Ñee ruuyaluʼ ni jneza si la?
1. Ximodo rusihuínninu rúʼyanu «ni jneza» si.
1 Laanu rúninu stale de ca cosa ni ridúʼyanu, nga runi jneza nga ca diidxaʼ guníʼ Jesús riʼ: «Pa ruyubi tu guʼya tu ni jneza la? ziaani xquenda biaani tu» (Mat. 6:22). Pa guyúbinu gúʼyanu «ni jneza» la? zacá íquenu ti cosa si: gúninu ni na Dios. Ne rihuinni zacá ni ora rúninu xhiiñaʼ Reinu primeca lu xquendanabáninu ne cadi guicá íquenu gápanu cosa ni risaca o gúninu xcaadxi cosa ni cuee tiempu ni riquiiñenu para gucheechenu diidxaʼ.
2. Xi zándaca guiníʼ íquenu nuu tiru, ne xi zanda gacané laanu.
2 Ñee ruuyaʼ ni jneza si la? Zándaca guiníʼ íquenu caquiiñeruʼ gápanu xcaadxi cosa pur guiráʼ ni ridúʼyanu rutoo binni o pur ni ridúʼyanu napa xcaadxi binni. Nga runi, ti binni nuu xpiaaniʼ la? ruuyaʼ primeru pa zanda guni o siʼ xiixa cosa, ante guniti tiempu, bueltu o stipa stiʼ luguiáʼ cani. Ne ante gúnibe cani riníʼ íquebe pa zacaneni laabe gúnibe jma lu xhiiñaʼ Dios o pa zucueeza cani laabe (Luc. 14:28; Fili. 1:9-11). Laaca galán guidúʼyanu xiruʼ zanda gúninu para gápanu ca cosa si ni jma caquiiñenu ti ganda gucheechenu diidxaʼ jma (2 Cor. 13:5; Efe. 5:10).
3. Xi rizíʼdinu de ni biʼniʼ ti gunaa xpinni Cristu ora biziidiʼ guibaniné ni caquiiñeʼ si.
3 Guzéʼtenu de ti gunaa xpinni Cristu ni guca precursora regular. Laabe gudixhe íquebe cadi gusaanabe dxiiñaʼ ni rúnibe guidubi dxi neca laaca ñanda ñápabe guiráʼ ni caquiiñebe pa ñúnibe dxiiñaʼ galaa si dxi. Despué guníʼ íquebe jneza ne guniʼbe sicaríʼ: «Guirutiʼ qué zanda gapa chupa xpixuaanaʼ. Gupa xidé bisaanaʼ stale de ca cosa ni riuuladxeʼ guneʼ ne bicaa iqueʼ gapaʼ cani jma caquiiñesiáʼ. Bidieeʼ cuenta laaca rirá guiráʼ cosa ni rapa binni ne cunitesiáʼ stale stipa stinneʼ luguiáʼ cani». Pur modo nabánibe que biiyabe zanda guibánibe ne ni caquiiñesibe. Xi bíʼnibe yaʼ. Biyúbibe sti dxiiñaʼ ne zaqué gunda gúcarube precursora regular.
4. Xiñee yanna nga jma caquiiñeʼ guuyadxinu ni jneza si.
4 Riquiiñeʼ guuyadxinu ni jneza si purtiʼ mayaca guinitilú ca cosa malu nuu yanna. Cada dxi tiidiʼ jma zidxíñanu tiempu guinitilú guidxilayú malu riʼ ne guzulú guidxilayú cubi stiʼ Dios (1 Cor. 7:29, 31). Pa guidúʼyanu xi zanda gúninu para gucheechenu diidxaʼ jma la? zalanu ne laaca zalá cani gucaadiaga laanu (1 Tim. 4:16).