Ni chitiidiʼ lu dxi bibí para guidagulisaanu

Ca primé xpinni Cristu ni gucuaacaʼ espíritu santu, pur stipa ni bidii ni laacabe biquiiñecabe xpuéltucabe para yegucheechecabe diidxaʼ dede biaʼ ra gunda yendácabe (Hech. 1:8; Col. 1:23). Ni chitiidiʼ lu guendaridagulisaa de ti dxi stiʼ iza 2007 ni laʼ: «Cadi gusaananu de guininu Stiidxaʼ Dios», zacaneni laanu chinándanu ejemplu stiʼ ca primé xpinni Cristu (Hech. 18:5).

Sicaríʼ guníʼ rey David de Stiidxaʼ Dios: «Ni rusietenalaʼdxiʼ Jiobá qué rucheediʼni, ne riguuni xpiaaniʼ binni ni qué ganna» (Sal. 19:7). Maʼ gudixhe chaahuicabe ne stale cuidadu guiráʼ ni chitiidiʼ lu guendaridagulisaa de ti dxi stiʼ iza 2007, ne ni jma chiguieeteʼ luni nga, ximodo zanda iquiiñenu Stiidxaʼ Dios para guidúʼyanu «paraa cuchéʼ nu», ne zucaani laanu gusíʼdinu binni ne gucheechenu diidxaʼ nagueendaca (2 Tim. 3:16, 17). Ni chitiidiʼ lu guendaridagulisaa riʼ zuluíʼ ni laanu ximodo cadi guiábanu lu ca guendanagana ni ridxagalunu ne cueendunu ni galán ra chinándanu ca conseju stiʼ Biblia lu xquendanabáninu. Ne laaca zazíʼdinu ximodo iquiiñenu Stiidxaʼ Dios ca para gacanenu cani nahuiiniʼ ne cani nacubi cayuu ndaaniʼ xquidxi Jiobá para ganda guiniisicaʼ jma lu Stiidxabe.

Biʼniʼ stipa pur chuʼluʼ dede ora guzulú guendaridagulisaa ca ne bicaadiaga guiráʼ ni chiguieeteʼ luni. Bicaa guiráʼ ni zacané lii lu xquendanabániluʼ. Bisihuinni riuuláʼdxiluʼ guiráʼ ni cusiidicabe ne cani cusietenaláʼdxicabe laanu ca, ne guníʼ ique ximodo zanda guʼnuʼ cani biziidiluʼ ca.

Ni chitiidiʼ lu guendaridagulisaa de ti dxi riʼ zacaneni laanu gusisácanu Stiidxaʼ Dios ca jma, ne laaca zusietenaláʼdxini laanu pabiáʼ nga naquiiñeʼ gucheechenu ca diidxaʼ nacubi ne galán stiʼ Reinu ca sin guiaanadxinu, ne ximodo zanda gacanenu xcaadxi binni guni zacaca. Nga runi, naquiiñeʼ gúninu stipa pur gucaadiáganu guiráʼ ni chigusiidiʼ Jiobá laanu lu guendaridagulisaa riʼ (Isa. 30:20b, 21).