Ti modo racanécabe cani rucheeche diidxaʼ
1. Xi bizulú cayaca lu iza 1938, ne xiñee gudíxhecabe gácani.
1 Lu iza 1938 gudixhe xquidxi Jiobá gaca guendaridagulisaa de zona —yanna riʼ lani guendaridagulisaa de chupa gubidxa—, ne guca invitar caadxi neza binni ridagulisaa para checaʼ ora gácani. Xi para gudíxhecabe gácani yaʼ. Informador (yanna riʼ lani Xhiiñaʼ Reinu ni Rúninu) stiʼ enero 1939 (diidxaʼ inglés) bisiéneni sicaríʼ: «Ca guendaridagulisaa riʼ nga tobi de ca cosa ni riquiiñeʼ xquidxi Jiobá para gusiidiʼ laanu ximodo gúninu xhiiñaʼ Reinu. Guiráʼ cani rusiidicabe laanu racá biáʼsipeʼ laani nga ni caquiiñeʼ cada tobi de cani rucheeche diidxaʼ para guni xhiiñaʼ jneza». Lu iza 1938 que guyuu 58,000 si ni rucheeche diidxaʼ, peru lu 2009 maʼ nuu jma de gadxe millón. Ora ridúʼyanu pabiáʼ maʼ bidale cani rucheeche stiidxaʼ Reinu la? rihuínnica dxandíʼ cayacané ca guendaridagulisaa riʼ cada tobi de cani rucheeche diidxaʼ para «guni xhiiñaʼ jneza».
2. Xi guiráʼ chiguieeteʼ lu guendaridagulisaa de chupa gubidxa ni chigaca sti iza dxiiñaʼ guiuʼnu ca.
2 Tema stiʼ sti iza ca. Né stale guendanayecheʼ nga cabézanu ganda dxi guzulú ca guendaridagulisaa de chupa gubidxa ca, ne nánnanu zaguuni gana cada tobi de laanu casi xpinni Cristu ni rucheeche diidxaʼ. Biree tema stini lu Juan 15:19: «Cadi de guidxilayú riʼ laatu» (NM). Xi chiguieeteʼ lu ca libana ca yaʼ. Cani tiidiʼ sábadu ca zusiidicani laanu xiñee ora rúninu jma lu xhiiñaʼ Dios reeda gácani casi xiixa ni zanda gapa laanu. Laaca zadiʼdiʼ ti libana de chonna ndaa ni zusiene xiñee cadi naquiiñeʼ chinándanu «mani ngola», «gunaa dxabaʼ» ne «cani rutoo», pacaa zucaacabe laanu gucheʼnu. Domingu ca zadiʼdiʼ xcaadxi libana ni zucaa laanu gannaxhiinu Jiobá, ne cadi gannaxhiinu guidxilayú. Xcaadxi tema ni tiidiʼ dxi ca zusiénecaʼ ximodo zanda gápanu laanu para cadi guiaandaʼ laanu nuunu ndaaniʼ guidxilayú riʼ casi ñaca ñuʼnuʼ xquidxi binni ne naquiiñeʼ gácanu nadxibalú para quixhedxinu guidxilayú.
3. Xi zabeendunu pa chuunu guendaridagulisaa de chupa gubidxa.
3 Guzéʼtenu de ti gunaa xpinni Cristu ni guyé ti guendaridagulisaa de chupa gubidxa cadi tan xadxipeʼ. Laabe maʼ huaxiéʼ rucheechebe diidxaʼ, peru ni binadiágabe raqué bicaani laabe guiníʼ íquebe ximodo nuube ne gudixhe íquebe «gucheechebe diidxaʼ ne cadi guyúbibe pretextu para cadi gúnibe ni». Zacá nga laani, guiráʼ ni chitiidiʼ lu guendaridagulisaa de chupa gubidxa ni chigaca sti iza dxiiñaʼ guiuʼnu ca, zacanécani guiranu gannaxhiinu Jiobá ne cadi gannaxhiinu guidxilayú (1 Juan 2:15-17). Gudixhe ique cheluʼ ne gucaadiaga chaahuiluʼ ti cueenduluʼ stale cosa de ni rudii xquidxi Dios ca xpinni Cristu ni rucheeche stiidxaʼ Reinu.