Ca tema ni zanda iquiiñenu para gucheechenu diidxaʼ jma jneza
1. Xi para riree tema ni láʼ: «Ra caniʼné ti testigu stiʼ Jiobá tuuxa».
1 Lu revista Torre stiʼ ni rapa ni rusaananenu binni, gatigá reeda ti tema ni láʼ: «Ra caniʼné ti testigu stiʼ Jiobá tuuxa». Xiñee riree tema riʼ. Nuu chupa razón. Primé la? para gacaneni binni chuulaʼdxiʼ ganna xi rusiidiʼ Biblia, ne guiropa la? para gacaneni laanu gánnanu ximodo jma galán gusiénenu xiixa tema (1 Ped. 3:15). Guidúʼyanu xi zanda gúninu para iquiiñenu ca tema riʼ jma jneza.
2. Ximodo zanda iquiiñenu ca tema ni reeda lu revista Torre stiʼ ni rapa ora maʼ zigucheechenu diidxaʼ.
2 Riquiiñeni para gucheechenu diidxaʼ. Galán pa guindisaʼ chaahuinu chupa chonna de ca revista Torre stiʼ ni rapa ra reeda ca tema riʼ. Xiñee yaʼ. Purtiʼ pa guinabadiidxaʼ tuuxa laanu xiixa o pa gabi laanu xiñee qué runi crenu xiixa ni runi cré la? zanda iquiiñenu ca tema riʼ para guicábinu laabe pa maʼ bireeni lu revista riʼ; zanda gúninu zacá ora maʼ zigucheechenu diidxaʼ, ora guidxaaganu ti binni ni riuulaʼdxiʼ guiziidiʼ ne ora maʼ cayúʼndanenu tobi de ca binni ni rusíʼdinu de Biblia. Zanda gusaananenu laabe revista riʼ, ne pa guziguéndabe la? zanda gúʼndanenu ni laabe. Pa qué gapuʼ tobi de ca revista ra zeeda tema riʼ la? zanda guindetuʼ ni lu jw.org.
3. Ximodo zanda gúʼndanenu binni tobi de ca tema ni reeda lu revista Torre stiʼ ni rapa.
3 Ximodo zanda gúʼndanenu binni tobi de ca tema riʼ. Nuu de cani rucheeche diidxaʼ ruundacaʼ ra riníʼ Testigu ca ne rinábacaʼ binni guʼndaʼ ra riníʼ sti binni ni cuzeeteʼ tema riʼ. Pa gúninu zacá, jma nagueenda zacanenu binni guiene cani runi crenu, ne jma zaná binni güínenu laa diidxaʼ (Deut. 32:2).
4. Xi zanda guizíʼdinu de ca tema ni reeda lu Torre stiʼ ni rapa.
4 Rusiidini laanu ne zanda iquiiñenu ni para gusíʼdinu. Ora guidúʼndanu ca tema riʼ, laaca galán guidúʼndanu ca textu, ca ejemplu ne ca razón ni caquiiñeʼ Testigu ni riníʼ luni ne guiénenu modo cayuíʼcabe diidxaʼ. Galán gúninu stipa pur chinándanu ejemplu riʼ ora chigucheechenu diidxaʼ (Prov. 1:5; 9:9). Guidúʼyanu xi guníʼ ti gunaa Testigu: «Ora guundaʼ ca tema riʼ, zeeda gácani casi ora ñuuyaʼ modo rucheeche ti precursor diidxaʼ, tobi ni nanna xi naquiiñeʼ guicabi cada biaje guinabadiidxacabe laa xiixa».
5. Ximodo zanda gacanenu ca binni ridúʼndanenu Biblia ti gánnacaʼ gucheechecaʼ diidxaʼ.
5 Laaca zanda iquiiñenu ca tema riʼ para gusíʼdinu ca binni ridúʼndanenu Biblia ti gánnacaʼ ximodo gucheechecaʼ diidxaʼ. Ora gúʼndanenu ni laacabe, zanda guinábanu laacabe gúʼndacabe ra riníʼ Testigu ni zeeda lu tema ca. Zacané ca ejemplu riʼ laabe ti ganda guiziidibe ximodo gusiénebe cani runi crebe né respetu sin guchiichibe binni (Col. 4:6). Cadi dxandíʼ riquiiñeʼ Jiobá ca tema riʼ para gusiidiʼ laanu ximodo nga jma jneza gucheechenu diidxaʼ la? (2 Tim. 4:5.)