Guiduʼyaʼ chaahuinu ni cuʼnu ndaaniʼ íquenu
1. Xi láʼ guendaridagulisaa de chupa gubidxa ni chigaca lu iza dxiiñaʼ 2013, ne xi zucaani laanu gúninu.
1 Jesús bisiidiʼ ca discípulo stiʼ gannaxhiicaʼ Jiobá de guidubi ladxidoʼcaʼ, guidubi xhiálmacaʼ ne guidubi xquendabiaanicaʼ (Mat. 22:37, 38). Ca guendaridagulisaa roʼ ni chigaca iza riʼ guta chaahuiʼ cani para gacanécani laanu gácanu nadipaʼ ora guidxaagalunu guendanagana. Casi maca bieeteʼ que, guendaridagulisaa de chonna gubidxa ca lani «Gápanu ladxidoʼno». Guendaridagulisaa de ti dxi ni chigaca lu iza dxiiñaʼ 2013 lani «Gápanu xquendabiaaninu», ne guendaridagulisaa de chupa gubidxa ca láʼ «Guiduʼyaʼ chaahuinu ni cuʼnu ndaaniʼ íquenu», tema ca bireeni lu Mateo 22:37 ne zuzulú gácani sti beeu ca. Cani chiguieeteʼ lu guendaridagulisaa de chupa gubidxa ca zucaacani laanu gápanu ndaaniʼ íquenu cani chuulaʼdxiʼ si Jiobá.
2. Gunáʼ nga ca guendarinabadiidxaʼ ni zacábicabe lu guendaridagulisaa riʼ.
2 Xi chiguieeteʼ luni. Guiluxe si guendaridagulisaa de chupa gubidxa, ziuuláʼdxinu guietenaláʼdxinu cani jma risaca bieeteʼ luni. Nga runi, galán gucaʼnu ora guicábicabe ca guendarinabadiidxaʼ zeeda raríʼ:
• Xi zanda gúninu para cadi guicá modo riníʼ ique binni guidxilayú laanu.
• Xi zanda gúninu para gacanenu ca binni ni nacahui nuu xquendabiaaniʼ.
• Ximodo naquiiñeʼ guiníʼ íquenu.
• Xi zabeendunu ora guiníʼ íquenu jneza.
• Ximodo zanda gudiʼnu lugar guchaa Jiobá modo riníʼ íquenu.
• Xi zanda guni cani maʼ bichaganáʼ, cani napa xiiñiʼ ne xiiñicabe para guibánicabe nayecheʼ.
• Xi naquiiñeʼ gúninu para chuʼnu listu ora guedandá dxi stiʼ Jiobá.
• Xi zacané laanu ti jma quixhe íquenu gucheechenu diidxaʼ né stale gana.
• Xi zabeendú ca binni ni chinanda ni guiziidicaʼ.
3. Xiñee risaca nga chuunu guendaridagulisaa de chupa gubidxa ca, gucaadiáganu ne chinándanu ca conseju ni gudiicabe laanu yaʼ.
3 Binidxabaʼ racalaʼdxiʼ guiníʼ íquenu ni cadi jneza, ne pur nga cayuni intiica cosa (2 Cor. 11:3). Nga runi, naquiiñeʼ guiduʼyaʼ chaahuinu ni cuʼnu ndaaniʼ íquenu, gucueezanu laanu para cadi guiníʼ íquenu ni cadi jneza, guiníʼ íquenu casi riníʼ ique Cristu ne gucáʼnanu guiráʼ cosa ni nuu lu guidxilayú malu riʼ (1 Cor. 2:16). Gúninu stipa pur chuunu guiropaʼ gubidxa chigaca guendaridagulisaa ca ne gucaadiaga chaahuinu. Pa chinándanu ca conseju ni gudiicabe laanu racá zacanécani laanu jma quixhe íquenu gucheechenu diidxaʼ né stale gana (1 Ped. 1:13).