Rudiibe ni laanu órapeʼ caquiiñenu ni
1. Ximodo gucané últimu guendaridagulisaa de ti dxi lii. Ximodo gucaneni xcaadxi.
1 Stale biaje, despué de guiluxe ti guendaridagulisaa de ti dxi rininu: «¡Biáʼsipeʼ laani nga ni caquiiñenu!». Guidúʼyanu xi guníʼ ti binnigola ni riganna ca binni ridagulisaa de ni bizeeteʼ caadxi xpinni Cristu despué de biluxe tobi de ca guendaridagulisaa ca. Bizeetebe caníʼ ca binni que gucaneni laacaʼ quixhe íquecaʼ gucheechecaʼ diidxaʼ jma. Sti binnigola ni riganna ca binni ridagulisaa guníʼ: «Gucaneni laadu gudiʼdu cuenta xi tiempu ndiʼ nabánidu ne bicaani laadu guiníʼ íquedu pa jneza ngue cani maʼ gudixhe íquedu gúnidu». Ne sicaríʼ guníʼ stobi: «Stale de ca xpinni Cristu bizeetecaʼ bicaa guendaridagulisaa que laacaʼ gúnicaʼ dxiiñaʼ ni jma risaca, laani nga: gucheechecaʼ diidxaʼ». Yanna, ximodo gucané últimu guendaridagulisaa de ti dxi lii.
2. Xi zazíʼdinu lu caadxi de ca libana ni chitiidiʼ lu guendaridagulisaa ni chigápanu sti iza ca.
2 Guendaridagulisaa de ti dxi ni chigápanu iza dxiiñaʼ guiuʼnu ca, laaca zeeda gácani casi guendaró ni cudiicabe laanu órapeʼ caquiiñenu ni. Biree tema stini lu Salmo 118:8, 9. Caadxi de ca libana ca zusiidicani laanu ximodo rudii Jiobá stipa laanu ora cadídinu ra nagana, ximodo gacanenu xcaadxi gudiicaʼ lugar gapa Jiobá laacaʼ, casi ñaca niguube laacaʼ xaʼnaʼ xhiaabe. Laaca zazíʼdinu ximodo chinándanu ejemplu stiʼ Jiobá ne guʼyaʼ xcaadxi laanu casi tuuxa ni zanda gapa laacaʼ. Ne zadúʼyanu ximodo zanda gusihuinni cani nahuiiniʼ runi crecaʼ Jiobá de guidubi ladxidoʼcaʼ ne xiñee zanda gapa xquidxi Jiobá laanu, ni zeeda gaca casi ti paraísu.
3. Xi zanda gúninu para cueendunu stale cosa lu guendaridagulisaa de ti dxi ca.
3 Para cueendunu ni galán. Cásipeʼ guzeetecabe padxí chigácani, gudíxheca xi caquiiñeʼ guʼnuʼ para ganda cheluʼ ne biʼniʼ invitar ca binni ruundaneluʼ Biblia. Bietenalaʼdxiʼ, cani qué riaandaʼ laa ni rucaadiaga la? «qué riuu dxi ixele caʼ ne zacá riree ndu ni» rúnicaʼ (Luc. 8:15). Nga runi, bicaadiaga chaahuiʼ guiráʼ ni chitiidiʼ racá, ne bicaa xiixa de cani jma risaca guieeteʼ lu cada libana. Laaca zanda gucaaluʼ ca conseju ni rábiluʼ zanda iquiiñeluʼ lu xquendanabániluʼ ne ora maʼ chigucheecheluʼ diidxaʼ. Guiluxe si guendaridagulisaa ca, lacuee tiempu para guiníʼnetu familia stitu de ni bieeteʼ raqué ne laquixhe ximodo zanda guni cada tobi de ca binnilídxitu ni biziiditu.
4. Xiñee né stale guendanayecheʼ nga cabézanu ganda dxi gaca guendaridagulisaa de ti dxi ca.
4 Guiráʼ ni chitiidiʼ lu guendaridagulisaa de ti dxi ni chigaca iza riʼ, gúcani né stale guendarannaxhii ne guleecabe tiempu para bíʼnicabe ni, cásica raca ti guendaró nanixe ni zanda gacané binni chuʼ nazaaca. Jiobá cuʼ ndaayaʼ ca stipa gúniluʼ para cheluʼ ne cueenduluʼ stale cosa galán de guiráʼ ni chigusiidicabe laanu. Cani guizíʼdinu lu guendaridagulisaa ca zeeda gaca cani casi ti guendaró ni cudiicabe laanu órapeʼ caquiiñenu, ne zacaneni cada tobi de laanu casi xpinni Cristu para gaca fe stinu jma naguidxi (Mat. 24:45).