Chonna modo para gusíʼdinu binni jma jneza
1. Xiñee naquiiñeʼ gúninu stipa pur gusíʼdinu binni jma jneza.
1 Guiráʼ cani rucheeche diidxaʼ rusiidicaʼ binni. Pa gucheechenu diidxaʼ, guibiguetaʼ chigánnanu tuuxa o gúʼndanenu binni Biblia, naquiiñeʼ quixhe íquenu gusiidiʼ chaahuinu xiixa ni gacané laa. Ora gusiénenu binni ni «cá lu Xquiʼchi Dios», racanenu laacaʼ gánnacaʼ ximodo guilacaʼ (2 Tim. 3:15). ¡Nabé risaca dxiiñaʼ ni rúninu ca! Ñee cadi dxandíʼ risaca nga gúninu stipa pur gusíʼdinu binni jma jneza la? Guidúʼyanu chonna modo zanda gúninu ni.
2. Ximodo zanda gusíʼdinu binni sin iquiiñenu diidxaʼ nagana.
2 Gusíʼdinu modo ganda guiene binni laanu. Zándaca ora caninenu binni de xiixa tema ni maca nánnanu, guiaandaʼ laanu nacubi cayunadiágabe ni ne gaca nagana para laabe guiénebe ni. Nga runi, ora guidúʼndanenu binni Biblia cadi naquiiñeʼ guininu stale cosa dede cueenu gana laa. Ni gúninu nga gábinu laabe cani jma caquiiñeʼ gánnabe ne cadi guiníʼ íquenu jma zaziidibe pa guininu stale cosa (Pro. 10:19). Laaca cadi naquiiñeʼ guyúbinu guiráʼ ca textu ni zeeda lu ni cayuundanenu laabe, sínuque gúʼndanenu laabe ca textu si ni naquiiñeʼ. Ne guiduʼndanésinu laabe ca textu ca zanda guzéʼtenu ni cusiénecani de tema ni caninu ca. Cadi guiaandaʼ laanu bisiidiʼ Jesús stale tema nagana dxi bidiibe libana lu dani que (Mat., cap. 5-7). Laabe qué niquiiñebe diidxaʼ nagana para nusiénebe binni ne qué niniʼbe stale diidxaʼ.
3. Xiñee nabé risaca iquiiñenu ejemplu para gusíʼdinu binni, ne gunáʼ nga ni jma galán iquiiñenu.
3 Iquiiñenu ejemplu para gusíʼdinu. Ca ejemplu ca racanécani binni guiníʼ ique, guni sentir ne guietenalaʼdxiʼ. Cadi naquiiñeʼ gánnapeʼ binni modo guiníʼ historia para iquiiñeʼ ejemplu ni zanda gacané tuuxa. Jesús qué niquiiñeʼ diidxaʼ nagana para nusiene binni ne qué niquiiñeʼ stale diidxaʼ (Mat. 7:3-5; 18:2-4). Sti cosa ni zanda gacané laanu nga gúninu dibuju ni zanda gacané laacabe guiénecabe ni cusíʼdinu laacabe. Pa guidúʼndanu dede ante ni chigusíʼdinu binni, jma zánnanu ximodo gusiénenu.
4. Xiñee galán gánnanu modo guinabadiidxanu.
4 Gánnanu modo guinabadiidxanu. Ora gánnanu guinabadiidxanu cani rúʼndanenu racanenu laacaʼ guiníʼ ique chaahuicaʼ. Nga runi, ora guinabadiidxanu xiixa galán cuézanu guicábibe. Pa qué gudiʼnu lugar guiníʼ ique binni para guicabi la? qué zánnanu xi biénebe. Ne pa cadi jneza modo bicábibe, cadi galán gábinu laabe cadi jneza ni guniʼbe; zándaca jma galán guyúbinu xcaadxi guendarinabadiidxaʼ ni gacané laabe guicábibe jneza (Mat. 17:24-27). Peru naquiiñeʼ gánnanu guirutiʼ nga zanda gusiidiʼ casi bisiidiʼ Jesús. Nga runi, Biblia cayabi laanu gusíʼdinu jneza purtiʼ zacaneni laanu ne zacaneni cani gucaadiaga laanu (1 Tim. 4:16).