioneru ne xcaadxi ni rucheeche diidxaʼ ra riniʼcaʼ xi guiráʼ guendanagana ridxaagalucaʼ ora maʼ cayúnicaʼ dxiiñaʼ ca. Cani rizaacacabe ca ruluíʼcani binni ni riuulaʼdxiʼ guiziidiʼ careeche ca diidxaʼ nacubi ne galán stiʼ Reinu lu guidubi naca Guidxilayú, ne laani nga señal ni cusihuinni maʼ nuu Cristu lade binni (Mat. 24:3, 14).
6 Ndaa ra na «Bidxiña Dios» ca, racaneni binni ni dxandíʼ racalaʼdxiʼ guiziidiʼ jma de Jiobá, ne rireeni biaʼ ra zidúʼndanu Biblia lu Scuela stiʼ Cani Rucheeche Diidxaʼ. Tema ni láʼ «Ejemplu stiʼ cani gupa fe», nuuni para gacaneni binni guxuiʼlú ximodo bizaaca ca historia stiʼ Biblia, guiníʼ ique xi gudixhe íquecabe gúnicabe, ca guendanagana gúpacabe ne de fe stícabe, ne zacá casi ora ñuuyapécabe cani.
7 Nabé galán guicaanu revista Torre stiʼ ni rapa ni iquiiñenu para gucheechenu diidxaʼ. Nga runi, quixhe íquenu guiduʼndaʼ chaahuinu revista ca ne iquiiñenu ni jma jneza ora maʼ zigucheechenu diidxaʼ.