Gusíʼdinu modo ganda guiene binni laanu
1. Xi naquiiñeʼ gúninu para ganda gusíʼdinu jneza.
1 Para ganda gusíʼdinu jneza naquiiñeʼ guyúbinu modo guiene binni laanu. Jesús, Maestru Ni Jma Nanna Gusiidiʼ que, biyubi modo guiene binni laa. Nga runi, pa racaláʼdxinu gusíʼdinu jneza la? naquiiñeʼ chinándanu ejemplu stibe (2 Tim. 4:2; Juan 13:13).
2. Xi caquiiñeʼ gúninu para guiene binni ni caninu, ne xi ribeendunu.
2 Iquiiñenu diidxaʼ ni riene binni. Caadxi de ca cosa ni jma caquiiñeʼ guni binni lu xquendanabani zeedacani lu libana ni bidii Jesús lu dani que, ne cadi nagana modo bisiidibe cani (Mat., cap. 5-7). Ca binni ni bicaadiaga laabe que «nabé bidxagayaa ca [...] modo bisiidi be», dede ca soldadu ni zinaazecaʼ laabe que guniʼcaʼ sicaríʼ: «Qué huayuu dxi chuʼ tuuxa iníʼ casi riníʼ hombre que» (Mat. 7:28, 29; Juan 7:46). Nga rusiidiʼ laanu cadi caquiiñeʼ diʼ guininu diidxaʼ ni qué riene binni o xiixa ejemplu ni huaxiéʼ runibiáʼcabe para si gusihuínninu dxandíʼ ni caninu. Zanda gusiénenu ni cá lu Biblia ne diidxaʼ ni maca runibiáʼ binni.
3. Xiñee nuu tiru ribeenu gana binni de gucaadiaga laanu, ne xi jma jneza gúninu.
3 Pabiáʼ naquiiñeʼ gusíʼdinu binni. Jesús guníʼ ique tu guiráʼ cucaadiaga laa para ganna xi guiráʼ zanda gusiidiʼ laacabe (Juan 16:12). Ndiʼ rusiidiʼ laanu caquiiñeʼ guidúʼyanu ximodo nuu binni ne xi zanda gábinu laacabe, jmaruʼ si pa caninenu binnilídxinu, tuuxa ni riuulaʼdxiʼ guiziidiʼ o ti baʼduhuiiniʼ. Cadi galán diʼ gusíʼdinu laacabe stale cosa, neca ruluíʼ guizáʼ riuuláʼdxicabe ni caninu. Pa ti binni riuulaʼdxiʼ ganna jma la? neca qué gábinu laa stale cosa qué zusaana de guiziidiʼ de Jiobá, Dios ni dxandíʼ (Juan 17:3; 1 Cor. 3:6).
4. Xiñee galán guininu ni caquiiñeʼ si ganna binni ne cadi guzéʼtenu xcaadxi cosa.
4 Guininu ni jma naquiiñeʼ gánnacabe. Ora bisiidiʼ Jesús binni guniʼbe ni caquiiñeʼ si gánnacaʼ para cadi guiaandaʼ laacaʼ xii ngue cusiidibe. Casi dxi guniʼbe zaree «irá cani nuu ndaani baʼ» la? bidiibe cuenta cadi óraque diʼ nga caquiiñeʼ gusiénebe paraapeʼ chiguibani ca binni que ora guiásacaʼ (Juan 5:28, 29). Ngaca nga ni gúninu ora maʼ cayúʼndanenu binni Biblia, galán guininu cani jma naquiiñeʼ gánnacabe ne cadi guzéʼtenu stale cosa ni cadi zeeda lu libru ni cadúʼndanenu laacabe.
5. Xi zabeendunu pa guyúbinu modo guiene binni laanu.
5 ¡Guizáʼ riéchenu purtiʼ cadi nagana modo bisiidiʼ Jiobá laanu ni caquiiñeʼ gánnanu! (Mat. 11:25.) Yanna maʼ laanu nga chigúninu zacá, ne dxandipeʼ zabeendunu ni galán ne zusiécheni laanu.